—Haꞌ bꞌay ayonhanh takꞌatanh tiꞌ kaw witzꞌan, 2 estam chonhto kosayaꞌ hunun kopatzabꞌ hunujonh bꞌey istiꞌ haꞌ Jordán, kat kowatxꞌen bꞌay chonheh bꞌey tuꞌ, xhi ebꞌnaj. Istaqꞌwi yaꞌ Eliseo:

—Kꞌultikꞌa, asiꞌwej, xhi yaꞌ. 3 Yalni huneꞌ naj tet yaꞌ Eliseo:

—Estam chaxhto jintajanh hanhonh hachejabꞌ honhtiꞌanh, xhi naj. Istaqꞌwi yaꞌ:

—Kꞌultikꞌa, chintohan teyintaj, xhi yaꞌ.

4 Isto yaꞌ Eliseo yinta ebꞌnaj. Hayet yapni ebꞌnaj istiꞌ haꞌ Jordán, yok ebꞌnaj qꞌajo teꞌ. 5 Hayet lanhan isqꞌajnayo huneꞌ naj huneꞌ teꞌ, istokꞌay yeche naj yich haꞌ. Yah yaw naj yinh kaw ip tet yaꞌ Eliseo:

—Mamin, haꞌ huneꞌ chꞌen eche tiꞌ, mach wetojan chꞌen, to kꞌamnhebꞌil chꞌen wuhan, xhi naj.

6 Isqꞌambꞌen yaꞌ Eliseo tet naj:

—¿Bꞌaytuꞌwal matokꞌay chꞌen? xhi yaꞌ. Isyeni naj bꞌay to chꞌen yul haꞌ. Istzokꞌni yaꞌ Eliseo huneꞌ te teꞌ yanayto yaꞌ teꞌ yich haꞌ, yahilo bꞌatxbꞌon chꞌen eche tuꞌ yibꞌanh haꞌ. 7 Yalni yaꞌ Eliseo:

—Ihti chꞌen, xhi yaꞌ. Yanayto naj isqꞌabꞌ, yinilo naj chꞌen yibꞌanh haꞌ.

8 Hayet ayko howal yu ebꞌnaj sirio yinh ebꞌnaj Israel, islahtiꞌnhen isbꞌa naj rey ah Siria yebꞌ issoldado bꞌaytuꞌwal chiswatxꞌe ebꞌnaj iscampamento. 9 Yalnito yaꞌ Eliseo tet yaꞌ rey Israel hakaꞌ tiꞌ: «Mach chexekꞌ bꞌey tuꞌ yuto haꞌ tuꞌ chito ebꞌnaj ah Siria.» 10 Hak tuꞌ yu ischejnito yaꞌ isreyal Israel yilomal txꞌiꞌal el bꞌay yal yaꞌ Eliseo ischejabꞌ Komam Dios, yu iskolni isbꞌa ebꞌnaj.

11 Yuxin kabꞌkonkanh iskꞌul naj isreyal Siria, yawten naj ebꞌnaj issoldado yalni naj tet ebꞌnaj:

—Halwelo wetan mak ayko yetbꞌiho naj rey Israel koxol tiꞌ, xhi naj. 12 Istaqꞌwi huneꞌ issoldado naj rey Siria tuꞌ:

—Machi maka mam rey, wal xin haꞌ yaꞌ Eliseo ischejabꞌ Dios ay bꞌey Israel tuꞌ, haꞌ chihalni tet naj isreyal Israel yinh tzet chꞌekꞌ yinh hanabꞌal yet ayach hachukil bꞌay chachwayi, xhi naj. 13 Istaqꞌwi naj rey Siria:

—As ilwej bꞌaytuꞌwal ay yaꞌ, kat inchejnitojan mak chitzabꞌnayo yaꞌ, xhi naj. Yal-lax tet naj rey tuꞌ tato haꞌ bꞌey Dotán ay yaꞌ Eliseo.

14 Yanito naj rey Siria issoldado ayahto yibꞌanh cheh, yebꞌ yul carruaje yebꞌ hunteqꞌanxa ebꞌnaj yoj chakoj. Yapni ebꞌnaj aqꞌbꞌalil bꞌey konhobꞌ Dotán, ishoynayo ebꞌnaj konhobꞌ tuꞌ. 15 Haxa yet issajbꞌiloj yahwano ischejabꞌ yaꞌ Eliseo yelti naj, yilni naj tato hoybꞌilxa konhobꞌ tuꞌ yu ebꞌnaj soldado aykanh yibꞌanh noꞌ cheh yebꞌ ebꞌnaj ayahto yul carruaje, yalni naj chejabꞌ tuꞌ tet yaꞌ Eliseo:

—Mamin, ¿tzet chijute kobꞌa? ¿Tzet chijute kobꞌa? xhi naj. 16 Istaqꞌwi yaꞌ Eliseo:

—Mach chaxhxiwi, yuto ekꞌbꞌal mak ayko jetbꞌiho sata ebꞌnaj tiꞌ, xhi yaꞌ.

17 Yok yaꞌ Eliseo txahlo tet Komam Dios, yalni yaꞌ: «Mamin, chinqꞌanan tawet tato chahaj issat naj inchejabꞌtiꞌan,» xhi yaꞌ. Ishajni Komam Dios issat naj, yilnito naj tato nohnayo hunteqꞌan anma iswiꞌ wonhan ay ej ahto yibꞌanh cheh, yebꞌ carruaje ayiko qꞌaꞌ yinh, hoyaniko xin yinh yaꞌ Eliseo.^a 18 Haxa yet yaniko ebꞌnaj soldado Siria howal yinh yaꞌ Eliseo, istxahli yaꞌ tet Komam Dios, yalni yaꞌ: «Mamin, chinqꞌanan tawet tato matxahojabꞌ chiyu yilni hunteqꞌan ebꞌnaj tiꞌ,» xhi yaꞌ.

Yinhnhena tuꞌ matxa yu yilni ebꞌnaj Siria hakaꞌ yu isqꞌanni yaꞌ Eliseo tet Komam. 19 Lahwi tuꞌ isto yaꞌ Eliseo yalno tet ebꞌnaj Siria tuꞌ:

«Maxhtaj huneꞌ bꞌey tiꞌ chesaya, yebꞌ xin maxhtaj huneꞌ konhobꞌ tiꞌ chesaypaxoj, yuxin okanhwe tzujno wintajan, chexwijbꞌatojan iskꞌatanh naj winaj chesayikꞌo tuꞌ,» xhi yaꞌ Eliseo tet ebꞌnaj. Hak tuꞌ yu yijbꞌanto yaꞌ Eliseo ebꞌnaj bꞌey konhobꞌ Samaria.

20 Haxa yet yapni ebꞌnaj bꞌey Samaria, istxahli yaꞌ Eliseo tet Komam, yalni yaꞌ: «Mamin, haj issat hunteqꞌan ebꞌnaj tiꞌ, kat yilni ebꞌnaj,» xhi yaꞌ.

Ishajcha issat ebꞌnaj yu Komam. Haxa yet yilniti ebꞌnaj, yulxa konhobꞌ Samaria ay ebꞌnaj. 21 Hayet yilni yaꞌ isreyal ebꞌnaj Israel ebꞌnaj, isqꞌambꞌen yaꞌ tet yaꞌ Eliseo:

—¿Mamin, chimisje inpotxꞌnikamojan ebꞌnaj tiꞌ? xhi yaꞌ. 22 Yajaꞌ taqꞌwi yaꞌ Eliseo tet yaꞌ:

—Machoj, mach chapotxꞌkamo ebꞌnaj. ¿Tom chamaqꞌkamo ebꞌnaj chatzabꞌayo yu hawespada yebꞌ halitꞌ? Machoj. Wal xin ayo pan yebꞌ ha haꞌ sata ebꞌnaj yunhe iswahni ebꞌnaj kat ispaxto ebꞌnaj iskꞌatanh yahawil, xhi yaꞌ Eliseo.

23 Hak tuꞌ yu iswatxꞌelax nime itah chislo ebꞌnaj, iswaꞌ ebꞌnaj, lahwi tuꞌ yalni yaꞌ isreyal Israel ta chimeltzo ebꞌnaj, ismeltzo ebꞌnaj iskꞌatanh yahawil.

Hak tuꞌ xin yu isbꞌejni ebꞌnaj Siria yetliko yinh konhobꞌ Israel, yebꞌ matxa hul ebꞌnaj eleqꞌ yinh konhobꞌ.

24 Lahwi yekꞌkanto hunteqꞌan tzꞌayik tuꞌ, iskutxbꞌaniko naj Ben-adad isreyal Siria sunil issoldado, isto ebꞌnaj ishoynoyo konhobꞌ Samaria. 25 Yu huneꞌ tuꞌ xin yuxin hul huneꞌ niman wahil bꞌey Samaria yet ishoylaxayo ebꞌnaj konhobꞌ tuꞌ. 80 (kanhwinaj) plata istohol huneꞌ iswiꞌ noꞌ burro, haxa hunun mal istzaꞌ noꞌ palamuch, howebꞌ plata istohol.

26 Haxa yet huneꞌ tzꞌayik yet lanhan yekꞌ yaꞌ isreyal Israel yibꞌanh iskꞌubꞌal konhobꞌ, yah yaw huneꞌ ix ix tet yaꞌ, yalni ix:

—Mam rey, kolwahanh winhan, xhi ix. 27 Istaqꞌwi yaꞌ:

—Tato mach chachkol-lax yu Komam Dios, ¿hatomkꞌanabꞌ hinan chu kach inkolnihan? ¿Tom haninan chiwaqꞌan hatrigo maka havino? xhi yaꞌ rey. 28 Isqꞌambꞌen yaꞌ tet ix:

—¿Tzet chaqꞌana? xhi yaꞌ rey. Istaqꞌwi ix:

—Ay huneꞌ ix tiꞌ halni wetan hakaꞌ tiꞌ: “Kokꞌuxuꞌto hawunin, haxa yet hekal haxa wuninan chikokꞌuxaytoj,” xhi ix. 29 Kotxiknihanh wunin tuꞌan, kokꞌuxnitojanh. Haxa yet hunxa tzꞌayik walnihan tet ix tato chiyiti ix yunin yunhe kokꞌuxnaytojanh, yajaꞌ yebꞌato ix yunin tuꞌ, xhi ix tet yaꞌ.

30 Hayet yabꞌen yaꞌ rey yalni ix hakaꞌ tuꞌ, istzilnilo yaꞌ tuꞌ xil isqꞌap, yuxin hayet isbꞌelwikꞌo yaꞌ yibꞌanh iskꞌubꞌal konhobꞌ tuꞌ, yilni anma yul konhobꞌ tuꞌ ta ay xil isqꞌap yaꞌ qꞌaqꞌiꞌ sat yet bꞌiskꞌulal, ayko yalanh hunxa xil isqꞌap tuꞌ. 31 Yalni yaꞌ rey: «Yaqꞌabꞌayo Komam Dios isyaꞌtajil wibꞌanhan tato mach chiꞌel iswiꞌ yaꞌ Eliseo, iskꞌahol yaꞌ Safat tinanh,» xhi yaꞌ.

32 Wal yaꞌ Eliseo tzꞌonhan yaꞌ bꞌey yatut yebꞌ ebꞌnaj ichamta winaj ay yul konhobꞌ. Ischejnito yaꞌ isreyal Israel tuꞌ huneꞌ ischejabꞌ yinh yaꞌ Eliseo, yajaꞌ yet maxhto chiꞌapni naj chejabꞌ iskꞌatanh yaꞌ Eliseo, yalni yaꞌ Eliseo tet ebꞌnaj ichamta winaj ayko iskꞌatanh:

—Cheyilaꞌkꞌanabꞌi, maꞌischejti yaꞌ rey Israel, yaꞌ maqꞌomkamo anma, ischejabꞌ yiqꞌalo inwiꞌan. Yuxin hayet chihul naj tuꞌ, chepebꞌan pulta, machi xin chechakti naj, tzujan yulpaxo yaꞌ rey yinta naj, xhi yaꞌ Eliseo.

33 Lanhan xin yalni yaꞌ Eliseo tet ebꞌnaj hakaꞌ tuꞌ, yapni naj ischejabꞌ yaꞌ rey yinh yaꞌ Eliseo, yalni tet yaꞌ Eliseo:

—Haꞌ huneꞌ huchanil tiꞌ, haꞌ Komam Dios maꞌanitij, ¿tzetto chꞌok chiwechmahan kiniskolnihan Komam tinanh? xhi naj.