Bꞌeybꞌale iswatxꞌelo yaꞌ rey Asa
15
Yul Yespíritu Komam Dios yinh yaꞌ Azarías iskꞌahol yaꞌ Obed, 2 yelti yaꞌ ischahno yaꞌ rey Asa, yalni yaꞌ tet yaꞌ: «Abꞌe tzet chiwalan mam Asa yebꞌ hex Judá yebꞌ hex Benjamín, chiꞌok Komam Dios heyetbꞌihoj tato ayexnhetikꞌako iskꞌatanh Komam, yebꞌ xin ta chesayikꞌo Komam chiꞌilcha Komam heyu, yajaꞌ ta chehekꞌilo hebꞌa yinh Komam, chexbꞌejlaxpaxkano yu. 3 Txꞌiꞌal tzꞌayik maxhtaj Komam Dios bꞌay tzujan ebꞌnaj Israel, matxapaxo ebꞌyaꞌ sacerdote chikuywahi, matxapaxo chejbꞌanile. 4 Haxa yet yay isyaꞌtajil yibꞌanh ebꞌnaj, ismeltzo yul isqꞌabꞌ Komam Jahawil, isDiosal Israel, issayni ebꞌnaj Komam, yilcha Komam yu ebꞌnaj. 5 Haꞌ yinh hunteqꞌan tiempo tuꞌ machi aqꞌankꞌulal tet mak chiꞌokto yul konhobꞌ maka mak chiꞌeltoj, wal xin kaw niman isyaꞌtajil ay yibꞌanh anma ay yulajla konhobꞌ sat txꞌotxꞌ tiꞌ. 6 Yaqꞌlenkanh howal anma yebꞌ yet anmahil, yaqꞌlenpaxokanh howal huneꞌ konhobꞌ yebꞌ hunxa konhobꞌ, yuto haꞌ Komam Dios aqꞌni somchahokanh isnabꞌal anma yu sunilal isyaꞌtajil yayo Komam yibꞌanh anma. 7 Yajaꞌ wal hex tiꞌ, aweko yip heyanma, machojabꞌ chipax heyip, yuto haꞌ tzet chewatxꞌe, chechah ispaj,» xhi yaꞌ Azarías.8 Hayet yabꞌen yaꞌ Asa tzet yal yaꞌ Azarías ischejabꞌ Komam Dios, yaꞌ iskꞌahol yaꞌ Obed, yiqꞌnikanh yip yanma yaꞌ Asa tuꞌ, yinilo yaꞌ hunteqꞌan tioxh, hunteqꞌan chisyah Komam Dios aykanh yulajla konhobꞌ sat txꞌotxꞌ Judá, yebꞌ txꞌotxꞌ Benjamín yebꞌ yulaj hunteqꞌan konhobꞌ yiqꞌ yaꞌ yul ismajul txꞌotxꞌ chewal txꞌotxꞌ Efraín. Iswatxꞌenkanh yaꞌ ismexhahil yet xahanbꞌal tet Komam Dios ayko yamaqꞌil Yatut Komam. 9 Lahwi tuꞌ iskutxbꞌaniko yaꞌ Asa sunil ebꞌnaj Judá yebꞌ ebꞌnaj Benjamín yebꞌ hunteqꞌanxa ebꞌnaj Israel ay xol ebꞌnaj titna yul ismajul Efraín, Manasés yebꞌ Simeón, yuto niman ebꞌnaj Israel tuꞌ ok yetbꞌiho yaꞌ rey Asa, yet yilni ebꞌnaj tato ayko Komam Jahawil yetbꞌiho yaꞌ, Komam isDiosal yaꞌ.
10 Haxa yinh yox ixahaw yet 15 (holahonhebꞌxa) habꞌil yok yaꞌ Asa reyal, iskutxbꞌaniko isbꞌa ebꞌnaj bꞌey Jerusalén. 11 Haꞌtikꞌa yinh huneꞌ tzꞌayik tuꞌ xin yaqꞌ ebꞌnaj isxahanbꞌal tet Komam Dios, 700 noꞌ wakax yok hujebꞌ mil noꞌ meꞌ yaqꞌ ebꞌnaj xahanbꞌalil, haꞌ noꞌ tuꞌ yilo ebꞌnaj bꞌay ok howal. 12 Hak tuꞌ xin yu istaqꞌwenkano ebꞌnaj yinh tzalahilal issayni Komam Jahawil, Komam isDiosal yichmam ebꞌnaj, yinh sunil iskꞌul yebꞌ sunil yanma. 13 Yalni ebꞌnaj tato makxanhetikꞌa mach chisaynilo Komam Jahawil, isDiosal Israel, yilal iskami, machi yok yinh ta icham anma maka tzehto, winaj maka ix. 14 Kaw ip ah yaw ebꞌnaj, istaqꞌweniko ebꞌnaj yibꞌanh sata Komam Jahawil, yebꞌ yinh tzalahilal yoqꞌtzelax chꞌen trompeta yebꞌ bocina. 15 Sunil ebꞌnaj Judá kaw tzalahi yu tzet istaqꞌweko yibꞌanh, yuto istaqꞌweko ebꞌnaj yinh sunil yanma. Issayni ebꞌnaj Komam Jahawil yinh sunil iskꞌul, yilcha Komam yu ebꞌnaj, yaqꞌni Komam aqꞌankꞌulal xol ebꞌnaj yebꞌ ej konhobꞌ ayejiko yinhla ishoyanil.
16 Yinilo yaꞌ rey Asa ix Maaca ismiꞌ yinh huneꞌ yehobꞌal kaw ay yelapno bꞌay aykoj, yuto iswatxꞌe ix yechel tioxh Asera. Yetanto yaꞌ Asa huneꞌ tioxh tuꞌ ismaqꞌnipoho yaꞌ, isnhusnito yaꞌ istiꞌ haꞌ Cedrón. 17 Yajaꞌ hunteqꞌan bꞌay chiyiyo isbꞌa anma tet tioxh bꞌay nahat yekanh mach ilaxilo sat txꞌotxꞌ Israel. Yajaꞌ wal yaꞌ Asa kaw tohol yanma yaꞌ yulbꞌal sunilbꞌal tiempo ekꞌyaꞌ sat yibꞌanhqꞌinal tiꞌ. 18 Sunil tzet yakano ismam yaꞌ yeto Komam Dios yakto yaꞌ yul Yatut Komam, yanipaxikto yaꞌ chꞌen oro yebꞌ chꞌen plata, yebꞌ munlabꞌal, chꞌen yettikꞌa Komam. 19 Haꞌ yulbꞌal istiempohal yaꞌ rey Asa machi howal oki masanto yet ekꞌto 35 (holanhebꞌ iskawinaj) habꞌil yet yok yaꞌ reyal.