Yet yaqꞌlax kamo yaꞌ rey Saúl yebꞌ ebꞌnaj iskꞌahol
31
Yaniko ebꞌnaj filisteo howal yinh ebꞌnaj Israel, yelkanh ebꞌnaj tet ebꞌnaj, kaw xin niman ebꞌnaj Israel tuꞌ kam yu ebꞌnaj bꞌey witz Gilboa. 2 Yok tzujno ebꞌnaj yinta yaꞌ rey Saúl yebꞌ yinta ebꞌnaj iskꞌahol yaꞌ, ispotxꞌnikamo ebꞌnaj yaꞌ Jonatán, naj Abinadab yebꞌ naj Malquisúa, haꞌ ebꞌnaj oxwanh tiꞌ iskꞌahol yaꞌ rey Saúl. 3 Yiqꞌnikanh yip huneꞌ howal tuꞌ yinh yaꞌ rey Saúl, istzabꞌcha yaꞌ Saúl yu islitꞌ ebꞌnaj filisteo, hak tuꞌ xin yu yok huneꞌ niman xiwkilal yinh yaꞌ. 4 Yuxin yal yaꞌ Saúl tet naj soldado chitanhen hakaꞌ tiꞌ:«Ihti hawespada, kat hachꞌenikto chꞌen yul inkꞌulan, yuto mach isje inkꞌulan tato chinetalaxan yu hunteqꞌan ebꞌnaj mach circuncidadohoj, lahwi tuꞌ kat kinispotxꞌnikamojan ebꞌnaj,» xhi yaꞌ.
Yajaꞌ xin mach isje naj soldado tuꞌ ispotxꞌoꞌ yaꞌ rey Saúl yuto chixiw naj, yuxin yihti yaꞌ rey Saúl yespada tuꞌ, istoqꞌbꞌankanh yaꞌ chꞌen, yanayo isbꞌa yaꞌ yibꞌanh chꞌen. 5 Hayet yilni naj chitanhen yaꞌ rey Saúl huneꞌ tuꞌ, yinipaxahti naj yespada, yay pajno naj yibꞌanh chꞌen, iskam naj yinta yaꞌ rey Saúl. 6 Hak tuꞌ yu iskam yaꞌ rey Saúl yinh huneꞌ tzꞌayik tuꞌ, iskampaxo oxwanh iskꞌahol yaꞌ yebꞌ naj soldado chitanheni, iskampaxo sunil issoldado yaꞌ rey Saúl tuꞌ. 7 Hayet yabꞌen ebꞌnaj Israel ay bꞌey isqꞌaxebꞌikꞌto akꞌal Jezreel yebꞌ ebꞌnaj ay isqꞌaxebꞌikꞌto haꞌ Jordán tato elkanh ebꞌnaj yet Israel tet ebꞌnaj filisteo, yebꞌ ta ispotxꞌ ebꞌnaj yaꞌ rey Saúl, yebꞌ ebꞌnaj iskꞌahol yaꞌ, isbꞌejnikano ebꞌnaj iskonhobꞌ tuꞌ yelkanh ebꞌnaj. Lahwi tuꞌ yapni ebꞌnaj filisteo, yok ebꞌnaj yul ej iskonhobꞌ ebꞌnaj Israel yehayo ebꞌnaj bꞌey tuꞌ.
8 Haxa yinh hunxa tzꞌayik yet isto ebꞌnaj filisteo yinolo tzet ay ebꞌnaj Israel ispotxꞌkamo tuꞌ, yilchati isnimanil yaꞌ rey Saúl yebꞌ iskꞌahol yaꞌ yu ebꞌnaj bꞌey iswiꞌ witz Gilboa. 9 Yinilto ebꞌnaj iswiꞌ yaꞌ rey Saúl, yinipaxilo ebꞌnaj ischꞌen yaꞌ yet howal. Ischejnito ebꞌnaj filisteo ischejabꞌ yalno huneꞌ tuꞌ sunil yul ismajul ebꞌnaj filisteo yebꞌ bꞌey yatut istioxh ebꞌnaj. 10 Yanikto ebꞌnaj yespada yaꞌ rey Saúl yul yatut istioxh, chiyij Astarot, istꞌunhbꞌankanh ebꞌnaj isnimanil yaꞌ Saúl sat iskꞌubꞌal konhobꞌ Bet-sán.
11 Haxa yet yabꞌenilo ebꞌnaj Jabes-galaad yinh tzet utelax yaꞌ rey Saúl yu ebꞌnaj filisteo tuꞌ, 12 yahwano ebꞌnaj winaj kaw ay yip yanma, isto ebꞌnaj yinh huneꞌ aqꞌbꞌal tuꞌ, yinayti ebꞌnaj isnimanil yaꞌ rey Saúl yebꞌ isnimanil ebꞌnaj iskꞌahol yaꞌ yinh sat chꞌen iskꞌubꞌal Bet-sán, ismeltzo ebꞌnaj bꞌey Jabes, isnhusnito ebꞌnaj isnimanil ebꞌnaj. 13 Lahwi tuꞌ, yinikanh ebꞌnaj isbꞌajil isnimanil yaꞌ Saúl yebꞌ ebꞌnaj iskꞌahol, ismujni ebꞌnaj yich huneꞌ teꞌ qꞌebꞌtaj bꞌey Jabes; hujebꞌ tzꞌayik machi waꞌ ebꞌnaj yinh bꞌiskꞌulal yu iskamikal yaꞌ rey Saúl yebꞌ ebꞌnaj iskꞌahol yaꞌ.