41
Hayet ishuj ixahaw yapni naj Ismael iskꞌahol naj Netanías, yebꞌ 10 (lahonhwanh) issoldado yebꞌ hunteqꞌanxa ebꞌnaj yahawiltikꞌa Judá iskꞌatanh naj Gedalías iskꞌahol naj Ahicam bꞌey Mizpa, hun xin waꞌ ebꞌnaj yebꞌ naj Gedalías tuꞌ bꞌey Mizpa. Naj Ismael tuꞌ, ismam icham naj naj Elisama, ayto yu isbꞌa naj yebꞌ ebꞌnaj isreyal Judá. 2 Hayet lanhan iswaꞌ ebꞌnaj tuꞌ yah lemna naj Ismael, iskꞌahol naj Netanías yebꞌ issoldado tzujan yintaj, istejnikamo ebꞌnaj naj Gedalías yu espada, naj alaxkaniko gobernadoral sat txꞌotxꞌ Judá yu naj rey Babilonia. 3 Ismaqꞌnipaxokamo naj Ismael sunil ebꞌnaj ah Judá kutxaniko iskꞌatanh naj Gedalías yebꞌ ebꞌnaj soldado caldeo ayko iskꞌatanh bꞌey Mizpa.4 Haxa yet hunxa tzꞌayik xin yet xakam naj Gedalías yet maxhto chiꞌabꞌelaxilo tzet yuhi, 5 yapni 80 (iskanhwinaj) ebꞌnaj winaj ispeto bꞌey Siquem, bꞌey Silo yebꞌ bꞌey Samaria, elna xil istiꞌ ebꞌnaj, tzilbꞌilto xil isqꞌap ebꞌnaj, pulbꞌilpaxo isnimanil ebꞌnaj; iqꞌbꞌil isyebꞌalqꞌabꞌ ebꞌnaj yul isqꞌabꞌ, yebꞌ incienso, yu yaqꞌni ebꞌnaj yul Yatut Komam Dios. 6 Haꞌ bꞌey txꞌotxꞌ Mizpa elilo naj Ismael iskꞌahol naj Netanías sata ebꞌnaj, chixin oqꞌ naj. Haxa yet ischahnayo naj ebꞌnaj yalni naj tet ebꞌnaj: «¡Hex tiꞌ chexhul sata naj Gedalías, iskꞌahol naj Ahicam!» xhi naj. 7 Haxa yet lanhan yokto ebꞌnaj tuꞌ yul konhobꞌ, ispotxꞌlaxkamo ebꞌnaj yu naj Ismael iskꞌahol naj Netanías yebꞌ ebꞌnaj issoldado tzujan yintaj, isqꞌojnikanayto naj isnimanil ebꞌnaj tuꞌ yul huneꞌ kꞌuh. 8 Xol ebꞌnaj tuꞌ ay 10 (lahonhwanh) ebꞌnaj halni tet naj Ismael hakaꞌ tiꞌ: «Mach chonhhapotxꞌkamojanh, hanhonhtiꞌanh kaw ay ixim trigo yebꞌ ixim cebada, yebꞌ teꞌ aceite, yebꞌ noꞌ kabꞌ ebꞌabꞌil juhanh xolaj telaj,» xhi ebꞌnaj. Hak tuꞌ yu isbꞌejnikano naj Ismael ebꞌnaj, matxa ispotxꞌkamo naj ebꞌnaj yinta ebꞌnaj yetbꞌi tuꞌ.
9 Haꞌ huneꞌ kꞌuh bꞌay isqꞌojayto naj Ismael isnimanil ebꞌnaj winaj ismaqꞌkamo yinta naj Gedalías, haꞌ ton huneꞌ kꞌuh yaqꞌ watxꞌe yaꞌ rey Asa yet iskolni isbꞌa yaꞌ tet yaꞌ Baasa, isreyal Israel; kaw xin nohilo huneꞌ kꞌuh tuꞌ yu isnimanil ebꞌnaj ismaqꞌkamo naj Ismael, iskꞌahol naj Netanías. 10 Lahwi tuꞌ, yinito naj Ismael preso hunteqꞌanxa anma kantokano bꞌey Mizpa yebꞌ ebꞌix iskutzꞌin yaꞌ rey, haꞌ ton sunil anma alaxkaniko yul isqꞌabꞌ naj Gedalías yunhe yok naj gobernadoral yinh yu naj Nabuzaradán, yahawil yinh ebꞌnaj chitanhen naj rey Babilonia. Hak tuꞌ yu yinito naj Ismael iskꞌahol naj Netanías sunil anma tuꞌ preso, yinito naj ebꞌnaj xol ebꞌnaj ah Amón.
11 Yabꞌenilo naj Johanán iskꞌahol naj Carea yebꞌ sunil ebꞌnaj yahawil soldado ayko iskꞌatanh naj Johanán yinh sunil istxꞌojal iswatxꞌe naj Ismael iskꞌahol naj Netanías. 12 Iskutxbꞌaniko ebꞌnaj sunil issoldado, isto ebꞌnaj howal yinh naj Ismael iskꞌahol naj Netanías, yilchayo naj yu ebꞌnaj bꞌey huneꞌ niman tanque bꞌey Gabaón. 13 Wal sunil konhobꞌ yebꞌ ebꞌnaj yahawil soldado lanhan yilaxto preso yu naj Ismael, hayet yilni yinh naj Johanán, iskꞌahol naj Carea kaw tzalakanh ebꞌnaj. 14 Isbꞌejlaxkano naj Ismael yu sunil anma yiti naj bꞌey Mizpa, yekꞌto ebꞌnaj yetbꞌiho naj Johanán, iskꞌahol naj Carea. 15 Yajaꞌ wal naj Ismael iskꞌahol naj Netanías elkanh naj yebꞌ waxajwanh issoldado tet naj Johanán, istokano ebꞌnaj yul konhobꞌ Amón. 16 Yinito naj Johanán iskꞌahol naj Carea yebꞌ ebꞌnaj yahawil soldado ayko iskꞌatanh sunil anma iskolilo yul isqꞌabꞌ naj Ismael, haꞌ ton anma yilo naj bꞌey Mizpa yet lahwi ispotxꞌnikamo naj naj Gedalías iskꞌahol naj Ahicam. Haꞌ xol anma iskolilo naj Johanán tuꞌ ay ebꞌnaj soldado, ay ebꞌix ix, ay nixhte unin, ay ebꞌnaj eunuco, haꞌ anma tuꞌ yaqꞌ meltzoho naj bꞌey Gabaón. 17 Isto naj Johanán yebꞌ sunil anma tuꞌ yinh isbꞌel, yapnikano bꞌey Gerut-quimam iskawilal Belén, yunhe istokano bꞌey Egipto. 18 Ok yinh isnabꞌal ebꞌnaj isto bꞌey Egipto tuꞌ, yunhe iskolni isbꞌa yul isqꞌabꞌ ebꞌnaj caldeo, yuto chixiw ebꞌnaj yu ismaqꞌkamo naj Ismael naj Gedalías, naj yakaniko naj rey Babilonia gobernadoral yinh txꞌotxꞌ Judá.