2 Iskutxbꞌaniko yaꞌ Salomón tuꞌ sunil ebꞌnaj Israel; ebꞌnaj iswiꞌehal yinh mil yebꞌ yinh cien soldado, yebꞌ ebꞌnaj juez, yebꞌ ebꞌnaj iswiꞌehal ebꞌnaj Israel, yebꞌ ebꞌnaj mame. 3 Yahto yaꞌ Salomón yebꞌ sunil ebꞌnaj tuꞌ bꞌay nahat yekanh bꞌey Gabaón bꞌay chiyiyo isbꞌa anma Israel tet Komam Dios, yuto haꞌ tuꞌ aykanh qꞌap mantiado yatuto Komam, bꞌay chiskutxbꞌa isbꞌa anma Israel iskꞌatanh Komam; qꞌap iswatxꞌe yaꞌ Moisés ischejabꞌ Komam Jahawil, bꞌey txꞌotxꞌ desierto. 4 Yajaꞌ wal Kaxha yet istrato Komam Dios iqꞌbꞌilxalo yu yaꞌ David bꞌey Quiriat-jearim, yet yinito yaꞌ bꞌey qꞌap mantiado watxꞌebꞌil yu bꞌey Jerusalén. 5 Walpaxo huneꞌ mexha bronce yet xahanbꞌal, watxꞌebꞌil yu naj Bezaleel, ayko satalti isTabernáculo Komam bꞌey Gabaón. Haꞌ bꞌey tuꞌ xin to yaꞌ Salomón yebꞌ sunil ebꞌnaj iskutxbꞌako yaꞌ txahlo tet Komam Dios. Wal ismam naj Bezaleel tuꞌ, haꞌ ton naj Uri, wal ismam naj Uri, haꞌ ton naj Hur.^a 6 Yahto yaꞌ Salomón bꞌey tuꞌ sata Komam Jahawil bꞌey ismexhahil yet xahanbꞌal, bronce ayko yinh, yul Tabernáculo, bꞌay chiskutxbꞌa isbꞌa anma Israel sata Komam, isnhusni yaꞌ Salomón huneꞌ mil no noqꞌ xahanbꞌalil tet Komam yibꞌanh huneꞌ mexha tuꞌ.

7 Haxa yet aqꞌbꞌalil xin isyeni isbꞌa Komam Dios tet yaꞌ Salomón, yalni Komam tet yaꞌ:

—Salomón, qꞌan wetan tzet chawoche, chiwaqꞌan tawet, xhi Komam tet yaꞌ.

8 Istaqꞌwi yaꞌ Salomón tet Komam Dios:

—Hach tiꞌ Mamin, kaw niman iskꞌulal hakꞌul hawaqꞌ tet inmaman, haꞌ ton yaꞌ David, kinhawanikojan reyal selelo inmaman xol ebꞌnaj Israel tiꞌ. 9 Wal tinanh xin hach inDiosal, Wahawil, yijabꞌ isbꞌa tzet hawalkano tet inmaman, yuto haꞌ huneꞌ konhobꞌ bꞌay kinhawakojan reyal tiꞌ kaw nimankano isbꞌisil, lahan isbꞌisil hakaꞌ ispojojal txꞌo txꞌotxꞌ. 10 Wal tinanh xin aqꞌ yitzꞌatil inwiꞌan yebꞌ xin inhelanilan, hak tuꞌ xin chu wijbꞌanan huneꞌ konhobꞌ tiꞌ; yuto ¿maktaxka chu yijbꞌan hakonhobꞌ kaw nimajal tiꞌ? xhi yaꞌ Salomón.

11 Istaqꞌwi Komam Dios tet yaꞌ Salomón hakaꞌ tiꞌ:

—Haꞌ hun tiꞌ maꞌok yinh hawanma haqꞌanni wetan, machi xin maxaqꞌan qꞌalomal maka tzet ay hach, maka wanikojan hamay. Machi maxaqꞌanpaxo kamikal yibꞌanh ebꞌnaj ayko ishowal tawinh; machi maxaqꞌan hakawil. Wal xin hanabꞌal yebꞌ hahelanil maxaqꞌan wetan yu hawijbꞌan inkonhobꞌan bꞌay chachwakojan reyal. 12 Yuxin chiwaqꞌan hanabꞌal yebꞌ hahelanil hakaꞌ maxaqꞌan wettiꞌan, kat xin waqꞌnipaxojan qꞌalomal tawet, kat wanikojan hamay, machi xin hunu ebꞌnaj isreyal Israel kaw aykano yelapno hakaꞌ hach tiꞌ yet yalanhtokanoj, yebꞌ xin machi hunu ebꞌnaj yet tzujaniloxa, xhi Komam tet yaꞌ.

13 Lahwi tuꞌ yel yaꞌ Salomón bꞌey Tabernáculo, bꞌay nahat yekanh bꞌey Gabaón, ismeltzo yaꞌ bꞌey Jerusalén, yokkano yaꞌ isreyalo konhobꞌ Israel.

14 Iskutxbꞌaniko yaꞌ rey Salomón carruaje yebꞌ noꞌ cheh yet howal; 1,400 isbꞌisil iscarruaje yaꞌ Salomón tuꞌ, yok 12 (kabꞌlahonhebꞌ) mil noꞌ cheh yet howal, yanito yaꞌ sunil tuꞌ yulajla konhobꞌ bꞌay chikꞌubꞌalax carruaje, yebꞌ bꞌey yul konhobꞌ Jerusalén bꞌay ay yaꞌ rey. 15 Iskutxbꞌaniko yaꞌ rey Salomón chꞌen oro yebꞌ chꞌen plata bꞌey Jerusalén, tzetkꞌa isbꞌisil chꞌen hakaꞌ isbꞌisil chꞌen komon chꞌen. Hakpax tuꞌ teꞌ cedro kaw niman teꞌ iskutxbꞌako yaꞌ, lahanxa isbꞌisil teꞌ hakaꞌ isbꞌisil teꞌ xoltelajil higo ay bꞌey txꞌotxꞌ Sefela. 16 Haꞌ xin ebꞌnaj loqꞌom cheh yu yaꞌ rey Salomón, haꞌ bꞌey Egipto chibꞌey ebꞌnaj isloqꞌoꞌ noꞌ, haꞌtikꞌa bꞌey tuꞌ xin chisloqꞌ ebꞌnaj qꞌap lino, kat yinito ebꞌnaj hunteqꞌan tuꞌ tet yaꞌ Salomón. 17 Chibꞌeyahto ebꞌnaj bꞌey Egipto, kat isloqꞌni ebꞌnaj carruaje, haꞌ istohol hunun carruaje tuꞌ 600 pieza plata istohol. Wal noꞌ cheh xin 150 pieza plata istohol hunun noꞌ; haxa sunil ebꞌnaj rey heteo yebꞌ ebꞌnaj rey Siria chiloqꞌni carruaje yebꞌ noꞌ cheh tet ebꞌnaj chitxonhwi yu yaꞌ rey Salomón.