2 Wal yaꞌ Ocozías titkꞌay yaꞌ yul isventanah yinh yet iskabꞌ piso yatut yaꞌ ay bꞌey Samaria. Kaw xin niman islahwilal yaꞌ oki. Hayet kaw yaꞌay yaꞌ tuꞌ yawten yaꞌ ebꞌnaj ischejabꞌ yalni yaꞌ tet ebꞌnaj: «Asiꞌwe heqꞌambꞌeꞌ tet Baal-zebub, isdiosal Ecrón ta chito kinkawxihan,» xhi yaꞌ.

3 Istzotel yángel Komam Jahawil tet yaꞌ Elías, yaꞌ ay bꞌey Tisbe hakaꞌ tiꞌ: «Elías, ahanhwanoj kat hachahleno habꞌa yebꞌ ebꞌnaj ischejabꞌ yaꞌ rey Samaria, kat hawalni tet ebꞌnaj: “¿Tom machi Dios bꞌey Israel yuxin chexto heqꞌambꞌeꞌ tet Baal-zebub, isdiosal Ecrón?” kachi tet ebꞌnaj,» xhi yángel Komam. 4 Yalnipaxo yángel Komam tet yaꞌ Elías: «Haꞌ Komam chihalni tet yaꞌ rey: “Matxa chachahwanoj, wal xin yinh kaw yeli chachkamoj,” xhi Komam, kachi,» xhi yángel Komam. Lahwi tuꞌ isto yaꞌ Elías, ischahni yaꞌ ebꞌnaj ischejabꞌ yaꞌ rey.

5 Ismeltzo ebꞌnaj chejabꞌ tuꞌ, hayet yapni ebꞌnaj iskꞌatanh yaꞌ rey, isqꞌambꞌen yaꞌ tet ebꞌnaj:

—¿Tzet yinh xin makexmeltzohi? xhi yaꞌ. 6 Istaqꞌwi ebꞌnaj:

—Makochayo kobꞌahanh yebꞌ huneꞌ yaꞌ yul bꞌeh, mayalni yaꞌ jetanh: “Meltzanhweto iskꞌatanh yaꞌ rey makexchejnitij, kat heyalni tet yaꞌ: Hak tiꞌ chiyute yalni Komam Dios hakaꞌ tiꞌ: ‘¿Tom machi Dios bꞌey Israel yuxin hachejti haqꞌambꞌeꞌ habꞌa tet Baal-zebub, isdiosal Ecrón? Yu huneꞌ maxawu tiꞌ, yuxin matxa chachahwano sat hatxꞌat,’ xhi Komam Dios,” xhi yaꞌ jetanh, xhi ebꞌnaj.

7 Isqꞌambꞌen yaꞌ rey tet ebꞌnaj:

—¿Tzet jilni huneꞌ yaꞌ winaj hechah tuꞌ, yalni hunteqꞌan tiꞌ teyet? xhi yaꞌ.

8 Istaqꞌwi ebꞌnaj:

—Mam rey, haꞌ huneꞌ yaꞌ winaj tuꞌ, haꞌ huneꞌ noꞌ tzꞌum ay xil hukaniko yinh yaꞌ, yebꞌ xin tzꞌumpaxo noꞌ ayko istxꞌambꞌalo yaꞌ, xhi ebꞌnaj. Yalni yaꞌ rey tuꞌ tet ebꞌnaj:

—¡Haꞌ yaꞌ Elías, yaꞌ ay bꞌey Tisbe, chal tuꞌ! xhi yaꞌ. 9 Lahwi tuꞌ ischejnito yaꞌ rey Ocozías huneꞌ naj yahawil yeko yinh 50 (lahonh yoxkꞌalwanh) ebꞌnaj soldado istzujnoyo yaꞌ, isto naj yebꞌ ebꞌnaj issoldado, ilchayo yaꞌ Elías yu ebꞌnaj. Hayet yapni ebꞌnaj tuꞌ, tzꞌonhanayo yaꞌ iswiꞌ wonhan, yalni naj yahawil soldado tuꞌ tet yaꞌ:

—Hach ischejabꞌ Komam Dios, chal yaꞌ rey tato chachayti iswiꞌ wonhan tiꞌ, xhi naj. 10 Istaqꞌwi yaꞌ Elías:

—¡Tato ischejabꞌ Komam Dios wehan, tijabꞌ qꞌa qꞌaꞌ yul satkanh kat kach isnhusnito yebꞌ ebꞌnaj 50 (lahonh yoxkꞌalwanh) hasoldado tiꞌ! xhi yaꞌ. Yinhnhena tuꞌ istit qꞌa qꞌaꞌ satkanh istzꞌato naj yebꞌ 50 (lahonh yoxkꞌalwah) issoldado tzujan yintaj.

11 Lahwi tuꞌ, ischejnipaxto yaꞌ rey Ocozías huneꞌxa naj yahawil yinh 50 (lahonh yoxkꞌalwah) ebꞌnaj soldado, isto naj yebꞌ issoldado tuꞌ, yapni ebꞌnaj iskꞌatanh yaꞌ Elías, yalni naj tet yaꞌ:

—Hach ischejabꞌ Komam Dios, chal yaꞌ rey tato chachayti yinh anhe, xhi naj. 12 Istaqꞌwi yaꞌ Elías tet naj:

—Tato ischejabꞌ Komam Dios wehan, tijabꞌ qꞌa qꞌaꞌ satkanh, kat hatzꞌato yebꞌ 50 (lahonh yoxkꞌalwah) ebꞌnaj hasoldado, xhi yaꞌ.

Yinhnhena tuꞌ istit qꞌa qꞌaꞌ satkanh istzꞌato naj yebꞌ 50 (lahonh yoxkꞌalwah) issoldado tzujan yintaj.

13 Lahwi tuꞌ, ischejnipaxto yaꞌ rey huneꞌxa naj yahawil, yebꞌ 50 ebꞌnaj soldado, iskꞌatanh yaꞌ Elías. Hayet yahapno naj yebꞌ issoldado tuꞌ, yay jahno naj yahawil chejlaxto yinh yoxel sata yaꞌ Elías, isqꞌanni naj tet yaꞌ hakaꞌ tiꞌ:

—Mamin, hach ischejabꞌ Komam Dios, ayojabꞌ yelapno inkawilan yul hasat, yebꞌ iskawil ebꞌnaj 50 issoldado hachejabꞌ tiꞌ yul hasat, 14 yuto kawanh ebꞌnaj yahawil yebꞌ 50 issoldado hunun ebꞌnaj tanhilo yu qꞌa qꞌaꞌ tit satkanh; ¡yuxin hanintiꞌan chinqꞌanan tawet, ayojabꞌ yelapno inkawilan yul hasat! xhi naj.

15 Yuxin yal yángel Komam Jahawil tet yaꞌ Elías: «Asiꞌ yinta naj, mach chaxhxiw tet yaꞌ rey tuꞌ,» xhi yángel Komam Dios. Yahwano yaꞌ Elías, yok tzujno yaꞌ yinta ebꞌnaj, isto yaꞌ isyeno isbꞌa tet yaꞌ rey Ocozías. 16 Yalni yaꞌ Elías tet yaꞌ rey tuꞌ:

—Hak tiꞌ chiyute yalni Komam Jahawil: ¿Tom machi Dios bꞌey Israel tiꞌ bꞌay chaqꞌambꞌe habꞌa tet, yuxin hachejto hachejabꞌ kach isqꞌambꞌeꞌ tet Baal-zebub, isdiosal Ecrón? Yu huneꞌ maxawu tuꞌ, yuxin matxa chachahwano sat hatxꞌat, ¡wal xin yinh kaw yeli chaxhkami! xhi yaꞌ Elías.

17 Iskam yaꞌ rey Ocozías hakaꞌtikꞌa yu yalni Komam Jahawil tet yaꞌ Elías. Yaꞌ Ocozías tuꞌ, machi hunu iskꞌahol yaꞌ, yuxin haꞌ yaꞌ Joram, yuxhta yaꞌ ok reyal seleloj. Hayet yok yaꞌ Joram isreyalo Israel, kabꞌxa habꞌil yok hunxa yaꞌ Joram, iskꞌahol yaꞌ Josafat isreyal Judá.

18 Haꞌ hunteqꞌanxa tzet iswatxꞌe yaꞌ rey Ocozías tzꞌibꞌnhebꞌilkano yul hum chitzotel yinh ebꞌyaꞌ isreyal Israel.