—Kananhkano bꞌey tiꞌ tinanh, yuto chinischejtojan Komam Jahawil bꞌey Bet-el, xhi yaꞌ. Istaqꞌwi yaꞌ Eliseo tet yaꞌ:

—¡Chiwaqꞌ bꞌinahojan isbꞌi Komam Jahawil itzitz, chiwalnikanojan tawet tato mach chachinbꞌejkanojan! xhi yaꞌ.

Hak tuꞌ yu isto ebꞌyaꞌ iskawanhil bꞌey Bet-el. 3 Yelti ebꞌnaj iskꞌahol ebꞌyaꞌ ischejabꞌ Komam Dios bꞌey Bet-el ischahno yaꞌ Eliseo, yalni ebꞌnaj tet yaꞌ:

—¿Hawohtaxami tato chiyilo Komam Jahawil yaꞌ hawahawil tiꞌ takꞌatanh tinanh? xhi ebꞌnaj. Istaqꞌwi yaꞌ Eliseo tet ebꞌnaj:

—Hoꞌ wohtajan, kachwe hetiꞌ, xhi yaꞌ. 4 Yalni yaꞌ Elías tet yaꞌ Eliseo hunelxa:

—Kananhkano bꞌey tiꞌ tinanh, yuto chinischejtojan Komam Jahawil bꞌey Jericó, xhi yaꞌ. Istaqꞌwi yaꞌ Eliseo tet yaꞌ:

—Chiwaqꞌ bꞌinahojan isbꞌi Komam Jahawil itzitz, chiwalnikanojan tawet tato mach chachinbꞌejkanojan, xhi yaꞌ. 5 Ishitziko ebꞌnaj iskꞌahol ebꞌyaꞌ ischejabꞌ Komam Dios bꞌey Jericó ischahno yaꞌ Eliseo, yalni ebꞌnaj tet yaꞌ:

—¿Hawohtaxami tato chiyilo Komam Jahawil yaꞌ hawahawil tiꞌ takꞌatanh tinanh? xhi ebꞌnaj. Istaqꞌwi yaꞌ Eliseo tet ebꞌnaj:

—Hoꞌ wohtajan, kachwe hetiꞌ, xhi yaꞌ. 6 Yalni yaꞌ Elías tet yaꞌ Eliseo hunelxa:

—Kananhkano bꞌey tiꞌ tinanh, yuto chinischejtojan Komam Jahawil bꞌey haꞌ Jordán, xhi yaꞌ. Istaqꞌwi yaꞌ Eliseo tet yaꞌ:

—¡Chiwaqꞌ bꞌinahojan isbꞌi Komam Jahawil itzitz, chiwalnikanojan tawet tato mach chachinbꞌejkanojan! xhi yaꞌ.

Isto ebꞌyaꞌ iskawanhil xin. 7 Yajaꞌ apni 50 (lahonh yoxkꞌalwah) ebꞌnaj iskꞌahol ebꞌyaꞌ ischejabꞌ Komam Dios bꞌay chito ebꞌyaꞌ kawanh tuꞌ, nahat xin kankano linhno ebꞌnaj; wal ebꞌyaꞌ kawanh xin, ok linhno ebꞌyaꞌ istiꞌ haꞌ Jordán. 8 Yinilo yaꞌ Elías huneꞌ xil isqꞌap ayko yinh, ispajtzonayo yaꞌ, ismaqꞌnayo yaꞌ qꞌap tuꞌ yibꞌanh haꞌ Jordán, ispohni isbꞌa haꞌ, yekꞌto ebꞌyaꞌ bꞌay tajin txꞌotxꞌ. 9 Hayet xaꞌekꞌto ebꞌyaꞌ tuꞌ, yalni yaꞌ Elías tet yaꞌ Eliseo:

—Qꞌankano tzet chawoche chiwaqꞌan tawet yalanhto maxhto chinilaxilojan takꞌatanh, xhi yaꞌ. Istaqꞌwi yaꞌ Eliseo:

—Chinqꞌanan tawet tato kayel chawaqꞌkano hawespíritu wibꞌanhan, inmajujlojan, hakaꞌta habꞌabꞌel kꞌahol inan, xhi yaꞌ.^a 10 Istaqꞌwi yaꞌ Elías tet yaꞌ:

—Haꞌ tzet maxaqꞌan tiꞌ kaw yaꞌtaj. Tato chawil yet chinilaxilojan takꞌatanh, wal tuꞌ chiyij isbꞌa tzet maxaqꞌan tiꞌ, taka mach chawil wilaxilojan takꞌatanh, mach chij isbꞌa, xhi yaꞌ.

11 Hayet lanhan istzotel ebꞌyaꞌ tuꞌ bꞌelwo chu ebꞌyaꞌ, yinhnhena tuꞌ yul huneꞌ carruaje hoyaniko qꞌaꞌ yinh, nhikꞌbꞌil yu noꞌ cheh xol qꞌa qꞌaꞌ, haꞌ xin pohni xolbꞌal ebꞌyaꞌ. Yilaxto yaꞌ Elías satkanh xol huneꞌ jaqꞌeqꞌ kajtuxkum. 12 Hayet yilni yaꞌ Eliseo huneꞌ tuꞌ, yah yaw yaꞌ hakaꞌ tiꞌ: «¡Hach wahawil, hach wahawil, haꞌ huneꞌ tiꞌ, haꞌ iscarruaje ebꞌnaj Israel, yebꞌ ebꞌnaj issoldado ayahto yibꞌanh cheh!» xhi yaꞌ.

Hak tuꞌ xin matxa yil yaꞌ Eliseo yaꞌ Elías.

Yinilo yaꞌ Eliseo xil isqꞌap, istzilnito yaꞌ qꞌap, kabꞌebꞌ ayiko qꞌap yu yaꞌ. 13 Lahwi tuꞌ, yinikanh yaꞌ xil isqꞌap yaꞌ Elías aykꞌaykanoj, isto yaꞌ istiꞌ haꞌ Jordán, yok linhno yaꞌ istiꞌ haꞌ. 14 Ismaqꞌnayo yaꞌ xil isqꞌap yaꞌ Elías yibꞌanh haꞌ, yalni yaꞌ: «¿Bꞌaytuꞌwal ay Komam Dios, isDiosal yaꞌ Elías?» xhi yaꞌ.

Lanhantotikꞌa ismaqꞌnayo yaꞌ qꞌap yibꞌanh haꞌ, ispohni isbꞌa haꞌ, yekꞌto yaꞌ Eliseo yiktabꞌal haꞌ. 15 Hayet yilni ebꞌnaj iskꞌahol ebꞌyaꞌ ischejabꞌ Komam Dios huneꞌ tuꞌ, ebꞌnaj tit bꞌey Jericó, iskankano linhno isqꞌaxebꞌikꞌto haꞌ, yalni ebꞌnaj hakaꞌ tiꞌ: «Haꞌ yespíritu yaꞌ Elías mahul yibꞌanh yaꞌ Eliseo tiꞌ,» xhi ebꞌnaj.

Ishitzto ebꞌnaj ischahno yaꞌ Eliseo, yay nhohno ebꞌnaj sata yaꞌ. 16 Yalni ebꞌnaj tet yaꞌ Eliseo:

—Mamin, hakoxolanh hanhonh hachejabꞌ honhtiꞌanh ay 50 (lahonh yoxkꞌalwanh) ebꞌnaj winaj kaw ay yip, tojabꞌ ebꞌnaj tinanh issayaꞌ yaꞌ Elías, hawahawil tuꞌ, yuto kꞌuxantaxka haꞌ Yespíritu Komam Dios maꞌinito yaꞌ iswiꞌla witz maka satla akꞌal, xhi ebꞌnaj. Istaqꞌwi yaꞌ Eliseo tet ebꞌnaj:

—Machoj, mach chechejto ebꞌnaj, xhi yaꞌ.

17 Yajaꞌ kaw ischilbꞌa ebꞌnaj yalni huneꞌ tuꞌ tet yaꞌ Eliseo, yuxin tibꞌayo yu yaꞌ, yalni yaꞌ:

—Chejweto ebꞌnaj, chal tuꞌ, xhi yaꞌ. Ischejlaxto 50 (lahonh yoxkꞌalwah) ebꞌnaj, issayno yaꞌ Elías, issaylax yaꞌ yulbꞌal oxebꞌ tzꞌayik, yajaꞌ mach ilcha yaꞌ. 18 Haxa yet ismeltzo ebꞌnaj bꞌey sayno yaꞌ Elías tuꞌ iskꞌatanh yaꞌ Eliseo bꞌey Jericó, yalni yaꞌ Eliseo tet ebꞌnaj:

—¿Tom machi walan teyet xin tato mach chexto hesayaꞌ yaꞌ? xhi yaꞌ tet ebꞌnaj. 19 Yalni ebꞌnaj winaj ay yul konhobꞌ tuꞌ tet yaꞌ Eliseo:

—Mamin, ilkꞌanabꞌi lah, haꞌ bꞌay ayayo huneꞌ konhobꞌ tiꞌ kaw saqꞌal jilni, yajaꞌ wal isnuqꞌ ej ha haꞌ mach kꞌulo haꞌ, yebꞌpaxo txꞌo txꞌotxꞌ matzet chichꞌibꞌ sat txꞌotxꞌ, xhi ebꞌnaj. 20 Yalni yaꞌ Eliseo tet ebꞌnaj:

—Iweti atzꞌam atzꞌam yul hunu sekꞌ kaw akꞌto, xhi yaꞌ.

Yiniti ebꞌnaj atzꞌam atzꞌam tuꞌ tet yaꞌ Eliseo, 21 isto yaꞌ istixhnoyto atzꞌam yul ej isnuqꞌ ha haꞌ, yalni yaꞌ:

—Haꞌ Komam Jahawil halni hakaꞌ tiꞌ: “Haninan chinwatxꞌelojan ha haꞌ tiꞌ, matxa bꞌaqꞌinh chiyako haꞌ kamikal, matxapaxo xin yabꞌil chaqꞌ haꞌ,” xhi Komam, xhi yaꞌ.

22 Iswatxꞌikanilo ha haꞌ tuꞌ masanto tinanh, hakaꞌtikꞌa yu yalni yaꞌ Eliseo.

23 Lahwi tuꞌ yel yaꞌ Eliseo bꞌey tuꞌ, isto yaꞌ bꞌey Bet-el, hayet lanhan yahto yaꞌ yinh isbꞌel, yelti hunbꞌulan ebꞌnaj tzeh ay yul konhobꞌ bꞌuchwal yinh yaꞌ hakaꞌ tiꞌ: «¡Ahanhto pechꞌanwiꞌ! ¡Ahanhto pechꞌanwiꞌ!» xhi ebꞌnaj.

24 Ismeltzo yaꞌ Eliseo yok tꞌanhno yaꞌ yinh ebꞌnaj, istzꞌaktiꞌnhen yaꞌ ebꞌnaj yinh isbꞌi Komam Jahawil, yelilo kakꞌonh noꞌ oso xol telaj yinh ebꞌnaj, istzilnikamo noꞌ 42 (kabꞌ yoxkꞌalwanh) ebꞌnaj tzehtaj tuꞌ. 25 Lahwi tuꞌ isto yaꞌ Eliseo bꞌey witz Carmelo, tzujan tuꞌ ismeltzo yaꞌ bꞌey Samaria.