2 Istaqꞌwi Komam, yalni tato haꞌ ebꞌnaj Judá chiꞌaniko howal bꞌabꞌelal, yebꞌ tato chaqꞌ Komam istxꞌotxꞌ ebꞌnaj cananeo tet ebꞌnaj.

3 Yawten ebꞌnaj Judá, ebꞌnaj titna yinh yaꞌ Simeón, yalni hakaꞌ tiꞌ:

«Ahanhweto jintajanh yu janiko howal yinh ebꞌnaj cananeo yuto haꞌ txꞌotxꞌ bꞌay ay ebꞌnaj tuꞌ, aqꞌbꞌilxa jetanh yu Komam, lahwi tuꞌ xin kat kotopaxojanh kolwal teyintaj yet chexto heyinolo txꞌotxꞌ aqꞌbꞌilxa teyet yu Komam,» xhi ebꞌnaj Judá.

4 Hak tuꞌ xin yu isto ebꞌnaj, isqꞌoji ebꞌnaj yinh howal yinh ebꞌnaj cananeo yebꞌ yinh ebꞌnaj ferezeo, yuto haꞌ Komam Dios Jahawil aniko ebꞌnaj yul isqꞌabꞌ ebꞌnaj. 10 (lahonhebꞌ) mil ebꞌnaj soldado aykꞌay yu ebꞌnaj bꞌey txꞌotxꞌ Bezec. 5 Haꞌ hunpaxo xin naj Adoni-bezec, isreyal txꞌotxꞌ Bezec ok islahwilal yu ebꞌnaj xol ebꞌnaj cananeo yebꞌ ebꞌnaj ferezeo tuꞌ. 6 Waxanhka xin elkanh naj Adoni-bezec, yaj ok tzujno ebꞌnaj Israel yinta naj, istzabꞌcha naj yu ebꞌnaj. Istzokꞌnilto ebꞌnaj ismiꞌehal yiximal isqꞌabꞌ naj yebꞌ ismiꞌehal yiximal yoj naj.^a 7 Yalni naj Adoni-bezec hakaꞌ tiꞌ:

«Hayet yalanhtokanoj, intzokꞌiltojan ismiꞌehal yiximal isqꞌabꞌ yebꞌ ismiꞌehal yiximal yoj 70 (lahonhebꞌ iskanhwinaj) ebꞌnaj rey, chixin issikꞌkanh ebꞌnaj isqꞌal intiꞌan chiꞌaykꞌay yalanh mexha; yajaꞌ tinanh, lahan chinyutehan Komam Dios hakaꞌ wutehan ebꞌnaj tuꞌ,» xhi naj.

Yinito ebꞌnaj naj Adoni-bezec bꞌey Jerusalén, haꞌ bꞌey tuꞌ xin kam naj.

8 Ebꞌnaj Judá yako ebꞌnaj howal yinh konhobꞌ Jerusalén, yaykꞌay yul isqꞌabꞌ ebꞌnaj. Ispotxꞌnikamo ebꞌnaj sunil anma yu espada, isnhusnikanto ebꞌnaj konhobꞌ tuꞌ.

9 Lahwi tuꞌ istopaxo ebꞌnaj yanoko howal yinh ebꞌnaj cananeo ay bꞌey chewal txꞌotxꞌ, yebꞌ ebꞌnaj ay yul ismajul Neguev, yebꞌ ebꞌnaj ay ej yulaj akꞌal. 10 Istopaxo ebꞌnaj yanoko howal yinh ebꞌnaj cananeo ay yul konhobꞌ Hebrón, huneꞌ konhobꞌ chihal-lax Quiriat-arba yet yalanhtokanoj, yaqꞌnikamo ebꞌnaj naj Sesai, yebꞌ naj Ahimán yebꞌ naj Talmai.

11 Lahwi tuꞌ xin, yanipaxiko ebꞌnaj howal yinh konhobꞌ Debir, huneꞌ konhobꞌ chihal-lax Quiriat-sefer yet yalanhtokanoj. 12 Yalni yaꞌ Caleb:

«Haꞌ mak chiꞌaniko howal yinh konhobꞌ Quiriat-sefer kat yaqꞌni aykꞌayoj, chiwaqꞌan inkutzꞌinan, ix Acsa yixaloj,» xhi yaꞌ.

13 Haꞌ xin yaꞌ qꞌoji yinh konhobꞌ tuꞌ, haꞌ ton yaꞌ Otoniel, iskꞌahol naj Cenaz. Naj Cenaz tuꞌ, yuxhta isbꞌa naj yebꞌ yaꞌ Caleb, tzujan unin naj. Hak tuꞌ xin yu yaqꞌni yaꞌ Caleb iskutzꞌin Acsa yixalo yaꞌ Otoniel. 14 Hayet lanhan isto ix yebꞌ yaꞌ, yalni yaꞌ tet ix tato chisqꞌan ix istxꞌotxꞌ tet ismam. Hayet yayti ix yibꞌanh noꞌ burro bꞌay ayahtoj, isqꞌambꞌen yaꞌ Caleb tuꞌ tet ix:

—¿Tzet hawehi? xhi yaꞌ.

15 Istaqꞌwi ix:

—Ay tzet chiwochehan chawaqꞌ wetan. Xahawaqꞌ intxꞌotxꞌan bꞌey Neguev, yaj chiwochehan chawaqꞌpaxo intxꞌotxꞌan bꞌay ay isnuqꞌ ha haꞌ, xhi ix.

Hak tuꞌ xin yu yaqꞌni yaꞌ Caleb huneꞌxa istxꞌotxꞌ ix bꞌay ay isnuqꞌ ha haꞌ iswiꞌlaj, yebꞌ xin huneꞌxa istxꞌotxꞌ bꞌay ay isnuqꞌ ha haꞌ yichlaj.

16 Haꞌ ebꞌnaj titna yinh naj Ceneo, naj ismam yixal yaꞌ Moisés, el ebꞌnaj yul konhobꞌ chihal-lax Palmera yebꞌ ebꞌnaj titna yinh yaꞌ Judá, isto ebꞌnaj bꞌey txꞌotxꞌ desierto yul ismajul txꞌotxꞌ Judá bꞌey Neguev, bꞌey iskawilal Arad, yehayo ebꞌnaj xol anma ay bꞌey tuꞌ.

17 Ebꞌnaj Judá tuꞌ, to ebꞌnaj kolwal yinta ebꞌnaj Simeón, yaniko ebꞌnaj howal yinh ebꞌnaj cananeo ay bꞌey Sefat, istanhtzenkanilo ebꞌnaj konhobꞌ tuꞌ yinh hunelnhe, yuxin Horma yako ebꞌnaj isbꞌiho huneꞌ konhobꞌ tuꞌ isselelo Sefat.^b 18 Isqꞌojipaxo ebꞌnaj Judá tuꞌ yinh konhobꞌ Gaza, yebꞌ yinh konhobꞌ Ascalón, yebꞌ yinh konhobꞌ Ecrón, yebꞌ yinh sunil ishoyanil hunteqꞌan konhobꞌ tuꞌ.

19 Komam Dios kolwa yinh ebꞌnaj Judá isqꞌoji ebꞌnaj yinh hunteqꞌan anma ay bꞌey chewal txꞌotxꞌ. Yajaꞌ mach yinilo ebꞌnaj anma ayayo sat akꞌal yuto hunteqꞌan anma tuꞌ ay iscarruaje yet howal, nabꞌa chꞌennhe. 20 Haꞌ tet yaꞌ Caleb aqꞌlax konhobꞌ Hebrón, hakaꞌtikꞌa yu yalnikano yaꞌ Moisés. Haꞌ xin yaꞌ Caleb tuꞌ inilo sunil ebꞌnaj titna yinh oxwanh iskꞌahol naj Anac. 21 Haxapaxo ebꞌnaj Benjamín, machi yu yinilo ebꞌnaj ebꞌnaj jebuseo ay bꞌey Jerusalén, yuxin ebꞌnaj Benjamín tuꞌ, xol ebꞌnaj jebuseo ay ebꞌnaj bꞌey Jerusalén masanto tinanh.

22 Wal ebꞌnaj José, ahto ebꞌnaj yaqꞌaꞌko howal yinh konhobꞌ Bet-el. Haꞌ xin Komam Dios ayko yetbꞌiho ebꞌnaj. 23 Haꞌ ebꞌnaj José tuꞌ ischejto ebꞌnaj il-laxo konhobꞌ Bet-el; huneꞌ konhobꞌ chiyij Luz yet yalanhtokanoj. 24 Ebꞌnaj to ilno konhobꞌ tuꞌ, yil ebꞌyaꞌ yelti huneꞌ naj yul konhobꞌ, yalni ebꞌnaj tet naj:

«Tato chayelo jetanh yinh tzet chu joktojanh yul konhobꞌ tiꞌ, yinh hakaꞌ tuꞌ chitzꞌayo kokꞌulanh tawinh,» xhi ebꞌnaj tet naj.

25 Isyeni naj bꞌaytuꞌwal chu yokto ebꞌnaj yul konhobꞌ. Hak tuꞌ xin yu ispotxꞌnikamo ebꞌnaj sunil anma ay yul konhobꞌ, yajaꞌ wal naj yewa tet ebꞌnaj, yaqꞌ nimankꞌulal ebꞌnaj yinh naj yebꞌ yinh sunil mak ay yul yatut naj. 26 Wal huneꞌ naj tuꞌ to naj sat istxꞌotxꞌ ebꞌnaj heteo, iswatxꞌenkanh naj huneꞌ konhobꞌ bꞌey tuꞌ, yaniko naj Sajilqꞌinal isbꞌihoj; hak tuꞌ xin isbꞌi tinanh.

27 Ebꞌnaj Israel titna yinh yaꞌ Manasés, mach yu istzumbꞌenilo ebꞌnaj ebꞌnaj cananeo ay bꞌey konhobꞌ Bet-seán, bꞌey konhobꞌ Taanac, bꞌey konhobꞌ Dor, bꞌey konhobꞌ Ibleam yebꞌ bꞌey konhobꞌ Meguido, yebꞌ yulajla yaldeahil hunteqꞌan konhobꞌ tuꞌ. Hak tuꞌ xin yu iskankano ebꞌnaj cananeo yul hunteqꞌan konhobꞌ tuꞌ. 28 Haxa yet yiqꞌnikanh yip ebꞌnaj Israel tuꞌ, yaniko ebꞌnaj ebꞌnaj cananeo yinh munil kaw yaꞌtaj, yaj mach yu istzumbꞌenilo ebꞌnaj ebꞌnaj.

29 Hakpax tuꞌ ebꞌnaj Efraín, mach yilo ebꞌnaj ebꞌnaj cananeo ay bꞌey konhobꞌ Gezer, yuxin kankano ebꞌnaj xol ebꞌnaj tuꞌ.

30 Ebꞌnaj Zabulón machi yu yinilo ebꞌnaj ebꞌnaj cananeo ay bꞌey konhobꞌ Quitrón yebꞌ bꞌey konhobꞌ Naalal. Hak tuꞌ yu iskankano ebꞌnaj cananeo tuꞌ xol ebꞌnaj, yajaꞌ xin yako ebꞌnaj Zabulón ebꞌnaj tuꞌ yinh munil kaw yaꞌtaj. 31 Hakpax tuꞌ ebꞌnaj Aser, mach yu yinilo ebꞌnaj ebꞌnaj cananeo ay bꞌey konhobꞌ Aco, bꞌey konhobꞌ Sidón, bꞌey konhobꞌ Ahlab, bꞌey konhobꞌ Aczib, bꞌey konhobꞌ Helba, bꞌey konhobꞌ Afec yebꞌ bꞌey konhobꞌ Rehob. 32 Yehayo ebꞌnaj Aser xol ebꞌnaj cananeo ay bꞌey tuꞌ, yuto mach ilaxilo ebꞌnaj yu ebꞌnaj.

33 Hakpax tuꞌ ebꞌnaj Neftalí, mach yipaxilo ebꞌnaj ebꞌnaj cananeo ay bꞌey konhobꞌ Bet-semes, yebꞌ bꞌey konhobꞌ Bet-anat, wal xin yako ebꞌnaj Neftalí ebꞌnaj yinh munil kaw yaꞌtaj, yaj ehayo ebꞌnaj xol ebꞌnaj.

34 Wal ebꞌnaj amorreo, hata bꞌey chewal txꞌotxꞌ yakanto ebꞌnaj ebꞌnaj Dan, mach ischahko ebꞌnaj ebꞌnaj Dan sat akꞌal. 35 Hak tuꞌ yu iskankano ebꞌnaj amorreo ehoyo bꞌey witz Heres, yebꞌ bꞌey witz Ajalón, yebꞌ bꞌey witz Saalbim; yajaꞌ haxa yet yiqꞌnikanh yip ebꞌnaj Dan, yaniko ebꞌnaj ebꞌnaj amorreo yinh munil kaw yaꞌtaj.

36 Haꞌ ismohonal istxꞌotxꞌ ebꞌnaj amorreo, chꞌekꞌ yinh istzalanil witz Acrabim masanto chiꞌapni bꞌey witz Sela, chilahwi tuꞌ, kat yekꞌpaxo yibꞌanhahto istzalanil txꞌotxꞌ tuꞌ.