—Chah hawabꞌe tzet chijaltiꞌanh, txahlanh tet Komam Jahawil haDiosal jinhanh, hanhonh haywanh honhxanhetiꞌanh, yuto kaw niman honhtikꞌahanh, yajaꞌ wal tinanh xin haywanh honhxanhechꞌananh, haꞌ huneꞌ tiꞌ hach kaw hach chawila. 3 Txahlanh jinhanh tet Komam Jahawil, haDiosal yu isyeni Komam jetanh tzet bꞌehal bꞌay wal kotohanh, yebꞌ tzet wal kowatxꞌenanh, xhi ebꞌnaj.

4 Istaqꞌwi yaꞌ Jeremías ischejabꞌ Komam Dios tet ebꞌnaj:

—Kꞌultikꞌa, chintxahlihan tet Komam Jahawil teyinh hakaꞌ heyalni tiꞌ, haꞌ sunil tzet chispajtze Komam wetan chiwalan teyet, machi hunu tzotiꞌ tiꞌ chiwebꞌayojan, xhi yaꞌ.

5 Yalni ebꞌnaj tet yaꞌ Jeremías:

—Haꞌ Komam Jahawil chaqꞌ isbꞌa jinhanh ta haꞌ isyelal chijalanh tawet, yajaꞌ ta mach chikoyijehanh hakaꞌ yalni Komam Jahawil haDiosal tawet jinhanh xin, yaqꞌabꞌti Komam ishowal jibꞌanhanh. 6 Machi yok yinh ta kꞌul maka mach kꞌulo tzet chiyal Komam Jahawil, koDiosal, chikoyijehanh tzet chu ispajtzen Komam tawet, haxinwal yet chikoyijehanh tzet chal Komam Jahawil, koDiosal, kꞌul chijilanh, xhi ebꞌnaj.

7 Haxa yet 10 (islahonhebꞌ) tzꞌayik xin, istzotel Komam Jahawil tet yaꞌ Jeremías. 8 Yawten yaꞌ Jeremías naj Johanán, yahaw soldado ayko iskꞌatanh, yebꞌ sunil konhobꞌ; anma mach yelapnoj yebꞌ anma ay yelapnoj. 9 Yalni yaꞌ tet ebꞌnaj: «Haꞌ Komam Jahawil isDiosal Israel, Komam bꞌay heqꞌan wetan ta chintxahlihan teyinh, halni hakaꞌ tiꞌ: 10 “Ta chexkankano sat hetxꞌotxꞌ tiꞌ, kat heyehikꞌo yinh aqꞌankꞌulal, haninan chexinwatxꞌekanhan, mach xin chexintanhtzelojan, chexwakanojan sat huneꞌ txꞌo txꞌotxꞌ tiꞌ, mach xin chexwilojan sat txꞌotxꞌ, yuto kaw yaꞌ yelo wanmahan yu huneꞌ niman isyaꞌtajil wayojan teyibꞌanh tiꞌ. 11 Hanin Jahawil intiꞌan chiwalan ta mach chexxiw tet naj isreyal Babilonia, naj bꞌay kaw chexxiwi. Mach chexxiw tet naj yuto ayinikojan heyetbꞌihoj, yu kexinkolnilojan yul isqꞌabꞌ naj. 12 Chinyebꞌalojan iskꞌulal inkꞌulan teyinh hakpax tuꞌ naj rey tuꞌ chitzꞌaypaxo iskꞌul naj teyinh, chexyaqꞌni meltzoho naj sat hetxꞌotxꞌ,” xhi Komam.

13 »Yajaꞌ ta cheyala: “Mach chonhkankano sat kotxꞌotxꞌ tiꞌ, mach yilalo chikoyije tzet chal Komam Jahawil, koDiosal. 14 Wal xin tonhwe Egipto, haꞌ bꞌey tuꞌ machi howal chijila, machi jabꞌepaxo yoqꞌ chꞌen trompeta, mach chijijlepaxo wahil, haꞌ tuꞌ xin chonhkankanoj,” ta kexchi, 15 chewatxꞌen hakaꞌ tuꞌ, abꞌewe tzet chu yalni Komam Jahawil, hex ah Judá kexkantokanoj: Hak tiꞌ yalni Komam Yahawil kaw aykano yip, isDiosal Israel hakaꞌ tiꞌ: “Ta hinan hex heto bꞌey Egipto kat hekankano bꞌey tuꞌ, 16 haꞌ howal yebꞌ wahil bꞌay kaw chexxiwi chiꞌapni teyinh, kat hekam bꞌey Egipto tuꞌ. 17 Sunil ebꞌnaj winaj hinan isto bꞌey Egipto, kat iskankano bꞌey tuꞌ chimaqꞌlaxkamo ebꞌnaj yu espada, kat iskampaxo ebꞌnaj yu wahil yebꞌ yu howla yabꞌil, machi hunu itzitz chikankano xol ebꞌnaj, yebꞌ xin machi hunu ebꞌnaj tiꞌ chikolchalo tet isyaꞌtajil chiwatojan yibꞌanh ebꞌnaj,” xhi Komam.

18 »Yuto hak tiꞌ yalnipaxo Komam Jahawil kaw aykano yip, isDiosal Israel: “Hakaꞌ yu wanayojan inhowalan yibꞌanh anma ay yul konhobꞌ Jerusalén, hak tuꞌ chu wanayojan inhowalan teyibꞌanh tato chexto bꞌey Egipto yu hekankano bꞌey tuꞌ; chiꞌok inhowalan teyinh, chiwanayojan tzꞌaktiꞌ teyibꞌanh, kaw chixiw ej konhobꞌ kexyilni, kat heyokkano yinh txꞌixwilal, matxa bꞌaqꞌinhal xin cheyilaꞌ hetxꞌotxꞌ tiꞌ hunelxa,” xhi Komam. 19 Hex ah Judá kexkantokanoj, haꞌ Komam Jahawil chalni ta mach chexto bꞌey Egipto, yuxin haꞌ tinanh, yinh kaw yeli chiwalkanojan heyabꞌeꞌ. 20 ¿Tzet yinh yuxin cheyako hemul chemanhkꞌon tzet chal Komam? Yajaꞌ xin hex kinhechejan txahlo teyinh tet Komam yet heyalni: “Txahlanh jinhanh tet Komam Jahawil koDiosal, kat hawalni jetanh sunil tzet chal Komam tawet jinhanh, kat kowatxꞌenanh,” kexchi. 21 Haꞌ tinanh xin lanhan walnilojan tzet yal Komam wetan teyinh, yajaꞌ xin mach cheyije tzet chal Komam Jahawil koDiosal, mach cheyijepaxo tzetaj ischej Komam walaꞌan teyet. 22 Wal tinanh xin yilal heyohtanhenkaniloj ta chexmaqꞌlaxokamo yu espada, kat hekam yu wahil yebꞌ yu howla yabꞌil bꞌey Egipto, bꞌay cheyoche chexto yu heyehikꞌo bꞌey tuꞌ,» xhi yaꞌ Jeremías.