4 Haꞌ yinh hunteqꞌan habꞌil tuꞌ, haꞌ naj Mesa isreyal Moab, pohchahom meꞌ naj, chaqꞌni naj 100 mil yunin noꞌ meꞌ, yebꞌ xin 100 mil noꞌ icham meꞌ yebꞌ isxil noꞌ, yinh tohlabꞌal tet yaꞌ isreyal Israel. 5 Yajaꞌ haxa yet iskam yaꞌ rey Acab, yok ebꞌnaj Moab manhkꞌomal tet isreyal ebꞌnaj Israel. 6 Yuxin el yaꞌ rey Joram bꞌey Samaria, isto yaꞌ iskutxbꞌanoko sunil ebꞌnaj soldado Israel. 7 Ischejni yaꞌ rey Joram ischejabꞌ yalno tet yaꞌ Josafat, isreyal Judá:

—Naj isreyal Moab chilo isbꞌa naj yalanh wipan, yuxin ¿chimkachto hawaqꞌaꞌ howal wintajan yinh txꞌotxꞌ Moab? xhito yaꞌ. Istaqꞌwi yaꞌ Josafat:

—Chintohan tawintaj, yuto hanin tiꞌanh hakaꞌto hawuxhta wehan, haꞌ inkonhobꞌan, hakaꞌto hakonhobꞌpaxoj, haꞌ inchehan yet howal hakaꞌto hawetpaxo noꞌ. 8 Yajaꞌ ¿tzet bꞌehal bꞌay chonhto jaqꞌaꞌko howal yinh Moab tuꞌ? xhi yaꞌ. Istaqꞌwi yaꞌ Joram:

—Haꞌ yul isbꞌelal txꞌotxꞌ desierto, ay yul ismajul Edom chonhtohi, xhi yaꞌ.

9 Hak tuꞌ yu isto yaꞌ isreyal Israel, yebꞌ yaꞌ isreyal Judá yebꞌ naj isreyal Edom yinh howal tuꞌ, yajaꞌ ekꞌ ebꞌnaj ishoyoꞌ txꞌotxꞌ desierto yulbꞌal hujebꞌ tzꞌayik, yuxin lahwayo yaꞌ ebꞌnaj soldado yinh isbꞌel, machipaxo haꞌ chukꞌ ischeh ebꞌnaj. 10 Yuxin yal yaꞌ rey Israel:

—¡Wal tinanh tonhe makonhyiti Komam Jahawil joxwanhil hanhonh reyonh tiꞌ bꞌey tiꞌ, yunhe konhyaniko yul isqꞌabꞌ ebꞌnaj Moab! xhi yaꞌ. 11 Yajaꞌ yal yaꞌ Josafat, isreyal Judá:

—¿Tom xin machi hunu ischejabꞌ Komam Jahawil bꞌey tiꞌ bꞌay chisje koqꞌambꞌen tet Komam Jahawil yinh tzet wal juten kobꞌa? xhi yaꞌ. Istaqꞌwi huneꞌ ischejabꞌ yaꞌ rey Israel, yalni naj:

—Haꞌ bꞌey tiꞌ aykꞌo yaꞌ Eliseo, iskꞌahol yaꞌ Safat. Yaꞌ Eliseo tuꞌ, ischejabꞌ yaꞌ Elías ye yaꞌ yet yalanhtokanoj, xhi naj. 12 Istaqꞌwi yaꞌ Josafat:

—Haꞌ yaꞌ tuꞌ chihalno tzotiꞌ yet Komam Jahawil, xhi yaꞌ. Yuxin haꞌ yaꞌ rey Israel yebꞌ yaꞌ Josafat yebꞌ naj isreyal ebꞌnaj Edom, to ebꞌnaj yoxwanhil bꞌay ay yaꞌ Eliseo tuꞌ. 13 Yalni yaꞌ Eliseo tet yaꞌ isreyal Israel:

—¿Tzet wokan tawinh? ¡Asiꞌ tet ebꞌnaj ischejabꞌ hamam, yebꞌ xin tet ebꞌnaj ischejabꞌ hamiꞌ! xhi yaꞌ Eliseo. Yaꞌ isreyal Israel ispajtze yaꞌ hakaꞌ tiꞌ:

—Machoj, yuto haꞌ Komam Yahawil, konhawtenikojanh oxwanh reyonh tiꞌanh yunhe konhyanikojanh yul isqꞌabꞌ ebꞌnaj moabita, xhi yaꞌ. 14 Istaqꞌwi yaꞌ Eliseo:

—¡Chiwaqꞌ bꞌinahojan isbꞌi Komam Jahawil itzitz, Komam kaw aykano yip ayinikojan ischejabꞌoj! Chiwalnihan tato maxhtaj yu ay yelapno yaꞌ Josafat, isreyal Judá yul insatan, machi wabꞌehan tzet chawala, mach chintꞌanhxipaxikojan tawinh. 15 Iweti hunu naj chiꞌaniko teꞌ arpa yinh insatan, xhi yaꞌ.

Hayet lanhan yaniko huneꞌ naj teꞌ arpa tuꞌ, yul yip Komam Jahawil yibꞌanh yaꞌ Eliseo, 16 yalni yaꞌ: «Hak tiꞌ chiyute yalni Komam Jahawil hakaꞌ tiꞌ: “Watxꞌewe txꞌiꞌal sanja sat akꞌal tiꞌ, 17 machi xin jaqꞌeqꞌ cheyil yekꞌi, machipaxo haꞌ nhabꞌ chiyaqꞌa, yajaꞌ chinoholo huneꞌ akꞌal tiꞌ yu ha haꞌ, kat heyukꞌni haꞌ yebꞌ hecheh yebꞌ henoqꞌ. 18 Huneꞌ tiꞌ nichꞌanchꞌan yul sat Komam Jahawil yinh tzet chisyeloj, chiyaniko Komam ebꞌnaj moabita yul heqꞌabꞌ. 19 Cheyetanto sunil ej konhobꞌ ayko iskꞌubꞌal, yebꞌ nime konhobꞌ kaw kꞌulchꞌan jilni, cheqꞌajnayo isqꞌeptalajil kaw kꞌul, chemajchen sunil isnuqꞌ ha haꞌ, chemujnito istxꞌotxꞌ kaw kꞌul bꞌay chimunla yu chꞌen chꞌen,” xhi Komam,» xhi yaꞌ Eliseo.

20 Haxa yet hunxa tzꞌayik yet sahabꞌ yet yorahil yaqꞌlax xahanbꞌal, istit ha haꞌ yul ismajul Edom, isnohilo sat akꞌal yu haꞌ.

21 Haxa yet yabꞌen ebꞌnaj Moab tato lanhan yahapno ebꞌnaj rey yaqꞌaꞌko howal yinh ebꞌnaj, iskutxbꞌaniko isbꞌa ebꞌnaj nixhte tzehtaj maxhto helano yinh howal, yebꞌ ebꞌnaj winaj ayko yinh istiempohal isto yinh howal, istxolbꞌaniko isbꞌa ebꞌnaj yinhla ismohonal istxꞌotxꞌ. 22 Haxa yet kaw sahabꞌ yet hunxa tzꞌayik, yahwano ebꞌnaj yet lanhan yahilo tzꞌayik, yilnito ebꞌnaj Moab tuꞌ kaj ponhpoxanhe jilnito ha haꞌ sat akꞌal tuꞌ hakaꞌ chikꞌ, yu yoj tzꞌayik. 23 Yuxin yal ebꞌnaj: «¡Haꞌ tzet chijilto tiꞌ, chikꞌ el yu chꞌen espada! Ebꞌnaj rey tuꞌ pakꞌiko ebꞌnaj yinh hunun, hakpax tuꞌ ebꞌnaj soldado pakꞌiko ebꞌnaj yinh yet soldadohal, ismaqꞌlenkamo isbꞌa ebꞌnaj. Wal tinanh xin tonhwe kosunil hanhonh Moabonh tiꞌ jiqꞌaꞌti sunil tzet makankano yu ebꞌnaj,» xhi ebꞌnaj.

24 Haxa yet yapni ebꞌnaj moabita bꞌey iscampamento ebꞌnaj Israel, yelti ebꞌnaj Israel howal yinh ebꞌnaj, yelkanh ebꞌnaj moabita tet ebꞌnaj, yok tzujno ebꞌnaj Israel yinta ebꞌnaj, ispotxꞌnikamo ebꞌnaj Israel ebꞌnaj Moab tuꞌ. 25 Lahwi tuꞌ yuchkꞌankanto ebꞌnaj Israel iskonhobꞌ ebꞌnaj, isnohtzen ebꞌnaj sat istxꞌotxꞌ ebꞌnaj bꞌay chimunla yu ej chꞌen chꞌen, ismajchen ebꞌnaj sunil isnuqꞌ ha haꞌ. Isqꞌajnayo ebꞌnaj sunil teꞌ qꞌebꞌtaj kaw kꞌul, kachanxanhe konhobꞌ Kir-hareset kani. Yajaꞌ haꞌ ebꞌnaj iqꞌbꞌil isximich hoyni huneꞌ konhobꞌ tuꞌ, isqꞌojnito ebꞌnaj isbꞌaqꞌ isximich yinh konhobꞌ, yuchkꞌakantoj.

26 Hayet yilni naj rey Moab tato tanhilo issoldado naj yinh howal tuꞌ, iskutxbꞌaniko naj 700 ebꞌnaj winaj kaw helan yaqꞌni howal yu espada, yinito naj ebꞌnaj yintaj yunhe yaniko naj howal yinh naj rey Edom, yajaꞌ mach qꞌoji ebꞌnaj yinh naj. 27 Istzabꞌnayo naj rey Moab isbꞌabꞌel kꞌahol chiꞌok reyal seleloj, isnhusni naj iskꞌahol xahanbꞌalil yibꞌanh iskꞌubꞌal konhobꞌ hoyanikoj. Hak tuꞌ yu yokkano ishowal ebꞌnaj moabita yinh konhobꞌ Israel, yel ebꞌnaj Israel tuꞌ, ismeltzo ebꞌnaj sat istxꞌotxꞌ.^a