ESDRAS
1. MELTZO EBꞌNAJ JUDÁ YUL ISKONHOBꞌ HUNELXA YEBꞌ XIN WATXꞌELAXPAXOKANH YATUT KOMAM JAHAWIL BꞌEY JERUSALÉN
(1:1–6:22)
Ischejbꞌanil naj rey Ciro
1
Hayet bꞌabꞌel habꞌil yok naj Ciro isreyal Persia,a yaniko Komam Dios yinh isnabꞌal naj huneꞌ ley yu yijni isbꞌa Istzotiꞌ Komam halbꞌilkano yu yaꞌ Jeremías. Huneꞌ chejbꞌanile tuꞌ pujbꞌalaxikꞌo sunil yul ismajul txꞌotxꞌ Persia, istꞌinhbꞌanhelaxpaxayo yul hum:b
2 «Hak tiꞌ xin yalni huneꞌ chejbꞌanile tuꞌ hakaꞌ tiꞌ: Hak tiꞌ chiyute yalni naj Ciro, isreyal Persia: “Haꞌ Komam Jahawil, isDiosal yul satkanh, aniko sunil ej konhobꞌ ay yul sat yibꞌanhqꞌinal tiꞌ yalanh wipan. Haꞌ Komam halni wetan tato chinischejan inwatxꞌekanhan Yatut Komam Jahawil bꞌey Jerusalén, yul ismajul txꞌotxꞌ Judá. 3 Yuxin makxanhetikꞌa hex kexiskonhobꞌ Komam, okojabꞌ Komam Dios, heDiosal, heyetbꞌihoj, kat heto bꞌey Jerusalén ay yul ismajul Judá, kat hewatxꞌenkanh Yatut Komam Jahawil, isDiosal Israel, haꞌ Komam tuꞌ xin ayikꞌo bꞌey Jerusalén. 4 Wal hex chexkankano xin bꞌayxanhetuꞌwal ay hex, kolwahanhwe yinh ebꞌnaj heyet konhobꞌ tuꞌ, cheyaqꞌni chꞌen oro, chꞌen plata maka tzetaj ay yul heqꞌabꞌ, yebꞌ no noqꞌ, cheyaqꞌnipaxo heyebꞌalqꞌabꞌ chitit yinh heyanma chiꞌokniko yinh Yatut Komam Dios bꞌey Jerusalén,” xhi naj rey Ciro,» xhi huneꞌ chejbꞌanile tuꞌ.
Ebꞌnaj Judá meltzo bꞌey Jerusalén
5 Hak tuꞌ yu yahwano ebꞌnaj iswiꞌehal xol yikꞌal yaꞌ Judá yebꞌ ebꞌnaj iswiꞌehal xol yikꞌal yaꞌ Benjamín, yebꞌ ebꞌyaꞌ sacerdote yebꞌ ebꞌnaj levita, yebꞌ sunil ebꞌnaj yako Komam Dios yinh iskꞌul isto iswatxꞌenokanh Yatut Komam Jahawil bꞌey Jerusalén. 6 Iskolwa sunil konhobꞌ hoyaniko yinh konhobꞌ bꞌay ay ebꞌnaj tuꞌ, yaqꞌni anma chꞌen oro, chꞌen plata yebꞌ tzetaj ay yul isqꞌabꞌ, yaqꞌnipaxo anma no noqꞌ, yebꞌ tzetaj ye tuꞌ ay istohol, nan xin yepaxo sunil isyebꞌalqꞌabꞌ tit yinh yanma anma yaqꞌni. 7 Aypaxo hunteqꞌan ismunlabꞌal Yatut Komam Jahawil iqꞌbꞌilti bꞌey Jerusalén yu naj Nabucodonosor, haꞌ hunteqꞌan munlabꞌal tuꞌ aykanikto yul yatut istioxh naj, haꞌ xin naj rey Ciro inilti hunteqꞌan munlabꞌal tuꞌ. 8 Hak tuꞌ xin yu yalni naj Ciro isreyal Persia tet naj Mitrídates, naj tesorero, tato chiyilti naj munlabꞌal tuꞌ, kat isbꞌisniko naj yul isqꞌabꞌ naj Sesbasar, iswiꞌehal yinh Judá. 9 Hak tiꞌ xin isbꞌisil munlabꞌal tuꞌ hakaꞌ tiꞌ: 30 (Lahonhebꞌ iskawinaj) chꞌen nime sekꞌ oro, huneꞌ mil nime sekꞌ plata, yok 29 (bꞌalonhebꞌ iskawinaj) chꞌen cuchillo. 10 30 (lahonhebꞌ iskawinaj) hunteqꞌan sekꞌ oro, yok xin 410 chꞌen sekꞌ plata, yok huneꞌ mil hunteqꞌanxa munlabꞌal. 11 Haꞌ sunil munlabꞌal oro yebꞌ plata, 5,400 isbꞌisil yinh sunil. Haꞌ sunil munlabꞌal tuꞌ yiti naj Sesbasar yet ispaxti bꞌey Babilonia yebꞌ hunteqꞌanxa yet konhobꞌ yet ismeltzo bꞌey Jerusalén.