3. HAL-LAXKANO ISYAꞌTAJIL CHUL YIBꞌANH EJ NIMETA KONHOBꞌ BꞌAY AY ANMA CHIYIYO ISBꞌA TET TIOXH
(46:1–51:64)
Hal-laxkano isyaꞌtajil yibꞌanh Egipto
46
Tzotiꞌ yal Komam Jahawil tet yaꞌ Jeremías yinh ej nimeta konhobꞌ.2 Tzotel Komam Jahawil yinh Egipto yebꞌ yinh ebꞌnaj issoldado naj faraón Necao isreyal Egipto, naj tanhtzelaxilo bꞌey Carquemis iskawilal haꞌ niman Éufrates yu naj Nabucodonosor isreyal Babilonia yet kanhebꞌxa habꞌil yok yaꞌ Joacim iskꞌahol yaꞌ Josías isreyalo Judá, yalni Komam hakaꞌ tiꞌ:
3 «¡Watxꞌewe hebꞌa yebꞌ chꞌen escudo yebꞌ chꞌen chipahwa yinh isbꞌaqꞌ litꞌ,
kat hetit yinh howal!
4 ¡Watxꞌewe isxhila noꞌ cheh, ahanhweto hex yet howal kaw helan yibꞌanh noꞌ!
¡Ahweto chꞌen yelmo yinh hewiꞌ, chetxolbꞌan hebꞌa.
Chesu chꞌen lanza, kat heyaniko chꞌen coraza istxam hekꞌul!
5 ¿Tzet yinh xin hak tiꞌ wilnihan ebꞌnaj tiꞌ? Pax ebꞌnaj yintaj,
kaw chixiw ebꞌnaj, issajlemito ebꞌnaj soldado kaw helan tuꞌ yu aqꞌlax aykꞌayoj.
Elkanh ebꞌnaj, matxatikꞌa tꞌanhxiti ebꞌnaj yintaj.
¡Kaw ay xiwkilal sunil bꞌayejtuꞌwal! yalnipaxo Komam Jahawil.
6 Haꞌ ebꞌnaj kaw helan yekꞌ yinh anhe matxa chu yelkanh ebꞌnaj,
mach yu yelpaxokanh ebꞌnaj kaw helan yinh howal,
haꞌ bꞌey norte iskawilal istiꞌ haꞌ Éufrates txaqꞌmo ebꞌnaj, yaykꞌaykano ebꞌnaj.
7 ¿Mak huneꞌ chiꞌahilo hakaꞌ ischꞌibꞌkanh ha haꞌ,
yebꞌ xin kaw ay yip hakaꞌ isbꞌili haꞌ nime haꞌ?
8 Haꞌ ton Egipto kaw lanhan ischꞌibꞌ hakaꞌ ischꞌibꞌ sat ha haꞌ, yebꞌ xin kaw ay yip hakaꞌ yip haꞌ nime haꞌ. Yalni hakaꞌ tiꞌ:
“Chiwiqꞌkanh wipan, chinmajnayojan sunil sat txꞌo txꞌotxꞌ, chintanhtzenilojan konhobꞌ,
chintanhtzenpaxilojan anma ay yul konhobꞌ tuꞌ,” xhi Egipto tuꞌ.
9 ¡Ahanhweto yinh anhe, hex cheh hex tiꞌ!
¡Wejchahojabꞌkanh chꞌen carruaje, kat yaqꞌni chꞌen niman anhe!
¡Elojabꞌti ebꞌnaj winaj kaw helan yinh howal,
ebꞌnaj ah Etiopía yebꞌ ebꞌnaj ah Fut yebꞌ chꞌen escudo,
ebꞌnaj soldado ah Lud kaw helan isqꞌojnito teꞌ litꞌ!
10 Haꞌ huneꞌ tzꞌayik tiꞌ, haꞌ ton tzꞌayik bꞌay chiwayojan isyaꞌtajil hanin Yahawil kaw aykano yip.
Chiwaqꞌan ispaj tet ebꞌnaj ayko ishowal winhan.
Haꞌ chꞌen espada chitanhtzenkanilo ebꞌnaj, kat isnoh iskꞌul chꞌen yu chikꞌ,
kat yukꞌikanokanh chꞌen yu chikꞌ, yuto hanin Yahawil, kaw aykano yip,
chinpotxꞌkamojan anma yinh huneꞌ tzꞌayik tuꞌ bꞌey txꞌotxꞌ norte iskawilal haꞌ niman Éufrates.
11 ¡Hex ah Egipto nabꞌanhe chexto bꞌey Galaad hesayaꞌ anh!
Waxanhka kaw niman anh tuꞌ chiꞌilcha heyu,
yajaꞌ nabꞌanhe, yuto matxa heyanhal.
12 Haꞌ sunil nimeta konhobꞌ xayabꞌeloj ta xakexkankano yinh txꞌixwilal,
sunil yul sat yibꞌanhqꞌinal tiꞌ chiꞌabꞌelax yel heyaw yu isyaꞌtajil.
Yuto ebꞌnaj soldado kaw helan txaqꞌmo ebꞌnaj yinhpaxo ebꞌnaj helan,
huneꞌnhe xin yu yaykꞌaykano ebꞌnaj,» xhi Komam.
13 Tzotel Komam Jahawil tet yaꞌ Jeremías ischejabꞌ, yalni Komam tet yaꞌ ta chitit naj Nabucodonosor, isreyal Babilonia istanhtzelo txꞌotxꞌ Egipto, yalni Komam:
14 «Chawalikꞌo huneꞌ tzotiꞌ tiꞌ bꞌey Egipto,
kat hawaqꞌni ohtanhelo bꞌey Migdol, bꞌey Menfis,
yebꞌ bꞌey Tafnes, chawalni: “¡Watxꞌewe hebꞌa yebꞌ xin helan cheyute hebꞌa,
yuto chitanhtzelaxilo anma ay yulajla ismajul hekonhobꞌ tiꞌ yu chꞌen espada,
yuto haꞌ chꞌen espada chiskꞌuxayto chꞌen anma!” kachi.
15 ¿Tzet yinh xin aykꞌay tzet bꞌay chikawxi hekꞌul?
¡Haꞌ huneꞌ tuꞌ matxa yu iskankano linhnoj, yuto hanin Yahawilintiꞌan intenchatojan!a
16 Kaw ahkanokanh isbꞌisil ebꞌnaj soldado aykꞌayi,
aykꞌaykano hunun ebꞌnaj yibꞌanh yet soldadohal,
yal-len ebꞌnaj tet hunun hakaꞌ tiꞌ: “¡Ahojonhwewanoj,
meltzojonhwe sat kotxꞌotxꞌ bꞌay konhpitzkꞌahi!
¡Elojonhwekanh tet chꞌen espada lanhan isqꞌoji jinh!” xhile ebꞌnaj.
17 Haꞌ bꞌey tuꞌ, el yaw ebꞌnaj yinh kaw ip:
“¡Haꞌ naj Faraón isreyal Egipto, matanhkanilo naj,
matxa isyije naj tzet yalte!” xhi ebꞌnaj.
18 Yalni Komam: “Hanintiꞌan Rey hinan, itzitz hinan, Yahawil yinh Sunil, haꞌ inbꞌihan.
Hakaꞌ witz Tabor kaw nimajal yekanh sata sunil hunteqꞌanxa witz,
yebꞌ hakaꞌ witz Carmelo kaw nahat yekanh yibꞌanh haꞌ mar,
hak tuꞌ yip ebꞌnaj chihul anoko howal.
19 Hex ah Egipto watxꞌewe heqꞌuybꞌe, yuto chexilaxoto preso nan konhobꞌal,
haꞌ konhobꞌ Menfis kaw tzꞌinan chukanoj, chitanhtzelaxkaniloj,
matxa hunu anma chikan yul konhobꞌ tuꞌ.
20 Haꞌ Egipto lahan hakaꞌ noꞌ qꞌopo wakax kaw saqꞌal jilni.
¡Yajaꞌ haꞌ bꞌey txꞌotxꞌ norte chitit mak chitanhtzenkaniloj!b
21 Haꞌ ebꞌnaj soldado loqꞌbꞌilti yu ebꞌnaj Egipto tuꞌ,
lahan ebꞌnaj hakaꞌ noꞌ wakax kaw bꞌaqꞌich,
yajaꞌ haꞌ hun ebꞌnaj meltzopaxo yintaj yelkanh ebꞌnaj,
matxatikꞌa islinhbꞌa isbꞌa ebꞌnaj yet yelkanh,
yuto apni istzꞌayikal bꞌay tanhtzelaxkanilo ebꞌnaj,
yebꞌ istiempohal bꞌay ay isyaꞌtajil yibꞌanh ebꞌnaj.
22 Haꞌ ebꞌnaj Egipto xanhe chihixoni yet chiꞌelkanh ebꞌnaj hakaꞌ noꞌ labꞌa,
chiꞌelkanh ebꞌnaj tet ebꞌnaj chihul aqꞌno howal yinh,
kat istzokꞌlaxkamo ebꞌnaj yu chꞌen eche hakaꞌ chu istzokꞌlax teꞌ siꞌ.
23 Hanin Jahawil intiꞌan chiwalan ta chiqꞌajlaxayo isqꞌebꞌta ebꞌnaj tuꞌ,
yuto haꞌ isbꞌisil teꞌ qꞌebꞌtaj tuꞌ ekꞌbꞌal yibꞌanh noꞌ qꞌul, matxa chibꞌischa hanta teꞌ.
24 Haꞌ iskutzꞌin Egipto chikankano yinh txꞌixwilal,
kat yalaxiko ebꞌnaj Egipto yul isqꞌabꞌ konhobꞌ chitit bꞌey txꞌotxꞌ norte,» xhi Komam.
25 Yalnipaxo Komam Jahawil, yahawil yinh sunil, isDiosal Israel hakaꞌ tiꞌ: «Chintanhtzekanilojan tioxh Amón, isdiosal konhobꞌ Tebas. Chiwanayojan isyaꞌtajil yibꞌanh naj faraón, yebꞌ yibꞌanh Egipto, yebꞌ ebꞌnaj yahawil, chintanhtzenpaxkanilojan hunteqꞌan tioxh chiyal ebꞌnaj isdiosaloj. Chiwayojan isyaꞌtajil yibꞌanh naj faraón, yebꞌ yibꞌanh anma chikawxi iskꞌul yinh naj. 26 Chiwakojan ebꞌnaj yul isqꞌabꞌ ebꞌnaj chisaynikꞌoj yu ismaqꞌlaxkamoj, chiwanikojan ebꞌnaj yul isqꞌabꞌ naj Nabucodonosor isreyal Babilonia yebꞌ yul isqꞌabꞌ ebꞌnaj ischejabꞌ naj Nabucodonosor tuꞌ, yajaꞌ haxa yet tzujanilxa kat ispohchapaxkanh anma sat txꞌotxꞌ Egipto tiꞌ hunelxa hakaꞌ yet yalanhtokanoj,» xhi Komam Jahawil.
27 Yalnipaxo Komam hakaꞌ tiꞌ: «Hex pohchanaj hex tiꞌ yinh yaꞌ Jacob inchejabꞌan, mach chexxiwi;
hex pohchanaj hex tiꞌ yinh yaꞌ Israel, mach chexpax teyintaj,
yuto chexinkolan yebꞌ heyuninal bꞌey huneꞌ niman konhobꞌ kaw nahat bꞌay kexilaxto preso.
Hex Israel chexmeltzohi kat hexewi chechahni isyaxil, machi mak chexxibꞌteni.
28 Hanin Yahawilintiꞌan hankawinan chiwalan,
hex Israel, iskonhobꞌ yaꞌ Jacob mach chexxiwi,
yuto ayinikojan heyetbꞌihoj, yuto chintanhtzelojan sunil nimeta konhobꞌ bꞌay kexwaqꞌ pujnahotojan,
yajaꞌ wal hex tiꞌ mach chexintanhtzekanilojan yinh hunelnhe.
Wal xin chiwayojan isyaꞌtajil teyibꞌanh, yajaꞌ yinh kaw istoholal.
¡Yajaꞌ xin mach chꞌekꞌto yet quexinkachnihan!» xhi Komam.