Yet ok yaꞌ Joacaz isreyalo Judá yebꞌ yet ilaxilo yaꞌ reyal
36
Lahwi tuꞌ yaniko anma Judá yaꞌ Joacaz, iskꞌahol yaꞌ Josías reyal bꞌey Jerusalén. 2 Yaꞌ Joacaz tuꞌ 23 (oxebꞌ iskawinaj) habꞌil yaꞌ yet yok yaꞌ reyal, yajaꞌ xin oxebꞌnhe ixahaw ok yaꞌ reyal bꞌey Jerusalén, 3 yuto apni naj rey Egipto bꞌey Jerusalén yinilo naj yaꞌ yinh reyal. Isqꞌanni naj rey Egipto tuꞌ chꞌen tohlabꞌal tet anma Judá, yaqꞌni anma 100 talento chꞌen plata yok huneꞌ talento chꞌen oro tohlabꞌaloj. 4 Yaniko naj rey Egipto tuꞌ yaꞌ Eliaquim, yuxhta yaꞌ Joacaz tuꞌ reyal yinh Judá yebꞌ Jerusalén selelo yaꞌ Joacaz tuꞌ, ishelni naj rey Egipto isbꞌi yaꞌ Eliaquim, yaniko naj Joacim isbꞌiho yaꞌ, yinito naj Necao, isreyal Egipto tuꞌ yaꞌ Joacaz, yuxhta yaꞌ Eliaquim bꞌey Egipto.Ok yaꞌ Joacim isreyalo Judá
5 Hayet ok yaꞌ Joacim reyal, 25 (howebꞌ iskawinaj) habꞌil yaꞌ, 11 (hunlahonhebꞌ) habꞌil ok yaꞌ reyal bꞌey Jerusalén. Yaꞌ rey Joacim tuꞌ, haꞌ istxꞌojal iswatxꞌe yaꞌ sata Komam Dios, isDiosal. 6 Yapni naj Nabucodonosor, isreyal Babilonia yanoko howal yinh yaꞌ, iskꞌalnayo naj yaꞌ yu cadena, yinito naj yaꞌ preso bꞌey Babilonia. 7 Yinipaxto naj rey Nabucodonosor tuꞌ sunil ismunlabꞌal Yatut Komam Jahawil, yanikto naj yul yatut istioxh bꞌey Babilonia.
8 Haꞌ hunteqꞌanxa tzet iswatxꞌe yaꞌ rey Joacim yebꞌ isyahbꞌetajil iswatxꞌe yaꞌ, yebꞌ istxꞌojal ilchalo yinh yaꞌ, tzꞌibꞌnhebꞌilkano yul hum chitzotel yinh ebꞌyaꞌ isreyal Israel yebꞌ ebꞌyaꞌ isreyal Judá. Hayet yilaxto yaꞌ Joacim preso bꞌey Babilonia, yokkano yaꞌ Joaquín, iskꞌahol yaꞌ reyal seleloj.
Yet yilaxto yaꞌ Joaquín preso bꞌey Babilonia
9 Hayet yok yaꞌ Joaquín reyal waxajebꞌ habꞌil yaꞌ, oxebꞌnhe xin ixahaw yok 10 (lahonhebꞌ) tzꞌayik ok yaꞌ reyal bꞌey Jerusalén. Yaꞌ Joaquín tuꞌ haꞌ istxꞌojal iswatxꞌe yaꞌ sata Komam Jahawil. 10 Haxa yet islahwi huneꞌ habꞌil tuꞌ ischejni naj rey Nabucodonosor ilaxoto yaꞌ rey Joaquín preso bꞌey Babilonia, ischejni naj yilaxpaxto sunil qꞌalomal ay yul Yatut Komam Jahawil. Yanikaniko naj rey Nabucodonosor yaꞌ Sedequías, yuxhta yaꞌ Joaquín tuꞌ isreyalo Judá yebꞌ Jerusalén.
Ok yaꞌ Sedequías isreyalo Judá
11 Hayet yok yaꞌ Sedequías reyal, 21 (hun iskawinaj) habꞌil yaꞌ, 11 (hunlahonhebꞌ) habꞌil ok naj reyal bꞌey Jerusalén. 12 Iswatxꞌen yaꞌ istxꞌojal sata Komam Jahawil, isDiosal. Hayet ischejni Komam Dios yaꞌ Jeremías, mach yiyo isbꞌa yaꞌ tet yaꞌ. 13 Yokpaxo yaꞌ Sedequías tuꞌ manhkꞌomal tet naj rey Nabucodonosor yet xayaqꞌ bꞌinaho yaꞌ isbꞌi Komam Dios tato chisyije yaꞌ tzet chal naj Nabucodonosor tuꞌ. Haꞌ yaꞌ rey Sedequías yaqꞌ lutꞌbꞌo yaꞌ yanma, matxa xin isje iskꞌul yaꞌ meltzoho yul isqꞌabꞌ Komam Jahawil, isDiosal Israel.
14 Hakpax tuꞌ sunil ebꞌyaꞌ iswiꞌehal sacerdote yebꞌ konhobꞌ, islahiko iswatxꞌen istxꞌojal, isbꞌeybꞌalnhen sunil isyahbꞌetajil chiswatxꞌe hunteqꞌan nimeta konhobꞌ, yetanto ebꞌnaj Yatut Komam Jahawil yu istxꞌojal, haꞌ ton huneꞌ nha ay bꞌey Jerusalén, huneꞌ yalkano Komam yetoj. 15 Wal Komam Jahawil, isDiosal yichmam, chilannhetikꞌa ischejni ebꞌyaꞌ ischejabꞌ kachwal yinh ebꞌnaj yinh istxꞌojal tuꞌ, yuto chitzꞌay iskꞌul Komam yinh iskonhobꞌ yebꞌ yinh yatut. 16 Yajaꞌ xin ok ebꞌnaj tzebꞌoj yebꞌ bꞌuchwal yinh ebꞌyaꞌ ischejabꞌ Komam, mach xin yabꞌeto ebꞌnaj Istzotiꞌ Komam, yuxin tit ishowal Komam yinh iskonhobꞌ, matxa xin yu iskolchalo ebꞌnaj yalanh isyaꞌtajil.
Yet yilaxto anma Judá preso
17 Ischejni Komam Dios naj isreyal ebꞌnaj caldeo yebꞌ issoldado yaqꞌaꞌko howal yinh Judá, istejnikamo ebꞌnaj caldeo tuꞌ ebꞌnaj tzehtaj bꞌey yamaqꞌil Yatut Komam Dios, mach xin yaqꞌ nimankꞌulal ebꞌnaj yinh ebꞌnaj tzehtaj, ebꞌix qꞌopotaj, ebꞌnaj ichamta winaj, yebꞌ ebꞌnaj tzakaꞌ yeh isnimanil yettaxtikꞌa ispitzkꞌahi, wal xin isbꞌejiko Komam Dios konhobꞌ tuꞌ yul isqꞌabꞌ ebꞌnaj caldeo. 18 Yinipaxto ebꞌnaj nixhte munlabꞌal yebꞌ nime munlabꞌal chiꞌokniko yul Yatut Komam Dios. Yinipaxto ebꞌnaj sunil isqꞌalomal Yatut Komam Jahawil yebꞌ qꞌalomal ay yul palacio yet yaꞌ rey, yebꞌ isqꞌalomal ebꞌnaj iswiꞌehal konhobꞌ ay yulaj yatut; haꞌ sunil tuꞌ yito ebꞌnaj bꞌey Babilonia. 19 Yaniko ebꞌnaj qꞌaꞌ yinh Yatut Komam Dios, yuchkꞌanayo ebꞌnaj iskꞌubꞌal Jerusalén, yaniko ebꞌnaj qꞌaꞌ yinh ej palacio, yuchkꞌankanto ebꞌnaj sunil tzet ay bꞌey Jerusalén kaw ochebꞌal jilni, kaw ay istohol.
20 Wal anma Judá kolcha tet chꞌen espada ilaxto preso bꞌey Babilonia, yok ischejabꞌo naj rey Nabucodonosor yebꞌ ischejabꞌo iskꞌahol naj, masanto yet yiqꞌkanh yip txꞌotxꞌ Persia. 21 Hak tuꞌ yu yijni isbꞌa Istzotiꞌ Komam Jahawil yalkano yaꞌ Jeremías. Hak tuꞌ yu isxew txꞌotxꞌ Judá yet yalaxayo isyaꞌtajil yibꞌanh, yilaxto anma preso yulbꞌal 70 (lahonhebꞌ iskanhwinaj) habꞌil bꞌey Babilonia.
Chejbꞌanile yalilto naj rey Ciro
22 Hayet bꞌabꞌel habꞌil yok naj Ciro isreyalo Persia, yijni isbꞌa Istzotiꞌ Komam Jahawil yalkano yaꞌ Jeremías. Haꞌ Komam Dios aniko yinh isnabꞌal naj rey Ciro yalni huneꞌ chejbꞌanile tet sunil anma ayko yalanh yip. Haꞌ huneꞌ chejbꞌanile tuꞌ ischej naj hal-laxikꞌoj yebꞌ tzꞌibꞌnhelaxto yul hum tet anma. 23 Chalni hakaꞌ tiꞌ: «Hak tiꞌ chiyu yalni naj Ciro isreyal Persia: Haꞌ Komam Jahawil, isDiosal yul satkanh aniko sunil ej konhobꞌ ay yul sat yibꞌanhqꞌinal tiꞌ yalanh wipan, haꞌ Komam xin mahalni wetan tato chiwakanhan yatut bꞌey Jerusalén, yul ismajul txꞌotxꞌ Judá, yuxin makxanhetikꞌa hex iskonhobꞌ Komam Dios, okojabꞌ Komam heyetbꞌihoj, kat heto bꞌey tuꞌ,» xhito naj rey Ciro.