To anma ah Judá bꞌey Egipto
43
Hayet lahwi yalnikano yaꞌ Jeremías sunil tzet ischej Komam Jahawil yalaꞌ yaꞌ tet sunil anma ah Judá, Komam isDiosal anma, 2 yalni naj Azarías iskꞌahol naj Osaías yebꞌ naj Johanán iskꞌahol naj Carea yebꞌ sunil hunteqꞌan ebꞌnaj winaj kaw aykanh chute isbꞌa tet yaꞌ Jeremías: «Leqꞌtiꞌal chawal tiꞌ, mach kach ischej Komam Jahawil koDiosal hawalaꞌ ta mach chonhtohanh bꞌey Egipto, kat kokankano bꞌey tuꞌ. 3 Wal xin haꞌ naj Baruc iskꞌahol naj Nerías chalni hunteqꞌan tuꞌ tawet, yu konhhawanikojanh yul isqꞌabꞌ ebꞌnaj caldeo, kat konhispotxꞌnikamojanh ebꞌnaj, maka yu jilaxtojanh preso bꞌey Babilonia,» xhi ebꞌnaj.4 Hak tuꞌ yu ismanhkꞌon naj Johanán iskꞌahol naj Carea yebꞌ sunil ebꞌnaj yahaw soldado, yebꞌ sunil konhobꞌ tzet yal Komam Jahawil yet yalni ta chikankano ebꞌnaj sat txꞌotxꞌ Judá. 5 Yinito naj Johanán yebꞌ ebꞌnaj yahaw soldado anma ah Judá bꞌey Egipto, haꞌ ton sunil anma sajlemito yulajla nimeta konhobꞌ, yajaꞌ meltzoti sat txꞌotxꞌ Judá. 6 Haꞌ bꞌey Egipto tuꞌ ilaxto ebꞌnaj winaj, ebꞌix ix, nixhte unin, yebꞌ ebꞌix iskutzꞌin yaꞌ rey, yebꞌ sunil makta yakano naj Nabuzaradán, naj yahaw yeko yinh ebꞌnaj chitanhen naj rey Babilonia, yanikaniko naj anma tuꞌ yul isqꞌabꞌ naj Gedalías, iskꞌahol naj Ahicam, naj iskꞌahol naj Safán. Yinipaxto ebꞌnaj yaꞌ Jeremías ischejabꞌ Komam Dios yebꞌ naj Baruc iskꞌahol naj Nerías.a 7 Ismanhkꞌon ebꞌnaj tzet yal Komam Jahawil, yokto ebꞌnaj sat txꞌotxꞌ Egipto, yapnikano ebꞌnaj bꞌey konhobꞌ Tafnes.
8 Istzotel Komam Jahawil tet yaꞌ Jeremías bꞌey Tafnes, yalni Komam: 9 «Iti chꞌen nime chꞌen, kat hamujni chꞌen sata ebꞌnaj ah Judá yalanh txꞌotxꞌ ladrillo ayayo pisohal sata istiꞌ ispultahil yatut naj faraón, ay bꞌey yul konhobꞌ Tafnes tiꞌ. 10 Kat hawalni tet ebꞌnaj ah Judá, hakaꞌ tiꞌ: “Hak tiꞌ yalni Komam Jahawil, Yahawil yinh Sunil, isDiosal Israel: Chiwaqꞌtijan naj Nabucodonosor inchejabꞌan, isreyal Babilonia, chiwanayojan istzꞌonhobꞌal naj yebꞌ ismantiado yibꞌanh chꞌen chꞌen mujbꞌil hawu tiꞌ. 11 Hayet chihul naj tuꞌ, chistanhtzenilo naj txꞌotxꞌ Egipto tiꞌ. Haꞌ mak yetxatikꞌa ay iskami, yilal iskami, haꞌ mak yetxatikꞌa ay yilaxto preso, chiꞌilaxto preso, haꞌ mak yetxatikꞌa ay iskam yu espada, espada chiꞌaqꞌnikamoj. 12 Chaniko naj rey Babilonia qꞌaꞌ yinh hunteqꞌan yatut tioxh ay bꞌey Egipto tiꞌ, chisnhusnikanto naj, chiyinito naj ebꞌnaj Egipto tiꞌ preso, haꞌ txꞌotxꞌ Egipto tiꞌ kaw saj chutekano naj hakaꞌ chu issajnhen naj tanhem meꞌ yenhel. Hayet chimeltzo naj rey Babilonia tuꞌ bꞌey iskonhobꞌ, yinh aqꞌankꞌulal chiꞌel naj sat txꞌotxꞌ Egipto, 13 chismaqꞌnipaxo poho naj yechel tioxh Bet-semes ay bꞌey txꞌotxꞌ Egipto tiꞌ, chisnhusnipaxkanto naj hunteqꞌan yatut isdiosal ebꞌnaj Egipto,” kachi,» xhi Komam.