Meltzo tzet ay ix sunamita yul isqꞌabꞌ hunelxa
8
Yalni yaꞌ Eliseo tet ix yaqꞌ itzitzbꞌokanh yunin hakaꞌ tiꞌ: «Ahanhwanoj, kat hato bꞌey hunuxa konhobꞌ yebꞌ hawunin yebꞌ sunil mak ay yul hawatut, yuto mayal Komam Jahawil tato chihul huneꞌ niman wahil yulbꞌal hujebꞌ habꞌil yul konhobꞌ tiꞌ,» xhi yaꞌ tet ix. 2 Yuxin el ix yul konhobꞌ, isyijen ix hakaꞌ yu yalni ischejabꞌ Komam, isto ix yebꞌ sunil mak ay yul yatut sat istxꞌotxꞌ ebꞌnaj filisteo, hujebꞌ xin habꞌil ehayo ix bꞌey tuꞌ. 3 Haxa yet yekꞌto hujebꞌ habꞌil, ismeltzo ix bꞌey iskonhobꞌ hunelxa, yel ix sat istxꞌotxꞌ ebꞌnaj filisteo. Isto ix tzotelo tet yaꞌ rey Israel, isqꞌanni ix yaqꞌlax meltzoho yatut yebꞌ istxꞌotxꞌ yul isqꞌabꞌ. 4 Lanhan xin istzotel yaꞌ rey yebꞌ naj Giezi, ischejabꞌ yaꞌ ischejabꞌ Komam, isqꞌambꞌen yaꞌ rey tet naj: «Halilo wetan sunilal kꞌaybꞌalkꞌule xaꞌiswatxꞌe yaꞌ Eliseo,» xhi yaꞌ rey. 5 Lanhan xin yalni naj Giezi tet yaꞌ rey tuꞌ yinh yet yaqꞌni itzitzbꞌokanh huneꞌ kamom, yapni ix ismiꞌ nichꞌan unin yaqꞌ itzitzbꞌokanh yaꞌ Eliseo. Apni ix isqꞌanaꞌ tet yaꞌ rey tato chiꞌaqꞌlax meltzoho yatut ix yebꞌ istxꞌotxꞌ ix yul isqꞌabꞌ; yuxin yal naj Giezi: «Mam rey, haꞌ ton huneꞌ ix tiꞌ chiwalan tawet, haꞌ yunin ix tiꞌ, haꞌ ton naj yaqꞌ itzitzbꞌokanh yaꞌ Eliseo,» xhi naj Giezi. 6 Isqꞌambꞌen yaꞌ rey tet ix yinh huneꞌ tuꞌ, haxa ix kam halni tet yaꞌ. Lahwi tuꞌ yalni yaꞌ rey tet huneꞌ naj ay yelapno ismunil yinta yaꞌ rey tuꞌ hakaꞌ tiꞌ: «Aqꞌ meltzoho sunil tzet ay ix tiꞌ yul isqꞌabꞌ, kat hawaqꞌni meltzoho sunil sat istzꞌunubꞌ ix el sat istxꞌotxꞌ yettaxtikꞌa istohkano ix,» xhi yaꞌ rey.Ok naj Hazael isreyalo Siria
7 Lahwi tuꞌ xin isto yaꞌ Eliseo bꞌey Damasco. Haꞌ yinh huneꞌ tiempo tuꞌ kaw yaꞌay naj Ben-adad, isreyal Siria. Yal-lax tet naj hakaꞌ tiꞌ: «Haꞌ yaꞌ ischejabꞌ Komam Dios xahul yaꞌ bꞌey tiꞌ,» xhi. 8 Yuxin yal naj rey tet naj Hazael hakaꞌ tiꞌ: «As chah yaꞌ, ischejabꞌ Komam Dios, kat hawinito sabꞌehal tet yaꞌ, kat haqꞌambꞌen tet yaꞌ tato chal yaꞌ tet Komam Jahawil hakaꞌ tiꞌ: “¿Chitom kinkawxihan mato machoj?” kachi,» xhi naj rey tet naj Hazael.
9 Yuxin to naj Hazael yilaꞌ yaꞌ Eliseo, yinito naj sabꞌehal kaw kꞌul chiꞌel bꞌey Damasco, 40 (kawinaj) noꞌ camello iqꞌnhe sabꞌehal. Hayet yapni naj Hazael iskꞌatanh yaꞌ Eliseo yalni naj:
—Mamin, haꞌ yaꞌ hachejabꞌ yaꞌ Ben-adad, isreyal Siria makinchejnitijan inqꞌambꞌeꞌan tawet hakaꞌ tiꞌ: “¿Chimkinkawxihan mato machoj?” xhi yaꞌ, xhi naj. 10 Istaqꞌwi yaꞌ Eliseo tet naj:
—Asiꞌ, kat hawalni tet naj rey tato chikawxokanh naj, yalni, yajaꞌ wal Komam Dios xin xayal wetan tato chikam naj, xhi yaꞌ Eliseo. 11 Yokkano tꞌanhno yaꞌ Eliseo yinh sat naj Hazael, yuxin kaj tzꞌitilo sat naj; lahwi tuꞌ yok yaꞌ Eliseo oqꞌoj. 12 Isqꞌambꞌen naj Hazael tet yaꞌ:
—Mamin, ¿tzet yinh xin chaxhoqꞌi? xhi naj. Istaqꞌwi yaꞌ Eliseo:
—Chinoqꞌan yuto wohtajan ta ay istxꞌojal chawatxꞌe yinh konhobꞌ Israel, chanhusnito iscuartel ebꞌnaj, kat xin hapotxꞌnikamo ebꞌnaj tzehtaj yu espada, chapotxꞌnikamo nixhte unin, chapolnito iskꞌul ebꞌix ix ayxa chꞌini, xhi yaꞌ Eliseo. 13 Istaqꞌwi naj Hazael tet yaꞌ:
—Mamin, hanin hachejabꞌ intiꞌan ¿tom txꞌiꞌ hinan chawila yuxin chinwatxꞌehan hakaꞌ tuꞌ? xhi naj. Istaqꞌwi yaꞌ Eliseo:
—Haꞌ Komam Jahawil chalni wetan tato hach chaxhok isreyalo Siria, xhi yaꞌ.
14 Ismeltzo naj Hazael, yapni naj iskꞌatanh naj rey Ben-adad. Isqꞌambꞌen naj rey tet naj hakaꞌ tiꞌ:
—¿Tzet mayal yaꞌ Eliseo tawet? xhi naj. Istaqꞌwi naj Hazael:
—Mayal yaꞌ wetan tato chaxhkawxoj, xhi naj.
15 Haxa yet hunxa tzꞌayik xin yaqꞌni chakꞌanbꞌo naj Hazael huneꞌ qꞌap qꞌap kaw pim, isto naj yanoyo qꞌap yibꞌanh sat naj rey Ben-adad, hak tuꞌ yu iskam naj. Haxa xin naj Hazael okkano reyal selelo naj.a
4. KUYBꞌANILE YIBꞌANHILO JUDÁ YEBꞌ ISRAEL MASANTO YET ISKAM YAꞌ ELISEO
(8:16–13:25)
Ok yaꞌ Joram isreyalo Judá
16 Hayet howebꞌxa habꞌil yok yaꞌ Joram iskꞌahol yaꞌ Acab isreyalo Israel, yok yaꞌ Joram, iskꞌahol yaꞌ Josafat, isreyalo Judá. 17 32 (Kabꞌlanhebꞌ iskawinaj) ishabꞌilal yaꞌ Joram yet yok yaꞌ reyal, waxajebꞌ habꞌil ok yaꞌ reyal bꞌey Jerusalén, isreyal ebꞌnaj Judá. 18 Yajaꞌ bꞌelwi yaꞌ yinh isbꞌeybꞌal ebꞌnaj isreyal Israel hakaꞌ isbꞌeybꞌal ebꞌnaj yuninal yaꞌ rey Acab, yuto haꞌ huneꞌ ix iskutzꞌin yaꞌ Acab yiqꞌ yaꞌ yixaloj. Yaꞌ Joram tuꞌ, iswatxꞌe yaꞌ istxꞌojal sata Komam Jahawil. 19 Yajaꞌ mach yoche iskꞌul Komam Jahawil istanhtzelo Judá, yu iskꞌulal iskꞌul yinh yaꞌ David, ischejabꞌ Komam; yuto yalanhtokanoj yal Komam tet yaꞌ David tato mach chitanhtzelaxilo yikꞌal yaꞌ. 20 Haxa yinh istiempohal yet ayko yaꞌ Joram isreyalo Judá, yinilo isbꞌa ebꞌnaj Edom yalanh yip konhobꞌ Judá, issayniko ebꞌnaj isrey yul iskonhobꞌ. 21 Yuxin to yaꞌ Joram yebꞌ sunil iscarruaje yet howal yaqꞌaꞌko howal yinh ebꞌnaj Edom bꞌey Zair, yajaꞌ hoybꞌilxayo ebꞌnaj Judá yu ebꞌnaj Edom. Haxa yinh aqꞌbꞌalil xin yahwano yaꞌ rey Joram yebꞌ sunil ebꞌnaj capitán yinh iscarruaje, yu yaniko ebꞌnaj howal yinh ebꞌnaj Edom, yajaꞌ ebꞌnaj soldado tzujan yinta yaꞌ rey tuꞌ paxto ebꞌnaj yatut. 22 Hak tuꞌ xin yikanilti isbꞌa konhobꞌ Edom yalanh yip konhobꞌ Judá masanto tinanh. Haꞌtikꞌa yinh huneꞌ tzꞌayik tuꞌ yipaxilo isbꞌa konhobꞌ Libna yalanh yip konhobꞌ Judá.
23 Haꞌ hunteqꞌanxa tzet iswatxꞌe yaꞌ rey Joram yebꞌ sunil tzet yu yaꞌ, tzꞌibꞌnhebꞌilkano yul hum chitzotel yinh ebꞌnaj rey Judá. 24 Iskam yaꞌ rey Joram hakaꞌle yu iskamto ismam icham yebꞌ ismam, ismujlax yaꞌ bꞌey iskonhobꞌ yaꞌ David, yok yaꞌ Ocozías iskꞌahol yaꞌ reyalo seleloj.
Ok yaꞌ Ocozías isreyalo Judá
25 Haxa yet 12 (kabꞌlahonhebꞌxa) habꞌil yok yaꞌ Joram iskꞌahol yaꞌ rey Acab isreyalo Israel, yok yaꞌ Ocozías iskꞌahol yaꞌ Joram isreyalo Judá. 26 22 (Kabꞌ iskawinaj) habꞌil yaꞌ Ocozías yet yok yaꞌ reyalil, huneꞌnhe xin habꞌil ok yaꞌ reyal bꞌey Jerusalén. Haꞌ ismiꞌ yaꞌ Ocozías tuꞌ Atalía isbꞌi ix, iskutzꞌin yaꞌ Omri ye ix, isreyal Israel. 27 Yaꞌ Ocozías tuꞌ isbꞌeybꞌalnhe yaꞌ hakaꞌ isbꞌeybꞌal yuninal yaꞌ rey Acab, iswatxꞌen yaꞌ istxꞌojal sata Komam Jahawil hakaꞌ yuninal yaꞌ Acab, yuto ayto yu isbꞌa yixal yaꞌ yebꞌ yaꞌ rey Acab.
28 Yaꞌ rey Ocozías tuꞌ to yaꞌ bꞌey Ramot ay yul ismajul Galaad, yaqꞌaꞌ howal yinta yaꞌ rey Joram, iskꞌahol yaꞌ rey Acab, yinh naj Hazael, isreyal Siria. Hayet ayko howal tuꞌ, yok islahwilal yaꞌ rey Joram.b 29 Yuxin meltzo yaꞌ rey Joram yaqꞌaꞌ anhteꞌ islahwilal bꞌey Jezreel. Ok islahwilal yaꞌ tuꞌ yet yaqꞌni howal yaꞌ satakꞌti Ramot yinh naj Hazael, isreyal Siria. Isto yaꞌ Ocozías iskꞌahol yaꞌ Joram, isreyal Judá istukleno yaꞌ rey Joram, iskꞌahol yaꞌ Acab bꞌey Jezreel, yuto yaꞌay yaꞌ rey Joram.