2 Yaꞌ rey Asa haꞌ iskꞌulal yebꞌ istoholal iswatxꞌe yaꞌ sata Komam Jahawil, isDiosal, 3 yuto yuchkꞌato yaꞌ ismexhahil yet xahanbꞌal bꞌay nahat yekanh bꞌay chiyiyo isbꞌa anma tet istioxh, ismaqꞌnipoho yaꞌ tioxh aykanh bꞌey tuꞌ yebꞌ yechel tioxh Asera. 4 Ischejni yaꞌ Asa anma Judá issaynolo Komam Jahawil, isDiosal yichmam, yebꞌ isyijen yaꞌ chejbꞌanile yebꞌ kuybꞌanile yal Komam. 5 Yuchkꞌato yaꞌ ismexhahil yet xahanbꞌal bꞌay nahat yekanh bꞌay chiyiyo isbꞌa anma tet istioxh yulajla sunil konhobꞌ yul ismajul txꞌotxꞌ Judá, yinipaxilo yaꞌ yechel ej tioxh aykanh yulajla konhobꞌ. Ay xin aqꞌankꞌulal sat txꞌotxꞌ Judá yulbꞌal tiempo yet ayko yaꞌ Asa reyal.

6 Iswatxꞌenkanh yaꞌ rey Asa tuꞌ hunteqꞌan konhobꞌ sat txꞌotxꞌ Judá, yaniko yaꞌ iskꞌubꞌal yuto aqꞌankꞌulal ye ebꞌnaj, machi xin hunu konhobꞌ tiꞌ chiꞌaniko howal yinh ebꞌnaj yuto haꞌ Komam Jahawil aqꞌni aqꞌankꞌulal tet ebꞌnaj. 7 Yuxin yal yaꞌ rey Asa tet anma Judá: «Kowatxꞌeꞌwekanh hunteqꞌan konhobꞌ tiꞌ, kat janiko iskꞌubꞌal kat janikanh istorrehal, kat janiko ispultahil, kat janiko chꞌen barra istelo, yuto jet ye txꞌo txꞌotxꞌ tiꞌ, yuto xakosayilo Komam Jahawil koDiosal, yaqꞌni Komam aqꞌankꞌulal jet sunil yulajla kokonhobꞌ, yuxin kowatxꞌeꞌwekanh hunteqꞌan konhobꞌ tiꞌ,» xhi yaꞌ. Iswatxꞌenkanh ebꞌnaj, yanayo Komam isyaxilal yibꞌanh ebꞌnaj.

8 Haꞌ bꞌey Judá ay 300 mil issoldado yaꞌ rey Asa, ebꞌnaj tuꞌ ay islanza yebꞌ yescudo ebꞌnaj. Haxa ebꞌnaj Benjamín ay 280 mil issoldado, ebꞌnaj tuꞌ ay yescudo yebꞌ islitꞌ ebꞌnaj, ebꞌnaj Benjamín tuꞌ kaw helan ebꞌnaj yinh howal.

9 Istit naj Zera isreyal Etiopía yaqꞌaꞌko howal yinh ebꞌnaj Judá. Huneꞌ millón issoldado naj rey Zera tzujan yintaj, iqꞌbꞌilpaxo xin 300 iscarruaje naj, yapni ebꞌnaj bꞌey Maresa. 10 Yelto yaꞌ rey Asa howal yinh naj rey Etiopía bꞌey sat akꞌal Sefata iskawilal Maresa. 11 Hayet maxhto chiꞌok howal tuꞌ yah yaw yaꞌ rey Asa tet Komam Jahawil, isDiosal, yalni yaꞌ hakaꞌ tiꞌ: «¡Mamin, hach tiꞌ mach yaꞌtajo yul hasat hakolwa yinh mak ay yip maka yinh mak machi yip! Mamin, hach koDiosalanh kolwahanh jinhanh yuto tawinhnhe chikawxi kokꞌulanh, yinh habꞌi chijaqꞌanh howal yinh ebꞌnaj soldado tiꞌ. Mamin, hach tiꞌ koDiosalanh, machojabꞌ chiqꞌoji ebꞌnaj winaj tawinh,» xhi yaꞌ rey Asa.

12 Haꞌ Komam Jahawil aqꞌni aykꞌayo ebꞌnaj etíope yul isqꞌabꞌ yaꞌ rey Asa yebꞌ ebꞌnaj Judá, yelkanh ebꞌnaj etíope tuꞌ, 13 yok tzujno yaꞌ rey Asa yebꞌ issoldado yinta ebꞌnaj masanta bꞌey Gerar, istanhtzelaxilo ebꞌnaj etíope tuꞌ yu ebꞌnaj, matxa hunu ebꞌnaj kankanoj. Aykꞌay ebꞌnaj sata Komam Jahawil yebꞌ sata yejercito Komam. Kaw xin txꞌiꞌal tzet ye tuꞌ yet ebꞌnaj etíope tuꞌ yilo ebꞌnaj Judá. 14 Lahwi tuꞌ yanipaxiko ebꞌnaj Judá howal yinh ej konhobꞌ ayko yinhla ishoyanil Gerar, yaykꞌay hunteqꞌan konhobꞌ tuꞌ yul isqꞌabꞌ ebꞌnaj, yuto haꞌ Komam Jahawil aniko xiwkilal yinh anma ay yul hunteqꞌan konhobꞌ tuꞌ, yok ebꞌnaj Judá yinolti qꞌalomal ay yul ej konhobꞌ tuꞌ, yuto kaw ay isqꞌalomal. 15 Yanipaxiko ebꞌnaj Judá tuꞌ howal yinh ebꞌnaj ay isnoqꞌ ay yul iscampamento, isqꞌoji ebꞌnaj yinh ebꞌnaj, yinilo ebꞌnaj txꞌiꞌal noꞌ meꞌ yebꞌ noꞌ camello tet ebꞌnaj, lahwi tuꞌ ispaxto ebꞌnaj bꞌey Jerusalén.