ISKABꞌ HUM SAMUEL
1. YET YICHIKO YAꞌ DAVID YAQꞌNI YAHAWIL YINH EBꞌNAJ ISRAEL, YU YIP KOMAM
(1:1–8:18)
Yabꞌelo yaꞌ David tato kam yaꞌ rey Saúl
1
Haxa yet kam yaꞌ rey Saúl, lahwi isqꞌoji yaꞌ David yinh howal yinh ebꞌnaj amalecita, ismeltzo yaꞌ bꞌey konhobꞌ Siclag, iskankano yaꞌ kabꞌ tzꞌayik bꞌey tuꞌ.a 2 Yajaꞌ haxa yinh yox tzꞌayik xin, yapni huneꞌ naj tzeh iskꞌatanh yaꞌ David, ispeto naj bꞌey iscampamento yaꞌ rey Saúl; istzilto naj xil isqꞌap, yanahto naj txꞌotxꞌ xol xil iswiꞌ yu bꞌiskꞌulal. Hayet yapni naj iskꞌatanh yaꞌ David tuꞌ yay jahno naj, yay xulno naj sat txꞌotxꞌ, yuto kaw ay yelapno yaꞌ David yul sat naj.3 Isqꞌambꞌen yaꞌ David tet naj:
—¿Bꞌaytuꞌwal makaw hatitikoj? xhi yaꞌ. Istaqꞌwi naj:
—Inpetohan bꞌey iscampamento ebꞌnaj Israel, xhi naj.
4 Isqꞌambꞌenpaxo yaꞌ David tuꞌ:
—¿Hanikꞌ yeko howal? Chinqꞌanan tawet ta chawalilo wetan, xhi yaꞌ.
Istaqꞌwi naj hakaꞌ tiꞌ:
—Tanhilo ebꞌnaj Israel yu ebꞌnaj filisteo, ay ebꞌnaj elkanh, aypaxo ebꞌnaj kami, iskampaxo yaꞌ rey Saúl yebꞌ iskꞌahol Jonatán, xhi naj.
5 Isqꞌambꞌenpaxo yaꞌ David tet naj tzeh tuꞌ:
—¿Tzet xin yu hawohtanheniloj ta kam yaꞌ Saúl yebꞌ yaꞌ Jonatán? xhi yaꞌ.
6 Istaqꞌwi naj tzeh, halni huneꞌ tuꞌ hakaꞌ tiꞌ:
—Kꞌuxan lanhan wekꞌan bꞌey witz Gilboa, wilnihan yaꞌ Saúl, pajanayo yaꞌ yibꞌanh yespada, lanhan xin istzujcha yaꞌ yu ebꞌnaj filisteo ayahto yul iscarruaje yebꞌpaxo ebꞌnaj ayahto yibꞌanh ischeh. 7 Haxa yet istꞌanhxiti yaꞌ yintaj, kinyilnihan yaꞌ, kinyawtentojan yaꞌ iskꞌatanh, intaqꞌwihan tet yaꞌ: “¿Tzet chawal mamin?” kinchihan. 8 Isqꞌambꞌen yaꞌ wetan hakaꞌ tiꞌ: “¿Makach anmahil?” xhi yaꞌ. Intaqꞌwihan tet yaꞌ xin: “Amalecita hinan,” kinchihan. 9 Yalni yaꞌ wetan hakaꞌ tiꞌ: “Kaw chinqꞌanan tawet tato chachhitziko inkꞌatanhan, kat kinhapotxꞌnikamojan yinh hunelnhe, yuto itzitz intohan, kaw xin yaꞌ chuko bꞌiskꞌulal yinh wanmahan,” xhi yaꞌ wetan. 10 Hak tuꞌ yu inhitzikojan iskꞌatanh yaꞌ, inpotxꞌnikamojan yaꞌ, yuto intxuman tato matxa chihul iskꞌul yaꞌ, winilojan iscorona yaꞌ yinh iswiꞌ, winipaxilojan chꞌen brazalete ayko yinh isqꞌabꞌ yaꞌ, witijan chꞌen tawet mamin, xhi naj.
11 Hayet yabꞌen yaꞌ David huneꞌ tuꞌ, istzilnilo yaꞌ xil isqꞌap, haktikꞌapax tuꞌ yute ebꞌnaj soldado tzujan yinta yaꞌ. 12 Yok ebꞌnaj oqꞌo yu bꞌiskꞌulal yu iskamikal yaꞌ Saúl yebꞌ iskꞌahol Jonatán, yebꞌ yu ebꞌnaj soldado Israel, iskonhobꞌ Komam Jahawil yuto potxꞌlaxkamo ebꞌnaj yu espada. Matxa xin waꞌ ebꞌnaj yu bꞌiskꞌulal masanto yet qꞌejbꞌiyalil yinh huneꞌ tzꞌayik tuꞌ. 13 Tzujan tuꞌ isqꞌambꞌen yaꞌ David tet naj tzeh bꞌey halno tet yaꞌ yinh iskamikal yaꞌ Saúl tuꞌ:
—¿Tzet konhobꞌal hach? xhi yaꞌ. Istaqꞌwi naj:
—Hanintiꞌan iskꞌahol huneꞌ naj amalecita ay texol hex Israel hex tiꞌ, xhi naj.
14 Yalni yaꞌ David tet naj:
—¿Tzet yinh xin machi kaxhxiw islow haqꞌabꞌ yinh yaꞌ sikꞌbꞌiliko yu Komam Jahawil, yaꞌ ayko isreyalo konhobꞌ Israel? xhi yaꞌ.b
15 Hak tuꞌ xin yu yawtenti yaꞌ David huneꞌ issoldado, yalni yaꞌ tet naj:
—Potxꞌkamo huneꞌ naj tiꞌ, xhi yaꞌ.
Ispotxꞌnikamo naj soldado huneꞌ naj tzeh tuꞌ. 16 Hayet lanhan ispotxꞌlaxkamo naj, yalni yaꞌ David hakaꞌ tiꞌ:
—Tawibꞌanh chitokano hamul tiꞌ, yuto hach kaw hach maxawal yu hatiꞌ tato hach hapotxꞌkamo yaꞌ rey sikꞌbꞌiliko yu Komam Jahawil, xhi yaꞌ.
Isbꞌit yaꞌ David yet bꞌiskꞌulal chinaniti yaꞌ Saúl yebꞌ yaꞌ Jonatán
17 Isbꞌitnhen yaꞌ David huneꞌ bꞌit yet bꞌiskꞌulal yu iskamikal yaꞌ Saúl yebꞌ yaꞌ Jonatán, iskꞌahol yaꞌ Saúl. 18 Ischejnikano yaꞌ tato yilal iskuylax ebꞌnaj ah Judá yinh huneꞌ bꞌit tuꞌ, hakaꞌ yu istzꞌibꞌnhelaxkano yul teꞌ hum yet Jaser, bꞌay chal hakaꞌ tiꞌ:
19 «¡Matanhkanilo yip isqꞌaqꞌal komay hanhonh Israelonh tiꞌ bꞌey witz Gilboa!
¡Maꞌaykꞌay ebꞌnaj winaj kaw ay yelapno koxol!
20 Mach cheyalilo huneꞌ tuꞌ bꞌey konhobꞌ Gat.
Mach cheyalpaxikꞌo bꞌey yulaj txonhbꞌal bꞌey Ascalón,
haxinwal mach chitzala ebꞌix iskutzꞌin ebꞌnaj filisteo yet chiyabꞌen ebꞌix,
yebꞌ yunhe machi ah tꞌujla ebꞌix iskutzꞌin ebꞌnaj machi circuncisión yinh yu tzalahilal.
21 Haꞌ witz Gilboa matxahojabꞌ chiꞌay yal chew yebꞌ haꞌ nhabꞌ yibꞌanh.
Matxahojabꞌ chichꞌibꞌ ixim trigo chiꞌaqꞌlax yebꞌalqꞌabꞌehoj,
yuto haꞌ tuꞌ xanhlaxikꞌo yescudo ebꞌnaj winaj kaw ay yelapnoj.
Haꞌ tuꞌ xanhlaxikꞌo yescudo yaꞌ rey Saúl, hakaꞌto machi alaxayo aceite yibꞌanh iswiꞌ yaꞌ yet yok yaꞌ reyal.
22 Machi hunelo tiꞌ meltzo yaꞌ rey Saúl yebꞌ yaꞌ Jonatán yinh howal ta mach isbꞌak yebꞌ yespada,
yebꞌ islanza yu ischikꞌil,
yebꞌ yu ismantecahil isnimanil ebꞌnaj winaj kaw ay yelapnoj.
23 Hach Saúl yebꞌ hach Jonatán kaw ochebꞌil hex,
hex kaw xahan ay wuhan, huneꞌnhe heyehi yet itzitz hex, huneꞌnhe yu hekampaxoj,
ekꞌbꞌal heyekꞌ yinh anhe sata noꞌ tꞌiw, ekꞌbꞌal heyip sata noꞌ bꞌalam.
24 Hex ix ah Israel, oqꞌanhwe yinh yaꞌ Saúl, yaꞌ aniko xil heqꞌap,
qꞌap kaj kajmutzꞌmunhe, yebꞌ qꞌap lino kaw kꞌul, yaniko yaꞌ chꞌen oro yelawilo xil heqꞌap.
25 ¡Tzimi yu yaykꞌay ebꞌyaꞌ kaw ay yelapnoj yinh howal!
¡Ismaqꞌlaxkamo yaꞌ Jonatán iswiꞌ witz nahat yekanh!
26 Jonatán, hach tiꞌ hakaꞌ wuxhtajan hawehi, kaw chitzꞌay inkꞌulan tawinh.
Ekꞌbꞌal wochehan iskꞌulal hakꞌul sata iskꞌulal iskꞌul hunu ix ix.
27 ¡Tzimi yinh xin tanhilo ebꞌnaj winaj kaw ay yelapnoj,
yetaxkanto ismunlabꞌal ebꞌnaj yet howal!» xhi yaꞌ David.