Hal-laxkano isyaꞌtajil chihul yibꞌanh konhobꞌ Moab
48
Hak tiꞌ yalni Komam yinh konhobꞌ Moab, Komam Yahawil kaw aykano yip, isDiosal Israel:«¡Ay, kaw kꞌanchꞌan konhobꞌ Nebo, yuto chitanhtzelaxkaniloj, chiꞌilaxkanilo ispixan!
¡Haꞌ konhobꞌ Quiriataim chitanhkanilo yu isqꞌabꞌ ebꞌnaj chiꞌaniko howal yinh!
Kaw chiꞌokkano yinh sukal, chipaxkanilo yip.
2 ¡Haꞌ Moab, matxa chiꞌalaxiko ismay!
Haꞌ bꞌey konhobꞌ Hesbón chisnah ebꞌnaj winaj iswatxꞌen istxꞌojal yinh Moab tuꞌ, chalni ebꞌnaj:
“¡Titanhwej, maqꞌbꞌil kotanhtzenkanilo Moab xol nimeta konhobꞌ!” xhi ebꞌnaj.
Hakpax tuꞌ konhobꞌ Madmena chitanhkaniloj haꞌ chꞌen espada xin, chꞌapni chꞌen yinh.a
3 Haꞌ bꞌey konhobꞌ Horonaim chiꞌabꞌelax yel yaw anma, chalni:
“¡Chiꞌuchkꞌalaxayo konhobꞌ, chiꞌalaxayo niman isyaꞌtajil jibꞌanh!” xhi anma.
4 ¡Haꞌ Moab chiꞌuchkꞌalaxtoj, chiꞌabꞌelax yel yaw nixhte unin ay bꞌey tuꞌ!
5 Kaw chꞌay yal sat anma yoqꞌi yet chiꞌahto yinh istzalanil Luhit.
Haꞌ ebꞌnaj chiꞌaniko howal yinh Moab kaw chiyabꞌe ebꞌnaj yel yaw anma yu isyaꞌtajil bꞌey konhobꞌ Horonaim.
6 ¡Elanhwekanh, kolwelo hebꞌa,
lahanojabꞌ cheyute hebꞌa hakaꞌ teꞌ retama ay bꞌey txꞌotxꞌ desierto!
7 Hex ah Moab hex tiꞌ, haꞌ yinh tzetaj ay hex yebꞌ yinh heqꞌalomal kaw chikawxi hekꞌul,
yuxin chexilaxto preso, haꞌ hediosal chiyij Quemos chiꞌilaxoto preso yebꞌ ebꞌnaj sacerdote yeko yinh hediosal tuꞌ,
haꞌ hun xin ebꞌnaj yahawil hekonhobꞌ chiꞌilaxto preso yinta hetioxh tuꞌ.
8 Haꞌ naj chitanhtzenilo konhobꞌ chiꞌapni naj istanhtzelo hunun konhobꞌ yulaj Moab,
machi hunu konhobꞌ tiꞌ chikolchahi,
kat yuchkꞌalaxpaxto konhobꞌ ay satla akꞌal yebꞌ ischeqꞌanil, hakaꞌtikꞌa yu yalni Komam.
9 ¡Ayxikꞌa ay xikꞌ ebꞌnaj ah Moab hak tuꞌ xin chu yelkanh!
Yuto haꞌ konhobꞌ ay yul ismajul Moab kaw tzꞌinan chukanoj,
matxa anma chikano yulajla konhobꞌ tuꞌ,» xhi Komam.
10 ¡Kꞌanchꞌan mak mach chisje yaqꞌaꞌ chejaꞌ isbꞌa yinh ismunil Komam Jahawil, haꞌ huneꞌ mak tuꞌ chiꞌay tzꞌaktiꞌ yibꞌanh! ¡Kꞌanchꞌanpaxo mak mach chiyaqꞌbꞌalnhe yespada yinh ispotxꞌwahi yuto chiꞌaypaxo tzꞌaktiꞌ yibꞌanh!
11 Aqꞌankꞌulalnhetikꞌa ye anma ah Moab yettax yichebꞌanil,
maxhtotikꞌa hunelo tiꞌ xaꞌilaxto preso nan konhobꞌal.
Haꞌ Moab lahan hakaꞌ vino tonhe etxan yul isnet,
maxhto hunelo tiꞌ xajobꞌlaxayto yul hunuxa net,
maxhto chikꞌayilo isxuqꞌal sam yebꞌ xin kaw kꞌul yukꞌlaxi.
12 Yajaꞌ haꞌ Komam Jahawil chalni: «Chiꞌapni istzꞌayikal bꞌay chinchejtojan ebꞌnaj winaj chiꞌinito ebꞌnaj Moab preso nan konhobꞌal, hakaꞌ chu ishel-lax vino yul isnetal, kat ismaqꞌlaxpoho isnetal tuꞌ, hak tuꞌ chiꞌutelax ebꞌnaj. 13 Chitxꞌixwikanh ebꞌnaj Moab tuꞌ tet istioxh Quemos chiyal isdiosaloj, hakaꞌ yu istxꞌixwikanh ebꞌnaj Israel tet tioxh Bet-el bꞌay kaw kawxi iskꞌul.
14 Hex ah Moab, ¿tzet yinh xin cheyala?
“Hanhonhtiꞌanh kaw helan honhanh yinh howal yebꞌ xin kaw ay jipanh,” kexchi.
15 ¡Haꞌ Moab chitanhtzelaxkaniloj, kat yuchkꞌalaxpaxkanto iskonhobꞌal,
haꞌ ebꞌnaj tzehtaj kaw saqꞌalkanoj, chihojlaxkamo ebꞌnaj!
Hak tuꞌ yalnikano Komam Rey, Yahawil kaw aykano yip, hak tuꞌ isbꞌi Komam.
16 Kawilxa yeti istzꞌayikal bꞌay chiꞌay isyaꞌtajil yibꞌanh Moab,
kaw toxa chihul lemna isyaꞌtajil yibꞌanh.
17 Sunil hex ay hex yulaj konhobꞌ ayko yinhla ishoyanil Moab kaw tzꞌayojabꞌ hekꞌul yinh Moab tuꞌ,
yebꞌ sunil hex cheyaqꞌ bꞌinaho isbꞌi, halwe hakaꞌ tiꞌ:
“¡Haꞌ Moab lahan hakaꞌ teꞌ vara kaw ay yip yebꞌ kaw saqꞌal jilni,
yajaꞌ wal tinanh maqꞌahkanto teꞌ, matanhkanilo yip!” kexchi.
18 Hex ah konhobꞌ Dibón ayanhweti yul hetzꞌonhobꞌal kaw ay yelapnoj bꞌay tzꞌonhan hex,
kat heyay tzꞌonhno sat txꞌotxꞌ tajin txꞌotxꞌ,
yuto haꞌ ebꞌnaj chitanhtzenilo Moab chiꞌapnipaxo ebꞌnaj teyinh kat kexistanhtzenilo ebꞌnaj,
chiyuchkꞌanto ebꞌnaj iskꞌubꞌal hekonhobꞌ.
19 Hex ah konhobꞌ Aroer okanhwe linhno istiꞌla bꞌeh, kat kam heyilni.
Qꞌambꞌewe tet makta lanhan yelkanh yu iskolnilo isbꞌa: “¿Tzet mayuhi?” kexchi.
20 Okkano Moab yinh txꞌixwilal, yuto alaxayo isyaꞌtajil yibꞌanh.
Oqꞌanhwej yinh kaw ip yu bꞌiskꞌulal yinh Moab.
Halwe bꞌey istiꞌla haꞌ Arnón tato maꞌuchkꞌalaxkanto Moab,» xhi Komam.
21 Alaxayo isyaꞌtajil yibꞌanh ej konhobꞌ ayayo sat ej akꞌal,
haꞌ ton konhobꞌ Holón, konhobꞌ Jahaza, konhobꞌ Mefaat,
22 konhobꞌ Dibón, konhobꞌ Nebo, konhobꞌ Bet-diblataim,
23 konhobꞌ Quiriataim, konhobꞌ Bet-gamul, konhobꞌ Bet-meón,
24 konhobꞌ Queriot, konhobꞌ Bosra, yebꞌ yibꞌanh sunil konhobꞌ ay yul Moab;
konhobꞌ kawil yeko yebꞌ konhobꞌ nahat yehiloj.
25 Haꞌ Komam Jahawil, chalni hakaꞌ tiꞌ: «Haꞌ yip Moab matanhkaniloj,
haꞌ isqꞌabꞌ kaw helan yinh howal maqꞌahkantoj.
26 ¡Ukꞌtzewekanh ebꞌnaj ah Moab yuto kaw yikanh isbꞌa winhan, hanin Yahawilintiꞌan!
¡Chisbꞌalobꞌtanhe isbꞌa ebꞌnaj Moab yibꞌanh isxaw, kat istzebꞌi anma yinh ebꞌnaj!
27 Hex Moab ¿tom machi kextzebꞌi, hebꞌuchwa yinh konhobꞌ Israel?
¿Tom hakaꞌ elqꞌom ye ebꞌnaj yul hesat, yuxin hak tuꞌ yu heyahni ebꞌnaj?
28 Hex Moab bꞌejbꞌekano hekonhobꞌ,
kat heto heyebꞌano hebꞌa yulaj iskꞌul chꞌen nime chꞌen hakaꞌ noꞌ kuwis chiswatxꞌe yatut istiꞌla chꞌen chꞌen ayko satla witz.
29 Wohtajan hanta isloloꞌal anma ah Moab, yebꞌ kaw chiyikanh isbꞌa,
yebꞌ kaw istzan yaniko ismay, yebꞌ kaw leqꞌtiꞌ chute isbꞌa, yebꞌ kaw kanhye chute isbꞌa;
kaw nohna yanma yu loloꞌal,» xhi Komam.
30 Chalnipaxo Komam Jahawil: «Wohtajan ta lemannhetikꞌati ishowal anma ah Moab,
yajaꞌ matzet chiyiqꞌ yinh, wohtapaxojan isloloꞌal,
yajaꞌ nabꞌanhe,» xhi Komam.
31 Yuxin chinoqꞌan yu bꞌiskꞌulal yinh sunil anma ah Moab,
kat woqꞌpaxojan yu bꞌiskꞌulal yinh anma ay yul konhobꞌ Kir-hares.
32 Hex ah konhobꞌ Sibma chinoqꞌan teyinh hakaꞌ yu yoqꞌ anma yinh konhobꞌ Jazer;
hex ah Sibma lahan hex hakaꞌ isqꞌabꞌ teꞌ uva, to lekꞌo yibꞌanh haꞌ mar,
isqꞌaxpon teꞌ masanta apni lekꞌno teꞌ yibꞌanh haꞌ mar bꞌey Jazer,
yajaꞌ xin tanhtzelaxilo sat teꞌ uva tuꞌ, teꞌ sat kaw yihxa.
33 Matxa chiꞌabꞌelax bꞌit yet tzalahilal,
xolaj tzꞌunubꞌ kaw kꞌul chu sat txꞌotxꞌ Moab,
matxa teꞌ uva chixanhlaxilti yal bꞌay chitikꞌa xanhlax teꞌ,
matxa chiꞌabꞌelax bꞌit chiꞌalaxiko yet chixanhobꞌtanhelax teꞌ,
haxa oqꞌil chiꞌabꞌelax selelo bꞌit yet tzalahilal.
34 Haꞌ anma ah Hesbón kaw chiꞌel yaw yu isyaꞌtajil, chitaapni yel yaw bꞌey Eleale yebꞌ bꞌey Jahaza, abꞌelaxpaxo yel yaw bꞌey Zoar masanta bꞌey Horonaim, yebꞌ bꞌey Eglat-selesiyá; tajkanokanh ej isnuqꞌ ha haꞌ bꞌey Nimrim.
35 Chalnipaxo Komam Jahawil: «Chintanhtzekanilojan xol ebꞌnaj Moab makta chiyalte isxahanbꞌal iswiꞌla witz nahat yekanh yebꞌ makta chisnhus teꞌ pom tet istioxh. 36 Yuxin hakaꞌ yoqꞌ flauta yet ay bꞌiskꞌulal, hak tuꞌ yoqꞌ wanmahan yinh anma ah Moab, hakpax tuꞌ xin yoqꞌ wanmahan yinh anma ah Kir-hares yuto xatanhkanilo isqꞌalomal. 37 Haꞌ sunil ebꞌnaj winaj iskꞌupilo xil iswiꞌ, yinipaxilo ebꞌnaj xil istiꞌ, yanipaxiko ebꞌnaj islahwilal isqꞌabꞌ, yanipaxiko ebꞌnaj xilqꞌape yet bꞌiskꞌulal yinh,» xhi Komam.
38 Yalnipaxo Komam: «Sunil yibꞌanhla yakꞌalil teꞌ nha bꞌey Moab yebꞌ yulajla calla, haxanhkꞌanhe oqꞌil chꞌabꞌelaxi, yuto hanin Yahawilintiꞌan, chiwalan ta chiwayojan isyaꞌtajil yibꞌanh Moab, kat istanhkanilo hakaꞌ chu ismaqꞌlaxpoho hunu xi matxa chiꞌochelaxi. 39 ¡Kaw tzꞌayojabꞌ hekꞌul yinh Moab yuto xaꞌay isyaꞌtajil yibꞌanh! ¡Haꞌ anma Moab meltzo yintaj istxꞌixwikanh! Haꞌ Moab, ok anma bꞌuchwal yinh, isxiwkanh sunil konhobꞌ ayko yinhla ishoyanil yilni,» xhi Komam.
40 Yuto hak tiꞌ yu yalnipaxo Komam Jahawil:
«Haꞌ ebꞌnaj ayko ishowal yinh Moab
chihul lemna ebꞌnaj yaqꞌaꞌko howal yinh hakaꞌ chu yay lemna noꞌ tꞌiw leyanto isxikꞌ.
41 Chitzabꞌlaxayo konhobꞌ ay yul ismajul Moab yebꞌ konhobꞌ kaw kꞌul yeko iskꞌubꞌal.
Hayet huneꞌ tzꞌayik tuꞌ haꞌ ebꞌnaj winaj ah Moab kaw helan yinh howal,
chixiwkanh yanma ebꞌnaj hakaꞌ isxiwkanh yanma ix ix lanhan iswatxꞌi iskꞌul.
42 Haꞌ Moab chitanhtzelaxkaniloj,
matxa konhobꞌo chꞌelkanikoj yuto kaw yikanh isbꞌa insatajan.
43 Hanin Yahawilintiꞌan chiwalan: Haꞌ anma ah Moab chiꞌok xiwkilal yinh,
chiwatxꞌelaxo holan yul isbꞌeh, kat yalaxayo txꞌanh lasu sataj.
44 Haꞌ mak chiꞌelkanh yu xiwkilal chitokano yul holan,
haxa mak chiꞌahti yul holan tuꞌ chiꞌaykꞌay yul txꞌanh lasu,
yuto hanin Yahawilintiꞌan chiwitijan isyaꞌtajil yibꞌanh Moab,
chihul istiempohal bꞌay chistohla ismul, xhi Komam.
45 Haꞌ bꞌey Hesbón iskol isbꞌa makta matxa yip yu yelkanh; yajaꞌ haꞌ bꞌey Hesbón tuꞌ,
iskonhobꞌ naj rey Sehón elti xaj qꞌa qꞌaꞌ yinh, isto lebꞌo qꞌaꞌ tuꞌ, isnhusnito txꞌotxꞌ Moab,
yebꞌ anma ah Moab, anma iswiꞌehal kaw loloꞌ chute isbꞌa.
46 ¡Kꞌanchꞌan hach Moab! ¡Matanhkanilo konhobꞌ chiyiyo isbꞌa tet tioxh Quemos!
Haꞌ hekꞌahol ilaxkanto ebꞌnaj preso nan konhobꞌal,
yebꞌ hekutzꞌin ilaxpaxkanto preso nan konhobꞌal.
47 Yajaꞌ chiwalan ta haꞌ yinh islahobꞌal tzꞌayik
chiwaqꞌ meltzohojan ebꞌnaj Moab tuꞌ iskonhobꞌ hunelxa,» xhi Komam Jahawil.
Hata bꞌey tiꞌ chitanhkano isyaꞌtajil Moab.