Hal-laxkano isyaꞌtajil chihul yibꞌanh ebꞌnaj amonita
49
Hak tiꞌ yu istzotel Komam Jahawil yibꞌanhilo ebꞌnaj amonita:«¿Tom machi yuninal ebꞌnaj Israel? ¿Tom machi iskꞌahol ebꞌnaj Israel bꞌay kankano istxꞌotxꞌ,
yuxin haꞌ hunteqꞌan anma chiyiyo isbꞌa tet tioxh Milcom majnhehayo istxꞌotxꞌ yaꞌ Gad?
¿Tzet yinh xin ebꞌnaj amonita ay yulajla iskonhobꞌ ebꞌnaj yuninal yaꞌ Gad tuꞌ?
2 Yajaꞌ hanin Yahawilintiꞌan, chiwalan ta chiꞌapni istzꞌayikal bꞌay chiꞌabꞌelax aw yet howal bꞌey konhobꞌ Rabá,
isniman konhobꞌ ebꞌnaj amonita. Haꞌ konhobꞌ Rabá tuꞌ chiꞌuchkꞌalaxkantoj, qꞌalemxanhe chꞌelkanikoj,
kat istzꞌato sunil iskonhobꞌ ebꞌnaj amonita tuꞌ yu qꞌa qꞌaꞌ, kat ismeltzopaxo iskonhobꞌ ebꞌnaj Israel yul isqꞌabꞌ hunelxa.
3 ¡Hex konhobꞌ Hesbón okanhwe yinh bꞌiskꞌulal yuto tanhtzelaxkanilo konhobꞌ Hai!
Hex iskutzꞌin ebꞌnaj ah Rabá ¡okanhwe yinh bꞌiskꞌulal, aweko xilqꞌape yet bꞌiskꞌulal teyinh!
¡Oqꞌanhwej ekꞌanhwe hoyon yul konhobꞌ yu takkꞌulal!
Yuto ilaxto hetioxh Milcom presohal,
hun xin yu yilaxto ebꞌnaj sacerdote yebꞌ ebꞌnaj yahaw konhobꞌ yinta hetioxh tuꞌ.
4 ¿Tzet yinh xin kaw loloꞌ cheyute hebꞌa yu hetxꞌotxꞌ kaw akꞌal, kaw yax sat?
Hex konhobꞌ kaw manhkꞌom hex tiꞌ, wal tinanh xaꞌetaxkanto hetxꞌotxꞌ kaw akꞌal, yax sat.
Hex tiꞌ haꞌ yinh heqꞌalomal kaw chikawxi hekꞌul, cheyalni: “¿Maktaxka chisje yul howal jinh?” kexchi.
5 Hanin Yahawil kaw aykano yip, chiwatojan xiwkilal teyibꞌanh.
Yuxin haꞌ sunil konhobꞌla ayko yinhla hehoyanil chexaqꞌni xiwoj,
chextzumbꞌelaxilo yul hekonhobꞌ, matxa mak xin chexkutxbꞌanikoj.
6 Yajaꞌ hanin Yahawilintiꞌan,
chiwalan ta haxa yet islahobꞌal chiwaqꞌ meltzohojan ebꞌnaj ah Amón tiꞌ bꞌey iskonhobꞌ hunelxa,» xhi Komam.
Hal-lax isyaꞌtajil chihul yibꞌanh konhobꞌ Edom
7 Komam Jahawil, Yahawil yinh Sunil, hak tiꞌ yalni yinh ebꞌnaj Edom hakaꞌ tiꞌ:
«¿Tom matxa helanile bꞌey konhobꞌ Temán?
¿Tom xatanhkanilo ishelanil ebꞌnaj winaj kaw helan?
¿Tom maꞌetaxkanto ishelanil ebꞌnaj tuꞌ?
8 ¡Hex ah Dedán, elanhwekanh, meltzanhwe teyintaj, ebꞌawe hebꞌa yulaj holan nahat yich!
Yuto chintanhtzelojan iskonhobꞌ naj Esaú, xaꞌapni istiempohal bꞌay chiwayojan isyaꞌtajil yibꞌanh ebꞌnaj edomita tiꞌ.a
9 Qꞌinalo ta chꞌapni ebꞌnaj uxum uva yilal chákano hunta yachan teꞌ xol istel.
Qꞌinalo ta chꞌapni ebꞌnaj elqꞌom yet aqꞌbꞌalil teyinh hanhe tzet kaw chiꞌokniko yu ebꞌnaj, haꞌ chiyito ebꞌnaj.
10 Yajaꞌ wal hinan matxa hunu tzet chiwakanojan bꞌey Edom, iskonhobꞌ naj Esaú,
hakaꞌta kaw chintꞌilbꞌakanojan naj,
chiwinilojan yenhel tzetaj iswatxꞌe yinh ewantajil, matxa chu yebꞌanto isbꞌa.
Chitanhtzelaxkanilo yuninal ebꞌnaj ah Edom,
kat istanhtzelaxpaxilo yuxhta ebꞌnaj yebꞌ konhobꞌ ayayo yinhla ishoyanil iskonhobꞌ ebꞌnaj. Matxa hunu mak chikankanoj.
11 Haꞌ yuninal ebꞌnaj chikankano mebꞌaꞌil haninxahan chiwaqꞌ chꞌibꞌojan,
haxa ebꞌix hunix chikankanoj, winhan chikawxi iskꞌul ebꞌix,» xhi Komam.
12 Yuto hak tiꞌ yu yalnipaxo Komam Jahawil hakaꞌ tiꞌ: «Haꞌ anma mach yeto ay yay isyaꞌtajil yibꞌanh, haꞌ tinanh yinh kaw yeli yilal yay isyaꞌtajil yibꞌanh. ¿Haꞌ tom xin hex chexkolcha tet sunil isyaꞌtajil yilal yay teyibꞌanh? Wal xin mach chexkolchahi, yinh kaw yeli chꞌay isyaꞌtajil teyibꞌanh hakaꞌto chꞌaqꞌlax howla vino teyet,» xhi Komam. 13 Yalnipaxo Komam: «Waqꞌ bꞌinaho inbꞌihan, walnihan ta haꞌ konhobꞌ Bosra chiꞌuchkꞌalaxkantoj, kaw tzꞌinan chukanoj, kat yaykano tzꞌaktiꞌ yibꞌanh, kat yokkano yinh txꞌixwilal. Haxa sunil konhobꞌ ay yul ismajul Bosra tuꞌ chitanhtzelaxkanilo yinh hunelnhe,» xhi Komam.
14 Xawabꞌehan ta haꞌ Komam Jahawil chejnhe huneꞌ naj chejabꞌ yalno tet sunil nimeta konhobꞌ hakaꞌ tiꞌ:
«Kutxbꞌaweko hebꞌa, kat heto yinh Edom, ahanhweto heyaqꞌaꞌ howal yinh,» xhi Komam.
15 Yalnipaxo Komam: «Wal tinanh matxa yelapno chexelkaniko xolaj nimeta konhobꞌ yul insatan,
kaw chexyahlaxkano xol heyet anmahil.
16 Haꞌ hewinajil chiꞌalaxikoj yebꞌ isloloꞌal heyanma, haꞌ kexaqꞌni subꞌchahoj.
Haꞌ yulaj chꞌen nhachꞌen ay satla chꞌen nime chꞌen ay iswiꞌla witz ay hex.
Waxanhka kaw nahat cheyakanh heyatut hakaꞌ noꞌ tꞌiw chiswatxꞌe yatut satla chꞌen nime chꞌen kaw nahat yekanh,
ha tuꞌ chexinqꞌojaytijan.
17 Haꞌ konhobꞌ Edom chiꞌuchkꞌalaxtoj,
sunil mak chꞌekꞌto iskawilal Edom tiꞌ chitakkanh iskꞌul,
kat isxiwkanh yet chilni sunil isyaꞌtajil chiꞌay yibꞌanh Edom tiꞌ.
18 Hanin Yahawilintiꞌan, chiwalan ta hakaꞌ yu istanhkanilo konhobꞌ Sodoma yebꞌ konhobꞌ Gomorra yebꞌ konhobꞌla ayayo iskawilal.
Hak tuꞌ chu istanhilo konhobꞌ Edom,
matxa mak chikankano yul, nitam hunu chiꞌehayo bꞌey tuꞌ.
19 Hakaꞌ chu yelti hunu noꞌ bꞌalam xolaj qꞌebꞌtaj ay istiꞌla haꞌ Jordán kat yapni sat cheqꞌanh,
hak tuꞌ chu wapnihan yinh konhobꞌ Edom, konhobꞌ kaw kꞌulchꞌan yebꞌ kaw kanhye chute isbꞌa.
Yuto kaw toxa chintzumbꞌelojan anma ah Edom tuꞌ yul iskonhobꞌ,
hanhe xin mak chinsikꞌilojan haꞌ chiꞌeh yul konhobꞌ tuꞌ.
¿Mak hunu tiꞌ lahan hinan yebꞌi? yebꞌ xin
¿Mak chu yok inselelojan?
¿Mak hunu tanhem anma chisje kinislinhbꞌanan?
20 Yuxin abꞌewe tzet xaꞌinnahan Hanin Yahawilintiꞌan yinh konhobꞌ Edom,
yebꞌ tzet nabꞌilxa wuhan yinh anma ay bꞌey Temán.
Yinh kaw yeli haꞌ hunteqꞌan anma tiꞌ chitanhtzelaxiloj, kat yuchkꞌalaxto bꞌay aya,
haxa yuninal xin chiꞌilaxto hakaꞌ chu ishatxlaxto nixhte yunin meꞌ.
21 Kaw chibꞌili txꞌo txꞌotxꞌ yet chitanhilo konhobꞌ Edom, yuto kaw ip chiꞌaykꞌayi,
hata bꞌey haꞌ Kajinh Mar chiabꞌelax istaqꞌwi yul isnuqꞌ.
22 Haꞌ ebꞌnaj ayko ishowal yinh konhobꞌ Bosra chꞌapni lemna ebꞌnaj howal yinh,
hakaꞌ yapni lemna noꞌ tꞌiw leyanilto xikꞌ.
Hayet huneꞌ tzꞌayik tuꞌ haꞌ ebꞌnaj soldado kaw helan,
chixiwkanh yanma ebꞌnaj hakaꞌ ix ix lanhan iswatxꞌi iskꞌul,» xhi Komam.
Hal-laxkano isyaꞌtajil chul yibꞌanh konhobꞌ Damasco
23 Yalnipaxo Komam:
«Haꞌ anma ah Hamat yebꞌ Arfad kaw matxa nawi yu tzet chute isbꞌa,
yuto apni isqꞌumal tet ta chitanhtzelaxilo konhobꞌ Damasco,
haꞌ anma tuꞌ paxilo yip yu xiwkilal, matxa aqꞌankꞌulalo yehi.
24 Haꞌ anma ah Damasco matxa yip, yajaꞌ ok yinh isnabꞌal yelkanh,
ok niman xiwkilal yinh, isluylunkanh,
yay isyaꞌtajil yibꞌanh, yabꞌen isyaꞌil hakaꞌ isyaꞌil chiyabꞌe ix ix yet lanhan iswatxꞌi iskꞌul.
25 ¡Haꞌ konhobꞌ Damasco kaw chitikꞌa alaxiko ismay,
xabꞌejlaxkanoj! ¡Haꞌ konhobꞌ tuꞌ kaw chitikꞌa kintzalahan yinh!
26 Hanin, Yahawil yinh sunil, chiwalan:
Haꞌ ebꞌnaj tzehtaj ah Damasco chꞌaykꞌay ebꞌnaj yulaj txonhbꞌal,
kat iskam sunil ebꞌnaj winaj yet howal yet huneꞌ tzꞌayik tuꞌ.
27 Chiwakojan huneꞌ qꞌaꞌ yinh iskꞌubꞌal konhobꞌ Damasco,
chisnhusnikanto qꞌaꞌ hunteqꞌan ispalacio naj rey Ben-adad,» xhi Komam Jahawil.
Hal-laxkano isyaꞌtajil chiꞌay yibꞌanh konhobꞌ Cedar yebꞌ konhobꞌ Hazor
28 Yinh konhobꞌ Cedar yebꞌ yinh konhobꞌla ay yul ismajul Hazor,b hunteqꞌan konhobꞌ qꞌoji naj rey Nabucodonosor, isreyal Babilonia, hak tiꞌ yalni Komam Jahawil:
«Ahanhwewanoj, ahanhweto howal yinh konhobꞌ Cedar,
kat hetanhtzenilo ebꞌnaj iskꞌahol ebꞌnaj winaj ay yinh yetkꞌulal bꞌay chiꞌahilo tzꞌayik.
29 Haꞌ ismantiado ebꞌnaj aykanh yatutoj, yebꞌ iswakax ebꞌnaj cheyitoj;
yebꞌ iscortina ebꞌnaj yebꞌ ismunlabꞌal ebꞌnaj, yebꞌ iscamello ebꞌnaj cheyipaxtoj.
Chꞌel yaw anma yinh kaw ip yinh ebꞌnaj hakaꞌ tiꞌ: “Kaw ay xiwkilal sunil bꞌaya,” xhi.
30 Yalni Komam Jahawil:
“¡Hex ah Hazor, elanhwekanh! Nahat chextohi,
ebꞌawe hebꞌa yulaj nime holan nahat yich, yuto haꞌ naj Nabucodonosor,
isreyal Babilonia xaꞌok yinh isnabꞌal naj yul yaniko howal teyinh,
xaꞌislahtiꞌnhe isbꞌa naj yebꞌ issoldado yinh tzet chu isqꞌoji teyinh,” xhi Komam.
31 Chalnipaxo Komam Jahawil:
“¡Ahanhwewanoj, ahanhweto heyaqꞌaꞌ howal yinh konhobꞌ Hazor,
huneꞌ konhobꞌ kaw aqꞌankꞌulal yehi!
Kaw matzet chal iskꞌul, machi ispultahil iskonhobꞌ,
machipaxo istel ispultahil yatut, haꞌ huneꞌ konhobꞌ tuꞌ kaw ischukil.
32 Chꞌelqꞌalaxto iscamello yebꞌ iswakax ebꞌnaj ah Hazor tuꞌ,
chiwaqꞌni sajlemotojan ebꞌnaj sunil bꞌayejtuꞌwal, kaw nahat chinqꞌojkantojan ebꞌnaj.
Chiwaqꞌtijan sunil isyaꞌtajil yibꞌanh ebꞌnaj bꞌayxanhetuꞌwal ay ebꞌnaj,” xhi Komam.
33 Chalnipaxo Komam: Haꞌ konhobꞌ Hazor chimeltzokaniko yatuto noꞌ oj, kaw chitzꞌinhtzꞌonkanoj,
matxa anma chikankanoj, matxapaxo anma chiꞌehayo sat txꞌotxꞌ,» xhi Komam.
Hal-laxkano isyaꞌtajil chiꞌay yibꞌanh konhobꞌ Elam
34 Istzotiꞌ Komam Jahawil hul tet yaꞌ Jeremías, ischejabꞌ Komam, yibꞌanhilo ebꞌnaj Elam, yet yichiko yaꞌ Sedequías reyal bꞌey Judá.
35 Hak tiꞌ yalni Komam Yahawil kaw aykano yip:
«Chinqꞌahtojan islitꞌ ebꞌnaj soldado ah Elam, bꞌay kaw chikawxi iskꞌul.
36 Chiwaqꞌtijan howal yinh ebꞌnaj Elam sunil bꞌayejtuꞌwal,
hakaꞌto chiwatijan nime jaqꞌeqꞌ yibꞌanh, kat yijlaxkanh yu.
Machi hunu konhobꞌ tiꞌ bꞌay machi sajlemito anma ah Elam yet chꞌelkanh.
37 Haꞌ anma ah Elam chiwakojan xiwkilal yinh sata ebꞌnaj soldado chiꞌaniko howal yinh,
kat isxiwkanh sata ebꞌnaj chisaywa yu ismaqꞌlaxkamoj.
Yalnipaxo Komam: “Chiwitijan isyaꞌtajil yibꞌanh anma ah Elam,
chiwanayojan inhowalan yibꞌanh ebꞌnaj,” xhi Komam Jahawil.
Yalnipaxo Komam: “Chiwatijan howal,
kat istzumbꞌelaxikꞌoj kat istanhtzelaxkanilo ebꞌnaj Elam yu espada.
38 Chinokan yahawilo yinh konhobꞌ Elam,
chintanhtzelojan ebꞌnaj rey yebꞌ ebꞌnaj yahaw yinh konhobꞌ Elam,” xhi Komam.
39 Yalnipaxo Komam: Yajaꞌ yinh islahobꞌal tzꞌayik chiwaqꞌmeltzohotijan anma Elam
yul iskonhobꞌ tiꞌ hunelxa,» xhi Komam Jahawil.