RUT
1. YET ISTO NAJ ELIMELEC YEBꞌ YIXAL YEBꞌ ISKꞌAHOL BꞌEY MOAB
(1:1-5)
Ix Rut yebꞌ ix Noemí
1
Haꞌ yinh hunteqꞌan tzꞌayik yet ayko ebꞌnaj juez yahawilo konhobꞌ Israel, yul huneꞌ wahil bꞌey txꞌotxꞌ Israel. Ay xin huneꞌ naj ay bꞌey konhobꞌ Belén, ayko yul ismajul txꞌotxꞌ Judá to bꞌey txꞌotxꞌ Moab yu huneꞌ wahilal tuꞌ, yinito naj yixal yebꞌ kawanh iskꞌahol. 2 Naj tiꞌ Elimelec isbꞌi naj, haxa yixal naj xin Noemí isbꞌi ix. Haxa kawanh iskꞌahol naj, huneꞌ naj Mahlón isbꞌi, hunxa naj xin Quelión isbꞌi. Ebꞌnaj tuꞌ efrateo ebꞌnaj, chal yelapnoj ah Belén.aHak tuꞌ xin yu yapni ebꞌnaj bꞌey txꞌotxꞌ Moab, iskankano ebꞌnaj bꞌey tuꞌ.b
3 Yajaꞌ xin kam naj Elimelec, yichamil ix Noemí bꞌey tuꞌ, iskankano ix ischukil yebꞌ kawanh yunin. 4 Tzujanilxa xin yiqꞌni yixal ebꞌnaj kawanh yunin ix Noemí xol ebꞌix moabita. Huneꞌ ix Orfa isbꞌi, hunxa ix Rut isbꞌi. Lahonhebꞌ xin habꞌil ehayo ix Noemí yebꞌ yunin bꞌey tuꞌ, 5 iskam ebꞌnaj kawanh yunin ix, naj Mahlón yebꞌ naj Quelión. Hak tuꞌ yu iskankano ix Noemí ischukil, matxa yunin ix, matxapaxo yichamil.
2. YET ISMELTZO IX NOEMÍ YEBꞌ IX RUT BꞌEY BELÉN
(1:6-22)
6 Yabꞌenilo ix Noemí bꞌey Moab tato matxa wahil bꞌey Israel, yuto tzꞌay iskꞌul Komam Jahawil yinh konhobꞌ Israel. 7 Hak tuꞌ yu yel ix Noemí bꞌey txꞌotxꞌ Moab bꞌaytikꞌa aya, istopaxo kawanh yalibꞌ ix yintaj. Hak tuꞌ xin yu istit ebꞌix yinh isbꞌel bꞌey txꞌotxꞌ Judá. 8 Haxa yet ayko ebꞌix yinh isbꞌel tuꞌ, yalni ix Noemí tet ebꞌix:
—Meltzanhweto bꞌey heyatut iskꞌatanh hemiꞌ, kꞌulchꞌanojabꞌ chiyute iskꞌul Komam Dios teyinh, hakaꞌ heyute hekꞌul winhan yebꞌ yinh ebꞌnaj wuninan xakami. 9 Haꞌojabꞌ Komam Jahawil chiꞌok heyetbꞌihoj, chiyaqꞌni hunxa heyichamil kat heye yinh aqꞌankꞌulal yul yatut ebꞌnaj, xhi ix.
Lahwi tuꞌ, istzꞌohni ix isqꞌotx ebꞌix yu istaqꞌlikano ix tet ebꞌix, yajaꞌ xin yako yip yul isnuqꞌ ebꞌix yoqꞌi. 10 Yalni ebꞌix hakaꞌ tiꞌ:
—Machoj, matxa chonhmeltzohanh, wal xin chonhtohanh tawinta yul hakonhobꞌ tuꞌ, xhi ebꞌix.
11 Yokpaxo ix Noemí tuꞌ yalno tet ebꞌix:
—Hex walibꞌ, meltzanhweto heyatut, ¿tzettokꞌanabꞌ yinh yuxin chexoktzujno wintajan? Hanintiꞌan matxa wuninan chipitzkꞌahi bꞌay wal hemohyi. 12 Meltzanhweto heyatut, yuto wal hinan tiꞌ ixnamxa nan, matxa chiwiqꞌan wichamilan, waxanhka xin chiwiqꞌan wichamilan, kat inmohyihan yinh huneꞌ aqꞌbꞌal tiꞌ, kat ispitzkꞌa wuninan; 13 ¿tom xin niman hekꞌul heyechman ischꞌibꞌi? ¿Tom yu heyechmani yuxin mach cheyiqꞌ heyichamil? Hex walibꞌ, mach kꞌulo hakaꞌ tuꞌ. Hanintiꞌan kaw xawilan isyaꞌtajil yu Komam Jahawil, yajaꞌ ta chiwilan heyetan heyanma, ip yahkanokanh inbꞌiskꞌulalan heyu, xhi ix.
14 Hayet yabꞌen ebꞌix hakaꞌ tuꞌ, yanipaxiko yul isnuqꞌ ebꞌix yoqꞌi. Yajaꞌ wal ix Orfa istzꞌoh ix isqꞌotx ix yalibꞌ tuꞌ, ispaxto ix yatut, wal ix Rut xin, kankano ix iskꞌatanh ix Noemí.
15 Yalni ix Noemí tuꞌ tet ix Rut hunelxa:
—Ilkꞌanabꞌi, lanhan ispaxto ix yixal yuxhta hawichamil bꞌey iskonhobꞌ yebꞌ bꞌay ay isdiosal, asiꞌ yinta ix, xhi ix.
16 Yajaꞌ taqꞌwi ix Rut hakaꞌ tiꞌ:
—Mach chalahiko hawalni wetan ta chaxhinbꞌejkanojan yebꞌ ta chikopoh kobꞌa.
Wal xin haꞌ bꞌay chaxhtohi, haꞌ tuꞌ chintohan; bꞌay chaxhehi,
bꞌey tuꞌ chinehan; hakonhobꞌ, haꞌ chiꞌok inkonhobꞌojan; haDiosal, haꞌ chiꞌokpaxo inDiosalojan;
17 haꞌ bꞌay chaxhkami, haꞌ tuꞌ chinkaman, kat inmujlaxpaxojan. Tato chaxhinbꞌejkanojan,
kꞌul ta chitit isyaꞌtajil wibꞌanhan yu Komam Jahawil, wal xin hanhehojabꞌ naj kamikal chipohni koxol, xhi ix.
18 Hayet yilni ix Noemí tato kaw hinan ix Rut tuꞌ isto yinta ix, matxa tzet yal ix.
19 Lahwi tuꞌ xin isto ebꞌix yinh isbꞌel masanta apni ebꞌix bꞌey konhobꞌ Belén. Kaw kꞌayilo iskꞌul sunil anma ay yul konhobꞌ tuꞌ yilni ebꞌix. Yalni ebꞌix ix ay bꞌey tuꞌ hakaꞌ tiꞌ:
—¿Kochnhe haꞌ ix tiꞌ ix Noemí? xhi ebꞌix.
20 Istaqꞌwi ix Noemí tet ebꞌix:
—Matxa cheyal Noemí winhan, wal xin Mara cheyal winhan, yuto Komam Jahawil, kaw aykano yip, kaw txꞌiꞌal isyaꞌtajil yayo wibꞌanhan.c
21 Hayet welan bꞌey tiꞌ ayayo isyaxil Komam wibꞌanhan, haxa yet inmeltzohan xin,
matxa tzet ay yul inqꞌabꞌan yuto hak tuꞌ el yinh iskꞌul Komam Dios, Jahawil.
¿Tzet yinh yuxin chito heyal Noemí inbꞌihojan? Yuto xayaqꞌ Komam Dios,
Komam kaw aykano yip, isyaꞌtajil wibꞌanhan, xhi ix.
22 Hak tuꞌ yu yel ix Noemí yebꞌ ix Rut sat txꞌotxꞌ Moab, ismeltzo ebꞌix bꞌey konhobꞌ Belén. Hayet yapni ebꞌix bꞌey Belén tuꞌ, lanhan yichiko iskꞌuplaxkanh ixim cebada.