Hal-laxkano isyaꞌtajil chihul yibꞌanh ebꞌnaj filisteo
47
Tzotiꞌ yal Komam Jahawil tet yaꞌ Jeremías ischejabꞌ, yinh isyaꞌtajil chiꞌay yibꞌanh ebꞌnaj filisteo yet yalanhto maxhto chistanhtzelo naj faraón konhobꞌ Gaza.a2 Hak tiꞌ yute yalni Komam Jahawil:
«Haꞌ bꞌey txꞌotxꞌ norte chitit hunbꞌulan ebꞌnaj soldado,
haꞌ ebꞌnaj tuꞌ lahan hakaꞌ haꞌ nime haꞌ chichꞌibꞌkanh, kat ismaliltoj.
Chismajnayo ebꞌnaj sunil txꞌo txꞌotxꞌ tiꞌ, yebꞌ sunil tzet ayayo sat txꞌotxꞌ;
chistanhtzenilo ebꞌnaj hunteqꞌan konhobꞌ yebꞌ sunil anma ayayo sat.
Haꞌ sunil anma ay yul konhobꞌ Filistea, chꞌel yaw, sunil ebꞌnaj winaj chꞌel yaw yu isyaꞌil.
3 Hayet chiyabꞌen ebꞌnaj isbꞌili yay yisqꞌaj noꞌ cheh,
yebꞌ xin isbꞌili istit chꞌen carruaje, chipaxkanilo yip ebꞌnaj mame, chisbꞌejnikano ebꞌnaj yuninal.
4 Yuto chihul istzꞌayikal bꞌay chitanhtzelaxilo ebꞌnaj filisteo,
kat istanhtzelaxilo ebꞌnaj Tiro yebꞌ Sidón yebꞌ ebꞌnaj chito kolwa yinh hunteqꞌan konhobꞌ tiꞌ tinanh.
Yuto chistanhtzelo Komam Jahawil ebꞌnaj filisteo, ebꞌnaj kantokano xol ebꞌnaj ah Caftor ay istiꞌ haꞌ mar.
5 Haꞌ sunil anma ah Gaza, iskꞌupilo xil iswiꞌ yu bꞌiskꞌulal, haxa anma ah Ascalón tanhkanilo yebꞌ sunil anma ay satla yakꞌalil konhobꞌ tuꞌ.
¿Bꞌaqꞌinh chisbꞌej hunteqꞌan anma tiꞌ yaniko islahwilal isnimanil?b
6 Haꞌ yespada Komam Jahawil, ¿bꞌaqꞌinh chixewi?
¡Ayxikꞌa meltzo yespada Komam Jahawil yul yatut, kat yehiko chꞌen yinh aqꞌankꞌulal!
7 Yajaꞌ ¿tzet chu yehiko chꞌen yinh aqꞌankꞌulal ta chischej Komam Jahawil chꞌen istanhtzenilo konhobꞌ Ascalón,
yebꞌ ej konhobꞌ ay istiꞌ haꞌ mar?» xhi.