—¿Tzet yinh xin makaxhbꞌeykꞌo kolwal yinh mak txꞌoj isbꞌeybꞌal? ¿Tzet yinh xin chachtzala yinh mak chiyahni Komam Jahawil? Wal xin matit ishowal Komam Jahawil tawinh yu tzet maxawatxꞌe tiꞌ. 3 Yajaꞌ xin ay hunteqꞌan tzet ye tuꞌ tiꞌ kꞌul chiꞌilchalo tawinh, yuto hawilo hunteqꞌan tioxh Asera sat txꞌotxꞌ Judá, hawaniko yinh hawanma hasaynilo Komam Dios, xhi yaꞌ Jehú tet yaꞌ Josafat.

4 Yaꞌ rey Josafat haꞌ bꞌey Jerusalén ay yaꞌ, yaj ekꞌyaꞌ yilaꞌ ej konhobꞌ ay yul ismajul txꞌotxꞌ Judá, ichiti yaꞌ bꞌey Beerseba masanta bꞌey txꞌotxꞌ chewal txꞌotxꞌ Efraín, yalni yaꞌ tet anma ta chimeltzo yul isqꞌabꞌ Komam Jahawil, isDiosal yichmam. 5 Yaniko yaꞌ Josafat ebꞌnaj juez yulajla hunun konhobꞌ ayejiko iskꞌubꞌal yul ismajul Judá. 6 Yalni yaꞌ Josafat tet ebꞌnaj juez tuꞌ: «Kam cheyil yinh tzet chewatxꞌe, mach chewatxꞌe tzet choche iskꞌul anma, wal xin haꞌ tzet choche iskꞌul Komam Jahawil haꞌ chewatxꞌe, haꞌ Komam Dios chꞌok heyetbꞌihoj yet cheyilni tzet chꞌeliko hunu tzet ye tuꞌ. 7 Yilal hexiw tet Komam Jahawil, kam cheyil yinh tzet chewatxꞌe, yuto haꞌ Komam Jahawil, koDiosal, mach choche tato ay tzet ye tuꞌ mach toholo chewatxꞌe, maka ta ay hunu mak tiꞌ ekꞌbꞌal yelapno yibꞌanh hunuxa yet anmahil yul hesat, mach chochepaxo Komam tato chechah chꞌen melyu yu hewatxꞌenayo hunu tzet ye tuꞌ yinh leqꞌtiꞌal,» xhi yaꞌ.

8 Yanipaxiko yaꞌ Josafat hunteqꞌan ebꞌnaj yahawil xol konhobꞌ yebꞌ ebꞌnaj levita yebꞌ ebꞌyaꞌ sacerdote ay bꞌey Jerusalén juesal yinh kuybꞌanile hakaꞌ isley Komam Jahawil, yebꞌ yu iswatxꞌenilo ebꞌnaj howal chiꞌah xol anma ay bꞌey Jerusalén. 9 Yaqꞌnikano yaꞌ Josafat ischejbꞌanil ebꞌnaj: «Hakexpax tuꞌ hex tiꞌ, yilal hexiw tet Komam Jahawil yinh hemunil tiꞌ, haꞌojabꞌnhe isyelal cheyala, yebꞌ xin toholojabꞌ cheyute heyanma. 10 Tzijxanhe howal chul ebꞌnaj juxhta ay yulaj nime konhobꞌ yaqꞌaꞌko yul heqꞌabꞌ, yu hunu kamikal maka yu hunu tzet ye tuꞌ chiswatxꞌe maxhtaj yehi, hakaꞌ yalni ley yebꞌ chejbꞌanile, chikam heyal tet ebꞌnaj tato mach chako ebꞌnaj ismul tet Komam Jahawil yunhe mach chitit ishowal Komam teyibꞌanh yebꞌ yibꞌanh ebꞌnaj juxhta tuꞌ. 11 Haꞌ yaꞌ sacerdote Amarías chꞌok ijbꞌalo teyinh yinh tzetaj yet Komam Jahawil, haxa naj Zebadías, iskꞌahol naj Ismael yahawpaxo xol ebꞌnaj Judá, haꞌ naj chꞌok ilno inmunilan, kat iskolwapaxo ebꞌnaj levita teyinta yinh hemunil tiꞌ. Aweko yip heyanma kat heyok munil, haꞌ mak kꞌul tzet chiswatxꞌe chꞌok Komam Jahawil yetbꞌihoj,» xhi yaꞌ Josafat.