Tzotiꞌ yal yaꞌ Jeremías ischejabꞌ Komam Dios tet naj Baruc iskꞌahol naj Nerías yet kanhebꞌxa habꞌilxa yok yaꞌ Joacim, iskꞌahol yaꞌ Josías isreyalo Judá; hayet istzꞌibꞌnhen naj Baruc hunteqꞌan tzotiꞌ yul libro, haꞌ yaꞌ Jeremías halni tet naj tzet chistzꞌibꞌnhekano naj. Yalni yaꞌ Jeremías tet naj Baruc hakaꞌ tiꞌ: 2 «Hak tiꞌ yalni Komam Jahawil, isDiosal Israel tawet: Baruc, 3 hach tiꞌ hawala: “¡Ay, kaw kꞌanchꞌan hinan tinanh! Yuto kaw chislahiko Komam Jahawil yanayo bꞌiskꞌulal yebꞌ isyaꞌtajil wibꞌanhan, kaw xatibꞌayilo wuhan inqꞌajwihan, machi nino xewilal chiwuhan,” kachi. 4 Hanin Yahawilintiꞌan chiwalan ta haninan chintanhtzelojan makta inwatxꞌekanhan, chinhokꞌkanhan makta intzꞌunayojan, hak tuꞌ chiwutehan huneꞌ niman konhobꞌ tiꞌ. 5 ¿Tom xin chawako yinh hakꞌul hasayni nimeta tzet ye tuꞌ? Mach chasaya, yuto chiwayojan isyaꞌtajil yibꞌanh sunil anma tiꞌ, yajaꞌ haninan Yahawilintiꞌan chiwalan ta mach chachmaqꞌlaxkamoj bꞌayxanhetuꞌwal chachekꞌi,» xhi yaꞌ Jeremías.