Apni ix reina ah Sabá istukleꞌ yaꞌ rey Salomón
9
Hayet yabꞌen ix reina ay bꞌey Sabá isqꞌumal ishelanil yaꞌ rey Salomón, yapni ix bꞌey Jerusalén, kaw txꞌiꞌal ischejabꞌ ix tzujan yintaj, iqꞌbꞌil noꞌ camello iqꞌnhe anh kaw xuqꞌ sam, yebꞌ chꞌen oro yinh kaw niman, yebꞌ chꞌen chꞌen kaw kꞌulejchꞌan jilni. Apni ix yilweꞌ yaꞌ rey Salomón tuꞌ, yaqꞌ ix hunteqꞌan qꞌambꞌebꞌal kaw yaꞌta tet yaꞌ. Yalni ix sunil tzet ay yul yanma tet yaꞌ Salomón yet yapni ix. 2 Wal yaꞌ Salomón tuꞌ, ispajtze yaꞌ sunil tzet isqꞌambꞌe ix, machi hunu tiꞌ mach ispajtze yaꞌ. 3 Hayet yabꞌen ix reina ah Sabá ishelanil yaꞌ rey Salomón tuꞌ yebꞌ yilni ix teꞌ nha iswatxꞌe yaꞌ, 4 yilnipaxo ix tzet chislo yaꞌ ayahto sat ismexha, yilni ix yatut ebꞌnaj ay yelapno ismunil, yebꞌ ebꞌnaj ischejabꞌ yaꞌ, yebꞌ xil isqꞌap ebꞌnaj chakoj, yebꞌ ebꞌnaj chiꞌiniti isvino yaꞌ, yebꞌ xil isqꞌap ebꞌnaj chakoj, yilnipaxo ix isqꞌochal Yatut Komam Dios bꞌay chiꞌahto anma. Yet yilni ix sunil tzet iswatxꞌe yaꞌ tuꞌ iskꞌaykanilo iskꞌul ix. 5 Yalni ix tet yaꞌ rey Salomón: «Toꞌan yel tzet wabꞌehan yul inkonhobꞌan yinh haqꞌalomal yebꞌ hahelanil. 6 Hayet yal-lax wettuꞌan mach waytojan yul wanmahan, haxa tinanh xin, hankawinan chiwilan yu isbꞌaqꞌ insatan, yuxin mach apni yal-lax hahelanil tiꞌ wetan, wal xin kaw xapalkꞌonkanoj. 7 Kaw saqꞌal yet ebꞌnaj winaj chimunla tawintaj yebꞌ ebꞌnaj hachejabꞌ aynhetikꞌako tasataj, chabꞌen ebꞌnaj hahelanil tiꞌ. 8 Hal-laxojabꞌ kꞌul-la tzotiꞌ yinh Komam Jahawil, haDiosal, yuto chitzala tawinh kach yaniko isreyal Israel, yuto kaw xahan ay konhobꞌ Israel tiꞌ yu Komam, yuto choche tato aynhetikꞌa Israel tiꞌ yinh sunilbꞌal ej tiempo, yuxin kach yako reyaloj yunhe hawatxꞌen iskꞌulal yebꞌ istoholal,» xhi ix.9 Lahwi tuꞌ yaqꞌni ix 120 talento chꞌen oro tet yaꞌ rey, yebꞌ kaw txꞌiꞌal anh kaw xuqꞌ sam, yebꞌ chꞌen chꞌen kaw kꞌulejchꞌan jilni. Haꞌ hunteqꞌan anh kaw xuqꞌ sam yaqꞌ ix reina ah Sabá tet yaꞌ rey Salomón, matxa hunuxa anh kaw kꞌulkanoj hakaꞌ tuꞌ.
10 Hakpax tuꞌ ebꞌnaj ischejabꞌ naj rey Hiram yebꞌ ebꞌnaj ischejabꞌ yaꞌ rey Salomón bꞌey ebꞌnaj yiqꞌaꞌ chꞌen oro bꞌey Ofir, yinipaxti ebꞌnaj teꞌ sándalo yebꞌ chꞌen chꞌen kaw kꞌulejchꞌan jilni tet yaꞌ rey Salomón. 11 Haꞌ teꞌ sándalo tuꞌ yako yaꞌ rey isqꞌochal Yatut Komam Jahawil yebꞌ isqꞌochal yatut. Haꞌ yinh teꞌ sándalo tuꞌ xin watxꞌelaxpaxo teꞌ arpa yebꞌ teꞌ salterio chiyako ebꞌnaj bꞌitnom. Machi hunelo bꞌay il-lax teꞌ sándalo sat txꞌotxꞌ Judá hakaꞌ tuꞌ. 12 Haꞌ yaꞌ rey Salomón yaqꞌ yaꞌ sunil tzet yoche ix reina ah Sabá yebꞌ sunil tzet isqꞌan ix, ekꞌbꞌalto tzet yaqꞌ yaꞌ tet ix sata tzet yaqꞌ ix sabꞌehalo tet yaꞌ. Lahwi tuꞌ ispaxto ix sat istxꞌotxꞌ yebꞌ ebꞌnaj ischejabꞌ tzujan yintaj.
Isqꞌalomal yebꞌ ismay yaꞌ rey Salomón
13 Haꞌ yalil chꞌen oro chischah yaꞌ rey Salomón hunun habꞌil 676 talento chꞌen, 14 nan xin yepaxo chꞌen chiyaqꞌ ebꞌnaj txonhom istohlabꞌaloj. Yebꞌ xin nanyepaxo chꞌen oro yebꞌ chꞌen plata chiyiti ebꞌnaj rey Arabia, yebꞌ ebꞌnaj gobernador ay yul ismajul Israel tet yaꞌ rey Salomón. 15 Yaqꞌni watxꞌe yaꞌ rey Salomón tuꞌ 200 chꞌen nime escudo chipahni qꞌojbꞌal, 600 siclo chꞌen oro okniko yinh hunun chꞌen escudo tuꞌ. 16 Yaqꞌni watxꞌeꞌ yaꞌ 300 chꞌen nixhte escudo oro, wajebꞌ libra chꞌen oro okniko yinh hunun, yaniko yaꞌ chꞌen escudo tuꞌ yul nha chiyij qꞌebꞌtala yet Líbano.
17 Ischejni yaꞌ rey Salomón tuꞌ watxꞌelaxo huneꞌ niman tzꞌonhobꞌal marfil, yalaxiko chꞌen oro, chꞌen kaw kꞌul, yelawiloj. 18 Huneꞌ tzꞌonhobꞌal tuꞌ wajebꞌ xalabꞌ huneꞌ isqꞌochal aykoj, haꞌ bꞌay chiꞌay bꞌatxno yoj yaꞌ rey tuꞌ oronhe, ay xin hunun isqꞌabꞌ yinh qꞌaxqꞌep iskꞌul tzꞌonhobꞌal tuꞌ, iskawilal isqꞌabꞌ tuꞌ linhankanh hunun yechel noꞌ bꞌalam. 19 Haꞌ yibꞌanh wajebꞌ xalabꞌ isqꞌochal tuꞌ linhankanh 12 (kabꞌlahonhkꞌonh) yechel noꞌ bꞌalam, linhankanh hunun yechel noꞌ yinh hunun istxikin xalabꞌ tuꞌ. Machi bꞌay watxꞌi hunuxa tzꞌonhobꞌal rey hakaꞌ huneꞌ iswatxꞌe yaꞌ rey Salomón tuꞌ.
20 Sunil sekꞌ yebꞌ vaso okniko yu yaꞌ rey Salomón kaw oro, hakpax tuꞌ sekꞌ yebꞌ vaso chiꞌokniko bꞌey nha chiyij Qꞌebꞌtala Líbano nabꞌa oropaxoj. Yulbꞌal istiempohal yaꞌ rey Salomón tuꞌ matxa ochebꞌilo chꞌen plata. 21 Yuto ebꞌnaj ischejabꞌ yaꞌ rey Salomón yebꞌ ebꞌnaj ischejabꞌ naj rey Hiram oxox habꞌil chibꞌeykꞌo ebꞌnaj bꞌey Tarsis yul barco chiniti ebꞌnaj chꞌen oro, chꞌen plata, chꞌen marfil, yebꞌ noꞌ max, yebꞌ noꞌ pavo real tet yaꞌ Salomón tuꞌ.
22 Haꞌ isqꞌalomal yebꞌ ishelanil yaꞌ rey Salomón tuꞌ palkꞌon yibꞌanh sunil ebꞌnaj rey ay sat yibꞌanhqꞌinal tiꞌ. 23 Yuxin sunil ebꞌnaj rey ay sat yibꞌanhqꞌinal tiꞌ yoche yilaꞌ sat yaꞌ rey Salomón, yunhe yabꞌen helanile yaqꞌ Komam Dios tet yaꞌ. 24 Haꞌ sunil ebꞌnaj rey chibꞌey ilno yaꞌ rey Salomón hunun habꞌil, chiyaqꞌ ebꞌnaj sabꞌehal tet yaꞌ, chiyiniti ebꞌnaj chꞌen sekꞌ plata yebꞌ sekꞌ oro tet yaꞌ, chiyinipaxti ebꞌnaj xilqꞌape, yebꞌ chꞌen chꞌen yet howal, anh xuqꞌ sam, yebꞌ noꞌ cheh yebꞌ noꞌ mula sabꞌehal tet yaꞌ.
25 Aypaxo kanhebꞌ mil yatut ischeh yebꞌ iscarruaje yaꞌ rey Salomón. 12 (kabꞌlahonhebꞌ) mil noꞌ cheh bꞌay chiꞌahto ebꞌnaj soldado yet howal, haꞌ ebꞌnaj soldado tuꞌ ok yilomalo yaꞌ rey bꞌey Jerusalén yebꞌ yulaj hunteqꞌan konhobꞌ bꞌay ay iscarruaje yaꞌ. 26 Yaꞌ rey Salomón tuꞌ ok yaꞌ yahawilo yibꞌanh sunil ebꞌnaj isreyal hunteqꞌan konhobꞌ chiꞌichiti bꞌey haꞌ Éufrates chitaapni bꞌey istxꞌotxꞌ ebꞌnaj filisteo yebꞌ chitaapni bꞌey ismohonal txꞌotxꞌ Egipto. 27 Kaw niman chꞌen oro iskutxbꞌako yaꞌ Salomón tuꞌ bꞌey Jerusalén lahanxa isbꞌisil chꞌen hakaꞌ chꞌen komon chꞌen, yebꞌ xin kaw txꞌiꞌal teꞌ cedro iskutxbꞌako yaꞌ, lahanxa isbꞌisil teꞌ hakaꞌ teꞌ xoltelajil higo chipoh bꞌey txꞌotxꞌ Sefela. 28 Yilaxpaxti noꞌ cheh ay bꞌey Egipto tet yaꞌ rey Salomón, yebꞌ noꞌ ay yulajla sunil nimeta konhobꞌ.
Iskamikal yaꞌ rey Salomón
29 Haꞌ hunteqꞌanxa tzet iswatxꞌe yaꞌ rey Salomón yet yichebꞌanil yebꞌ yet islahobꞌal, tzꞌibꞌnhebꞌilkano yul yum yaꞌ Natán, ischejabꞌ Komam Dios, yebꞌ yul yum yaꞌ Ahías, silonita ischejabꞌ Komam, yebꞌ yul yum yaꞌ Iddo bꞌay chitzotel yinh yaꞌ rey Jeroboam, iskꞌahol naj Nabat. 30 Yaꞌ Salomón tuꞌ 40 (kawinaj) habꞌil ok yaꞌ isreyalo sunil txꞌotxꞌ Israel bꞌey Jerusalén. 31 Iskam yaꞌ Salomón hakaꞌ yu iskamto yichmam yaꞌ, ismujlax yaꞌ bꞌey isKonhobꞌ yaꞌ David, ismam yaꞌ; yok yaꞌ Roboam, reyal selelo ismam.