—Abꞌe tzet chiyal Komam Dios. Haꞌ Komam chihalni hakaꞌ tiꞌ: “Hayet hekal hakaꞌ yinh huneꞌ hora tiꞌ, bꞌey istiꞌ ispultahil konhobꞌ Samaria, haꞌ yinh huneꞌ siclo plata chiloqꞌlax huneꞌ mal ixim harina kaw kꞌul, kat isloqꞌlaxpaxo kabꞌ mal ixim cebada yinh huneꞌ siclo plata,” xhi yaꞌ Eliseo.^a 2 Istaqꞌwi huneꞌ naj kaw yilomal yaꞌ rey tet yaꞌ Eliseo, ischejabꞌ Komam Dios, hakaꞌ tiꞌ:

—Waxanhka chishaj Komam Dios ventanah yul satkanh, mach chu yijni isbꞌa hakaꞌ hawalni tiꞌ, xhi naj. Yajaꞌ taqꞌwi yaꞌ Eliseo tet naj:

—¡Haꞌ huneꞌ chawal tiꞌ, haꞌ kaw isbꞌaqꞌ hasat chiꞌilnoj, yajaꞌ mach chawabꞌ ixim! xhi yaꞌ Eliseo.

3 Ay xin kanhwanh ebꞌnaj winaj ayko lepra yinh ayilto istiꞌ ispultahil konhobꞌ, yal-len ebꞌnaj tet hunun hakaꞌ tiꞌ:

—¿Tom wal je bꞌey tiꞌ jechman kokamikal? 4 Tato chonhokto yul konhobꞌ, masantikꞌa chonhkamo yu wahil ay yul konhobꞌ tiꞌ, taka chonhkanpaxkano bꞌey tiꞌ xin, chitikꞌa konhkamopaxoj; yuxin wal tinanh tonhwe bꞌey iscampamento ebꞌnaj Siria, tato chiyaqꞌ nimankꞌulal ebꞌnaj jinh, kꞌultikꞌa, yajaꞌ ta mach chaqꞌ nimankꞌulal ebꞌnaj jinh xin, yilaltikꞌa kokam chal tuꞌ, xhi ebꞌnaj.

5 Haxa yet yay numna xin, isto ebꞌnaj bꞌey iscampamento ebꞌnaj Siria, hayet yokapno ebꞌnaj yul istiꞌ iscampamento ebꞌnaj Siria tuꞌ matxa hunu maka. 6 Yuto yet ay ebꞌnaj Siria yul iscampamento yaqꞌni Komam yabꞌeꞌ ebꞌnaj isbꞌili chꞌen carruaje yet howal, yebꞌ isbꞌili yekꞌ noꞌ cheh, yebꞌ iswejcha hunbꞌulan ebꞌnaj soldado; yuxin yal ebꞌnaj tet hunun tato istohla yaꞌ rey Israel ebꞌnaj isreyal ebꞌnaj heteo, yebꞌ ebꞌnaj isreyal Egipto yaqꞌaꞌko howal yinh ebꞌnaj. 7 Yuxin ah wejna ebꞌnaj, yelkanh ebꞌnaj yet yay numnahi, isbꞌejnikano ebꞌnaj iscampamento yebꞌ ismantiado, yebꞌ ischeh, yebꞌ isburro; matxa tzet yito ebꞌnaj yu iskolni isbꞌa. 8 Yuxin hayet yokapno ebꞌnaj ayko lepra yinh yul istiꞌ iscampamento ebꞌnaj sirio tuꞌ yokto ebꞌnaj yul huneꞌ mantiado, iswaꞌ ebꞌnaj, yukꞌni tzet yukꞌuꞌ. Yinipaxti ebꞌnaj chꞌen plata yebꞌ chꞌen oro yebꞌ xilqꞌape, isto ebꞌnaj yebꞌanotoj. Ismeltzopaxo ebꞌnaj hunelxa yokto ebꞌnaj yul hunxa mantiado, yinipaxto ebꞌnaj tzettaj ye tuꞌ yul huneꞌxa mantiado, isto ebꞌnaj yebꞌanotoj. 9 Lahwi tuꞌ yalni ebꞌnaj tet hunun:

—Mach kꞌulo tzet chiju tiꞌ, haꞌ tinanh istzꞌayikal jinito kꞌul-la tzotiꞌ, walonh xin tonhe tukanonh, tato chito jechma hekal aytaxka txꞌoj tzet chitit jibꞌanh, yuxin tonhwe tinanh, kat jokto yul konhobꞌ kat jalni huneꞌ tiꞌ tet yaꞌ rey, xhi ebꞌnaj tet hunun.

10 Isto ebꞌnaj, hayet yapni ebꞌnaj bꞌey konhobꞌ Samaria, yahwi ebꞌnaj tet ebꞌnaj chitanhen ispultahil konhobꞌ tuꞌ, yalni ebꞌnaj:

«Hanhonhtiꞌanh makonhbꞌeykꞌojanh yul iscampamento ebꞌnaj Siria, machi xin hunu ebꞌnaj Siria ay yul iscampamento tuꞌ, machi hunu mak chijabꞌe istzoteli, hanhe ischeh ebꞌnaj xekankanoj yebꞌ isburro ebꞌnaj, aykanokanh ismantiado ebꞌnaj,» xhi ebꞌnaj.

11 Hayet yabꞌen ebꞌnaj chitanhen ispultahil konhobꞌ tuꞌ, yalnito ebꞌnaj tet yaꞌ rey yul ispalacio. 12 Yahwano yaꞌ rey tuꞌ yet aqꞌbꞌalil, yalni yaꞌ tet ebꞌnaj ischejabꞌ:

—Chiwalan teyet tzet chiyoche ebꞌnaj Siria tuꞌ konhyuteꞌ, yuto yohta ebꞌnaj ta lanhan kokam yu wahil, yuxin isbꞌejkano ebꞌnaj iscampamento tuꞌ yebꞌanto isbꞌa ebꞌnaj xol telaj, chiyechman ebꞌnaj japni, chijanikano konhobꞌ tiꞌ kat konhistzabꞌnayo ebꞌnaj, kat yokti ebꞌnaj yul konhobꞌ tiꞌ, xhi yaꞌ rey Israel tuꞌ.

13 Yajaꞌ taqꞌwi huneꞌ ischejabꞌ yaꞌ:

—Tojabꞌ haywanho ebꞌnaj soldado yibꞌanh hokꞌonho noꞌ cheh xol noꞌ aytokano yul konhobꞌ tiꞌ, yilaꞌ hanikꞌ yeko iscampamento ebꞌnaj sirio tuꞌ, (yuto haꞌ ebꞌnaj Israel aytokꞌo tiꞌ chitikꞌa kamopaxo ebꞌnaj yu wahil hakaꞌ hunbꞌulan anma xakami), xhi ebꞌnaj.

14 Ischejni yaꞌ rey yilaxolo kakꞌonh noꞌ cheh yinh carruaje, ischejnito yaꞌ ebꞌnaj soldado yilno iscampamento ebꞌnaj sirio tuꞌ, yalni yaꞌ tet ebꞌnaj: «Asiꞌwej, kaw kam cheyila tzet yeko iscampamento ebꞌnaj sirio tuꞌ,» xhi yaꞌ. 15 Isto ebꞌnaj soldado Israel tuꞌ, yok tzujno ebꞌnaj yinta yojlen ebꞌnaj sirio masanta bꞌey haꞌ Jordán, yilni ebꞌnaj xilqꞌape yebꞌ tzetaj ye tuꞌ isbꞌejkano ebꞌnaj sirio yul bꞌeh yet yelkanh ebꞌnaj yinh anhe. Lahwi tuꞌ ismeltzo ebꞌnaj yaqꞌni ebꞌnaj yohtanhelo yaꞌ rey. 16 Yuxin elto konhobꞌ, yinito anma sunil tzet isbꞌejkano ebꞌnaj sirio yul iscampamento. Hak tuꞌ xin yu yijnikano isbꞌa hakaꞌ yu yalni Komam Dios tato huneꞌ mal ixim harina chitxonhlax yinh huneꞌ siclo chꞌen plata, yebꞌ xin kabꞌ mal ixim cebada chitxonhlax yinh huneꞌ siclo chꞌen plata.

17 Yalni yaꞌ rey tet naj kaw chitanhen yaꞌ, tato chiꞌok naj istanheꞌ istiꞌ ispultahil konhobꞌ, yuxin hayet yokto wejwon anma yul ispultahil konhobꞌ, istenchankanh anma naj, isxanhlaxkamo naj, hakaꞌtikꞌa yu yalni ischejabꞌ Komam tet naj, yet ischejlaxto naj yu yaꞌ rey tzotelo tet ischejabꞌ Komam.

18 Hak tuꞌ yu yijni isbꞌa tzet yal ischejabꞌ Komam Dios tet yaꞌ isreyal Israel yet yalni yaꞌ hakaꞌ tiꞌ: «Hayet hekal yinh huneꞌ hora tiꞌ, haꞌ istiꞌ ispultahil konhobꞌ Samaria tiꞌ chitxonhlax kabꞌ mal ixim cebada yinh huneꞌ siclo chꞌen plata, kat istxonhlaxpaxo huneꞌ mal ixim harina yinh huneꞌ siclo chꞌen plata,» xhi ischejabꞌ Komam. 19 Yajaꞌ taqꞌwi naj kaw yilomal yaꞌ isreyal Israel tet ischejabꞌ Komam Dios: «Waxanhka chishaj Komam Jahawil ventanah yul satkanh mach chu yijni isbꞌa hakaꞌ hawalni tiꞌ,» xhi naj. Yajaꞌ taqꞌwi ischejabꞌ Komam tet naj: «Haꞌ tzet chiwaltiꞌan, haꞌ kaw isbꞌaqꞌ hasat chiꞌilni, yajaꞌ mach chawah ixim,» xhi yaꞌ.

20 Yij isbꞌa hakaꞌtikꞌa yu yalni ischejabꞌ Komam, yuto tenlaxkanh naj istiꞌ ispultahil konhobꞌ, hak tuꞌ xin yu isxanhlaxkamo naj yu anma.