Istꞌinhbꞌa istzotiꞌ yaꞌ Asa yebꞌ naj Ben-adad
16
Hayet 36 (wajlanhebꞌ iskawinaj) habꞌilxa yok yaꞌ Asa reyal, yahapno yaꞌ Baasa, isreyal Israel yanoko howal yinh Judá, iswatxꞌenkanh yaꞌ Baasa iskꞌubꞌal konhobꞌ Ramá, hak tuꞌ yu ismajchen yaꞌ bꞌeh yunhe machi hunu mak chiꞌelto yebꞌ machi hunu mak chiꞌapni bꞌay ay yaꞌ Asa, isreyal Judá. 2 Wal yaꞌ rey Asa xin yilti yaꞌ sunil chꞌen oro yebꞌ chꞌen plata ayikto yul Yatut Komam Jahawil, yebꞌ chꞌen ayikto yul yatut yaꞌ, yanito yaꞌ chꞌen oro yebꞌ chꞌen plata tuꞌ tet naj Ben-adad, isreyal Siria ay bꞌey Damasco, yalnito yaꞌ hakaꞌ tiꞌ: 3 «Kotꞌinhbꞌakano kotrato kokawanhil, hakaꞌ yu istꞌinhbꞌankano istrato inmaman yebꞌ hamam. Mawatojan chꞌen oro yebꞌ chꞌen plata tawet yu hatita, kat hamanhkꞌon tzet taqꞌebꞌil hawu hawatxꞌen yebꞌ yaꞌ Baasa, isreyal Israel, yunhe isbꞌejni yaꞌ yaniko howal winhan,» xhito yaꞌ.4 Wal naj rey Ben-adad tuꞌ, ischah iswiꞌ naj tzet yalto yaꞌ rey Asa; ischejnito naj ebꞌnaj yahawil yinh issoldado yanoko howal yinh hunteqꞌan konhobꞌ ay yul ismajul txꞌotxꞌ Israel. Isqꞌoji ebꞌnaj yinh konhobꞌ Ijón, konhobꞌ Dan yebꞌ konhobꞌ Abel-maim yebꞌ sunil konhobꞌ ay yul ismajul Neftalí bꞌay chikꞌubꞌalax ixim trigo. 5 Hayet yabꞌen yaꞌ rey Baasa huneꞌ tuꞌ isbꞌejni yaꞌ iswatxꞌenkanh konhobꞌ Ramá, isbꞌejnikano yaꞌ huneꞌ munil tuꞌ. 6 Hak tuꞌ yu yinito yaꞌ rey Asa sunil ebꞌnaj Judá yintaj, isto ebꞌnaj yinoti chꞌen chꞌen yebꞌ te teꞌ iskutxbꞌako yaꞌ Baasa yu iswatxꞌenkanh konhobꞌ Ramá. Haxa chꞌen chꞌen yebꞌ te teꞌ tuꞌ okniko yu ebꞌnaj Judá iswatxꞌenkanh ebꞌnaj konhobꞌ Geba yebꞌ konhobꞌ Mizpa.
7 Haꞌ yinh huneꞌ tzꞌayik tuꞌ, apni yaꞌ Hanani, ischejabꞌ Komam Dios iskꞌatanh yaꞌ Asa, isreyal Judá, yalni yaꞌ tet yaꞌ: «Hach tiꞌ, maxhtaj yinh Komam Jahawil, haDiosal kawxi hakꞌul, wal xin yinh naj rey Siria kawxi hakꞌul, yuxin ebꞌnaj soldado yet naj rey Siria maꞌelkano ebꞌnaj yul haqꞌabꞌ. 8 Ebꞌnaj etíope yebꞌ ebꞌnaj libio yet yul ebꞌnaj howal teyinh ¿Tom mach txꞌiꞌalo yiqꞌni isbꞌa ebꞌnaj, iqꞌbꞌil iscarruaje ebꞌnaj yu, yebꞌ hanta isbꞌisil ebꞌnaj ejército yet howal ayahto yibꞌanh cheh? Waxanhka kaw ay yip ebꞌnaj yajaꞌ yako Komam Jahawil ebꞌnaj yul heqꞌabꞌ yuto kawxi hekꞌul yinh Komam. 9 Yuto haꞌ isbꞌaqꞌ sat Komam chiyilayti sunil txꞌo txꞌotxꞌ yunhe isyeni yip, chiswatxꞌen iskꞌulal yinh ebꞌnaj tohol yanma yul sat. Haꞌ huneꞌ maxawatxꞌe tiꞌ mach kꞌuloj yuto lahan hawute hanabꞌal hakaꞌ ebꞌnaj suk, yuxin haꞌ tzꞌayik chihul tasataj txꞌiꞌal howal chihul tawibꞌanh,» xhi yaꞌ Hanani.
10 Hayet yabꞌen yaꞌ rey Asa tzet yal ischejabꞌ Komam Dios tuꞌ istit ishowal yaꞌ, yanikto yaꞌ yaꞌ yul preso. Haꞌ yinh hunteqꞌan tzꞌayik tuꞌ ay haywanhpaxo ebꞌnaj ay yul konhobꞌ tuꞌ chiꞌekꞌyaꞌ yanma yu yaꞌ Asa.
Iskamikal yaꞌ rey Asa
11 Haꞌ tzetaj iswatxꞌe yaꞌ rey Asa yet yichebꞌanil yebꞌ yet islahobꞌal, tzꞌibꞌnhebꞌil yul hum chitzotel yibꞌanhilo ebꞌyaꞌ isreyal Judá yebꞌ isreyal Israel. 12 Haxa yet 39 (bꞌalonhlahonhebꞌ iskawinaj) habꞌilxa yok yaꞌ Asa reyal, yok huneꞌ howla yabꞌil yinh yoj yaꞌ, yajaꞌ hayet yabꞌiꞌay yaꞌ tuꞌ mach issayilo yaꞌ Komam Jahawil, wal xin hanhe ebꞌnaj doctor issayikꞌo yaꞌ. 13 Haxa yet 41 (huneꞌ yoxkꞌal) habꞌilxa yok yaꞌ reyal, iskam yaꞌ. 14 Muji yaꞌ yul ispantionh yaqꞌ watxꞌe yet yalanhtokanoj bꞌey iskonhobꞌ yaꞌ David. Hayet iskam yaꞌ rey Asa alaxayto isnimanil yaꞌ yul huneꞌ kaxha, yalaxiko txꞌiꞌal anh kaw xuqꞌ sam yinh isnimanil yaꞌ. Lahwi tuꞌ yaniko ebꞌnaj Judá huneꞌ niman qꞌaꞌ yunhe isyenilo ebꞌnaj tato kaw niman yelapno yaꞌ rey Asa yul sat ebꞌnaj.