Yaceite huneꞌ ix hunix kamnaxa yichamil
4
Ay huneꞌ ix yixal huneꞌ yaꞌ yetbꞌi ebꞌyaꞌ ischejabꞌ Komam Dios, to halno tet yaꞌ Eliseo:
—Mamin, haꞌ wichamilan, hachejabꞌ, kamnaxa yaꞌ; hach tiꞌ kaw hawohtaj hayet itzitz wichamil tuꞌan, xiw yaꞌ tet Komam Jahawil. Haꞌ tinanh xin mahul huneꞌ naj bꞌay ay iskꞌas wichamil tuꞌan, chixin yoche naj yiqꞌato kawanh wuninan ischejabꞌoj selelo iskꞌas wichamil tuꞌan, xhi ix. 2 Istaqꞌwi yaꞌ Eliseo tet ix:
—¿Tzet wal kach wutenan tinanh? Hal wetan ¿tzet ay yul hawatut? xhi yaꞌ tet ix. Istaqꞌwi ix:
—Mamin, hanin hachejabꞌ intiꞌan, matzet ay hinan yul watutan, kachannhe huneꞌ nichꞌan xhalu aceite, xhi ix. 3 Yalni yaꞌ Eliseo tet ix:
—Wal tinanh asiꞌ, kat hato hakꞌamnhen net tet ebꞌix ayayo yatut hakawilal, yajaꞌ mach hayebꞌnheho chakꞌamnhe. 4 Lahwi hakꞌamnhen sunil net tuꞌ, kat hawokto yul hawatut yebꞌ hawunin, kat hapebꞌan ispultahil hawatut, kat hanohtzen sunil net tuꞌ yu hawaceite ayayto yul nichꞌan haxhalu tuꞌ, nan xin chawaqꞌ sunil net chanohtze tuꞌ, xhi yaꞌ tet ix.
5 Isto ix iskꞌamnhenoti hunteqꞌan xhalu, ismajchenikto isbꞌa ix yebꞌ yunin yul yatut, haꞌ xin ebꞌnaj yunin ix inito txꞌotxꞌ tet ismiꞌ tuꞌ, yanayto ix aceite yul. 6 Hayet isnohkano sunil xhalu tuꞌ, yalni ix tet huneꞌ yunin:
—Iti hunuxa xhalu, xhi ix. Istaqꞌwi yunin ix:
—Matxa tzet, xhi naj. Hayet yalni naj hakaꞌ tuꞌ, istanhayto yaceite ix ayayto yul nichꞌan isxhalu. 7 Lahwi tuꞌ isto ix tzotelo tet ischejabꞌ Komam Dios; yalni yaꞌ tet ix hakaꞌ tiꞌ:
—Wal tinanh asiꞌ, kat hatxonhni tet aceite tuꞌ, kat hatohlanto iskꞌas hawichamil, hantato chikankano yul haqꞌabꞌ tuꞌ xin, chiꞌokniko yu yekꞌ hawu yebꞌ hawunin, xhi yaꞌ Eliseo tet ix.
Yaꞌ Eliseo yebꞌ huneꞌ ix ah Sunem
8 Yinh huneꞌ tzꞌayik, yet yekꞌ yaꞌ Eliseo bꞌey Sunem, haꞌ bꞌey tuꞌ xin ay huneꞌ ix ix kaw ay yelapnoj, kaw xin txꞌiꞌal el eliko yaw ix yinh yaꞌ tato chito yaꞌ waꞌo yatut ix. Yuxin hunta el chiꞌapni yaꞌ Eliseo bꞌey Sunem haꞌ bꞌey yatut ix chiꞌapni yaꞌ waꞌoj. 9 Yuxin yal ix tet yichamil:
—Wal tinanh, matxumchalo wuhan tato haꞌ huneꞌ yaꞌ chꞌekꞌ waꞌo kokꞌatanh tiꞌ, ischejabꞌ Komam Dios ye yaꞌ, pohbꞌililo isbꞌa yaꞌ xol istxꞌojal. 10 Yuxin chinqꞌanan tawet tato chikowatxꞌe hunu nichꞌan cuarto bꞌay chiꞌehayo yaꞌ yet chꞌekꞌyaꞌ kokꞌatanh, kat janikto hunu txꞌat, yebꞌ hunu mexha, yebꞌ hunu xhila, yebꞌ hunu cantil yul cuarto tuꞌ chiꞌokniko yu yaꞌ, xhi ix tet yichamil.
11 Haxa yet hunelxa xin apni yaꞌ Eliseo bꞌey tuꞌ, iskankano yaꞌ wayo yul huneꞌ cuarto tuꞌ. 12 Yalni yaꞌ Eliseo tet naj Giezi ischejabꞌ:
—Awte ix Sunem, xhi yaꞌ. Isto naj yawteno ix, yapni ix iskꞌatanh yaꞌ. 13 Yalni yaꞌ Eliseo tet naj Giezi ischejabꞌ:
—Hal tet ix: “Hach tiꞌ kaw kꞌul hakꞌul jinhanh yu chawaqꞌ bꞌay chonhxewanh, yuxin qꞌan tzet chawoche. ¿Ta chawoche chisje kotzotelanh tawinh yu hachahni iskꞌulal tet yaꞌ rey maka tet naj yahawil yinh ebꞌnaj soldado?” xhi yaꞌ. Istaqꞌwi ix:
—Matzet chal hekꞌul winhan, kꞌul wehan xol wet konhobꞌtiꞌan, xhi ix. 14 Yalni yaꞌ Eliseo tet naj Giezi:
—¿Tzet wal kowatxꞌen yinh ix, chal tuꞌ? xhi yaꞌ. Istaqꞌwi naj Giezi:
—Haꞌ ix tiꞌ, machi hunu yunin ix, yebꞌ xin kaw ichamxa yichamil ix, xhi naj. 15 Yalni yaꞌ Eliseo tet naj:
—Awte ix, xhi yaꞌ.
Yawten naj Giezi ix, yok linhno ix istiꞌ pulta. 16 Yalni yaꞌ Eliseo tet ix:
—Hayet hunabꞌ hakaꞌ huneꞌ tzꞌayik tiꞌ, chachel nichꞌan hawunin, xhi yaꞌ. Istaqꞌwi ix tet yaꞌ:
—Machoj mamin, hach ischejabꞌ Komam Dios hach tiꞌ, mach chachok bꞌuchwal winhan, hanin hachejabꞌ intiꞌan, xhi ix.
17 Ispitzkꞌati nichꞌan unin yinh ix, haxa yinh hunxa habꞌil xin ispitzkꞌa nichꞌan unin tuꞌ, hakaꞌtikꞌa istiempohal bꞌay yal yaꞌ Eliseo. 18 Ischꞌibꞌkanh nichꞌan unin tuꞌ, apni huneꞌ tzꞌayik bꞌay to naj yilaꞌ ismam ayikꞌo iskꞌatanh ebꞌnaj lanhan iskꞌupni iswiꞌ ixim trigo. 19 Yichiko naj nichꞌan tuꞌ yel yaw:
—¡Ay, kaw yaꞌ chikꞌanhxi inwiꞌan, kaw yaꞌ chikꞌanhxi inwiꞌan! xhi naj. Yalni naj mame tet huneꞌ ischejabꞌ:
—Itopaxo naj nichꞌan tiꞌ iskꞌatanh ismiꞌ, xhi naj. 20 Yilaxto nichꞌan unin tuꞌ tet ismiꞌ yu naj chejabꞌ, istzꞌonhbꞌanayo ix nichꞌan unin tuꞌ yibꞌanh iswitxꞌiꞌ masanta yinh chumanil iskamayoj. 21 Yinahto ix naj nichꞌan tuꞌ yul iscuarto yaꞌ ischejabꞌ Komam Dios, ishilbꞌanahto ix naj yibꞌanh istxꞌat yaꞌ, yelti ix, ispebꞌankano ix ispultahil huneꞌ cuarto tuꞌ. 22 Yinh anhe yawte ix yichamil, yalni ix hakaꞌ tiꞌ:
—Ato hunu ebꞌnaj hachejabꞌ tiꞌ wintajan inqꞌanaꞌan yebꞌ hunu noꞌ burro, yuto chintohan yinh anhe wawtehan yaꞌ ischejabꞌ Komam Dios, xhi ix. 23 Istaqꞌwi naj:
—¿Tzet yinh xin chachto hawilaꞌ yaꞌ tinanh? Haꞌ tinanh mach unino ixahaw, mach istzꞌayikalo xewilal, xhi naj. Istaqꞌwi ix:
—Matzet chal hakꞌul, xhi ix tet naj.
24 Lahwi tuꞌ yalni ix tet ischejabꞌ tato chiyakanh naj istzꞌum noꞌ burro, yalni ix tet naj:
—Ijbꞌahonh yinh anhe. Machonhlinhi yulaj bꞌeh, kachan tato haninan chiwalan tawet kat kolinhi, xhi ix.
25 Isto ix, yapni ix bꞌey wonhan Carmelo bꞌay ay yaꞌ ischejabꞌ Komam Dios. Hayet yilniti yaꞌ ischejabꞌ Komam tuꞌ yet nahatto, yalni yaꞌ tet naj Giezi, ischejabꞌ:
—Lanhan yul ix ah Sunem lah. 26 As chah ix yinh anhe inqꞌanaꞌan kat haqꞌambꞌen tet ix: “¿Kꞌulmi hawehi? ¿kꞌulmi yepaxo iskꞌul hawichamil yebꞌ hawunin? kachi,” xhi yaꞌ. Hayet isqꞌambꞌen naj hakaꞌ tuꞌ, istaqꞌwi ix:
—Hoꞌ kꞌul jehanh, xhi ix.
27 Haxa yet ishitziko ix iskꞌatanh yaꞌ Eliseo bꞌey wonhan tuꞌ yok laqꞌno ix yinh yoj yaꞌ Eliseo. Ishitziko naj Giezi yunhe yinilo naj ix yinh yaꞌ, yajaꞌ yal yaꞌ Eliseo hakaꞌ tiꞌ:
—Yilaꞌ ix, yuto kaw bꞌiskꞌulal ye yanma ix, maxhto xin chiyal Komam Dios wetan tzet chiyaqꞌle ix, xhi yaꞌ. 28 Yalni ix tet yaꞌ:
—Mamin, ¿tom haninan inqꞌanan huneꞌ nichꞌan wuninan? ¿tom machi walan tawet, tato mach chaxhbꞌuchwa winhan? xhi ix. 29 Yalni yaꞌ Eliseo tet naj Giezi:
—Kawxeko hatxꞌambꞌal, kat hawinito inqꞌojochan yul haqꞌabꞌ, kat hatohi. Yaj tato ay hunu mak chachah, mach chachtioxhli tet, yebꞌ xin tato ay hunu mak chiqꞌambꞌen tawet hanikꞌ hawehi, mach chachtaqꞌwi tet, kat hawanayo inqꞌojochan yibꞌanh sat naj nichꞌan tuꞌ, xhi yaꞌ Eliseo. 30 Yalni ismiꞌ nichꞌan unin tuꞌ tet yaꞌ Eliseo:
—¡Chiwaqꞌ bꞌinahojan isbꞌi Komam Dios itzitz, chiwaqꞌni bꞌinahojan habꞌi, chiwalnihan tawet tato mach hach chinbꞌejkanojan! xhi ix.
31 Yahwano yaꞌ Eliseo yok tzujno yaꞌ yinta ix, yajaꞌ wal naj Giezi bꞌabꞌito naj, yanayo naj teꞌ qꞌojoch yibꞌanh sat nichꞌan unin tuꞌ, yajaꞌ machi nino chibꞌili nichꞌan unin tuꞌ, machisyepaxilo ta chiꞌitzitzbꞌikanh; yuxin meltzo naj Giezi ischahno yaꞌ Eliseo, yalni naj tet yaꞌ:
—Machi mahulkanh iskꞌul naj nichꞌan tuꞌ, xhi naj.
32 Haxa yet yapni yaꞌ Eliseo yul nha, yilni yaꞌ tato kamom naj nichꞌan tuꞌ, hilanahto sat istxꞌat yaꞌ. 33 Yokto yaꞌ yul cuarto tuꞌ, ispebꞌanilti yaꞌ teꞌ pulta, yok yaꞌ txahlo tet Komam Jahawil. 34 Lahwi tuꞌ, yahto yaꞌ Eliseo yibꞌanh txꞌat, yay nhohno yaꞌ yibꞌanh nichꞌan unin tuꞌ, yanayo yaꞌ istiꞌ yibꞌanh istiꞌ, yokpaxo tꞌanhno yaꞌ yinh isbꞌaqꞌ sat nichꞌan unin tuꞌ, yanipaxayo yaꞌ isqꞌabꞌ yibꞌanh isqꞌabꞌ naj nichꞌan tuꞌ, yay pajno yaꞌ yibꞌanh, yekꞌto isqꞌaxanil yaꞌ yinh nichꞌan unin tuꞌ. 35 Lahwi tuꞌ yel yaꞌ yibꞌanh nichꞌan unin, yekꞌikꞌo yaꞌ yul nha tuꞌ. Yaypaxo pajno yaꞌ yibꞌanh nichꞌan unin hunelxa, yah ishatixh nichꞌan unin tuꞌ hujel, ishajni isbꞌaqꞌ sat. 36 Yawten yaꞌ Eliseo naj Giezi, yalni yaꞌ tet naj:
—Awte ix Sunamita, xhi yaꞌ. Yawten naj ix. Hayet yapni ix, yalni yaꞌ Eliseo tet ix:
—¡Ay hawunin lah! xhi yaꞌ.
37 Yokto ix yul cuarto, yay jahno ix sat txꞌotxꞌ sata yaꞌ Eliseo. Lahwi tuꞌ ischelnikanh ix yunin, yelti ix yul cuarto.
Yelax kꞌaybꞌalkꞌule tet ebꞌyaꞌ ischejabꞌ Komam Dios
38 Lahwi tuꞌ ismeltzo yaꞌ Eliseo bꞌey Gilgal yet yul huneꞌ niman wahil bꞌey Israel. Sunil xin ebꞌnaj iskꞌahol ebꞌyaꞌ ischejabꞌ Komam Dios aykꞌo iskꞌatanh yaꞌ Eliseo, yuxin yal yaꞌ Eliseo tet ischejabꞌ:
—Ahto hunu niman xi yibꞌanh qꞌaꞌ, kat hawatxꞌen tzet chislo ebꞌnaj iskꞌahol ebꞌyaꞌ ischejabꞌ Komam Dios tiꞌ, xhi yaꞌ.a
39 Isto huneꞌ naj sayo itah, yilcha huneꞌ teꞌ xoltelajil kꞌum yu naj, yinilo naj sat teꞌ, yaniko naj teꞌ yul xil isqꞌap hukaniko, ismeltzo naj, isqꞌaxponayo naj teꞌ, yanayto naj teꞌ yul xi, mach xin yohtajo naj tzet teꞌal teꞌ. 40 Lahwi tuꞌ yaqꞌlax teꞌ islobꞌ ebꞌnaj, yajaꞌ hayet yichiko ebꞌnaj waꞌo tuꞌ, yah yaw ebꞌnaj, yalni hakaꞌ tiꞌ:
—¡Mamin, hach ischejabꞌ Komam Dios, haꞌ hunteqꞌan teꞌ tiꞌ chonhkam yu teꞌ! xhi ebꞌnaj. Matxa xin isloh ebꞌnaj teꞌ. 41 Yalni yaꞌ Eliseo:
—Iweti hanikꞌo ixim harina, xhi yaꞌ.
Yilaxti ixim harina tet yaꞌ, istixhnayto yaꞌ ixim yul xi, yalni yaꞌ:
—Aqꞌwe itah tiꞌ tet ebꞌnaj, xhi yaꞌ.
Iswatxꞌilo itah tuꞌ, iswaꞌ ebꞌnaj.
42 Yinhnhena tuꞌ yapni huneꞌ naj ispeto bꞌey Baal-salisa iskꞌatanh yaꞌ Eliseo ischejabꞌ Komam Dios, yaqꞌni naj 20 (hunkꞌal) ixim pan cebada tet yaꞌ Eliseo, ixim watxꞌebꞌililo yinh ixim bꞌabꞌel sat cebada, yaqꞌnipaxo naj iswiꞌ ixim trigo yaxto tet yaꞌ. Yuxin yal yaꞌ Eliseo tet ischejabꞌ tato chiyaqꞌ naj ixim pan iswabꞌ ebꞌnaj aykꞌo iskꞌatanh tuꞌ. 43 Istaqꞌwi naj ischejabꞌ yaꞌ Eliseo:
—Mamin, ¿tom chiyabꞌe ixim tiꞌ yinh 100 (hokꞌal) ebꞌnaj winaj tiꞌ? xhi naj.
Yajaꞌ yalpaxo yaꞌ Eliseo hakaꞌ tiꞌ:
—Aqꞌ ixim iswabꞌ ebꞌnaj yuto haꞌ Komam Dios mahalni tato chiswah ebꞌnaj ixim, aytopaxo ixim chikanoꞌkanoj, xhi yaꞌ.
44 Yaqꞌlax ixim pan tuꞌ tet ebꞌnaj, iswahni ebꞌnaj ixim, aytopaxo xin ixim kantokanoj hakaꞌtikꞌa yu yalni Komam Dios tet yaꞌ Eliseo.