Yet ok yaꞌ Josafat reyal yinh Judá
17
Haxa yaꞌ Josafat, iskꞌahol yaꞌ Asa ok reyal seleloj. Yaꞌ Josafat kaw ay yip yute isbꞌa yaꞌ iskolni isbꞌa tet ebꞌnaj Israel. 2 Yanito yaꞌ issoldado yulajla konhobꞌ ayko iskꞌubꞌal yul ismajul Judá, iswatxꞌelaxkanh campamento yul sunil ismajul Judá yebꞌ yulaj hunteqꞌan konhobꞌ yul ismajul Efraín, haꞌ ton hunteqꞌan konhobꞌ yilo yaꞌ Asa, ismam yaꞌ Josafat tuꞌ tet ebꞌnaj Efraín.
3 Ok Komam Jahawil yetbꞌiho yaꞌ Josafat yuto isbꞌeybꞌalnhe yaꞌ isbꞌeybꞌal yaꞌ David yichmam, mach xin ok tzujno yaꞌ yinta tioxh Baal. 4 Wal xin issay yaꞌ Komam Dios, isDiosal ismam, isbꞌeybꞌalnhen yaꞌ chejbꞌanile yal Komam, mach ok tzujno yaꞌ yinta isbꞌeybꞌal ebꞌnaj Israel. 5 Yuxin yiqꞌkanh yip yaꞌ Josafat yu Komam Jahawil yinh ismunil yinh reyal. Sunil ebꞌnaj Judá aqꞌni sabꞌehal tet yaꞌ, yahkanh isqꞌalomal yaꞌ yebꞌ xin kaw ay ismay elkaniko yaꞌ. 6 Yiqꞌnikanh yip yanma yaꞌ, isbꞌeybꞌalnhen isbꞌeh Komam Jahawil, yinilo yaꞌ bꞌay chiyiyo isbꞌa anma tet tioxh bꞌay nahat yekanh; yinipaxilo yaꞌ yechel tioxh Asera sat sunil txꞌotxꞌ Judá.
7 Hayet oxebꞌxa habꞌil yok yaꞌ Josafat reyalil ischejnito yaꞌ ebꞌnaj iswiꞌehal iskuyno anma ay yulajla konhobꞌ ay sat txꞌotxꞌ Judá. Ebꞌnaj chejlaxto tuꞌ haꞌ ebꞌnaj tiꞌ: Naj Ben-hail, naj Abdías, yaꞌ Zacarías, naj Natanael, yebꞌ yaꞌ Micaías. 8 Istopaxo ebꞌnaj levita yinta ebꞌnaj; naj Semaías, naj Netanías, naj Zebadías, naj Asael, naj Semiramot, naj Jonatán, naj Adonías, naj Tobías yebꞌ naj Tobadonías. Istopaxo ebꞌyaꞌ sacerdote Elisama yebꞌ yaꞌ Joram yinta ebꞌnaj. 9 Iqꞌbꞌil yumal kuybꞌanile yal Komam Jahawil yu ebꞌnaj yet chiskuyni ebꞌnaj anma Judá. Sunil yulajla konhobꞌ ay yul ismajul Judá ekꞌ ebꞌnaj iskuyuꞌ anma yinh kuybꞌanile yal Komam.
10 Sunil nime konhobꞌ ayko yinhla ishoyanil Judá xiw tet Komam Jahawil, yuxin machi hunu konhobꞌ aniko howal yinh yaꞌ rey Josafat. 11 Yiniti ebꞌnaj filisteo sabꞌehal tet yaꞌ Josafat, yaqꞌni ebꞌnaj chꞌen plata tohlabꞌalo tet yaꞌ. Hakpax tuꞌ ebꞌnaj árabe yiti ebꞌnaj 7,700 noꞌ meꞌ yok 7,700 noꞌ winaj chiw tet yaꞌ Josafat.
12 Kaw qꞌalombꞌikanh yaꞌ rey Josafat, iswatxꞌenkanh yaꞌ konhobꞌ alaxiko iskꞌubꞌal sat txꞌotxꞌ Judá, iswatxꞌenpaxokanh yaꞌ konhobꞌ bꞌay chikꞌubꞌalax tzet chilolaxi. 13 Kaw tzetkꞌa konhobꞌ iswatxꞌekanh yaꞌ sat txꞌotxꞌ Judá bꞌay chikꞌubꞌalax tzet chilolaxi. Kaw nimanpaxo ebꞌnaj issoldado yaꞌ bꞌey Jerusalén, ebꞌnaj kaw ay yip yanma yebꞌ kaw helan yinh howal. 14 Haꞌ tiꞌ isbꞌisil ebꞌnaj issoldado yaꞌ Josafat yinh hunun majan:
Haꞌ naj Adnas, yahawil yeko yinh ismilalxa ebꞌnaj soldado Judá, 300 mil isbꞌisil ebꞌnaj, ebꞌnaj tuꞌ kaw helan ebꞌnaj yinh howal. 15 Haxa naj iskabꞌ yahawil, haꞌ ton naj Johanán, 280 mil isbꞌisil ebꞌnaj issoldado naj. 16 Haxa naj yox yahawil, haꞌ ton naj Amasías, iskꞌahol naj Zicri, naj tiꞌ kaw haꞌ yinh yanma naj tit ismunla yinh ismunil Komam Jahawil; haꞌ xin isbꞌisil ebꞌnaj issoldado naj 200 mil ebꞌnaj, ebꞌnaj tuꞌ soldado kaw ay yip yanma.
17 Haxa xol ebꞌnaj Benjamín, 200 mil isbꞌisil ebꞌnaj soldado, ebꞌnaj tuꞌ ay islitꞌ yebꞌ yescudo ebꞌnaj chiꞌokniko yinh howal; haꞌ xin naj Eliada ayko yahawilo ebꞌnaj; naj Eliada tuꞌ winaj kaw ay yip yanma. 18 Haxa naj Jozabad, haꞌ naj iskabꞌ yahawil xol ebꞌnaj soldado Benjamín, 180 mil isbꞌisil ebꞌnaj issoldado naj. Ebꞌnaj tuꞌ kaw helan ebꞌnaj yinh howal.
19 Haꞌ sunil ebꞌnaj tuꞌ, ischejabꞌ yaꞌ rey Josafat, nan xin yepaxo ebꞌnaj pujanilto yulajla konhobꞌ ayko iskꞌubꞌal ay sat txꞌotxꞌ Judá.