Aykꞌay konhobꞌ Jerusalén
39
Haꞌ yinh 10 (islahonhebꞌ) ixahaw yet isbꞌalonhebꞌxa habꞌil yok yaꞌ Sedequías isreyalo Judá, yapni naj Nabucodonosor, isreyal Babilonia, yebꞌ sunil issoldado yanoko howal yinh konhobꞌ Jerusalén, ishoynayo ebꞌnaj. 2 Haxa yinh isbꞌalonhebꞌ tzꞌayik yinh iskanh ixahaw yet 11 (hunlanhebꞌxa) habꞌil yok yaꞌ Sedequías isreyalo Judá, isholni ebꞌnaj iskꞌul iskꞌubꞌal konhobꞌ Jerusalén. 3 Yokto sunil ebꞌnaj yahaw issoldado naj rey Babilonia yul konhobꞌ Jerusalén, iswatxꞌen ebꞌnaj iscampamento bꞌey istiꞌ pulta kaw ay yelapno ayko yiktabꞌal konhobꞌ. Ebꞌnaj yahaw tuꞌ, haꞌ ton ebꞌnaj tiꞌ: Naj Nergal-sarezer, naj Samgar-nebo, naj Sarsequim chihal-lax Rabsaris yinh yabꞌxubꞌal Babilonia, yebꞌ naj Nergal-sarezer chihal-lax Rabmag yinh yabꞌxubꞌal Babilonia tuꞌ, yebꞌ sunil hunteqꞌanxa ebꞌnaj yahawil issoldado naj rey Babilonia. 4 Hayet yilni yaꞌ Sedequías isreyal Judá yebꞌ sunil issoldado ta xaꞌokto ebꞌnaj ah Babilonia yul konhobꞌ, yelkanh ebꞌnaj yet aqꞌbꞌalil, isto yul bꞌeh chito bꞌey huneꞌ peyabꞌ bꞌay ay istzꞌunubꞌ yaꞌ rey, yelto ebꞌnaj yul pulta ayko yiktabꞌal kabꞌebꞌ kꞌubꞌ, hak tuꞌ yu isto yaꞌ rey Sedequías yul isbꞌehal txꞌotxꞌ Arabá. 5 Yajaꞌ ok tzujno ebꞌnaj soldado caldeo tuꞌ yinta ebꞌnaj, istzujchayo yaꞌ rey Sedequías tuꞌ yu ebꞌnaj bꞌey yakꞌalil Jericó, istzabꞌnayo ebꞌnaj yaꞌ, yinito ebꞌnaj yaꞌ tet naj rey Nabucodonosor bꞌey konhobꞌ Ribla yul ismajul txꞌotxꞌ Hamat, yuto haꞌ tuꞌ ay naj rey Nabucodonosor; haꞌ bꞌey tuꞌ xin yal naj tzet chitanhkano yaꞌ rey Sedequías. 6 Wal ebꞌnaj iskꞌahol yaꞌ rey Sedequías tuꞌ, hojlaxkamo ebꞌnaj yu naj rey Nabucodonosor sata yaꞌ rey Sedequías bꞌey konhobꞌ Ribla; ishojnipaxokamo naj sunil ebꞌnaj nime winaj ah Judá. 7 Lahwi tuꞌ ischejni naj rey Nabucodonosor yilaxilti isbꞌaqꞌ sat yaꞌ rey Sedequías iskꞌal-laxayo yaꞌ yu cadena, yilaxto yaꞌ bꞌey Babilonia. 8 Isnhusnito ebꞌnaj caldeo tuꞌ ispalacio yaꞌ rey Sedequías yebꞌ ej teꞌ nha ay yul konhobꞌ Jerusalén, yuchkꞌanayo ebꞌnaj iskꞌubꞌal Jerusalén. 9 Wal yaqꞌbꞌilxa anma kantokano konhobꞌ Jerusalén, yebꞌ makta yako isbꞌa yetbꞌiho ebꞌnaj caldeo ilaxto preso bꞌey Babilonia yu naj Nabuzaradán, yahawil yinh ebꞌnaj chitanhen naj rey Nabucodonosor. 10 Wal anma mebꞌaꞌ kaw matzet ay yul konhobꞌ Jerusalén kankano sat txꞌotxꞌ Judá yu naj Nabuzaradán, yaqꞌni naj tzꞌunubꞌ bꞌay ay teꞌ uva tet, yaqꞌnipaxo naj istxꞌotxꞌ.
Istaqꞌe naj rey Nabucodonosor isyaꞌilnhelax yaꞌ Jeremías
11 Wal naj Nabucodonosor isreyal Babilonia yaqꞌ naj chejbꞌanile tet naj Nabuzaradán, yahawil yinh ebꞌnaj chitanheni ta kaw chiꞌil-lax yaꞌ Jeremías, yalni naj: 12 «Ito yaꞌ Jeremías, kaw kam chayaꞌilnhe yaꞌ, mach hunu istxꞌojal tiꞌ chawatxꞌe yinh yaꞌ, wal xin haꞌ tzet chal yaꞌ, haꞌ chawatxꞌe yinh yaꞌ,» xhi naj rey Nabucodonosor. 13 Yuxin haꞌ naj Nabuzaradán, yahawil yinh ebꞌnaj chitanhen naj rey, yebꞌ naj Nabusazbán, yahawil yinh ebꞌnaj eunuco, yebꞌ naj Nergal-sarezer, naj niman yelapno ismunil yinta naj rey Babilonia, yebꞌ sunil hunteqꞌanxa ebꞌnaj yahawil chimunla yinta naj rey tuꞌ. 14 Haꞌ ebꞌnaj tuꞌ xin chejlaxto iqꞌwal yinh yaꞌ Jeremías yamaqꞌil teꞌ preso, yalaxiko yaꞌ tet naj Gedalías, iskꞌahol naj Ahicam, haxa naj Ahicam iskꞌahol naj Safán. Hak tuꞌ yu yinito naj Gedalías yaꞌ Jeremías bꞌey yatut, hak tuꞌ xin yu iskankano yaꞌ xol yet konhobꞌ.
Yalte Komam Dios ta chikolwa yinh naj Ebed-melec
15 Hayet aytoko yaꞌ Jeremías preso bꞌey yamaqꞌil teꞌ preso, tzotel Komam Jahawil tet yaꞌ, yalni Komam hakaꞌ tiꞌ: 16 «Asiꞌ iskꞌatanh naj Ebed-melec, ah Etiopía, kat hatzotel yebꞌ naj chawalni hakaꞌ tiꞌ: “Hak tiꞌ yalni Komam Yahawil kaw aykano yip, isDiosal Israel: Haꞌ tzet xawalan yinh konhobꞌ tiꞌ chiyij isbꞌa, haꞌ ton isyaꞌtajil, maxhtaj iskꞌulal chiwayojan yibꞌanh, yet chiyijni isbꞌa isyaꞌtajil xawalan, hach kaw hach chawilaꞌ. 17 Yajaꞌ hanin Yahawilintiꞌan, chiwalan tato chachinkolilojan tet ej isyaꞌtajil, mach chachalaxiko yul isqꞌabꞌ ebꞌnaj bꞌay chaxhxiwi; 18 yuto hanin Yahawilintiꞌan, yinh kaw yeli chiwalan ta chachinkolan, mach chachpotxꞌlaxkamo yu espada, wal xin chachkolchalo xol isyaꞌtajil, yuto kawxi hakꞌul winhan,” xhi Komam Jahawil,» xhi yaꞌ Jeremías tet naj Ebed-melec.