2 Yet hunel chejlaxto hunbꞌulan ebꞌnaj soldado Siria yaqꞌaꞌ howal yinh Israel, istzabꞌcha huneꞌ ix qꞌopo Israel yu ebꞌnaj, yinito ebꞌnaj ix preso bꞌey Siria, yok ix qꞌopo Israel tuꞌ ischejabꞌo yixal naj Naamán. 3 Yalni ix qꞌopo tet ix yahawil bꞌay chimunla tuꞌ:

—Miyay, tato chito yaꞌ wahawtiꞌan isqꞌanaꞌ tet ischejabꞌ Komam Dios ay bꞌey Samaria, tato chiyanhte yaꞌ yaꞌ tet huneꞌ yabꞌil lepra tiꞌ, chiꞌanhcha yaꞌ, xhi ix. 4 Isto naj Naamán, yalni naj tet naj rey, yahawil naj:

—Haꞌ huneꞌ tiꞌ yal huneꞌ ix qꞌopo ay bꞌey txꞌotxꞌ Israel ta ay huneꞌ naj anhlom bꞌey Israel, xhi naj tet naj rey tuꞌ. 5 Yalni naj rey Siria tet naj Naamán:

—Asiꞌ, chintzꞌibꞌnhetojan carta bꞌay chachintaqꞌetojan tet naj isreyal Israel, xhi naj.

Isto naj Naamán, yinito naj teꞌ carta yebꞌ 10 (lahonhebꞌ) talento chꞌen plata, yebꞌ wajebꞌ mil melyu chꞌen oro, yebꞌ 10 (lahonhebꞌ) majan xilqꞌape. 6 Yaqꞌni naj Naamán teꞌ carta tet yaꞌ rey Israel, hak tiꞌ xin chiyute yalni teꞌ hakaꞌ tiꞌ: «Hayet chachahni hunteqꞌan tzotiꞌ tiꞌ, chawohtanheniloj tato haꞌ yul teꞌ chintaqꞌetojan naj Naamán tawet, naj yahawil yinh ebꞌnaj insoldadohan. Chiwatojan naj tawet yu hawaqꞌni kawxo naj, kat yel lepra yinh naj,» xhihayo yul teꞌ.

7 Hayet lahwi yilni yaꞌ rey Israel teꞌ carta tuꞌ, istzilnilo yaꞌ xil isqꞌap, yalni yaꞌ: «¿Tom Dios hinan yuxin chu waqꞌni kawxojan anma, maka chu waqꞌnihan iskawil, yuxin maschejti naj rey Siria huneꞌ naj tiꞌ inkꞌatanhan, kat wanhtenilojan lepra ayko yinh naj? Txumweloj ta haꞌ naj rey Siria tiꞌ ay istxꞌojal chisnako winhan,» xhi yaꞌ.

8 Hayet yabꞌen yaꞌ Eliseo ischejabꞌ Komam Dios tato istzililo yaꞌ rey Israel xil isqꞌap, ischejnito yaꞌ ischejabꞌ yalno tet yaꞌ hakaꞌ tiꞌ: «¿Tzet yinh xin hatzililo xil haqꞌap? Chejti huneꞌ yaꞌ tuꞌ inkꞌatanhan, kat hawohtanheniloj tato ay ischejabꞌ Komam Dios bꞌey Israel tiꞌ,» xhito yaꞌ.

9 Istit naj Naamán yebꞌ ischeh yebꞌ iscarruaje iskꞌatanh yaꞌ Eliseo, hayet yapni naj yok linhno naj sata istiꞌ ispultahil yatut yaꞌ Eliseo. 10 Ischejnilti yaꞌ Eliseo ischejabꞌ yalno tet naj Naamán hakaꞌ tiꞌ: «“As txꞌah habꞌa hujel bꞌey haꞌ Jordán kat hakawxiloj, kat issajbꞌikanilo hanimanil tet lepra,” xhi yaꞌ Eliseo,» xhi naj chejabꞌ tet naj Naamán.

11 Hayet yabꞌen naj Naamán hakaꞌ tuꞌ, istit ishowal naj, isto naj, yichiko naj yalni: «Haꞌ walnihan to yinh anhe chꞌelilo yaꞌ kinischabꞌaꞌan, kat yok linhno yaꞌ inkꞌatanhan, kat istxahli yaꞌ tet isDiosal insatajan, chiyanikanh yaꞌ huneꞌ isqꞌabꞌ kat yaniko yaꞌ hunxa isqꞌabꞌ yinh innimanilan bꞌay ayko lepra tiꞌ, kat wanhchahan, walnihan. 12 ¿Tom mach ekꞌbꞌalo kꞌul haꞌ Abana yebꞌ haꞌ Farfar ay bꞌey Damasco sata ha haꞌ ay bꞌey Israel tiꞌ? Tato chintohan intxꞌahaꞌ hinbꞌahan xol haꞌ ay bꞌey tuꞌ. ¿Tom mach chinanhchapaxojan kat xin yel lepra winhan?» xhi naj. Istit lemna ishowal naj, ispaxto naj. 13 Yajaꞌ hitziko ebꞌnaj ischejabꞌ naj iskꞌatanh, yalni ebꞌnaj tet naj:

—Mamin, ta haꞌ hunu tzet ye tuꞌ kaw yaꞌta chal ischejabꞌ Dios tawet, ¿machmi chayije xin? Wal xin kachan mayal yaꞌ tawet tato chaxhto hatxꞌahaꞌ habꞌa bꞌey haꞌ Jordán, kat hawatxꞌoloj, xhi ebꞌnaj tet naj.

14 Hak tuꞌ yu isto naj Naamán istxꞌahno isbꞌa yul haꞌ Jordán, hujel xin yayto isbꞌa naj xol haꞌ, hakaꞌtikꞌa yu yalni yaꞌ Eliseo, ischejabꞌ Komam Dios. Yinhnhena tuꞌ issajbꞌilo isnimanil naj, hakaꞌ isnimanil nixhte unin, hak tuꞌ elikoj. 15 Ismeltzo naj iskꞌatanh yaꞌ Eliseo ischejabꞌ Komam Dios yebꞌ sunil ebꞌnaj tzujan yinta naj. Hayet yapni ebꞌnaj sata yaꞌ Eliseo tuꞌ yalni naj Naamán tet yaꞌ:

—Wal tinanh matxumchalo wuhan tato machi hunuxa Dios sat yibꞌanhqꞌinal tiꞌ, kachannhe isDiosal Israel. Chinqꞌanan tawet tato chachah hanikꞌo sabꞌehal chiwaqꞌan tawet, hanin hachejabꞌ intiꞌan, xhi naj. 16 Yajaꞌ taqꞌwi yaꞌ Eliseo:

—¡Chiwaqꞌ bꞌinahojan isbꞌi Komam Dios itzitz, chiwalnihan tawet ta mach chinchahan hunteqꞌan chawal tiꞌ! xhi yaꞌ.

Yajaꞌ kaw ischilbꞌa naj Naamán yalni tet yaꞌ Eliseo tato chischah yaꞌ sabꞌehal tuꞌ, yajaꞌ mach ischah yaꞌ. 17 Yuxin yal naj Naamán tet yaꞌ Eliseo:

—Ta hak tuꞌ chinqꞌanan tawet tato chiꞌel yinh hakꞌul hawaqꞌni kabꞌ ijatzo txꞌo txꞌotxꞌ ay bꞌey Israel tiꞌ, chiyito kakꞌonho noꞌ mula yuto hanin hachejabꞌ intiꞌan matxa bꞌaqꞌinh chinnhusan xahanbꞌal tet komon dios, wal xin hanhe tet Komam Dios chiwaqꞌan inxahanbꞌalan. 18 Kachannhe xin chinqꞌanan tet Komam Dios tato chiyaqꞌ nimankꞌulal winhan yuto hayet chibꞌeykꞌo yaꞌ inreyalan yul yatut tioxh Rimón chiꞌoktzabꞌno yaꞌ yinh inqꞌabꞌan, yilal xin chinay jahnojan yinta yaꞌ yul yatut tioxh tuꞌ, yuxin hayet chintohan yinta naj rey tuꞌ, yaqꞌabꞌ nimankꞌulal Komam Dios winhan yu huneꞌ tuꞌ, xhi naj Naamán tet yaꞌ Eliseo. 19 Istaqꞌwi yaꞌ Eliseo tet naj:

—Paxanhto yinh aqꞌankꞌulal, xhi yaꞌ.

Ispaxto naj Naamán tuꞌ. Yiktaxa legua xin chibꞌelwito naj, 20 yet istxumni naj Giezi, ischejabꞌ yaꞌ Eliseo hakaꞌ tiꞌ: «¿Tzet yinh xin tonhe maschato yaꞌ wahawiltiꞌan naj Naamán, ah Siria tuꞌ, machi xin maschah yaꞌ sabꞌehal iqꞌbꞌil yu naj? ¡Wal tinanh chiwaqꞌ bꞌinahojan isbꞌi Komam Dios itzitz, ta chintohan intzujuyojan naj Naamán tuꞌ, kat inqꞌannihan hanikꞌo sabꞌehal tuꞌ tet naj!» xhi naj Giezi yul yet ischukil.

21 Isto naj Giezi istzujnoyo naj Naamán. Hayet yilniti naj Naamán ta apni naj yinh anhe istzujnoyo naj, yayti naj yul iscarruaje ischahno naj. Isqꞌambꞌen naj Naamán:

—¿Toxka ay tzet? xhi naj. 22 Istaqꞌwi naj Giezi:

—Machoj, matzet. Haꞌ yaꞌ wahawilan makinchejnitijan walaꞌan tawet tato ay kawanh ebꞌnaj tzeh iskꞌahol ebꞌyaꞌ ischejabꞌ Komam Dios lanhanto yapni iskꞌatanh yaꞌ, ebꞌnaj tuꞌ ispeto ebꞌnaj bꞌey txꞌotxꞌ chewal txꞌotxꞌ Efraín, yuxin chisqꞌan yaꞌ tato chawaqꞌ huneꞌ talento chꞌen plata, yok kabꞌ majan xilqꞌape akꞌto tet ebꞌnaj, xhi naj Giezi. 23 Istaqꞌwi naj Naamán tet yaꞌ:

—Ito kabꞌ talento chꞌen plata inqꞌanaꞌan, xhi naj. Kaw xin islanh naj Naamán naj Giezi ischahni kabꞌebꞌ talento chꞌen plata, yanayto naj Naamán chꞌen kabꞌ talento tuꞌ yul kabꞌebꞌ txꞌuy yebꞌpaxo kabꞌebꞌ xilqꞌape kaw akꞌto. Isximnayo naj istiꞌ kabꞌebꞌ txꞌuy tuꞌ, yaqꞌni naj tet kawanh ischejabꞌ yu isbꞌabꞌi ebꞌnaj sata naj Giezi masanta yinh qꞌehan. 24 Haxa yet yapni ebꞌnaj bꞌay machi mak chiꞌilni, yinilo naj Giezi chꞌen plata yebꞌ xilqꞌape tet ebꞌnaj ischejabꞌ naj Naamán, iskꞌubꞌanto naj yul nha, yalni naj ta chimeltzo ebꞌnaj. 25 Lahwi tuꞌ yokto naj Giezi bꞌay ay yaꞌ Eliseo, isqꞌambꞌen yaꞌ Eliseo tuꞌ tet naj:

—Giezi, ¿Bꞌaytuꞌwal hapeto? xhi yaꞌ. Istaqꞌwi naj Giezi:

—Mamin, hanin hachejabꞌ intiꞌan, machi bꞌay manbꞌeykꞌojan, xhi naj. 26 Yalni yaꞌ Eliseo tet naj:

—¿Tom mach yil wanmahan, hawalni yet yelti naj Naamán yul iscarruaje kach ischahnoj? Wal xin mach istzꞌayikalo ischahlax chꞌen plata maka xilqꞌape, maka tzꞌunubꞌ bꞌay ay teꞌ olivo maka teꞌ uva, maka ischahlax noꞌ meꞌ, noꞌ wakax maka ebꞌnaj chejabꞌ, maka ebꞌix chejabꞌ. 27 Wal xin, yu huneꞌ maxawu tiꞌ, yuxin haꞌ lepra aytikꞌako yinh naj Naamán chiꞌelilo tawinh yebꞌ yinh hawuninal yinh sunilbꞌal ej tiempo, xhi yaꞌ Eliseo. Hayet yel naj Giezi yinh sat yaꞌ Eliseo yelilo lepra yinh isnimanil naj, sajpepoxanhe jilni hakaꞌ chꞌen chew.