Ok yaꞌ Abiam reyal yinh Judá
15
Hayet 18 (iswaxajlahonhebꞌxa) habꞌil yok yaꞌ Jeroboam, iskꞌahol naj Nabat reyal yinh Israel, yok yaꞌ Abiam isreyalo Judá. 2 Oxebꞌ habꞌil xin ok yaꞌ reyal bꞌey Jerusalén. Haꞌ isbꞌi ismiꞌ yaꞌ Abiam tuꞌ, Maaca isbꞌi iskutzꞌin naj Abisalom ye ix. 3 Yaꞌ rey Abiam tuꞌ isbꞌeybꞌalnhe yaꞌ sunil istxꞌojal iswatxꞌe ismam yuxin mach toholo yanma yaꞌ sata Komam Dios Jahawil, isDiosal, mach hakaꞌ yaꞌ David, yichmam yaꞌ. 4 Yajaꞌ yu iskꞌulal iskꞌul Komam Jahawil yinh yaꞌ David, isDiosal yaꞌ, yuxin mach istanhtzelo Komam yikꞌal yaꞌ, haꞌ xin istzejtah Jerusalén. Wal xin ok yikꞌal yaꞌ yinh reyal bꞌey Jerusalén, iskolchakanilo huneꞌ konhobꞌ tuꞌ.a 5 Yuto haꞌ istoholal iswatxꞌe yaꞌ David sata Komam Dios Jahawil, yulbꞌal sunilbꞌal tiempo itzitz yaꞌ, machi hunu tzet ye tuꞌ tiꞌ bꞌay chejlax yaꞌ yu Komam ismanhkꞌo; kachannhe xin haꞌ huneꞌ ismul yaꞌ yako yinh naj Urías, naj heteo.b6 Sunilbꞌal tiempo yet ayiko yaꞌ Roboam reyal, yebꞌ yet aypaxiko yaꞌ Jeroboam reyal ay howal xol ebꞌyaꞌ. 7 Haꞌ hunteqꞌanxa tzet yu yaꞌ rey Abiam yebꞌ sunil tzet iswatxꞌe yaꞌ, tzꞌibꞌnhebꞌil yul hum chitzotel yinh ebꞌyaꞌ rey Judá. Wal xin aynhetikꞌa howal xol yaꞌ rey Abiam yebꞌ yaꞌ rey Jeroboam. 8 Iskam yaꞌ Abiam, hakaꞌ yu iskamto ismam yebꞌ ismam icham yaꞌ, ismujlax yaꞌ bꞌey iskonhobꞌ yaꞌ David, yok yaꞌ Asa iskꞌahol yaꞌ reyal seleloj.
Ok yaꞌ Asa isreyalo Judá
9 Hayet 20 (hunkꞌalxa) habꞌil yok yaꞌ Jeroboam isreyalo Israel, yokpaxo yaꞌ Asa isreyalo Judá. 10 41 (Hun yoxkꞌal) habꞌil ok yaꞌ reyal bꞌey Jerusalén, Maaca isbꞌi ismiꞌ yaꞌ Asa tuꞌ, ix iskutzꞌin naj Abisalom.
11 Wal yaꞌ rey Asa tuꞌ, iswatxꞌe yaꞌ istoholal sata Komam Dios Jahawil, hakaꞌ yaꞌ David yichmam yaꞌ. 12 Istzumbꞌelo yaꞌ ebꞌnaj winaj chiwatxꞌen mule yebꞌ yet winajil yul konhobꞌ tuꞌ, yinilo yaꞌ sunil tioxh iswatxꞌe ismam icham yebꞌ ismam yaꞌ. 13 Yinilo yaꞌ ismiꞌ, haꞌ ton ix Maaca yul huneꞌ yehobꞌal kaw ay yelapnoj, yuto iswatxꞌe ix yechel tioxh Asera. Ismaqꞌnipoho yaꞌ istioxh ismiꞌ tuꞌ, isnhusnito yaꞌ istiꞌ haꞌ Cedrón. 14 Yajaꞌ wal hunteqꞌan bꞌay chiyiyo isbꞌa anma tet istioxh iswiꞌla wonhan machi istanhtzelo yaꞌ. Sunilbꞌal tiempo itzitz yaꞌ Asa tuꞌ tohol yanma yaꞌ sata Komam Dios Jahawil. 15 Yanikanikto yaꞌ Asa yul Yatut Komam Dios sunil tzet iswatxꞌe ismam yaꞌ yeto Komam Dios Jahawil. Iswatxꞌenpaxayo yaꞌ Asa munlabꞌal yinh chꞌen oro yebꞌ chꞌen plata, yokniko yinh ismunil Komam.
Ay tzet istꞌinhbꞌakano yaꞌ rey Asa yebꞌ naj rey Ben-adad
16 Sunilbꞌal tiempo yet ayko yaꞌ Asa reyal yinh Judá yaqꞌ yaꞌ howal yebꞌ yaꞌ Baasa, isreyal Israel. 17 Hayet yahapno yaꞌ Baasa, isreyal Israel yaqꞌaꞌko howal yinh Judá, iswatxꞌenkanh yaꞌ iscuartelo konhobꞌ Ramá, hak tuꞌ yu ismajchen yaꞌ bꞌeh yunhe machi hunu ebꞌnaj Israel chiꞌapni Judá iskꞌatanh yaꞌ rey Asa, yebꞌ yunhe machi hunu mak chiꞌel yul ismajul Judá. 18 Yuxin yilti yaꞌ rey Asa chꞌen oro yebꞌ chꞌen plata kantokano yul Yatut Komam Dios Jahawil, yebꞌ qꞌalomal ay yul yatut yaꞌ, ischejnito yaꞌ ischejabꞌ yanokano sunil tuꞌ tet naj Ben-adad, isreyal Siria. Naj Ben-adad tuꞌ, iskꞌahol naj Tabrimón ye naj, haxa naj Tabrimón iskꞌahol naj Hezión ye naj. Haꞌ xin bꞌey Damasco ay naj Ben-adad tuꞌ, yalnito yaꞌ Asa tet naj hakaꞌ tiꞌ: 19 «Kotꞌinhbꞌa kotrato, hakaꞌ yu istꞌinhbꞌan istrato inmaman yebꞌ hamam, chiwatojan chꞌen plata yebꞌ chꞌen oro sabꞌehal tawet, manhkꞌo tzet tꞌinhbꞌabꞌil hawu yebꞌ yaꞌ Baasa isreyal Israel, yunhe isbꞌejnikano yaꞌ yaniko howal winhan,» xhito yaꞌ Asa.
20 Isyijen naj Ben-adad tzet isqꞌan yaꞌ rey Asa, ischejnito naj yahawil issoldado yaqꞌaꞌko howal yinh ej konhobꞌ ay yul ismajul Israel; konhobꞌ Ijón, Dan, Abel-bet-maaca yebꞌ konhobꞌ ay yul ismajul txꞌotxꞌ Cineret yebꞌ Neftalí, yok hunteqꞌan konhobꞌ tiꞌ yalanh yip naj Ben-adad. 21 Hayet yabꞌen yaꞌ Baasa huneꞌ tuꞌ, islinhbꞌan yaꞌ iswatxꞌenkanh konhobꞌ Ramá, iskankano yaꞌ bꞌey konhobꞌ Tirsa. 22 Lahwi tuꞌ iskutxbꞌaniko yaꞌ rey Asa sunil ebꞌnaj Judá, machi hunu ebꞌnaj Judá machi apni; isto ebꞌnaj bꞌey Ramá yinilo ebꞌnaj sunil chꞌen chꞌen yebꞌ te teꞌ yako yaꞌ Baasa yet iswatxꞌenkanh konhobꞌ Ramá, iswatxꞌenkanh yaꞌ rey Asa konhobꞌ Geba ay yul ismajul Benjamín yebꞌ konhobꞌ Mizpa yu chꞌen chꞌen yebꞌ te teꞌ yilo bꞌey konhobꞌ Ramá.
Iskamikal yaꞌ rey Asa
23 Haꞌ hunteqꞌanxa tzet iswatxꞌe yaꞌ rey Asa, yebꞌ yip yaꞌ, yebꞌ ej konhobꞌ iswatxꞌekanh yaꞌ, tzꞌibꞌnhebꞌil yul hum chitzotel yinh ebꞌyaꞌ isreyal Judá.
Haxa yet kaw ichamxa yaꞌ rey Asa yok huneꞌ yabꞌil yinh yoj yaꞌ.c 24 Lahwi tuꞌ iskam yaꞌ, hakaꞌ yu iskamto ismam icham, yebꞌ ismam yaꞌ bꞌey iskonhobꞌ yaꞌ David, yichmam yaꞌ. Yok yaꞌ Josafat, iskꞌahol yaꞌ Asa reyal seleloj.
Ok yaꞌ Nadab reyal yinh Israel
25 Hayet kabꞌxa habꞌil yok yaꞌ Asa isreyalo Judá, yok yaꞌ Nadab iskꞌahol yaꞌ Jeroboam isreyalo Israel, kabꞌnhe xin habꞌil ok yaꞌ isreyal. 26 Yaꞌ Nadab tuꞌ, iswatxꞌe yaꞌ istxꞌojal sata Komam Dios Jahawil, yuto isbꞌeybꞌalnhe yaꞌ istxꞌojal hakaꞌ iswatxꞌe ismam, yijbꞌanpaxo yaꞌ konhobꞌ Israel iswatxꞌen istxꞌojal. 27 Yajaꞌ yako yaꞌ Baasa, iskꞌahol yaꞌ Ahías howal yinh yaꞌ rey Nadab, ispotxꞌnikamo yaꞌ yaꞌ bꞌey konhobꞌ Gibetón, iskonhobꞌ ebꞌnaj filisteo, yuto haꞌ konhobꞌ Gibetón tuꞌ hoybꞌilayo yu yaꞌ rey Nadab yebꞌ yu sunil ebꞌnaj soldado Israel. Yaꞌ Baasa yikꞌal yaꞌ Isacar ye yaꞌ.
28 Hayet oxebꞌxa habꞌil yok yaꞌ Asa, isreyalo Judá, ispotxꞌnikamo yaꞌ Baasa yaꞌ rey Nadab, yok yaꞌ isreyalo Israel, selelo yaꞌ. 29 Hayebꞌixto tzꞌayik yok yaꞌ Baasa isreyalo Israel tuꞌ ispotxꞌnikamo yaꞌ sunil yuninal yaꞌ Jeroboam. Machi hunu yuninal yaꞌ Jeroboam tuꞌ kankanoj, wal xin sunil istanhtzelo yaꞌ, yu yijni isbꞌa hakaꞌ yu yalni yaꞌ Ahías, silonita, ischejabꞌ Komam Dios. 30 Haꞌ isyaꞌtajil tuꞌ hul yu ismul yaꞌ rey Jeroboam, yebꞌ yu yijbꞌa yaꞌ konhobꞌ Israel yaniko ismul, yaqꞌnitij yaꞌ ishowal Komam Dios Jahawil, isDiosal Israel.
31 Haꞌ hunteqꞌanxa tzet yu yaꞌ rey Nadab yebꞌ sunil tzet iswatxꞌe yaꞌ, tzꞌibꞌnhebꞌil yul hum chitzotel yinh ebꞌyaꞌ rey Israel.
32 Sunilbꞌal tiempo yet ayko yaꞌ Asa isreyalo Judá, yebꞌ xin ayko yaꞌ Baasa isreyalo Israel, yaleko howal yinh hunun.
Ok yaꞌ Baasa isreyalo Israel
33 Ayxako yox habꞌil yok yaꞌ Asa isreyalo Judá, yet yok yaꞌ Baasa, iskꞌahol naj Ahías, reyal yinh sunil Israel bꞌey konhobꞌ Tirsa. Yulbꞌal 24 (kanhebꞌ iskawinaj) habꞌil ok yaꞌ isreyalo Israel. 34 Yajaꞌ yaꞌ Baasa tuꞌ, haꞌ istxꞌojal iswatxꞌe yaꞌ sata Komam Dios Jahawil, isbꞌeybꞌalnhe yaꞌ istxꞌojal iswatxꞌe yaꞌ Jeroboam, yet yok yaꞌ yijbꞌan ebꞌnaj Israel yanoko ismul yul sat Komam Dios.