Hal-lax isyaꞌtajil chiꞌay yibꞌanh ebꞌnaj ah Babilonia
50
Tzotiꞌ yal Komam Jahawil tet yaꞌ Jeremías ischejabꞌ, yibꞌanhilo ebꞌnaj ah Babilonia:2 «Pujbꞌawekꞌo hunteqꞌan tzotiꞌ tiꞌ tet nimeta konhobꞌ,
cheyaqꞌni ohtanhelaxoj, cheyanikanh qꞌap bandera,
matzet cheyebꞌayoj, yilal heyalnilo hakaꞌ tiꞌ:
“¡Haꞌ konhobꞌ Babilonia xatanhiloj,
haxa tioxh Bel kankano yinh txꞌixwilal, haxa tioxh Merodac maqꞌbꞌilxa pohoj!
¡Haꞌ yechel tzetaj ye tuꞌ watxꞌebꞌil yu ebꞌnaj, etabꞌilxatoj.
Haꞌ hunteqꞌan tioxh chiyal Babilonia isdiosaloj xatanhtzelaxkaniloj!
3 Haꞌ bꞌey norte tit huneꞌ niman konhobꞌ yaqꞌaꞌko howal yinh Babilonia,
kaw chitzꞌinhzꞌonkano Babilonia yu, matxa hunu anma kan yul konhobꞌ,
nitam hunu no noqꞌ kani; sunil xiwkanh istokanoj,” xhi Komam.
4 Haꞌ yinh hunteqꞌan tzꞌayik tuꞌ hun chu ismeltzoti ebꞌnaj Israel yebꞌ ebꞌnaj Judá,
kaw chꞌoqꞌi yet chꞌekꞌi, kat kinissaynihan, hanin Yahawilintiꞌan, isDiosal.
5 Chisqꞌambꞌen ebꞌnaj isbꞌelal konhobꞌ Sión,
kat istit ebꞌnaj konhobꞌ Sión chalni ebꞌnaj:
“¡Titanhwej, kokutxbꞌaweko kobꞌa,
kat komeltzoko yul isqꞌabꞌ Komam Jahawil,
kat kowatxꞌen hunu kotrato yebꞌ Komam!
¡Huneꞌ trato aynhetikꞌa yinh sunilbꞌal ej tiempo,
matxa bꞌaqꞌinhal tiꞌ xin chikonahulnhetoj!” xhi ebꞌnaj.
6 Haꞌ inkonhobꞌtiꞌan lahan hakaꞌ noꞌ meꞌ chikꞌayikꞌoj,
haꞌ ebꞌnaj istanhemal inkonhobꞌan aqꞌni kꞌayotoj,
yaqꞌ kꞌayoto ebꞌnaj inkonhobꞌan iswiꞌla witz.
Yijbꞌakꞌo ebꞌnaj inkonhobꞌan iswiꞌla witz yebꞌ yinhla wonhan,
yaqꞌni kꞌayoto ebꞌnaj hakaꞌ noꞌ meꞌ chisnahulnheto ispeyabꞌil bꞌay chiwayi.
7 Haxa yet yilchayo inkonhobꞌan yu sunil ebꞌnaj ayko ishowal yinh,
ismaqꞌnikamo ebꞌnaj hakaꞌ chu iskꞌuxnayto noꞌ oj noꞌ meꞌ.
Chilayalni ebꞌnaj yinh inkonhobꞌan hakaꞌ tiꞌ:
“Machi komul yinh huneꞌ tiꞌ, yuto haꞌ anma Israel tiꞌ yako ismul tet Yahawil,
tet Dios istoholalnhe chiswatxꞌe, Dios bꞌay kawxi iskꞌul yichmam ebꞌnaj,” xhi ebꞌnaj.
8 Hex inkonhobꞌtiꞌan, elanhwe yul konhobꞌ Babilonia,
elanhwe sat istxꞌotxꞌ ebꞌnaj caldeo.
Lahanojabꞌ cheyute hebꞌa hakaꞌ noꞌ icham chiw, chibꞌabꞌi sata hunmajan noꞌ meꞌ.
9 Yuto chiwitijan hunteqꞌan nimeta konhobꞌ ay bꞌey norte, chiskutxbꞌako isbꞌa,
chiswatxꞌen isbꞌa, kat yahto yanoko howal yinh konhobꞌ Babilonia;
hunteqꞌan konhobꞌ tuꞌ kaw helan yinh howal,
hayet chiqꞌojwa yu islitꞌ mach chikꞌaywahi.
10 Chꞌelqꞌalaxto sunil tzetaj ay ebꞌnaj caldeo yu hunteqꞌan konhobꞌ tuꞌ,
chiyinito sunil tzet chal iskꞌul,» xhi Komam Jahawil.
11 Yalnipaxo Komam: «Yuto hex caldeo hex tiꞌ kaw kextzala yet heyetanto inmajulan;
hex tiꞌ kaw noh hekꞌul yu tzetaj heyelqꞌalo tet inkonhobꞌan,
hakaꞌ noꞌ qꞌopo wakax kaw chinoh iskꞌul bꞌay kaw ay telaj,
kaw kextzala hakaꞌ noꞌ cheh chiꞌekꞌ kꞌirlahi.
12 Haꞌ hekonhobꞌ bꞌay kexpitzkꞌahi hakaꞌta hemiꞌ,
chikankano yinh txꞌixwilal, matxa chinawi yu tzet chute isbꞌa.
Haꞌ chikankano yinh islahobꞌal yinh ej konhobꞌ kat ismeltzokaniko desiertohal, matxa mak chiꞌehayo sat.
13 Yu chitit ishowal Komam yinh Babilonia,
yuxin matxa anma chꞌehayo yul konhobꞌ tuꞌ, wal xin kaw tzꞌinan chukano yinh hunelnhe.
Sunil mak chꞌekꞌto iskawilal Babilonia kaw chikꞌay iskꞌul yilni,
kat isbꞌuchwa yinh yu isyaꞌtajil hul yibꞌanh.
14 ¡Txolbꞌawe hebꞌa kat hehoynayo konhobꞌ Babilonia;
sunil hex kaw helan heqꞌojwa yu teꞌ litꞌ, kaw chexqꞌojwato yinh konhobꞌ yu helitꞌ!
¡Machi xin chebꞌej heqꞌojnito isbꞌaqꞌ helitꞌ tuꞌ, yuto haꞌ anma tuꞌ kaw ay ismul tet Komam Jahawil!
15 ¡Elojabꞌ heyaw yinhla ishoyanil Babilonia, cheyalni ta cheyako howal yinh!
¡Lanhan istanhilo Babilonia, lanhan yaykꞌay istorrehal, lanhan yaykꞌay iskꞌubꞌal!
¡Haꞌ huneꞌ tiꞌ ispaj selel chaqꞌ Komam Jahawil tet!
¡Hakexpax tuꞌ, pajtzewe tet, haꞌ tzet iswatxꞌe yinh ej konhobꞌ haꞌ chewatxꞌepaxo yinh!
16 Tanhtzewelo ebꞌnaj tzꞌunum tzꞌunubꞌ ah Babilonia,
yebꞌ ebꞌnaj chikꞌupnikanh sat istzꞌunubꞌ yet yok hatxꞌo.
Hayet chiꞌichiko howal bꞌey Babilonia sunil anma nan konhobꞌal ay yul konhobꞌ tuꞌ chimeltzoto yul iskonhobꞌ;
hununtajil yelkanh anma tuꞌ, kat ismeltzo sat istxꞌotxꞌ.
17 Hakaꞌ noꞌ meꞌ kꞌaynatoj, tzumbꞌebꞌilikꞌo yu noꞌ bꞌalam,
hak tuꞌ ye anma Israel.
»Haꞌ yinh bꞌabꞌelal, haꞌ naj rey ah Asiria aqꞌni kꞌayoto, lahwi tuꞌ, haxa naj Nabucodonosor, isreyal Babilonia, haxa kaw tanhtzenkaniloj. 18 Yuxin hak tiꞌ yalni Komam Jahawil, yahawil kay aykano yip, isDiosal Israel: Haninan chiwayojan isyaꞌtajil yibꞌanh naj isreyal Babilonia, yebꞌ yibꞌanh istxꞌotxꞌ, hakaꞌ yu wanayojan isyaꞌtajil yibꞌanh naj isreyal Asiria.
19 Chiwaqꞌ meltzohojan anma Israel sat istxꞌotxꞌ hunelxa,
chisloni sunil tzet chꞌel sat txꞌotxꞌ Carmelo, txꞌotxꞌ Basán,
txꞌotxꞌ chewal txꞌotxꞌ Efraín yebꞌ txꞌotxꞌ Galaad;
kaw xin aynhetikꞌa tzet chislo bꞌey tuꞌ, kaw nohnanhetikꞌa iskꞌul.
20 Hayet huneꞌ tiempohal tuꞌ, xhi Komam Jahawil, chisaylax ismul Israel, yajaꞌ matxa chiꞌilchalo ismul,
hakpax tuꞌ anma ah Judá machi ismul chiꞌilchaloj,
yuto chiwaqꞌ nimankꞌulalan yinh ismul anma Israel yebꞌ anma Judá chitokankanoj.
21 ¡Hanin Yahawilintiꞌan chexinchejan:
Ahanhweto heyaqꞌaꞌko howal yinh konhobꞌ Merataim yebꞌ yinh anma ay bꞌey Pecod,
okanhwe tzujno yintaj, kat hetanhtzenkaniloj,
kat hewatxꞌen sunil hakaꞌtikꞌa walnihan teyet tiꞌ!» xhi Komam.
22 ¡Kaw chibꞌili yaqꞌlax howal sat txꞌotxꞌ Babilonia,
lanhan yay niman isyaꞌtajil yibꞌanh txꞌotxꞌ!
23 ¡Haꞌ Babilonia lahantikꞌa yip hakaꞌ hunu martillo ismaqꞌ poho ej konhobꞌ sat txꞌo txꞌotxꞌ tiꞌ!
¡Yajaꞌ wal tinanh xin xaqꞌahkantoj, xamaqꞌlaxpohoj!
¡Haꞌ anma ay yulajla nimeta konhobꞌ kaw chixiw yabꞌen niman isyaꞌtajil ay yibꞌanh Babilonia!
24 Yalni Komam: «Hex ah Babilonia wayojan txꞌanh lasu tesataj, machi xin heyil heyay yul txꞌanh,
kexkankano preso yul txꞌanh, yuto heyaqꞌtij inhowalan,» xhi Komam Yahawil.
25 Hanin Yahawilintiꞌan inhajan inkꞌuwanbꞌalan bꞌay ay munlabꞌal yet howal,
winahtijan yu inyenilojan inhowalan.
Hanin Yahawil, kaw aykano yip, haꞌ huneꞌ tiꞌ inwatxꞌehan sat istxꞌotxꞌ ebꞌnaj caldeo.
26 Hex konhobꞌ kaw nahat ayexkantoj,
titanhwe heyaqꞌaꞌko howal yinh Babilonia.
Hajwelti tzet chislo tenbꞌabꞌil. Meltzoweko hunteqꞌan konhobꞌ tuꞌ hakaꞌ huntenan yekꞌlenal nha,
kat hetanhtzenkaniloj.
27 Potxꞌwekamo sunil noꞌ tzehla wakax; iweto bꞌey kambꞌal.
¡Ay kaw kꞌanchꞌan ebꞌnaj ah Babilonia,
yuto xaꞌapni istzꞌayikal yebꞌ xin istiempohal bꞌay chiꞌay isyaꞌtajil yibꞌanh ebꞌnaj!
28 Haꞌ anma Israel ay bꞌey Babilonia elkanh, ismeltzo bꞌey konhobꞌ Sión,
yok yalno yinh tzet yu yaqꞌni Komam Jahawil,
isDiosal, ispaj selel tet anma ah Babilonia tuꞌ yu ej istxꞌojal iswatxꞌe.
Yaqꞌnipaxo Komam ispaj selel tet yuto yuchkꞌato ebꞌnaj Yatut Komam.
29 Yalni Komam: «Hex yet howal kaw helan hex heqꞌojwa yu teꞌ litꞌ,
kutxbꞌaweko hebꞌa kat heyaniko howal yinh Babilonia.
Watxꞌewekanh hemantiado yinhla ishoyanil konhobꞌ.
Matxahojabꞌ hunu ebꞌnaj ah konhobꞌ chiꞌelkanh,
aqꞌwe ispaj selel tet hakaꞌtikꞌa tzet iswatxꞌe,
yuto haꞌ hunteqꞌan anma tiꞌ kaw yikanh isbꞌa insatajan,
hanin Yahawilintiꞌan, isDiosal Israel, hanin machi istxꞌojal winhan.
30 Yuxin haꞌ ebꞌnaj tzehtaj chiꞌaykꞌayi, kat yekꞌ pakꞌla ebꞌnaj yul txonhbꞌal,
hakpax tuꞌ ebꞌnaj winaj yet howal chitanhkanilo ebꞌnaj yinh huneꞌ tzꞌayik tuꞌ.
31 Hanin Yahawilintiꞌan, yahawil yinh sunil, chiwalan:
Hex ah Babilonia, hex kaw loloꞌ cheyute, chiwiti inhowalan teyinh;
xaꞌayilo istzꞌayikal bꞌay chiꞌay isyaꞌtajil teyibꞌanh.
32 Haꞌ anma ah Babilonia kaw loloꞌ chute isbꞌa, chitxaqꞌmohi,
kat yaykꞌaykanoj, machi xin mak chikolwa yinh yinikanh.
Chintzujbꞌakojan qꞌaꞌ yinh iskonhobꞌ,
chinnhusnipaxkantojan sunil ej konhobꞌ hoyaniko yinh.
33 Haꞌ Komam Jahawil kaw aykano yip, halni hakaꞌ tiꞌ:
Haꞌ ebꞌnaj Israel yebꞌ ebꞌnaj Judá kaw etalax ebꞌnaj yu anma bꞌay ilaxto preso,
machi xin isje hunteqꞌan anma tuꞌ isbꞌejtzo ebꞌnaj.
34 Haꞌ Komam chikolni ebꞌnaj, kaw aykano yip Komam.
Komam Yahawil yinh sunil, hak tuꞌ isbꞌi Komam.
Haꞌ Komam chiwatxꞌen istoholal yinh ebꞌnaj, chꞌaqꞌni aqꞌankꞌulal tet ebꞌnaj yul iskonhobꞌ.
Wal yibꞌanh ebꞌnaj ah Babilonia hanhe xiwkilal chiyatoj.
35 Chitejlaxkamo ebꞌnaj caldeo yu chꞌen espada, xhi Komam Jahawil.
Yebꞌpaxo anma ay yul konhobꞌ Babilonia, yebꞌ ebꞌnaj yahaw yebꞌ ebꞌnaj winaj kaw ay yitzꞌatil iswiꞌ.
36 Chitejlaxpaxo kamo ebꞌnaj ahbꞌelom, kat issukbꞌikanilo iskꞌul,
kat istejlaxkamo ebꞌnaj winaj kaw helan yinh howal, kat istanhtzelaxkanilo ebꞌnaj.
37 Chitejlaxkamo ischeh ebꞌnaj yet howal ay bꞌey Babilonia, kat istanhtzelaxilo iscarruaje ebꞌnaj,
kat istejlaxkamo sunil ebꞌnaj soldado loqꞌbꞌilti hunxa nan konhobꞌal,
kat isxiwkanh ebꞌnaj hakaꞌ ebꞌix ix.
Chꞌaqꞌlelax howal yinh isqꞌalomal ebꞌnaj ah Babilonia, kat yelqꞌalaxtoj.
38 Chitajkanh ha haꞌ ay bꞌey txꞌotxꞌ tuꞌ yuto haꞌ hunteqꞌan anma kaw nohna iskonhobꞌ yu ej tioxh,
xaꞌetaxto yul iswiꞌ hunteqꞌan anma tuꞌ yu yinayo isbꞌa sata tioxh yahbꞌetaj.
39 Yuxin haꞌ bꞌey konhobꞌ Babilonia haxanhe noꞌ xoltelajil noqꞌ aya,
yebꞌ noꞌ oj, haxanhe nixhte yunin noꞌ avestruz chiꞌehayoj.
Matxa bꞌaqꞌinhal xin chipoh anma bꞌey tuꞌ; matxa xin yuninal ebꞌnaj chiꞌehayoj.
40 Hanin Yahawilintiꞌan chiwalan ta hakaꞌ yu wuchkꞌantojan konhobꞌ Sodoma yebꞌ konhobꞌ Gomorra yebꞌ ej konhobꞌ hoyaniko yinh,
hak tuꞌ chukanoj, chitanhkanilo sunil anma,
matxa hunu mak chꞌehayo sat txꞌotxꞌ bꞌey tuꞌ.
41 Chitit huneꞌ niman konhobꞌ bꞌey txꞌotxꞌ norte, kaw nimajal,
tzetkꞌa ebꞌnaj reyes kaw nahat aya chitita.
42 Haꞌ hunteqꞌan ebꞌnaj tuꞌ iqꞌbꞌil islitꞌ yebꞌ islanza ebꞌnaj yu, kaw how iswiꞌ ebꞌnaj,
kaw machi tzꞌay iskꞌul ebꞌnaj ispotxꞌni yet anmahil.
Hayet chꞌel yaw ebꞌnaj lahan yaw hakaꞌ haꞌ mar.
Chiꞌahto ebꞌnaj yibꞌanh ischeh. ¡Chiswatxꞌen isbꞌa ebꞌnaj, kat yul ebꞌnaj yaqꞌno howal yinh Babilonia!
43 Hayet yabꞌen naj rey ah Babilonia huneꞌ tuꞌ, ispaxilo yip isqꞌabꞌ naj yu xiwkilal,
kaw yaꞌ yuko yinh yanma naj hakaꞌ isyaꞌil chiyabꞌe hunu ix ix yet chiwatxꞌi iskꞌul.
44 Hakaꞌ hunu noꞌ bꞌalam chiꞌelti xolaj qꞌebꞌtaj ay istiꞌla haꞌ Jordán, kat isto sat cheqꞌanh,
hak tuꞌ chu wapni lemnahan yinh konhobꞌ Babilonia,
yuto haꞌ anma ay yul konhobꞌ kaw toxa chintzumbꞌelojan bꞌey tuꞌ,
haxa xin mak chinsikꞌilojan haꞌ chꞌekꞌ yul konhobꞌ tuꞌ. ¿Mak hunu mak tiꞌ chinlahbꞌa hinbꞌahan yebꞌi?
Yebꞌ xin ¿mak hunu chiqꞌoji winhan?
¿Mak hunu naj chitanhen anma chinpitnikojan yinh?
45 Yuxin hanin Yahawilintiꞌan,
kaw abꞌewe tzet nabꞌilxa wuhan yinh Babilonia yebꞌ tzet chꞌekꞌ yinh innabꞌalan yinh istxꞌotxꞌ ebꞌnaj caldeo.
Yinh kaw yeli, haꞌ yuninal ebꞌnaj caldeo chiꞌilaxtoj hakaꞌ chu ishatxlaxto nixhte yunin meꞌ,
chimaqꞌlaxkamo ebꞌnaj ah Babilonia, kat yuchkꞌalaxkanto bꞌay ay ebꞌnaj.
46 Hayet yabꞌelax yel aw ta tanhilo Babilonia kaw bꞌili txꞌo txꞌotxꞌ,
haꞌ huneꞌ aw tuꞌ kaw abꞌelaxpaxo yulajla konhobꞌ,» xhi Komam.