2 Haxa yinh tzujanilxa yet xaꞌekꞌto hayebꞌ habꞌil, isto yaꞌ Josafat bꞌey Samaria, istukleno yaꞌ rey Acab, yuxin txꞌiꞌal noꞌ meꞌ yebꞌ noꞌ wakax ischej yaꞌ Acab potxꞌlaxoj, yu iswaꞌ yaꞌ rey Josafat yebꞌ ebꞌnaj tzujan yintaj. Yok yaꞌ Acab yaqꞌni ayo iskꞌul yaꞌ Josafat yu isto yaꞌ yinta yaꞌ yanoko howal yinh konhobꞌ Ramot, ay yul ismajul Galaad. 3 Yalni yaꞌ Acab, isreyal Israel tet yaꞌ Josafat, isreyal Judá:

—¿Chimhawoche chaxhto jintajanh jaqꞌaꞌko howal yinh konhobꞌ Ramot ay yul ismajul Galaad? xhi yaꞌ.

Istaqꞌwi yaꞌ Josafat tet yaꞌ:

—Hanintiꞌan lahan hakaꞌta hawuxhta wehan, yebꞌ inkonhobꞌan lahan hakaꞌta hakonhobꞌpaxoj, yuxin chonhtohanh tawinta yinh howal tuꞌ, xhi yaꞌ. 4 Yalnipaxo yaꞌ Josafat tet yaꞌ isreyal Israel:

—Yajaꞌ chinqꞌanan tawet tato yilal haqꞌambꞌen tet Komam Jahawil bꞌabꞌel, xhi yaꞌ.

5 Yuxin iskutxbꞌako yaꞌ isreyal Israel 400 ebꞌyaꞌ ischejabꞌ Komam Dios, isqꞌambꞌen yaꞌ:

—Tzet cheyute heyalni, ¿chimyu intohan waqꞌaꞌkojan howal yinh konhobꞌ Ramot ay yul ismajul Galaad, mato mach chintohan? xhi yaꞌ.

Istaqꞌwi ebꞌyaꞌ:

—Ahanhtoj, yuto haꞌ Komam Dios chiꞌanoko konhobꞌ tuꞌ yul haqꞌabꞌ, xhi ebꞌyaꞌ.

6 Yajaꞌ isqꞌambꞌepaxo yaꞌ Josafat:

—¿Machim xin hunuxa ischejabꞌ Komam Jahawil bꞌey tiꞌ bꞌay wal koqꞌambꞌeni? xhi yaꞌ.

7 Istaqꞌwi yaꞌ rey Israel tet yaꞌ Josafat:

—Ayto huneꞌxa ischejabꞌ Komam Jahawil bꞌay chisje koqꞌambꞌeni, haꞌ ton yaꞌ Micaías iskꞌahol yaꞌ Imla, kachannhe xin chichiwa inkꞌulan yinh yaꞌ, yuto machi hunelo tiꞌ chiyal yaꞌ iskꞌulal winhan, wal xin hanhkꞌanhetikꞌa isyaꞌtajil chiyal yaꞌ winhan, xhi yaꞌ.

8 Ischejni yaꞌ rey Israel awtelaxo huneꞌ naj ischejabꞌ, yalni yaꞌ tet naj:

—As iti yaꞌ Micaías, iskꞌahol yaꞌ Imla yinh anhe, xhi yaꞌ.

9 Yaꞌ Acab, isreyal Israel, yebꞌ yaꞌ Josafat, isreyal Judá ayko xil isqꞌap ebꞌyaꞌ yet rey yinh, tzꞌonhanayo ebꞌyaꞌ yul isxhila yul txonhbꞌal iskawilal istiꞌ ispultahil konhobꞌ Samaria. Wal sunil ebꞌyaꞌ ischejabꞌ Komam Dios ayko ebꞌyaꞌ sata ebꞌyaꞌ rey tuꞌ, chalni ebꞌyaꞌ tzet chꞌeliko ebꞌyaꞌ tuꞌ. 10 Wal naj Sedequías, iskꞌahol naj Quenaana iswatxꞌeyo naj chꞌen hierro hakaꞌ yukꞌaꞌ wakax, yalni naj hakaꞌ tiꞌ: «Hak tiꞌ chiyute yalni Komam Jahawil: “Haꞌ yu hunteqꞌan chꞌen hierro hakaꞌ yukꞌaꞌ wakax tiꞌ chetejkamo ebꞌnaj sirio masanto chetanhtzekanilo ebꞌnaj,” xhi Komam Dios,» xhi naj.^a 11 Haktikꞌapax tuꞌ ebꞌyaꞌ ischejabꞌ Komam Dios lahannhe yalni ebꞌyaꞌ sunil tet yaꞌ rey Acab hakaꞌ tiꞌ: «Ahanhto hawaqꞌako howal yinh konhobꞌ Ramot, ay yul ismajul Galaad, hach chaxhqꞌoji yinh, yuto haꞌ Komam Jahawil chiꞌaniko yul haqꞌabꞌ,» xhi ebꞌnaj.

12 Wal naj chejabꞌ bꞌey inoti yaꞌ Micaías yal naj tet yaꞌ tuꞌ hakaꞌ tiꞌ:

—Sunil ebꞌyaꞌ ischejabꞌ Komam Dios lahannhe chu yalni ebꞌyaꞌ iskꞌulal yinh yaꞌ rey, yuxin chinqꞌanan tawet hakojabꞌpax tuꞌ hawalni iskꞌulal yinh yaꞌ, hakaꞌ yalni ebꞌyaꞌ tuꞌ, xhi naj.

13 Istaqꞌwi yaꞌ Micaías tet naj:

—Haꞌ Komam Jahawil itzitz, haꞌ tzet chal Komam, haꞌ chiwalaꞌan, xhi yaꞌ.

Lahwi tuꞌ xin yok yaꞌ sata yaꞌ rey. 14 Isqꞌambꞌen yaꞌ rey Acab tet yaꞌ Micaías:

—¿Chimyu kotohanh janokojanh howal yinh konhobꞌ Ramot, ay yul ismajul Galaad? mato machoj, xhi yaꞌ.

Istaqꞌwi yaꞌ Micaías tet yaꞌ:

—Ahanhtoj, hach chachqꞌoji yinh konhobꞌ tuꞌ, yuto haꞌ Komam chiꞌanoko yul haqꞌabꞌ, xhi yaꞌ.

15 Yalni yaꞌ Acab tet yaꞌ:

—Txꞌiꞌalxa el chiwalan tawet tato haꞌojabꞌ isyelal chawal wetan, chawaqꞌni bꞌinaho isbꞌi Komam Jahawil, xhi yaꞌ.

16 Yalnipaxo yaꞌ Micaías:

—Wilan sunil ebꞌnaj Israel issajlemito iswiꞌla witz, hakaꞌ issajlemito noꞌ meꞌ, machi mak chitanheni. Yalni Komam Jahawil wetan: “Haꞌ hunteqꞌan anma tiꞌ machi yahaw, meltzojabꞌ hunun ebꞌnaj yatut yinh aqꞌankꞌulal,” xhi Komam, xhi yaꞌ Micaías.

17 Yalni yaꞌ isreyal Israel tet yaꞌ Josafat:

—¿Tom maxhtikꞌa chiwalan tawet xin tato haꞌ huneꞌ yaꞌ tiꞌ, maxhtikꞌa nino iskꞌulal chiyal yaꞌ winhan? Wal xin to hanhkꞌanhe isyaꞌtajil, xhi yaꞌ.

18 Yalnipaxo yaꞌ Micaías tet yaꞌ:

—Abꞌe Istzotiꞌ Komam Jahawil tiꞌ. Hanintiꞌan wilan Komam Jahawil tzꞌonhanayo yul istzꞌonhobꞌal, ayko xin sunil ebꞌnaj ángel yet howal ay yul satkanh iskꞌatanh yinh iswatxꞌqꞌabꞌ yebꞌ yinh ismekqꞌabꞌ. 19 Isqꞌambꞌen Komam Jahawil hakaꞌ tiꞌ: “¿Mak chitubꞌtento yaꞌ Acab, isreyal Israel yanoko howal yinh konhobꞌ Ramot, ay yul ismajul Galaad, yu istanhilo yaꞌ bꞌey tuꞌ?” xhi Komam. Ay huneꞌ naj nan yute yalni, ay xin huneꞌxa naj halnipaxo huneꞌxa. 20 Yelti huneꞌ espíritu yapni sata Komam Jahawil, yalni tet Komam: “Hanintiꞌan, chintubꞌtetojan yaꞌ Acab tuꞌ,” xhi.

Isqꞌambꞌen Komam tet huneꞌ espíritu tuꞌ:

“¿Tzet xin chawute yaꞌ?” xhi Komam.

21 Istaqꞌwi huneꞌ espíritu tuꞌ: “Chintohan, kat waqꞌnihan leqꞌtiꞌal yalaꞌ sunil ebꞌyaꞌ chejabꞌ tet yaꞌ rey Acab,” xhi.

Yalni Komam tet huneꞌ espíritu tuꞌ: “Tubꞌteto yaꞌ, kat isyijen yaꞌ tzet chawala, asiꞌ kat hawatxꞌen hakaꞌ hawalni tiꞌ,” xhi Komam.

22 Yalnipaxo yaꞌ Micaías: “Yuxin wal tinanh, haꞌ Komam Dios chejnheti huneꞌ espíritu aqꞌni leqꞌtiꞌal yalaꞌ ebꞌyaꞌ hachejabꞌ tiꞌ, yajaꞌ wal Komam Jahawil xayala tato haꞌ isyaꞌtajil chihul tawibꞌanh,” xhi yaꞌ.

23 Yuxin hitziko naj Sedequías, iskꞌahol naj Quenaana, iskꞌatanh yaꞌ Micaías, ispaqꞌnilto naj isqꞌoch yaꞌ, yalni naj tet yaꞌ:

—¿Tzet mayu yel Yespíritu Komam Jahawil winhan, mato tzotelo tawet? xhi naj.

24 Istaqꞌwi yaꞌ Micaías tet naj:

—Hach kaw chawilaꞌ yinh huneꞌ tzꞌayik yet chaxhto hawebꞌano habꞌa yulajla nha, xhi yaꞌ.

25 Yalni yaꞌ isreyal Israel:

—Tzabꞌweyo yaꞌ Micaías tiꞌ, kat heyinito yaꞌ tet yaꞌ Amón, ayko gobernadoral yinh konhobꞌ tiꞌ, yebꞌ tet yaꞌ Joás inkꞌaholan. 26 Kat heyalni tet ebꞌyaꞌ: “Yaꞌ rey, hak tiꞌ yalni hakaꞌ tiꞌ: ‘Akto yaꞌ tiꞌ yul preso, nixhtenhe istiꞌ pan cheyaqꞌ tet yaꞌ, yebꞌ nixhtenhe haꞌ cheyaqꞌ yukꞌuꞌ yaꞌ, masanto yet chinmeltzohan yinh aqꞌankꞌulal,’” xhi.

27 Yalni yaꞌ Micaías:

—Tato kꞌul chu hameltzohi, maxhtaj Komam Jahawil mahalni tzet mawalan tawet tiꞌ, xhi.

Yalnipaxo yaꞌ:

—Cheyabꞌekano hesunil, hex konhobꞌ, xhi yaꞌ Micaías.

28 Lahwi tuꞌ yahto yaꞌ isreyal Israel yebꞌ yaꞌ Josafat, isreyal Judá yanoko howal yinh konhobꞌ Ramot, ay yul ismajul Galaad. 29 Yalni yaꞌ isreyal Israel tet yaꞌ Josafat:

—Hanintiꞌan, komon xilqꞌape chiwakojan yet chinokan xol howal, wal hach xin mach chawilo xil haqꞌap yet rey tiꞌ tawinh, xhi yaꞌ.

Ishelnilo yaꞌ rey Acab xil isqꞌap tuꞌ, yaniko yaꞌ xil isqꞌap ebꞌnaj soldado yinh, yok yaꞌ xol howal.

30 Yajaꞌ wal naj isreyal Siria halbꞌilxa yu naj tet ebꞌnaj capitán ayiko yul iscarruaje yet howal hakaꞌ tiꞌ: «Mach cheyako howal yinh ebꞌnaj soldado ay yelapnoj maka machi yelapnoj, wal xin yinhnhe naj isreyal Israel cheyako howal,» xhi naj tet ebꞌnaj. 31 Hayet yilni ebꞌnaj capitán ah Siria yaꞌ Josafat, yalni ebꞌnaj: «Haꞌ naj tiꞌ isreyal Israel,» xhi ebꞌnaj. Ishoynayo ebꞌnaj yaꞌ yu yaniko ebꞌnaj howal yinh yaꞌ; yajaꞌ ah yaw yaꞌ Josafat tet Komam Jahawil, iskolwa Komam yinh yaꞌ, ishekꞌnilo Komam ebꞌnaj ah Siria yinh yaꞌ Josafat. 32 Haxa yet yilni ebꞌnaj capitán ayko yul iscarruaje tato maxhtaj yaꞌ isreyal Israel, matxa yako ebꞌnaj howal yinh yaꞌ. 33 Yajaꞌ xin ay huneꞌ naj soldado sirio tonhe isqꞌojto islitꞌ, kꞌuxan xin yapni isbꞌaqꞌ islitꞌ naj tuꞌ yinh yaꞌ isreyal Israel bꞌay chischah isbꞌa isxijbꞌanil chꞌen coraza yet howal ayko yinh yaꞌ. Yuxin yal yaꞌ rey tuꞌ tet naj lanhan isyoni noꞌ cheh iqꞌnhe iscarruaje yaꞌ bꞌay ayahtoj hakaꞌ tiꞌ:

—Meltzo noꞌ cheh iqꞌnhe carruaje tiꞌ, kat kinhawinilojan xol howal tiꞌ, yuto niman inlahwilalan maꞌoki, xhi yaꞌ rey Acab.

34 Yajaꞌ yiqꞌkanh yip howal yinh huneꞌ tzꞌayik tuꞌ, wal yaꞌ isreyal Israel xin kankano linhno yaꞌ yul iscarruaje sata ebꞌnaj sirio masanto qꞌejbꞌiyal, haxa yet isto tzꞌayik iskamayo yaꞌ rey Acab.