Meltzoko yaꞌ Salomón manhkꞌomal tet Komam Dios
11
Wal yaꞌ rey Salomón machnhetaj ix iskutzꞌin naj faraón yiqꞌ yaꞌ, wal xin yiqꞌpaxo yaꞌ hunteqꞌanxa ebꞌix ix nan konhobꞌal, ebꞌix ah Moab, ebꞌix ah Amón, ebꞌix ah Edom, ebꞌix Sidón, yebꞌ ebꞌix heteo.a 2 Haꞌ yinh hunteqꞌan ebꞌix tuꞌ yal Komam tet ebꞌnaj Israel hakaꞌ tiꞌ: «Haꞌ hunteqꞌan ebꞌix tiꞌ, mach cheyiqꞌ ebꞌix heyixaloj, hakpax tuꞌ ebꞌix Israelita mach chu yiqꞌni ebꞌix ebꞌnaj yichamiloj, yuto ta cheyiqꞌ ebꞌix nan konhobꞌal chiꞌok ebꞌix yalaꞌ teyet tato cheyiyo hebꞌa sata istioxh ebꞌix, cheyaniko heyanma yinh istioxh ebꞌix tuꞌ,» xhi Komam. Yajaꞌ wal yaꞌ rey Salomón tuꞌ yocheko yaꞌ ebꞌix, yiqꞌnikanh yaꞌ ebꞌix yixaloj. 3 700 ebꞌix iskutzꞌin ebꞌnaj rey ok yixalo yaꞌ Salomón, yiqꞌnipaxokanh yaꞌ 300 ebꞌix iskabꞌ ixale; haꞌ ebꞌix yixal yaꞌ tuꞌ inilo yanma yaꞌ yinh Komam Dios. 4 Haxa yet ichamxa yaꞌ Salomón, issomchakanh isnabꞌal yaꞌ yu ebꞌix yixal, yaniko yanma yaꞌ yinh hunteqꞌan tioxh chihal-lax diosal. Hak tuꞌ xin matxa toholo yanma yaꞌ sata Komam Jahawil, hakaꞌ istoholal yanma yaꞌ David, ismam yaꞌ. 5 Ok yaꞌ Salomón tuꞌ yiqꞌayo isbꞌa tet tioxh Astoret, isdiosal ebꞌnaj Sidonio, yebꞌ tet tioxh Milcom, isdiosal ebꞌnaj amonita; hunteqꞌan tioxh tuꞌ kaw yahbꞌetaj yul sat Komam. 6 Iswatxꞌen yaꞌ Salomón tuꞌ istxꞌojal sata Komam, mach xin yijemo yute isbꞌa yaꞌ tet Komam hakaꞌ isyijemal yaꞌ David, ismam yaꞌ.7 Iswatxꞌenkanh yaꞌ Salomón yatut tioxh Quemos, isdiosal Moab, yebꞌ yatut tioxh Moloc, isdiosal Amón yibꞌanh iswiꞌ wonhan aykoj satakꞌti Jerusalén, haꞌ hunteqꞌan tioxh tuꞌ kaw yahbꞌeta yul sat Komam Dios.b 8 Haktikꞌapax tuꞌ xin yute yaꞌ yinh ebꞌix ix nan konhobꞌal iqꞌbꞌil yu, iswatxꞌekanh yaꞌ yatut istioxh ebꞌix, chisnhusni ebꞌix teꞌ pom yebꞌ xahanbꞌal tet istioxh. 9 Istit ishowal Komam Jahawil yinh yaꞌ Salomón, yuto yilo yanma yaꞌ yinh Komam, isDiosal Israel, waxanhka xin isye isbꞌa Komam kayel tet yaꞌ. 10 Yal Komam tet yaꞌ tato mach chiyiyo isbꞌa yaꞌ sata hunteqꞌan tioxh, yajaꞌ mach iskꞌubꞌa yaꞌ tzet yal Komam, Jahawil tet yaꞌ. 11 Yuxin yal Komam Dios Jahawil tet yaꞌ Salomón: «Yu tzet xahawatxꞌe tiꞌ, mach xin hawije tzet chiwalan, yuxin chachwilojan yinh hawaqꞌni yahawilal, kat wanikojan yul isqꞌabꞌ hachejabꞌ. 12 Yajaꞌ mach chintzikilojan txꞌotxꞌ konhobꞌ Israel yul haqꞌabꞌ yulbꞌal istiempohal yet itzitz hachto, yu iskꞌulal inkꞌulan yinh hamam David, wal xin haꞌ tet hakꞌahol chintzikilojan txꞌotxꞌ. 13 Yajaꞌ mach sunilo chiwilojan, wal xin chiwakojan huneꞌ majan ebꞌnaj Israel yul isqꞌabꞌ hakꞌahol, yu iskꞌulal inkꞌulan yinh hamam David, yebꞌ yinh konhobꞌ Jerusalén sikꞌbꞌililo wuhan,» xhi Komam tet yaꞌ Salomón.
14 Hak tuꞌ yu yaniko Komam Dios huneꞌ naj yaqꞌaꞌko howal yinh yaꞌ rey Salomón. Huneꞌ naj tuꞌ, haꞌ ton naj Hadad ah Edom, naj yikꞌal ebꞌnaj isreyal Edom. 15 Hayet yalanhtokanoj qꞌoji yaꞌ David yinh ebꞌnaj edomita, yapni naj Joab, yahawil ebꞌnaj soldado Israel mujwal yinh ebꞌnaj Israel kamiloj, hayet ayko naj Joab yebꞌ issoldado bꞌey tuꞌ ispotxꞌnikamo ebꞌnaj sunil ebꞌnaj edomita. 16 (Wajebꞌ ixahaw ehayo naj Joab bꞌey tuꞌ yebꞌ sunil ebꞌnaj soldado Israel masanto tanhkanilo sunil ebꞌnaj winaj edomita yu naj.) 17 Hak tuꞌ yu yelkanh naj Hadad yebꞌ haywanhxa ebꞌnaj edomita, ischejabꞌ ismam naj, isto ebꞌnaj bꞌey Egipto. Hayet yelkanh naj Hadad tuꞌ, nichꞌan tzeh naj. 18 Hayet yelkanh ebꞌnaj tuꞌ yapni ebꞌnaj bꞌey txꞌotxꞌ Madián, yapnipaxo ebꞌnaj bꞌey txꞌotxꞌ Parán, haꞌ bꞌey tuꞌ ok tzujno hunteqꞌanxa ebꞌnaj yinta naj Hadad. Yapni ebꞌnaj bꞌey Egipto iskꞌatanh naj faraón, isreyal Egipto; yaqꞌni naj faraón tuꞌ yatut ebꞌnaj yebꞌ tzet chislo ebꞌnaj, yaqꞌnipaxo naj istxꞌotxꞌ ebꞌnaj.
19 Kaw xin kan naj Hadad kꞌulal yul sat naj faraón, yuxin yaqꞌ naj isnoh yixal, yiqꞌaꞌkanh naj Hadad tuꞌ. Wal isbꞌi ix yixal naj faraón tuꞌ, Tahpenes isbꞌi ix. 20 Lahwi tuꞌ, ispitzkꞌa huneꞌ iskꞌahol naj Hadad yebꞌ ix isnoh ix Tahpenes, Genubat isbꞌi nichꞌan unin tuꞌ. Wal naj Genubat tuꞌ xin, huneꞌnhe yu ischꞌibꞌkanh naj yebꞌ ebꞌnaj yunin ix Tahpenes yul yatut naj Faraón. 21 Haxa yet yabꞌen naj Hadad bꞌey Egipto tato xakam yaꞌ David yebꞌ naj Joab, yahawil yinh ebꞌnaj soldado Israel, yalni naj tet naj Faraón:
—Chahintopáxojan yul inkonhobꞌan, xhi naj.
22 Istaqꞌwi naj Faraón tet naj:
—¿Tzet yinh? ¿Tom mach tzꞌajano tzet ay yul haqꞌabꞌ inkꞌatanhtiꞌan yuxin chawoche chachpaxto hakonhobꞌ? xhi naj. Istaqꞌwi naj Hadad tuꞌ:
—Machi hunu tzet tiꞌ mach ay yul inqꞌabꞌan, yajaꞌ chinqꞌanan tawet tato chinhachatopaxojan, xhi naj.
23 Yanipaxiko Komam Dios naj Rezón yaqꞌaꞌko howal yinh yaꞌ rey Salomón, naj Rezón tuꞌ, iskꞌahol naj Eliada ye naj. Naj Eliada tuꞌ elnakanh naj iskꞌatanh naj Hadad-ezer, isreyal Soba. 24 Hayet ismaqꞌnikamo yaꞌ David ebꞌnaj ah Soba yok tzujno hunbꞌulan ebꞌnaj ah Soba elqꞌom yinta naj Rezón. Yok naj Rezón yahawilo ebꞌnaj, isto ebꞌnaj bꞌey Damasco, yehayo ebꞌnaj bꞌey tuꞌ, yaniko ebꞌnaj naj Rezón isreyalo Damasco. 25 Naj Rezón tuꞌ, yako naj howal yinh ebꞌnaj Israel yinh sunilbꞌal tiempo yet itzitzto yaꞌ rey Salomón. Wal xin haꞌ hun naj Rezón yinta naj Hadad yinh howal yinh Israel, yet ayiko naj Rezón isreyalo txꞌotxꞌ Siria.
26 Hakpax tuꞌ yaꞌ Jeroboam iskꞌahol naj Nabat, yikꞌal yaꞌ Efraín, ay bꞌey Sereda, meltzoko yaꞌ howal yinh yaꞌ rey Salomón. Wal xin, ischejabꞌ yaꞌ rey Salomón ye yaꞌ, ismiꞌ yaꞌ xin, Zerúa isbꞌi ix, ix Zerúa tuꞌ hunix ix. 27 Yako yaꞌ Jeroboam ishowal yinh yaꞌ Salomón yu huneꞌ tiꞌ: hayet lanhan iswatxꞌenkanh yaꞌ rey Salomón chꞌen kꞌubꞌ, Milo isbꞌi, ismajchen yaꞌ rey tuꞌ huneꞌ nichꞌan bꞌeh chiꞌokto yul iskonhobꞌ yaꞌ David, ismam yaꞌ Salomón. 28 Yaꞌ Jeroboam tuꞌ, kaw ay yip yanma yaꞌ yebꞌ kaw hinan yaꞌ, yuxin hayet yilni yaꞌ Salomón tato kaw sakꞌan yaꞌ Jeroboam tuꞌ, yaniko yaꞌ yaꞌ yahawilo yinh ebꞌnaj Israel yikꞌal yaꞌ José.
29 Hayet hunel xin elto yaꞌ Jeroboam yul konhobꞌ Jerusalén, kꞌuxan xin ischahnayo isbꞌa yaꞌ yul bꞌeh yebꞌ yaꞌ Ahías, silonita, yaꞌ ischejabꞌ Komam Dios, hukaniko huneꞌ akꞌ capa yinh yaꞌ Ahías. Iskawanhilchꞌan xin yilayo isbꞌa yul bꞌeh tuꞌ. 30 Yinilo yaꞌ Ahías iscapa ayko yinh, istzilnayo yaꞌ, kabꞌlahonhebꞌ pelan yuteyo yaꞌ qꞌap. 31 Yalni yaꞌ tet yaꞌ Jeroboam: «Haꞌ 10 (lahonhebꞌ) pelan qꞌap tiꞌ, hawet qꞌap yuto hak tiꞌ chute yalni Komam Dios, Jahawil, isDiosal Israel, hakaꞌ tiꞌ: “Chinpohayojan konhobꞌ ayko yalanh yip yaꞌ rey Salomón, chiwanikojan 10 (lahonhebꞌ) majan ebꞌnaj Israel yalanh hawip. 32 Chikankano huneꞌ majan ebꞌnaj Israel yalanh yip yaꞌ rey Salomón, yu iskꞌulal inkꞌulan yinh yaꞌ David, inchejabꞌan yebꞌ yu iskꞌulal inkꞌulan yinh konhobꞌ Jerusalén, konhobꞌ insikꞌilojan xol hunun majan ebꞌnaj Israel. 33 Yuto bꞌejbꞌilinkanojan yu yaꞌ rey, yok yaꞌ yinoyo isbꞌa tet tioxh Astoret, isdiosal ebꞌnaj Sidonio, yinipaxayo isbꞌa yaꞌ tet tioxh Quemos, isdiosal ebꞌnaj Moab, yebꞌ tet tioxh Moloc, isdiosal ebꞌnaj Amón. Machi xin bꞌelwi yaꞌ yinh kꞌul yul inbꞌehan, maxhtaj xin istoholal iswatxꞌe yaꞌ yul insatan. Machi xin isyije yaꞌ chejbꞌanile yebꞌ kuybꞌanile waqꞌan tet yaꞌ hakaꞌ yu isyijen yaꞌ David, ismam yaꞌ Salomón tuꞌ. 34 Yajaꞌ mach chinpohayojan konhobꞌ ayko yalanh yip yaꞌ Salomón tiꞌ tinanh, yuto sunilbꞌal tiempo itzitz yaꞌ Salomón tiꞌ, chiꞌok yaꞌ isreyal Israel yu iskꞌulal inkꞌulan yinh yaꞌ David inchejabꞌan, yaꞌ saybꞌiliko isreyalo Israel, yaꞌ David tuꞌ isyije yaꞌ chejbꞌanile yebꞌ kuybꞌanile waqꞌan tet yaꞌ. 35 Yajaꞌ chinpohayojan konhobꞌ ayko yalanh yip iskꞌahol yaꞌ, kat wanikojan 10 (lahonhebꞌ) majan ebꞌnaj Israel yalanh hawip. 36 Chiwanikojan huneꞌ majan ebꞌnaj Israel yalanh yip iskꞌahol yaꞌ Salomón tiꞌ, haxinwal aynhetikꞌako qꞌaꞌ yinh istzejtah yaꞌ David inchejabꞌan, yinh sunilbꞌal tiempo insatajan bꞌey Jerusalén, konhobꞌ saybꞌililo wuhan yu yaqꞌlax bꞌinaho inbꞌihan. 37 Haninan chachwakojan reyal yibꞌanh sunil tzet choche hawanma, kat hawok isreyalo Israel. 38 Tato chawabꞌe sunil tzet chiwaltiꞌan, kat habꞌeybꞌalnhen tzet chiwalkanojan, kat hawatxꞌen istoholal yul insatan, kat hakꞌubꞌan chejbꞌanil yebꞌ kuybꞌanile chiwalan hakaꞌ yu iskꞌubꞌan yaꞌ David, inchejabꞌan, wal tuꞌ chinokan hawetbꞌihoj, chiwanikojan hakꞌahol reyal haselelo bꞌaqꞌinh. Hakaꞌ wuhan yinh yaꞌ David, chiwanikojan Israel yalanh hawip. 39 Wal yuninal yaꞌ David chiwayojan isyaꞌtajil yibꞌanh yulbꞌal hayebꞌo habꞌil yu ismul yaꞌ Salomón,” xhi Komam,» xhi yaꞌ Ahías.
40 Yu huneꞌ tuꞌ, yuxin yoche yaꞌ rey Salomón ispotxꞌoꞌkamo yaꞌ Jeroboam, yajaꞌ elkanh yaꞌ, isto yaꞌ Egipto, yapni yaꞌ iskꞌatanh naj Sisac, isreyal Egipto, haꞌ tuꞌ xin ehayo yaꞌ Jeroboam masanto kam yaꞌ Salomón.c
Iskamikal yaꞌ Salomón
41 Haꞌ hunteqꞌanxa tzet iswatxꞌe yaꞌ Salomón yebꞌ ishelanil yaꞌ, tzꞌibꞌnhebꞌil yul huneꞌ hum chitzotel yinh tzetaj iswatxꞌe yaꞌ Salomón. 42 40 (Kawinaj) habꞌil ok yaꞌ Salomón reyal yinh sunil Israel. 43 Lahwi tuꞌ iskam yaꞌ rey Salomón tuꞌ hakaꞌ yu leiskamto ismam icham yaꞌ yebꞌ ismam yaꞌ. Yok yaꞌ Roboam, iskꞌahol yaꞌ Salomón tuꞌ reyal seleloj.