Isyaꞌtajil chiyayo Komam Jahawil yibꞌanh Babilonia
51
Hak tiꞌ yu yalni Komam Jahawil:«Chiwatojan huneꞌ niman isyaꞌtajil yibꞌanh Babilonia yebꞌ yibꞌanh anma ay yul ismajul Babilonia;
hakaꞌ istit hunu niman howla jaqꞌeqꞌ, yuto haꞌ hunteqꞌan anma tuꞌ, ah lemna howal winhan.
2 Chinchejtojan ebꞌnaj winaj chitzumbꞌenilo anma ah Babilonia yul iskonhobꞌ
hakaꞌ chu isxunito jaqꞌeqꞌ isqꞌalemal ixim trigo, hak tuꞌ chiꞌutelaxi.
Matxa hunu anma chikan sat istxꞌotxꞌ ebꞌnaj,
yuto haꞌ yinh istzꞌayikal bꞌay chiꞌay isyaꞌtajil yibꞌanh Babilonia,
chiꞌalaxiko howal yinh yu ej konhobꞌ chitit sunil bꞌayejtuꞌwal.
3 Haꞌ tet ebꞌnaj kaw helan isqꞌojwa yu teꞌ litꞌ
yebꞌ tet ebꞌnaj yet howal kaw helan ispichni istxam iskꞌul yu chꞌen coraza, chiwalan:
“Mach cheyaqꞌ nimankꞌulal yinh ebꞌnaj tzehtaj ah Babilonia, maqꞌbꞌil hepotxꞌni ebꞌnaj,
chetanhtzenpaxkanilo sunil ebꞌnaj winaj yet howal,” kinchihan tet ebꞌnaj.
4 Haꞌ sunil sat istxꞌotxꞌ ebꞌnaj caldeo chikankano pakꞌno isnimanil anma chipotxꞌlaxkamoj,
kat istejlaxkamo anma yu lanza yulaj calla.
5 Waxanhka nohilo yul iskonhobꞌ ebꞌnaj Israel yebꞌ Judá yu istxꞌojal iswatxꞌe,
yaniko ismul wetan, yajaꞌ mach bꞌejbꞌilokano ebꞌnaj wuhan hanin isDiosal ebꞌnaj,
Yahawil yinh sunil, machi istxꞌojal winhan.
6 ¡Elanhwekanh yul konhobꞌ Babilonia yu hekolni hebꞌa,
haxinwal mach chexkam yinta anma tuꞌ yu ej ismul yakoj!
Yuto hanin Yahawilintiꞌan chiwaqꞌan ispaj selel tet, istoholo ismul.
7 Haꞌ Babilonia tiꞌ lahantikꞌa hakaꞌ hunu copa nabꞌa oro yul inqꞌabꞌan,
haꞌ aqꞌni isyaꞌtajil tet ej konhobꞌ ay sat txꞌo txꞌotxꞌ tiꞌ,
hakaꞌto yaqꞌ vino yukꞌuꞌ ej konhobꞌ, iskamtzenilo iswiꞌ yu vino.
8 Yajaꞌ yinh kaw anhe aykꞌay Babilonia, kaw kokꞌ elkanikoj.
Oqꞌanhwe yinh, cheyiniti bálsamo chiꞌanhteni, kꞌuxantaxka chito anhchahi,» xhi Komam.
9 Haꞌ ebꞌnaj nan konhobꞌal ay bꞌey Babilonia chihalni: «Xajanhtehanh Babilonia tiꞌ, yajaꞌ machi anhchahi.
Kobꞌejawekanoj, meltzojonhwetoj hununonh kokonhobꞌ,
yuto haꞌ ismul anma ah Babilonia tiꞌ xaꞌahapno satkanh, xapalkꞌonahto yibꞌanh moyan,» xhi ebꞌnaj.
10 Yalnipaxo ebꞌnaj Israel yebꞌ Judá: «Lanhan isyenilo Komam Jahawil istoholal yinh.
Tonhwe bꞌey konhobꞌ Sión chijalnikꞌo tzet iswatxꞌe Komam Jahawil, koDiosal,» xhi ebꞌnaj.
11 ¡Hex yet howal helan cheyute hebꞌa, yebꞌ helitꞌ cheyaniko chꞌen coraza istxam hekꞌul!
Xayako Komam Jahawil yinh isnabꞌal isreyal Media yul yaniko howal yinh Babilonia,
xaꞌok yinh isnabꞌal Komam istanhtzenilo Babilonia.
Chiyaqꞌ Komam ispaj selel tzet iswatxꞌe,
chispajtzenpaxo Komam ismul yet yuchkꞌanto ebꞌnaj ah Babilonia tiꞌ Yatut Komam.a
12 ¡Awekanh qꞌap bandera yibꞌanh iskꞌubꞌal konhobꞌ Babilonia,
aweko yaqꞌbꞌil isbꞌisil ebꞌnaj soldado yu yiqꞌni yip ebꞌnaj,
aweko istanhemal! Majwanhwe yinh ebꞌnaj yinh ewantajil kat yaykꞌay ebꞌnaj yul heqꞌabꞌ,
yuto haꞌ tzet xaꞌisna Komam Jahawil yinh anma ah Babilonia chiyij isbꞌa yu Komam.
13 Hex ah Babilonia, hex tiꞌ, ayexayo xolbꞌal haꞌ nime haꞌ, kaw qꞌalomexkanoj,
yajaꞌ wal tinanh maꞌapni istzꞌayikal bꞌay chextanhkaniloj,
chilahwikano tzet ye tuꞌ cheyochekoj.
14 Haꞌ Komam Yahawil kaw aykano yip, yaqꞌ bꞌinaho isbꞌi, yalni hakaꞌ tiꞌ:
«Haninan chiwaqꞌtijan ebꞌnaj winaj yet howal teyinh,
kat isnohilo sat hetxꞌotxꞌ tiꞌ yu ebꞌnaj, xanhe chꞌekꞌ bꞌulbꞌon ebꞌnaj hakaꞌ noꞌ qꞌul,
kat yahwi ebꞌnaj yinh kaw ip, chalni ebꞌnaj ta chiqꞌoji ebꞌnaj teyinh,» xhi Komam.
15 Haꞌ Komam Jahawil watxꞌenhe txꞌo txꞌotxꞌ tiꞌ yu yip, iswatxꞌen Komam yul yibꞌanhqꞌinal tiꞌ yu ishelanil,
islehbꞌanto Komam satkanh yet iswatxꞌen yu yitzꞌatil iswiꞌ.b
16 Hayet chalni Komam, chiswatxꞌen isbꞌa haꞌ nime nhabꞌ yul satkanh;
haꞌ Komam chiꞌinikanh moyan sunil bꞌayejtuꞌwal,
masanta bꞌay chikachnakan apno txꞌo txꞌotxꞌ tiꞌ.
Haꞌ Komam chiwatxꞌen kꞌuh, kat isnhirlahi, chaqꞌni haꞌ nhabꞌ,
haꞌ Komam chiꞌinilo jaqꞌeqꞌ yul yehobꞌal.
17 Haꞌ sunil ebꞌnaj winaj kaw lutꞌ chute isbꞌa ebꞌnaj yebꞌ xin kaw machi isnabꞌal ebꞌnaj.
Haꞌ ebꞌnaj kaw helan iswatxꞌen tioxh, chilo istxꞌixobꞌal ebꞌnaj yu hunteqꞌan tioxh tuꞌ,
yuto matzet chal yelapnoj, yebꞌ xin mach itzitzoj.
18 Wal xin kaw matzet chal yelapnoj hunteqꞌan tioxh tuꞌ, yuxin yet ay isbꞌuchlaxi,
hayet chiꞌapni istzꞌayikal isyaꞌtajil kat istanhkaniloj.
19 Wal Komam Jahawil, isDiosal yaꞌ Jacob mach lahano Komam yebꞌ hunteqꞌan tioxh tuꞌ,
yuto haꞌ Komam watxꞌenhe sunil tzet aya.
Haꞌ Komam sikꞌnilo konhobꞌ Israel iskonhobꞌoj, Komam Yahawil kaw aykano yip, hak tuꞌ isbꞌi Komam.
20 Yalni Komam Jahawil: «Hex ah Babilonia lahan hex hakaꞌ hunu martillo yul inqꞌabꞌan,
yebꞌ xin lahan hex yebꞌ chꞌen chꞌen yet howal yul inqꞌabꞌan, hex chexinqꞌanan yu hetanhtzenilo nimeta konhobꞌ,
yebꞌ yu hetanhtzenilo ebꞌnaj isreyal ej konhobꞌ.
21 Hex chexinqꞌanan hepotxꞌnikamo noꞌ cheh, yebꞌ ebꞌnaj chiyaqꞌ howal yibꞌanh noꞌ.
Cheyuchkꞌanto chꞌen carruaje yebꞌ ebꞌnaj chiyaqꞌ howal ayahto yul chꞌen.
22 Chexinqꞌanpaxojan hepotxꞌnikamo ebꞌnaj winaj yebꞌ ebꞌix ix,
yebꞌ ebꞌnaj ichamta winaj yebꞌ ebꞌnaj tzehtaj yebꞌ ebꞌix qꞌopotaj.
23 Chexinqꞌanan hetanhtzen ebꞌnaj tanhem meꞌ yebꞌ noꞌ meꞌ chistanhe ebꞌnaj;
chepotxꞌnikamo ebꞌnaj munlawom yebꞌ noꞌ wakax chinhikꞌni teꞌ tꞌokom txꞌotxꞌ.
Chexinqꞌanpaxojan hepotxꞌnikamo ebꞌnaj yahaw konhobꞌ yebꞌ ebꞌnaj iswiꞌehal konhobꞌ.
24 Hex tiꞌ, hex kaw hex cheyil waqꞌnihan ispaj selel tet ebꞌnaj ah Babilonia
yebꞌ tet ebꞌnaj ah Caldea yu sunil istxꞌojal iswatxꞌe yinh konhobꞌ Sión,» xhi Komam Jahawil.
25 Yalnipaxo Komam: «Hanintiꞌan chiwakojan howal teyinh hex ah Babilonia.
Lahan hex hakaꞌ hunu niman witz chitanhtzenilo sunil ej konhobꞌ ay sat txꞌo txꞌotxꞌ tiꞌ,
chiwikanh inqꞌabꞌan teyibꞌanh chexintennitojan satla chꞌen nime chꞌen,
chinnhusnitojan hekonhobꞌ, lahan chꞌelkaniko hakaꞌ witz chitzꞌato yul bꞌolobꞌ.
26 Machi hunu mak tiꞌ chiꞌinikanh chꞌen chꞌen chꞌok istxikino xeꞌal nha bꞌey Babilonia,
machi mak chisikꞌnikanh chꞌen chꞌen chꞌok xeꞌalo nha,
yuto kaw chitzꞌinhzꞌonkano konhobꞌ yinh hunelnhe,» xhi Komam Jahawil.
27 Yalnipaxo Komam: «Awekanh qꞌap bandera sunil yulaj konhobꞌ yul ismajul Babilonia,
haꞌ chiyeniloj ta yokxa howal yinh.
Cheyoqꞌtzen chꞌen trompeta yulajla nimeta konhobꞌ, kat hewatxꞌen hebꞌa yu hetit yinh howal.
Iskutxbꞌaweko isbꞌa ebꞌnaj ah Ararat, ebꞌnaj ah Mini, ebꞌnaj ah Askenaz, kat yul ebꞌnaj howal yinh.
Saywe hunu naj capitán chiꞌijbꞌali yinh howal, tojabꞌ noꞌ cheh yinh howal,
haꞌ noꞌ cheh tuꞌ lahanxa isbꞌisil noꞌ hakaꞌ isbꞌisil noꞌ qꞌul chꞌekꞌ nhirnhoni.
28 ¡Iswatxꞌehabꞌ isbꞌa nimeta konhobꞌ, kat istit yinh howal.
Tijabꞌ ebꞌnaj isreyal txꞌotxꞌ Media yebꞌ ebꞌnaj capitán yebꞌ sunil ebꞌnaj yahaw konhobꞌ,
yebꞌ sunil ebꞌnaj ay yulaj konhobꞌ ay yul ismajul txꞌotxꞌ Media!» xhi Komam.
29 Yalnipaxo Komam: «Haꞌ txꞌo txꞌotxꞌ chibꞌilo txꞌotxꞌ, kat isxiwkanh txꞌotxꞌ, yuto chiyij isbꞌa tzet nabꞌil yu Komam Jahawil yinh Babilonia.
Haꞌ Babilonia tuꞌ, kaw tzꞌinan chukanoj, matxa hunu anma chiꞌeyayo yul.
30 Haꞌ ebꞌnaj soldado ah Babilonia kaw helan, isbꞌej yaqꞌni howal,
ismajchen isbꞌa yul iscuartel, ispaxilo yip, isxiwkanh ebꞌnaj hakaꞌ ebꞌix ix.
Nhuslaxkanto yatut ebꞌnaj, tzilchato ispultahil konhobꞌ tuꞌ.
31 Xanhe chischale isbꞌa ebꞌnaj chiꞌinito correo yebꞌ ebꞌnaj chejabꞌ
chiꞌinito tzotiꞌ tet naj isreyal Babilonia ta lanhan istanhtzelaxilo iskonhobꞌ naj sunil bꞌayejtuꞌwal.
32 Haꞌ ebꞌnaj chꞌaqꞌni howal yinh Babilonia ok ebꞌnaj majwal bꞌay chꞌekꞌto anma yul haꞌ,
isnhuslaxto cuartel, isxiwkanh ebꞌnaj winaj yet howal,» xhi Komam.
33 Yuto hak tiꞌ chute yalni Komam Jahawil kaw aykano yip, isDiosal Israel, hakaꞌ tiꞌ:
«Haꞌ ebꞌnaj ah Babilonia lahan ebꞌnaj hakaꞌ ixim trigo tenanxa,
lanhanxa yapni istzꞌayikal bꞌay chixanhlaxiltij,» xhi Komam.
34-35 Haꞌ anma ah Jerusalén, anma ay bꞌey konhobꞌ Sión, halni hakaꞌ tiꞌ:
«Haꞌ naj Nabucodonosor isreyal Babilonia, kaw kokꞌ konhaykanikojan yu naj,
konhiskꞌuxaytojan naj, yinito naj sunil tzet ayonhanh,
hakaꞌ hunu vaso matxa tzet ayayto yul, hak tuꞌ konhyutekanojanh naj.
Konhisbꞌiqꞌaytojan naj hakaꞌ chu isbꞌiqꞌnayto noꞌ dragón no noqꞌ.
Kaw noh iskꞌul naj yinh tzettaj kaw ochebꞌil ayonhanh, konhisxayenkanatijanh naj,
hakaꞌ hunu tzet ye tuꞌ matxa tzet chꞌoknikoj.
Jilaxilojanh yul kokonhobꞌanh yu naj.
Haꞌ istxꞌojal iswatxꞌe ebꞌnaj ah Babilonia jinhanh, haꞌojabꞌ chiwatxꞌelax yinh ebꞌnaj.
Istolahabꞌ ebꞌnaj ah Caldea ismul yet ispotxꞌnikamo ebꞌnaj jet konhobꞌanh,» xhi anma ah Jerusalén.
36 Yuxin hak tiꞌ yu yalni Komam Jahawil:
«Haninan chinwatxꞌehan istoholal teyinh. Chiwaqꞌnihan ispaj selel tzet iswatxꞌe ebꞌnaj ah Babilonia teyinh,
chiwaqꞌni tajokanhan ismar ebꞌnaj, chiwaqꞌni tajolojan isnuqꞌ yaꞌ ebꞌnaj chukꞌu.
37 Haꞌ konhobꞌ Babilonia chiꞌaywuynahi isqꞌalemalxanhe chikani, chiꞌokkano yatuto noꞌ oj.
Matxa anma chikan yul konhobꞌ Babilonia, chixiwilo anma yinh, kat isbꞌuchlax yu anma.
38 Sunil ebꞌnaj ah Babilonia chꞌel yaw ebꞌnaj hakaꞌ noꞌ bꞌalam,
kat yel yaw ebꞌnaj hakaꞌ yel yaw noꞌ nixhte yunin bꞌalam.
39 Hanin Yahawilintiꞌan chiwalan: Hayet lanhan isqꞌaxnakanh ebꞌnaj yu tzalahilal,
chiwaqꞌni waꞌojan ebꞌnaj yinh kaw kꞌul, chiwaqꞌnihan vino yukꞌuꞌ ebꞌnaj, kat yukꞌikanokanh ebꞌnaj.
Lahwi tuꞌ, kat iswaykanh ebꞌnaj yinh hunelnhe, matxa bꞌaqꞌinhal xin chꞌel iswayanh ebꞌnaj.
40 Chiwaqꞌtijan ebꞌnaj hakaꞌ noꞌ yunin meꞌ chꞌilaxto bꞌay chipotxꞌlaxkamoj,
yebꞌ hakaꞌ yilaxti noꞌ icham meꞌ yebꞌ noꞌ icham chiw bꞌay chikami,» xhi Komam.
41 ¡Haꞌ anma ah Babilonia xaꞌokkano preso, xatanhiloj,
konhobꞌ kaw chitikꞌa alaxiko ismay yu sunil konhobꞌ ay sat yibꞌanhqꞌinal tiꞌ!
¡Kaw xibꞌtebꞌalxa ye Babilonia yinh anma ay yulajla nimeta konhobꞌ!
42 Hakaꞌto haꞌ mar tixhmoyo yibꞌanh Babilonia, ismujikanto yalanh haꞌ.
43 Haꞌ ej konhobꞌ yet Babilonia uchkꞌalaxkantoj,
kaw tzꞌinan yebꞌ xin kaw tajin elkaniko sat istxꞌotxꞌ,
matxa hunu mak tiꞌ chꞌehayo bꞌey tuꞌ, nitam hunu mak chiꞌekꞌ bꞌey tuꞌ.
44 Yalni Komam: «Chiwayojan isyaꞌtajil yibꞌanh hatioxh Bel ay bꞌey Babilonia,
chisxayenati tzet xaꞌisbꞌiqꞌaytoj.
Matxa chihul anma ay yulaj nimeta konhobꞌ yiqꞌayo isbꞌa tet tioxh Bel.
Haꞌ iskꞌubꞌal konhobꞌ Babilonia chꞌuchkꞌalaxtoj.
45 ¡Hex inkonhobꞌan elanhwe xol anma ah Babilonia,
kolilo hebꞌa tet isyaꞌtajil chiwayojan yibꞌanh konhobꞌ yu inhowalan, hanin Yahawilintiꞌan!
46 Machojabꞌ chipax yip heyanma,
machojabꞌ chexxiw heyabꞌen isqꞌumal isyaꞌtajil chihul yibꞌanh Babilonia.
Nanantaxanhe isyaꞌtajil chibꞌina hunun habꞌil yinh Babilonia.
Haꞌ ebꞌnaj yahaw kaw ay yip chiyaqꞌ howal ebꞌnaj yinh huneꞌxa naj yahaw kaw ay yip.
47 Yuxin chꞌapni istzꞌayikal bꞌay chintanhtzelojan hunteqꞌan istioxh ebꞌnaj ah Babilonia,
kat yokkano sunil konhobꞌ ay yul ismajul Babilonia yinh txꞌixwilal.
Toxanhe chiꞌaykꞌaykano isnimanil anma chipotxꞌlaxkamoj yul konhobꞌ tuꞌ.
48 Haꞌ satkanh yebꞌ txꞌo txꞌotxꞌ yebꞌ sunil tzet ay yul satkanh yebꞌ tzet ay sat txꞌotxꞌ kaw chitzalahi yet chiꞌilni istanhilo Babilonia yu ebꞌnaj chitit norte.
Chitit ebꞌnaj winaj yet howal ay bꞌey txꞌotxꞌ norte yinh Babilonia,
kat yuchkꞌankanto ebꞌnaj,» Komam Jahawil chalni hakaꞌ tuꞌ.
49 Chalnipaxo Komam: «Haꞌ ebꞌnaj ah Babilonia chipotxꞌlaxkamo ebꞌnaj hakaꞌ yu ispotxꞌnikamo ebꞌnaj anma Israel,
chipotxꞌlaxkamo ebꞌnaj hakaꞌ yu ispotxꞌnikamo ebꞌnaj anma ay yulajla sunil konhobꞌ ay sat yibꞌanhqꞌinal tiꞌ,» xhi Komam.
50 ¡Hex kexkolchalo yul isqꞌabꞌ chꞌen espada, elanhwekanh, mach chexok tuknoj!
¡Waxanhka kaw nahat ay hex naweti Komam Jahawil! ¡Kat henanipaxti Jerusalén!
51 Ay hex tiꞌ cheyala: «Kaw chonhtxꞌixwi jabꞌen tzet chal-lax jinh,
kaw elkano kopixan yuto hul ebꞌnaj nan konhobꞌal yetaꞌto iscuartohal Yatut Komam Jahawil,» kexchi.
52 Yajaꞌ Komam Jahawil chalni hakaꞌ tiꞌ:
«Chiꞌapni istzꞌayikal bꞌay chiwetatojan hunteqꞌan istioxh ebꞌnaj ah Babilonia,
haꞌ sunil yulajla konhobꞌ yul ismajul Babilonia toxanhe chiqꞌajwi anma chilahwi xol howal.
53 Waxanhka chiꞌahapno ebꞌnaj ah Babilonia satkanh yu isloloꞌal,
yebꞌ xin waxanhka kaw kꞌul chuteko ebꞌnaj iskꞌubꞌal iskonhobꞌ,
haninan chiwatojan ebꞌnaj winaj yet howal, kat istanhkanilo ebꞌnaj,» xhi Komam Jahawil.
54 ¡Chiꞌabꞌelax huneꞌ niman aw bꞌey Babilonia,
haxa sat istxꞌotxꞌ ebꞌnaj caldeo chiꞌabꞌelax istanhtzelaxilo sunil tzet ay bꞌey tuꞌ!
55 Yuto chiyuchkꞌato Komam Jahawil Babilonia, chiyinilo Komam.
Hakaꞌ isbꞌili ishowal haꞌ mar, hak tuꞌ chu yapni lemna ebꞌnaj aqꞌom howal yibꞌanh Babilonia,
haxa yul isnuqꞌ ebꞌnaj, lahan isbꞌili hakaꞌ txꞌiꞌal haꞌ nimeta haꞌ.
56 Wal xin, chul ebꞌnaj chiꞌaqꞌni aykꞌayo Babilonia,
kat istzabꞌlaxayo ebꞌnaj yet howal kaw helan;
kat isqꞌahlaxkanto islitꞌ ebꞌnaj, yuto Komam Jahawil,
chipajtzen tzetaj iswatxꞌe ebꞌnaj, chistohlan ismul.
57 Hanin Rey intiꞌan, Yahawil kaw aykano yip, hak tuꞌ inbꞌihan, haninan chiwalan:
«Tet ebꞌnaj winaj kaw ay isnabꞌal,
tet ebꞌnaj capitán, tet ebꞌnaj kaw ay yelapnoj, tet ebꞌnaj winaj kaw ay yip,
tet ebꞌnaj yahawil konhobꞌ Babilonia, tet ebꞌnaj yahawil yet howal.
Chꞌokkano iswayanh ebꞌnaj matxa bꞌaqꞌinhal xin chiꞌel iswayanh ebꞌnaj,» xhi Komam.
58 Yalnipaxo Komam Yahawil kaw aykano yip:
«Haꞌ huneꞌ kꞌubꞌ nimejal sat ayko yinh Babilonia,
maqꞌbꞌil yuchkꞌalaxkanto sunil, kat istzꞌakanto ispultahil kaw nahat yekanh istel.
Kaw nabꞌnhe munla ebꞌnaj winaj ay yulajla hunteqꞌan nimeta konhobꞌ yinh,
haꞌ sunil munil bꞌay kaw siki ebꞌnaj tuꞌ, haꞌ qꞌa qꞌaꞌ chinhusnitoj kat istzꞌakantoj,» xhi Komam.
59 Hayet kanhebꞌxa habꞌil yok yaꞌ Sedequías isreyalo Judá, yaqꞌni yaꞌ Jeremías ischejabꞌ Komam Dios hunteqꞌan chejbꞌanile tet naj Seraías, iskꞌahol naj Nerías, naj iskꞌahol naj Maasías, yet yijbꞌanto naj yaꞌ rey yinh isbꞌel bꞌey konhobꞌ Babilonia. 60 Istzꞌibꞌnhen yaꞌ Jeremías yul hum sunil isyaꞌtajil chihul yibꞌanh Babilonia, haꞌ ton sunil tzotiꞌ chitzotel yibꞌanhilo Babilonia. 61 Yalni yaꞌ Jeremías tet naj Seraías: «Hayet chachapni Babilonia kaw chawako yinh hakꞌul hawawten sunil hunteqꞌan tzotiꞌ tiꞌ. 62 Chawalni hakaꞌ tiꞌ: “Mam Jahawil, hach tiꞌ hawala ta chawuchkꞌato huneꞌ konhobꞌ tiꞌ, matxa hunu winaj chikan bꞌey tiꞌ, nitam hunu no noqꞌ. Kaw tzꞌinan chukano yinh sunilbꞌal ej tiempo,” kachi. 63 Hayet chilahwi hawawten hunteqꞌan tzotiꞌ tiꞌ, kat hakꞌalbꞌaniko hunu chꞌen chꞌen yinh teꞌ hum tiꞌ, kat haqꞌojnayto yiktabꞌanil haꞌ Éufrates. 64 Chawalni: “Hak tiꞌ chiyu yaykanto Babilonia xol ha haꞌ. Matxa xin chiꞌahwanoj hunelxa yu sunil isyaꞌtajil chiꞌay yibꞌanh yu Komam Jahawil,” kachi,» xhi yaꞌ Jeremías.
Haꞌ bꞌey tiꞌ chilahwikano istzotiꞌ yaꞌ Jeremías.