Yaꞌ Jeremías yebꞌ anma Judá kankanoj yebꞌ naj Gedalías gobernador
40
Tzotel Komam Jahawil tet yaꞌ Jeremías yet xabꞌejtzolax yaꞌ bꞌey konhobꞌ Ramá yu naj Nabuzaradán, yahawil yinh ebꞌnaj chitanhen naj rey Babilonia. Haꞌ naj Nabuzaradán tuꞌ xin ilchanti yaꞌ Jeremías, yet kꞌalan yaꞌ yu chꞌen cadena, ayko yaꞌ xol ebꞌnaj ah Jerusalén yebꞌ ebꞌnaj ah Judá lanhan yilaxto preso Babilonia. 2 Ispohnilo naj Nabuzaradán yaꞌ Jeremías xol anma, yalni naj tet yaꞌ: «Haꞌ Hawahawil, haDiosal halnikanoj ta chiyati huneꞌ isyaꞌtajil yibꞌanh konhobꞌ tiꞌ. 3 Haꞌ tinanh xin mayati huneꞌ isyaꞌtajil tiꞌ, iswatxꞌen hakaꞌtikꞌa yu yalnikanoj, yuto heyako hemul tet heYahawil, yuxin mahul huneꞌ isyaꞌtajil tiꞌ teyibꞌanh, yebꞌ xin yu mach heyabꞌe tzet yala. 4 Haꞌ tinanh chachinbꞌejtzohan, chiwinilojan chꞌen cadena yinh haqꞌabꞌ. Ta chawoche chachto wintajan bꞌey Babilonia, chisje hatohi, hankawhinan chachwilan, yajaꞌ ta mach chisje hakꞌul chachto wintajan bꞌey Babilonia tuꞌ chisje hakankano bꞌey tiꞌ, ay txꞌo txꞌotxꞌ lah, sayilo bꞌay chawoche chachkani. 5 Ta chawoche chachkani, meltzohanh iskꞌatanh naj Gedalías, iskꞌahol naj Ahicam, naj iskꞌahol naj Safán, naj yakaniko naj rey Babilonia gobernadoral yinh ej konhobꞌ ay yul ismajul txꞌotxꞌ Judá, kat hakankano iskꞌatanh naj xol anma ay yul konhobꞌ; taka mach xin kananhkano bꞌay chiyoche hakꞌul,» xhi naj tet yaꞌ Jeremías. Lahwi tuꞌ yaqꞌni naj yahawil yinh ebꞌnaj chitanhen naj rey Babilonia tzet chilolaxi yebꞌ sabꞌehal tet yaꞌ Jeremías, istaqꞌlikano naj tet yaꞌ. 6 Hak tuꞌ yu isto yaꞌ Jeremías iskꞌatanh naj Gedalías, iskꞌahol naj Ahicam bꞌey konhobꞌ Mizpa, iskankano yaꞌ iskꞌatanh naj xol anma ay yul konhobꞌ kantokano sat txꞌotxꞌ Judá.7 Hayet yabꞌen ebꞌnaj yahawil soldado ah Judá, ebꞌnaj yebꞌato isbꞌa yebꞌ issoldado xolaj telaj ta haꞌ naj Gedalías, iskꞌahol naj Ahicam alaxiko gobernadoral yu naj rey Babilonia. Haꞌ naj Gedalías tuꞌ xin ok yilomalo ebꞌnaj winaj ah Judá yebꞌ ebꞌix ix yebꞌ nixhte unin mach ilaxto preso Babilonia, 8 isto ebꞌnaj iskꞌatanh naj Gedalías bꞌey Mizpa. Haꞌ ebꞌnaj to ilno naj Gedalías, haꞌ ton ebꞌnaj tiꞌ: Naj Ismael, iskꞌahol naj Netanías, naj Johanán yebꞌ naj Jonatán ebꞌnaj iskꞌahol naj Carea, naj Seraías iskꞌahol naj Tanhumet, yebꞌ ebꞌnaj iskꞌahol naj Efai naj ah Netofa yebꞌ naj Jezanías iskꞌahol huneꞌ naj ah Maacat, tzujan xin issoldado ebꞌnaj yintaj.a 9 Yaqꞌni bꞌinaho naj Gedalías iskꞌahol naj Ahicam naj iskꞌahol naj Safán isbꞌi Komam Dios sata ebꞌnaj tuꞌ yebꞌ sata ebꞌnaj winaj tzujan yinta ebꞌnaj, yalni naj Gedalías hakaꞌ tiꞌ: «Machojabꞌ chexxiw heyijen tzet chiyal ebꞌnaj caldeo, kananhwekano sat txꞌotxꞌ Judá tiꞌ, cheyijen tzet chal naj rey Babilonia, hak tuꞌ xin kꞌul cheyila. 10 Wal hanintiꞌan chinkanan bꞌey konhobꞌ Mizpa tiꞌ yu wokan yahawo teyinh sata ebꞌnaj caldeo chihul konhilnoj. Wal hex tiꞌ xin kutxbꞌaweko vino yebꞌ teꞌ lobꞌehal chiyaqꞌ yinh waresma yebꞌ teꞌ aceite kat hekꞌubꞌankanh, kat hekankano yulaj hunteqꞌan konhobꞌ hesayilo bꞌay chexkani,» xhi naj Gedalías tet ebꞌnaj.
11 Hakpax tuꞌ ebꞌnaj judío kankano bꞌey Moab, bꞌey Amón, bꞌey Edom yebꞌ yulaj hunteqꞌanxa konhobꞌ yabꞌelo ebꞌnaj ta ayto yet konhobꞌ ebꞌnaj kankano yu naj rey Babilonia sat txꞌotxꞌ Judá, yabꞌenpaxo ebꞌnaj ta haꞌ naj Gedalías iskꞌahol naj Ahicam, naj iskꞌahol naj Safán yakaniko naj gobernadoral yinh anma Judá tuꞌ. 12 Haꞌ sunil ebꞌnaj ah Judá sajlemitoj bꞌayejtuꞌwal, meltzoti ebꞌnaj bꞌey Judá hunelxa, isto ebꞌnaj isyeno isbꞌa sata naj Gedalías bꞌey Mizpa, iskutxbꞌaniko ebꞌnaj vino yebꞌ teꞌ lobꞌehal yinh kaw niman.
Maqꞌlaxkamo naj Gedalías yu naj Ismael
13 Haꞌ naj Johanán iskꞌahol naj Carea yebꞌ sunil ebꞌnaj yahawil soldado yebꞌaꞌ isbꞌa xolaj telaj, apni ebꞌnaj yilaꞌ naj Gedalías bꞌey Mizpa. 14 Yalni ebꞌnaj tet naj: «¿Hawohtaxami ta ischej naj Baalis isreyal ebꞌnaj Amón naj Ismael iskꞌahol naj Netanías kach ispotxꞌoꞌkamoj?» xhi ebꞌnaj tet naj. Yajaꞌ mach yako naj Gedalías iskꞌahol naj Ahicam yinh iskꞌul tzet yal ebꞌnaj. 15 Yuxin tzotel naj Johanán iskꞌahol naj Carea tet naj Gedalías yinh ewantajil yalni naj tet naj: «Wal tinanh chintohan inpotxꞌoꞌkamojan naj Ismael iskꞌahol naj Netanías, machi xin hunu mak tiꞌ chiꞌabꞌeniloj. Hanhonhtiꞌanh mach chaxhkochah maqꞌlaxokamojan, yuto ta chachmaqꞌlaxkamoj sunilmi ebꞌnaj ah Judá xaꞌiskutxbꞌako isbꞌa takꞌatanh tiꞌ chisajlemitoj, kat istanhkaniloj hunteqꞌanxa anma ah Judá kantokano tiꞌ,» xhi naj. 16 Yajaꞌ taqꞌwi naj Gedalías iskꞌahol naj Ahicam tet naj Johanán iskꞌahol naj Carea, yalni naj: «Mach chawute huneꞌ tuꞌ, yuto haꞌ tzet chawal yinh naj Ismael leqꞌtiꞌal,» xhi naj.