7 »Yuxin haꞌ tinanh hanin Jahawil intiꞌan, Yahawil kaw aykano yip, isDiosal Israel chiwalan: ¿Tzet yinh xin cheyiti huneꞌ niman isyaꞌtajil tiꞌ teyibꞌanh, cheyiniti kamikal texol hex ah Judá hex tiꞌ, yunhe iskam ebꞌnaj winaj, ebꞌix ix, ebꞌnaj tzehtaj yebꞌ nixhte unin chitotxutxwi yinh ismiꞌ, yunhe matxa hex ah Judá hex tiꞌ chexkankanoj? 8 ¿Tzet yinh xin cheyaqꞌtij inhowalan chewatxꞌen istxꞌojal, chenhusni incienso tet hunteqꞌan nan diosal ay bꞌey Egipto bꞌay kextit yunhe hetanhkaniloj? Yuxin haꞌ heyinhbꞌal yu tzetaj hewatxꞌen tuꞌ, haꞌ ton kexintanhtzenilojan; chexintzꞌaktiꞌnhenkanojan, kat hekankano yinh txꞌixwilal sata sunil nimeta konhobꞌ ay sat txꞌo txꞌotxꞌ tiꞌ. 9 ¿Tom xahenahulnheto istxꞌojal iswatxꞌe heyichmam, istxꞌojal iswatxꞌe ebꞌnaj isreyal Judá, istxꞌojal iswatxꞌe ebꞌix yixal ebꞌnaj? ¿Tom mach chenapaxti istxꞌojal hewatxꞌe yebꞌ istxꞌojal iswatxꞌe ebꞌix heyixal sat txꞌotxꞌ Judá, yebꞌ yulajla iscallehal Jerusalén? 10 Haꞌ tinanh xin maxhtotikꞌa cheyiyo hebꞌa, maxhtikꞌa chexxiwi, maxhtikꞌa chebꞌeybꞌalnhepaxo chejbꞌanile yebꞌ kuybꞌanile waqꞌkanojan tet heyichmam.

11 »Yu huneꞌ tuꞌ, yuxin hanin Yahawilintiꞌan, Yahawil kaw aykano yip, isDiosal Israel chiwalan: Wal tinanh chiwako inhowalan teyinh, chiwanitojan isyaꞌtajil teyibꞌanh, chexintanhtzenilojan hesunil hex ah Judá. 12 Haꞌ hunteqꞌanxa anma Judá kankano sat txꞌotxꞌ Judá, yajaꞌ islutꞌnhe isbꞌa istit sat txꞌotxꞌ Egipto yunhe iskankano bꞌey tiꞌ, chintanhtzekanilojan sat txꞌotxꞌ Egipto tiꞌ, ay chitejlaxkamo yu howal, ay chikam yu wahil, haꞌ sunil nixhte unin yebꞌ ichamta anma chikam yu espada maka yu wahil, kat isxiw anma yilni; chihal-lax tzꞌaktiꞌ yinh, kat iskankano yinh txꞌixwilal. 13 Chiwayojan isyaꞌtajil yibꞌanh anma Judá tit bꞌey Egipto tiꞌ, hakaꞌ yu wanayojan isyaꞌtajil yibꞌanh anma ah Jerusalén yet iskam yu howal, yu wahil yebꞌ yu howla yabꞌil. 14 Haxa yaqꞌbꞌilxa ebꞌnaj judío kantokanoj, tit bꞌey Egipto tiꞌ, machi hunu chikolchahi, nitam hunu itzitzto chikani, yunhe ismeltzo sat txꞌotxꞌ Judá, txꞌotxꞌ bꞌay chiꞌah iskꞌul yu ismeltzohi. Wal xin kachannhe haywanh mak chito yu yelkanh haꞌ chimeltzohi, xhi Komam,» xhi yaꞌ Jeremías.

15 Yuxin haꞌ sunil ebꞌnaj winaj yohtaj ta haꞌ hun yixal ebꞌnaj halten teꞌ pom tet nan diosal, yebꞌ sunil ebꞌix ix kutxaniko bꞌey tuꞌ, kaw nimankano isbꞌisil ebꞌix yebꞌ sunil anma ah Judá ay bꞌey Patros yul ismajul txꞌotxꞌ Egipto, taqꞌwi tet yaꞌ Jeremías hakaꞌ tiꞌ; 16 «Haꞌ istzotiꞌ Komam Jahawil hawal jetanh, mach chikoyijehanh. 17 Wal xin haꞌ tzet xajalanh haꞌ chikowatxꞌehanh, chijaltenanh teꞌ pom xahanbꞌalil tet ix yahawil satkanh, chijaltenpaxojanh vino tet ix, haꞌ chikobꞌeybꞌalnhehanh tinanh. Haꞌ isbꞌeybꞌalnhepaxo jichmamanh yebꞌ ebꞌyaꞌ koreyalanh yebꞌ ebꞌnaj yahawil kokonhobꞌanh, haꞌ iswatxꞌe ebꞌnaj yul ismajul Judá, yebꞌ yulaj txonhbꞌal bꞌey Jerusalén. Yuxin hayet tuꞌ kaw aynhetikꞌa tzet chikolohanh, kaw tzalahilalnhetikꞌa jehanh yebꞌ xin machi hunu isyaꞌtajil tit jibꞌanhanh. 18 Yajaꞌ hatax yet kobꞌejnihanh jaltenanh teꞌ pom yebꞌ vino xahanbꞌalil tet ix yahawil satkanh jokkanojanh yinh manhtzetal, iskam jet konhobꞌanh yu chꞌen espada yebꞌ yu wahil, xhi ebꞌnaj. 19 Yalni ebꞌix ix hakaꞌ tiꞌ: Hayet jaltenanh teꞌ pom yebꞌ vino tet ix yahawil satkanh tuꞌ, yebꞌ yet jaltenanh ixim nime pan kojobꞌnayojanh vino xahanbꞌalil tet ix, haꞌ hun ebꞌnaj jichamilan jintajanh yuto mach kachwa ebꞌnaj jinhanh yet jaltenanh koxahanbꞌalanh,» xhi ebꞌix tet yaꞌ Jeremías.

20 Lahwi tuꞌ istaqꞌwi yaꞌ Jeremías tet ebꞌnaj winaj yebꞌ tet ebꞌix ix yebꞌ tet sunil anma halni hunteqꞌan tuꞌ, yalni yaꞌ hakaꞌ tiꞌ: 21 «¿Tajka chetxumu ta mach yohtajo Komam Jahawil yebꞌ ta xaꞌisnahulnheto yet henhusni teꞌ pom tet nan diosal bꞌey yulajla konhobꞌ yul ismajul Judá yebꞌ yulajla iscallehal Jerusalén, hakaꞌ yu heyichmam, yebꞌ hereyal yebꞌ ebꞌnaj yahawil yinh hekonhobꞌ, yebꞌ sunil anma ah Judá? 22 Machi to nahul yu Komam; wal xin mach techa istxꞌojal yebꞌ isyahbꞌetajil hewatxꞌe tuꞌ yu Komam Jahawil, yuxin haꞌ tinanh xaꞌuchkꞌalaxkanto hekonhobꞌ, kaw chixiw anma yilni, kaw alaxayo tzꞌaktiꞌ yibꞌanh, matxa hunu mak kankano yulajla konhobꞌ tuꞌ. 23 Yuto henhus teꞌ pom xahanbꞌalil tet nan diosal, heyaniko hemul sata Komam Jahawil, mach xin heyijepaxo isley yebꞌ chejbꞌanile yebꞌ kuybꞌanile yakano teyet, yuxin hul huneꞌ niman isyaꞌtajil teyibꞌanh tinanh,» xhi yaꞌ Jeremías.

24 Yalnipaxo yaꞌ Jeremías tet sunil anma yebꞌ ebꞌix ix kutxanikoj: «Sunil hex ah Judá ay sat txꞌotxꞌ Egipto tiꞌ, abꞌewe istzotiꞌ Komam Jahawil. 25 Hak tiꞌ yalni Komam Jahawil, Yahawil yinh Sunil, isDiosal Israel: “Hex tiꞌ yebꞌ heyixal haꞌ tzet xahetaqꞌweko teyibꞌanh yu hetiꞌ, haꞌ chewatxꞌe yu heqꞌabꞌ, cheyalni: ‘Hanhonhtiꞌanh haꞌ tzet xakotaqꞌwekojanh jibꞌanhanh haꞌ yilal koyijenanh yet jalnihanh ta chikonhusanh pom, chikojobꞌnayojanh vino xahanbꞌalil tet ix yahawil satkanh,’ kexchi. Kꞌultikꞌa yijewe tzet xahetaqꞌweko teyibꞌanh tuꞌ. 26 Yajaꞌ abꞌewe tzet chu yalni Komam Jahawil sunil hex ah Judá ay bꞌey txꞌotxꞌ Egipto tiꞌ, chalni Komam hakaꞌ tiꞌ: Hanin Yahawilintiꞌan chiwalan ta xawaqꞌ bꞌinaho inbꞌihan kaw aykano yelapnoj, walnihan ta matxa chiꞌaqꞌlax bꞌinaho inbꞌihan yu anma ah Judá ay sat sunil txꞌotxꞌ Egipto tiꞌ, matxa hunu naj winaj ah Judá chalni: ‘¡Itzitz Komam Jahawil!’ mach xhihoj. 27 Yuto ayxako yinh innabꞌalan wanitojan isyaꞌtajil yibꞌanh anma Judá maxhtaj iskꞌulal chiwayojan yibꞌanh; sunil anma ah Judá ay bꞌey Egipto tiꞌ chitanhtzelaxkanilo yu howal yebꞌ yu wahil masanta chitanhkanilo sunil. 28 Kachannhe haywanh mak chiꞌelkanh xol howal, kat yel sat txꞌotxꞌ Egipto tiꞌ, haꞌ chimeltzo sat txꞌotxꞌ Judá. Hak tuꞌ chu yohtanhenkanilo hunteqꞌan anma ah Judá hul eho bꞌey Egipto tiꞌ, mak chij isbꞌa istzotiꞌ, ta haꞌ tzet chiwalan mato haꞌ tzet chiyal ebꞌnaj ah Judá tiꞌ. 29 Hanin Jahawil intiꞌan, chiwalan ta haꞌ huneꞌ isyaꞌtajil chiwayojan teyibꞌanh bꞌay ay hex tiꞌ, haꞌ chiwaqꞌan yecheloj ta haꞌ tzet chiwalan chiyij isbꞌa, hak tuꞌ chu heyohtanheniloj ta chiyij isbꞌa intzotiꞌan,” xhi Komam. 30 Yalnipaxo Komam Jahawil hakaꞌ tiꞌ: “Chiwakojan naj faraón Hofra, isreyal Egipto tiꞌ yul isqꞌabꞌ ebꞌnaj ayko ishowal yinh, chiwanikojan naj yul isqꞌabꞌ ebꞌnaj chisaynikꞌo yu ispotxꞌlaxkamoj, hakaꞌ yu wanikojan yaꞌ Sedequías isreyal Judá yul isqꞌabꞌ naj Nabucodonosor, isreyal Babilonia, naj ayko ishowal yinh yaꞌ, yu ismaqꞌnikamoj,” xhi Komam,» xhi yaꞌ Jeremías.