Ok yaꞌ Joram isreyalo Judá
21
Iskam yaꞌ Josafat hakaꞌ yu iskamto yichmam, ismujlax yaꞌ bꞌey iskonhobꞌ yaꞌ David bꞌay mujan ebꞌyaꞌ yichmam; yok yaꞌ Joram, iskꞌahol yaꞌ reyalo seleloj. 2 Haꞌ xin ebꞌnaj yuxhta yaꞌ Joram iskꞌahol yaꞌ Josafat haꞌ ebꞌnaj tiꞌ: Naj Azarías, naj Jehiel, naj Zacarías, naj Azarías, naj Micael yebꞌ naj Sefatías; haꞌ sunil ebꞌnaj tuꞌ iskꞌahol yaꞌ Josafat, isreyal Judá. 3 Haꞌ yaꞌ Josafat, ismam ebꞌnaj tuꞌ txꞌiꞌal chꞌen oro, chꞌen plata yebꞌ tzetaj ye tuꞌ ay istohol yaqꞌ yaꞌ sabꞌehalo tet ebꞌnaj iskꞌahol tuꞌ, yaqꞌnipaxo yaꞌ hunteqꞌan konhobꞌ hoybꞌil yu kꞌubꞌ ay yul ismajul Judá tet ebꞌnaj; yajaꞌ yaꞌ Joram yakaniko yaꞌ reyalo seleloj yuto haꞌ yaꞌ bꞌabꞌel kꞌahole. 4 Haxa yet ayxako yaꞌ Joram reyal selelo ismam, yiqꞌkanh yip yaꞌ yu ayko yaꞌ reyalil, ischejni yaꞌ potxꞌlaxokamo sunil ebꞌnaj yuxhtaj yu chꞌen espada, ischejnipaxo yaꞌ potxꞌlaxokamo haywanh ebꞌnaj iswiꞌehal yinh Israel. 5 32 (Kabꞌlahonhebꞌ iskawinaj) habꞌil yaꞌ Joram yet yok yaꞌ reyal, wal xin waxajebꞌchꞌan habꞌil ok naj reyal bꞌey Jerusalén. 6 Yajaꞌ isbꞌeybꞌalnhe yaꞌ tzetaj iswatxꞌe ebꞌyaꞌ isreyal Israel, iswatxꞌen yaꞌ tzetaj iswatxꞌe yaꞌ Acab yebꞌ yuninal, yuto haꞌ iskutzꞌin yaꞌ Acab tuꞌ iqꞌbꞌil yu yaꞌ. Yaꞌ Joram tuꞌ haꞌ istxꞌojal iswatxꞌe yaꞌ sata Komam Jahawil. 7 Yajaꞌ mach isje iskꞌul Komam Jahawil istanhtzelo yuninal yaꞌ David yuto istꞌinhbꞌakano Komam istzotiꞌ tet yaꞌ David, yet yalni tato haꞌ yuninal yaꞌ chiꞌok reyal Israel yinh sunilbꞌal tiempo.8 Haꞌ yinh istiempohal yaꞌ rey Joram ok yinh isnabꞌal ebꞌnaj Edom yinilo isbꞌa yalanh yip Judá; yel yaw ebꞌnaj, yaniko isrey ischukil. 9 Isto yaꞌ Joram yet aqꞌbꞌalil yebꞌ ebꞌnaj yahaw konhobꞌ, yebꞌ sunil iscarruaje yet howal yanoko howal yinh ebꞌnaj Edom. Isqꞌoji ebꞌnaj Judá yinh ebꞌnaj Edom tuꞌ, yebꞌ ebꞌnaj yahawil yinh carruaje. 10 Yajaꞌ iskolilo isbꞌa ebꞌnaj Edom tuꞌ yala yip Judá, hakto tuꞌ xin ye tinanh. Yinhtikꞌa huneꞌ tiempohal tuꞌ xin iskolpaxilo isbꞌa konhobꞌ Libna yalanh yip Judá, yuto isbꞌejkano yaꞌ rey Joram tuꞌ Komam Jahawil, isDiosal yichmam.
11 Iswatxꞌenpaxokanh yaꞌ Joram tuꞌ bꞌay chiyiyo isbꞌa anma tet tioxh iswiꞌla wonhan sat txꞌotxꞌ Judá. Hak tuꞌ yu yok yaꞌ Joram yiptzeno konhobꞌ Jerusalén yebꞌ konhobꞌ Judá yanoko ismul iswatxꞌen istxꞌojal hakaꞌ yinh ixloj yebꞌ winajloj. 12 Ischahni yaꞌ rey Joram huneꞌ carta istzꞌibꞌnheto yaꞌ Elías ischejabꞌ Komam Dios, hak tiꞌ xin chiyute yalni huneꞌ carta tuꞌ hakaꞌ tiꞌ: «Haꞌ Komam Jahawil, isDiosal yaꞌ David, hawichmam, halni hakaꞌ tiꞌ: “Hach tiꞌ mach habꞌeybꞌalnhe iskꞌulal iswatxꞌe hamam Josafat yebꞌ yaꞌ Asa oklena isreyalo Judá hawichmam.a 13 Wal xin haꞌ tzetaj iswatxꞌe ebꞌyaꞌ isreyal Israel haꞌ chabꞌeybꞌalnhe, hawijbꞌan Judá yebꞌ Jerusalén yinayo isbꞌa tet tioxh, yaniko ismul sata Komam; maxawako hamul tet Komam hakaꞌ yu yaꞌ Acab yebꞌ yuninal. Hapotxꞌkamo ebꞌnaj iskꞌahol hamam, ebꞌnaj hawuxhta hapotxꞌkamo tuꞌ ekꞌbꞌal kꞌul ebꞌnaj tasataj. 14 Chiyati Komam Jahawil huneꞌ niman isyaꞌtajil yibꞌanh hakonhobꞌ yebꞌ yibꞌanh hakꞌahol, yebꞌ yibꞌanh ebꞌix hawixal, kat yaykꞌaypaxo isyaꞌtajil tuꞌ yibꞌanh sunil tzet ayach. 15 Chaniti Komam txꞌiꞌal howla yabꞌil tawinh yebꞌ huneꞌ yabꞌil yinh hatxꞌanhkanta tzaꞌ, haxa yu isyaꞌil chilinhmolti hatxꞌanhkanta tzaꞌ yul hakꞌul,” xhi Komam,» xhi huneꞌ carta tuꞌ.
16 Yaniko Komam Jahawil yinh isnabꞌal ebꞌnaj filisteo yebꞌ ebꞌnaj árabe ay iskawilal ebꞌnaj etíope yanoko howal yinh yaꞌ Joram. 17 Isto ebꞌnaj yanoko howal yinh ebꞌnaj Judá, isqꞌoji ebꞌnaj yinh ebꞌnaj, yelqꞌanto ebꞌnaj sunil tzet ay yaꞌ rey Joram yul yatut, yinipaxto ebꞌnaj yuninal yaꞌ yebꞌ ebꞌix yixal yaꞌ matxa hunu iskꞌahol yaꞌ kankanoj, haxanhechꞌan naj Joacaz, naj islahobꞌal unin. 18 Lahwi tuꞌ xin yaniti Komam Jahawil huneꞌ yabꞌil yinh istxꞌanhkanta tzaꞌ yaꞌ rey Joram, matxa xin yanhal huneꞌ yabꞌil tuꞌ. 19 Haxa yet xaꞌekꞌto tiempo, yet xatzꞌajna kabꞌ habꞌil, islinhmolti istxꞌanhkanta tzaꞌ yaꞌ yul iskꞌul; iskam yaꞌ yu huneꞌ howla yabꞌil tuꞌ. Mach xin yako ebꞌnaj Judá qꞌa qꞌaꞌ chiyeniloj tato kaw ay yelapno yaꞌ Joram yet iskam yaꞌ, hakaꞌ yu yaniko ebꞌnaj qꞌaꞌ yet iskam ismam yaꞌ yebꞌ yet iskam ismam icham yaꞌ rey Joram tuꞌ. 20 32 (Kabꞌlahonhebꞌ iskawinaj) habꞌil yaꞌ Joram yet yok yaꞌ reyal, waxajebꞌnhe xin habꞌil ok yaꞌ reyal bꞌey Jerusalén. Hayet iskam yaꞌ rey Joram machi hunu mak tiꞌ yoche isnabꞌati yaꞌ. Hayet iskam yaꞌ, muji yaꞌ yul iskonhobꞌ yaꞌ David, yajaꞌ mach yulo ispantionh ebꞌyaꞌ isreyal Judá.