3 Hayet yabꞌen yaꞌ Josafat huneꞌ tuꞌ isxiwkanh yaꞌ, yinayo isbꞌa yaꞌ sata Komam Jahawil, yaniko yaꞌ huneꞌ tuꞌ yul isqꞌabꞌ Komam. Yalnilto yaꞌ tato sunil anma Judá mach chiwaꞌi yu istxahli tet Komam. 4 Iskutxbꞌaniko isbꞌa ebꞌnaj Judá, yok ebꞌnaj isqꞌanno tet Komam Jahawil ta chikolwa Komam yinh ebꞌnaj, istitpaxo ebꞌnaj yulajla hunun konhobꞌ, yalni ebꞌnaj tet Komam Jahawil ta chikolwa Komam yinh ebꞌnaj. 5 Yah linhno yaꞌ rey Josafat xol ebꞌnaj Judá yebꞌ ebꞌnaj ah Jerusalén kutxaniko sata yamaqꞌil Yatut Komam Jahawil, huneꞌ amaqꞌ akꞌto. 6 Yah yaw yaꞌ Josafat hakaꞌ tiꞌ: «Mam Jahawilanh, isDiosal jichmamanh, hach tiꞌ Dios hach yul satkanh, yahaw hachpaxo yinh ej konhobꞌ ay yul sat yibꞌanhqꞌinal tiꞌ. Yul haqꞌabꞌ ayko sunil hawip, kaw ay hawip machi mak tiꞌ chu isqꞌoji tawinh. 7 Mamin hach koDiosalanh. ¿Tom maxhtaj hach hatzumbꞌelo hunteqꞌan anma ayayo sat txꞌotxꞌ tiꞌ sata hakonhobꞌ Israel, hawaqꞌnikano txꞌotxꞌ yinh hunelnhe tet yikꞌal jichmam Abrahamanh, hawamigo? 8 Yehayo ebꞌnaj sat txꞌotxꞌ, yanikanh ebꞌnaj hawatut bꞌay chibꞌina habꞌi, yalni ebꞌnaj tawet hakaꞌ tiꞌ: 9 “Tato chiꞌay hunu isyaꞌtajil jibꞌanhanh yu kotxꞌojalanh, maka howal, maka howla yabꞌil, maka wahil, kat julanh tasataj yul Hawatut bꞌay chibꞌina habꞌi tiꞌ, kat koqꞌannihanh tawet tato chonhhakolanh yul isqꞌabꞌ isyaꞌtajil, chawabꞌe tzet chikoqꞌananh kat konhhakolnilojanh,” xhi ebꞌnaj tawet. 10 Haꞌ tinanh xin chawila tato ayko ebꞌnaj Amón yebꞌ ebꞌnaj Moab yebꞌ ebꞌnaj ay bꞌey txꞌotxꞌ chewal txꞌotxꞌ Seir, haꞌ ton ebꞌnaj ay bꞌey txꞌotxꞌ bꞌay mach hachakꞌto konhobꞌ Israel yet yel bꞌey Egipto, wal xin ispohilo isbꞌa yinh ebꞌnaj, yunhe mach chitanhtzelaxilo ebꞌnaj yu hakonhobꞌ. 11 Haꞌ tinanh xin, haꞌ ispaj selel chaqꞌ ebꞌnaj jetanh matit ebꞌnaj howal jinhanh, chiyochen ebꞌnaj konhyiqꞌalojanh sat kotxꞌotxꞌanh aqꞌbꞌilkano komajulojanh hawu. 12 Mamin, hach koDiosalanh, ¿Tom mach chawayo isyaꞌtajil yibꞌanh ebꞌnaj tiꞌ? Hanhonhtiꞌanh machi jipanh kotohanh jaqꞌlenojanh howal yinh hunteqꞌan ebꞌnaj kaw nimankano isbꞌisil chihul yaqꞌaꞌ howal jinhanh. Kaw mach chitxumcha juhanh tzet wal juten kobꞌahanh, yuxin tawinh chonhok tꞌanhnojanh,» xhi yaꞌ Josafat.

13 Sunil ebꞌnaj Judá linhankanh sata Komam Jahawil yebꞌ yixal, yebꞌ iskꞌahol, yebꞌ yuninal kaw nixhteto. 14 Yet kutxaniko sunil konhobꞌ tuꞌ, yul Yespíritu Komam Jahawil yinh huneꞌ naj levita titna yinh yaꞌ Asaf chiyij Jahaziel, naj Jahaziel tuꞌ iskꞌahol naj Zacarías, naj Zacarías iskꞌahol naj Benaía ye naj, haxa naj Benaía iskꞌahol naj Jeiel ye naj, haxa naj Jeiel iskꞌahol naj Matanías naj. 15 Yalni naj Jahaziel hakaꞌ tiꞌ: «Abꞌewe hex Judá yebꞌ hex Jerusalén yebꞌ hach tiꞌ mam rey Josafat. Hak tiꞌ chiyute yalni Komam Jahawil hakaꞌ tiꞌ: “Mach chexxiwkanh, mach chexibꞌtekanh hebꞌa sata ebꞌnaj soldado niman yiqꞌni isbꞌa tiꞌ, yuto maxhtaj hex cheyaqꞌ howal yebꞌ ebꞌnaj, wal xin to haꞌ Komam Dios chꞌaqꞌleno howal yebꞌ ebꞌnaj. 16 Yet hekal chexayto heyaqꞌaꞌ howal yinh ebꞌnaj, wal ebꞌnaj xin chiꞌahti ebꞌnaj yinhla iskꞌul witz Sis, kat xin hechahlen hebꞌa yebꞌ ebꞌnaj istiꞌ ha haꞌ bꞌay chiꞌichiko txꞌotxꞌ desierto Jeruel. 17 Yet hunel tiꞌ, maxhtaj hex cheyaqꞌ howal yinh ebꞌnaj, wal xin tonhe cheyila, chexok tuknoj, cheyilni kexiskolnilo Komam Jahawil yul isqꞌabꞌ ebꞌnaj. Hex Judá yebꞌ hex Jerusalén mach chexxiwi, mach chipax heyip. Hekal chexto heyaqꞌaꞌko howal yinh ebꞌnaj, yuto Komam Jahawil chꞌok heyetbꞌihoj,” xhi Komam,» xhi naj Jahaziel.

18 Yuxin ay jahno yaꞌ Josafat, yay xulno yaꞌ sat txꞌotxꞌ, yebꞌ sunil ebꞌnaj Judá yebꞌ sunil anma ay bꞌey Jerusalén, ay jahno sata Komam Jahawil yu yaqꞌni yuchꞌandiosal tet Komam. 19 Yahwano ebꞌnaj levita iskꞌahol naj Coat yebꞌ ebꞌnaj iskꞌahol naj Coré, yok ebꞌnaj isbꞌitnheno Komam Jahawil yinh kaw ip, Komam isDiosal Israel.

20 Haxa yet yahwano ebꞌnaj Judá yinh hunxa tzꞌayik yinh kaw sahabꞌ sakꞌayal, yu isto ebꞌnaj bꞌey txꞌotxꞌ desierto chiyij Tecoa. Wal yaꞌ Josafat linhankanh yaꞌ yet lanhan yelto ebꞌnaj Judá tuꞌ, yalni yaꞌ hakaꞌ tiꞌ: «Hex Judá yebꞌ hex Jerusalén tiꞌ, abꞌewe tzet chiwalan, aweyto yul heyanma yinh Komam Jahawil, haxinwal tꞌinhan heyekoj; awepaxayto yul heyanma yinh tzet chal ebꞌyaꞌ ischejabꞌ Komam, haxinwal kꞌul chꞌeliko tzet chewatxꞌe,» xhi yaꞌ.

21 Yet lahwi istzotel yaꞌ yebꞌ konhobꞌ yinh tzet chu isto yinh howal, yaniko yaꞌ hunteqꞌan ebꞌnaj chibꞌitnhen Komam Jahawil; yaniko ebꞌnaj bꞌitnom tuꞌ xil isqꞌap, hunteqꞌan xilqꞌape kaw ay yelapnoj. Chixin bꞌitni ebꞌnaj yet isto ebꞌnaj soldado yinh howal, yalni ebꞌnaj hakaꞌ tiꞌ: «Jaqꞌaꞌweko ismay Komam Jahawil, yuto kaw kꞌulchꞌankano iskꞌul yinh sunilbꞌal ej tiempo,» xhi ebꞌnaj.

22 Hayet yichiko ebꞌnaj isbꞌitnhen bꞌit chiꞌaniko ismay Komam, yaqꞌni somchahoto Komam Jahawil isnabꞌal ebꞌnaj Amón yebꞌ ebꞌnaj Moab yebꞌ ebꞌnaj tit bꞌey txꞌotxꞌ Seir, haꞌtikꞌa ebꞌnaj ishoyayo isbꞌa, yichiko ebꞌnaj ispotxꞌlenkamo isbꞌa. 23 Yok ebꞌnaj Amón yebꞌ ebꞌnaj Moab yaqꞌaꞌko howal yinh ebꞌnaj Seir, ispotxꞌnikamo ebꞌnaj ebꞌnaj, istanhtzenkanilo ebꞌnaj ebꞌnaj Seir tuꞌ. Haxa yet istanhkanilo ebꞌnaj Seir yu ebꞌnaj, yokpaxo ebꞌnaj Amón howal yebꞌ ebꞌnaj Moab, ispotxꞌnikamo ebꞌnaj hunun yet soldadohal.

24 Haxa yet yapni ebꞌnaj Judá bꞌey huneꞌ torre bꞌey txꞌotxꞌ desierto, yilnito ebꞌnaj tato kamomxa sunil ebꞌnaj, xanhepakꞌbꞌonbꞌato ebꞌnaj sat txꞌotxꞌ, machi hunu ebꞌnaj tuꞌ kolchahi. 25 Isto yaꞌ rey Josafat yebꞌ konhobꞌ Judá yinolo tzetaj iqꞌbꞌil yu ebꞌnaj tuꞌ, kaw niman tzetaj ye tuꞌ kaw ay istohol yebꞌ xilqꞌape ilcha yu ebꞌnaj. Kaw nimankano qꞌalomal iskutxbꞌa ebꞌnaj Judá xol ebꞌnaj kam tuꞌ, matxa qꞌoji ebꞌnaj yinito sunil. Oxebꞌ tzꞌayik yaqꞌ ebꞌnaj iskutxbꞌaniko tzetaj ye tuꞌ, yuto kaw niman tzet ye tuꞌ kaw ay istohol iqꞌbꞌil yu ebꞌnaj tanhtzelaxkanilo tuꞌ.

26 Haxa yinh iskanh tzꞌayik iskutxbꞌaniko isbꞌa ebꞌnaj Judá bꞌey akꞌal Beraca, yaniko ebꞌnaj ismay Komam Jahawil bꞌey tuꞌ, yuxin Beraca yako ebꞌnaj isbꞌiho huneꞌ akꞌal tuꞌ, hakto tuꞌ xin isbꞌi tinanh.^a 27 Lahwi tuꞌ xin ismeltzo sunil ebꞌnaj Judá yebꞌ ebꞌnaj ah Jerusalén yinh tzalahilal bꞌey konhobꞌ Jerusalén, haꞌ xin yaꞌ rey Josafat bꞌabꞌel sata sunil ebꞌnaj. Kaw tzalahilal yu ismeltzo ebꞌnaj, yuto haꞌ Komam Jahawil kolnilo ebꞌnaj yul isqꞌabꞌ ebꞌnaj icheniko howal yinh ebꞌnaj. 28 Haxa yet yapni ebꞌnaj bꞌey konhobꞌ Jerusalén, isto ebꞌnaj bꞌey Yatut Komam Jahawil, yaniko ebꞌnaj teꞌ salterio, teꞌ arpa yebꞌ trompeta yu tzalahilal.

29 Hayet yabꞌelaxiloj tato haꞌ Komam Jahawil aqꞌni howal yinh ebꞌnaj aniko howal yinh Israel, yok huneꞌ niman xiwkilal yinh sunil anma ay yulajla nime konhobꞌ. 30 Yuxin aynhetikꞌa aqꞌankꞌulal yulaj konhobꞌ ayko yalanh yip yaꞌ rey Josafat, yuto haꞌ Komam Dios aqꞌni aqꞌankꞌulal tet yaꞌ. Matxa xin howal yaqꞌ hunteqꞌan nime konhobꞌ ayko iskawilal Judá yinh yaꞌ rey Josafat.

31 Yaꞌ Josafat 35 (holanhebꞌ iskawinaj) habꞌil yaꞌ yet yok yaꞌ isreyalo Judá, wal xin 25 (howebꞌ iskawinaj) habꞌil ok yaꞌ reyal bꞌey Jerusalén. Haꞌ ismiꞌ yaꞌ Josafat, haꞌ ton ix Azuba, iskutzꞌin naj Silhi. 32 Yaꞌ Josafat isbꞌeybꞌalnhe yaꞌ tzetaj iswatxꞌe yaꞌ Asa ismam yaꞌ, machi bꞌay ishekꞌilo isbꞌa yaꞌ; wal xin haꞌ istoholal iswatxꞌe yaꞌ sata Komam Jahawil. 33 Yajaꞌ wal hunteqꞌan bꞌay chiyiyo isbꞌa anma Judá tet istioxh bꞌay nahat yekanh mach ilaxiloj, yuto haꞌ konhobꞌ tuꞌ mach istoholbꞌanheko yanma yinh Komam Dios, isDiosal yichmam. 34 Haꞌ hunteqꞌanxa tzet iswatxꞌe yaꞌ Josafat yet yichebꞌanil yebꞌ islahobꞌal tzꞌibꞌnhebꞌilkano yul yum yaꞌ Jehú, iskꞌahol naj Hanani, tzꞌibꞌnhebꞌilpaxkanayo yul hum chitzotel yibꞌanhilo isreyal ebꞌnaj Israel.

35 Haxa yet istzujanilxa, yaꞌ rey Josafat ischah ijaꞌ yaꞌ tzet yal yaꞌ Ocozías, isreyal Israel. Haꞌ yaꞌ Ocozías tuꞌ kaw txꞌojkano isnabꞌal yaꞌ. 36 Iswatxꞌen ebꞌyaꞌ teꞌ barco iskawanhil yu isto teꞌ bꞌey Tarsis, haꞌ bꞌey Ezión-geber iswatxꞌe ebꞌyaꞌ teꞌ. 37 Yu tuꞌ yuxin naj Eliezer, iskꞌahol naj Dodava ah Maresa halni hunteqꞌan tzotiꞌ mach kꞌulo yinh yaꞌ Josafat, yalni naj hakaꞌ tiꞌ: «Haꞌ Komam Jahawil chiꞌetanto hamunil hawatxꞌe tiꞌ, yuto maxawatxꞌe hatrato yebꞌ yaꞌ Ocozías,» xhi naj. Hak tuꞌ yu yetaxto hunteqꞌan teꞌ barco, yuxin matxa yu isto ebꞌnaj bꞌey Tarsis.