Istxꞌotxꞌ ebꞌnaj titna yinh yaꞌ Judá
15
Haꞌ txꞌo txꞌotxꞌ yiqꞌ huneꞌ majan ebꞌnaj Israel titna yinh yaꞌ Judá yinh suertehal, chiꞌapni txꞌotxꞌ yinh ismohonal txꞌotxꞌ Edom, haxa yinh yetkꞌulal sur chitaapni txꞌotxꞌ yinh txꞌotxꞌ desierto Zin.2 Haxa ismohonal txꞌotxꞌ yinh yetkꞌulal sur, chiꞌichiti yinh haꞌ Mar Kachi, 3 kat isto ismohonal txꞌotxꞌ yinh yetkꞌulal sur yinh isqꞌehanil Acrabim, kat isto yinh txꞌotxꞌ desierto Zin, kat yekꞌ yetkꞌulal sur yinh konhobꞌ Cades-barnea, kat yekꞌpaxo bꞌey konhobꞌ Hezrón, kat yahapno bꞌey konhobꞌ Adar, kat yekꞌ ishoyno konhobꞌ Carca. 4 Kat istopaxoj kat yapni yinh konhobꞌ Asmón, kat yelapno bꞌey ha haꞌ yul yet Egipto, kat yapnikano yinh haꞌ mar Mediterráneo, haꞌ tuꞌ ismohonal txꞌotxꞌ yinh yetkꞌulal sur. 5 Haxa ismohonal txꞌotxꞌ yinh yetkꞌulal bꞌay chiꞌahilo tzꞌayik chiꞌekꞌ yinh istiꞌ haꞌ Mar Kachi, masanta bꞌay chiꞌokapno haꞌ Jordán yul haꞌ mar tuꞌ. Haꞌ bꞌey tuꞌ, xin chiꞌichipaxti ismohonal txꞌotxꞌ yinh norte, 6 kat yahapno ismohonal txꞌotxꞌ tuꞌ yinh konhobꞌ Bet-hogla, kat yekꞌ yinh yetkꞌulal norte yinh konhobꞌ Bet-arabá, chiꞌel bꞌey tuꞌ kat yapni yich chꞌen chꞌen yet naj Bohán, iskꞌahol yaꞌ Rubén.
7 Lahwi tuꞌ xin, kat yahapno ismohonal txꞌotxꞌ tuꞌ yul akꞌal yet Acor, kat isto bꞌey Debir, kat ismeltzo bꞌey konhobꞌ Gilgal ayko satakꞌti istzalanil Adumín, yinh yetkꞌulal sur yinh huneꞌ haꞌ nichꞌan haꞌ, kat yekꞌto ismohonal txꞌotxꞌ bꞌey isnuqꞌ ha haꞌ En-semes, masanta chiꞌapni bꞌey isnuqꞌ ha haꞌ Rogel. 8 Lahwi tuꞌ, kat yekꞌ ismohonal txꞌotxꞌ bꞌey huneꞌ hokan yet iskꞌahol naj Hinom, yinh yetkꞌulal sur yinh witz Jebús, haꞌ ton konhobꞌ Jerusalén, kat yekꞌ yinh iswiꞌ huneꞌ witz ayayo yinh yetkꞌulal bꞌay chito tzꞌayik yinh hokan Hinom, yebꞌ yetkꞌulal norte yinh hokan Refaim; 9 kat ismeltzo ishoyni iswiꞌ witz tuꞌ masanta bꞌey isnuqꞌ haꞌ bꞌey Neftoa, kat yapni bꞌey hunteqꞌan konhobꞌ ayayo yich witz Efrón, kat istopaxo bꞌey konhobꞌ Baala chihal-laxpaxo Quiriat-jearim, 10 kat ismeltzo ismohonal yinh Baala tuꞌ yinh yetkꞌulal bꞌay chito tzꞌayik masanta bꞌey witz Seir, kat yekꞌpaxo bꞌey konhobꞌ Quesalón yinh yetkꞌulal norte yinh iskꞌul witz Jearim; lahwi tuꞌ kat yayilo bꞌey konhobꞌ Bet-semes, kat yekꞌ bꞌey konhobꞌ Timna. 11 Kat yahpaxo yinh iskꞌul witz yinh yetkꞌulal norte yinh konhobꞌ Ecrón, kat ishoyni konhobꞌ Sicrón, kat yekꞌpaxo bꞌey witz Baala, kat yelapno bꞌey konhobꞌ Jabneel, kat yapnikano yinh haꞌ Niman Mar.a 12 Haxa ismohonal txꞌotxꞌ tuꞌ yinh yetkꞌulal bꞌay chito tzꞌayik, haꞌ ton haꞌ niman Mar. Haꞌ tuꞌ ismohonal txꞌo txꞌotxꞌ aqꞌlax tet ebꞌnaj Israel titna yinh yaꞌ Judá, pohlaxkanh txꞌotxꞌ yinh ebꞌnaj mame yinh hunun nhahil anma.
Qꞌoji yaꞌ Caleb yinh konhobꞌ Hebrón yebꞌ yinh konhobꞌ Debir
13 Yaqꞌ yaꞌ Josué istxꞌotxꞌ yaꞌ Caleb, iskꞌahol yaꞌ Jefone yinh ismajul ebꞌnaj titna yinh yaꞌ Judá, hakaꞌtikꞌa yu yalni Komam Jahawil; yiqꞌ yaꞌ Caleb tuꞌ konhobꞌ Quiriat-arba, haꞌ ton konhobꞌ Hebrón. Haꞌ konhobꞌ Hebrón tuꞌ, haꞌ iskonhobꞌ naj Arba yet payat; naj Arba tuꞌ, haꞌ naj ismam naj Anac, naj kaw nimajal istel.b 14 Oxwanh xin ebꞌnaj iskꞌahol naj Anac tuꞌ istzumbꞌelo yaꞌ Caleb sat konhobꞌ Hebrón tuꞌ, haꞌ ton naj Sesai, naj Ahimán yebꞌ naj Talmai. 15 Lahwi tuꞌ, yahto yaꞌ Caleb yinh anma ay yul konhobꞌ Debir; haꞌ konhobꞌ Debir tuꞌ, Quiriat-sefer isbꞌi yet payat. 16 Yalni yaꞌ Caleb hakaꞌ tiꞌ: «Haꞌ mak chiꞌaniko howal yinh konhobꞌ tiꞌ, kat isqꞌoji yinh, chiwaqꞌan inkutzꞌinan, ix Acsa yixaloj,» xhi yaꞌ.
17 Haꞌ yaꞌ Otoniel iskꞌahol yuxhta yaꞌ Caleb, haꞌ ton naj Cenaz, aniko howal yinh konhobꞌ Debir; isqꞌoji yaꞌ yinh. Yu huneꞌ tuꞌ yuxin yako yaꞌ Caleb ix Acsa, iskutzꞌin, yixalo yaꞌ Otoniel.c 18 Hayet lanhan isto yaꞌ Otoniel yebꞌ yixal bꞌey yatut, yok yaꞌ yalno tet ix tato chisqꞌan ix istxꞌotxꞌ tet ismam yeto tzꞌunubꞌ. Yuxin ayti ix yibꞌanh noꞌ burro, isqꞌambꞌen ismam ix tet:
—¿Tzet chawoche? xhi yaꞌ Caleb.
19 Istaqꞌwi ix:
—Xahawaqꞌ intxꞌotxꞌan bꞌey txꞌotxꞌ Neguev,d yuxin chinqꞌanan ta chawaqꞌpaxo intxꞌotxꞌan bꞌay ay isnuqꞌ ha haꞌ, xhi ix.
Yu huneꞌ tuꞌ yuxin aqꞌlaxpaxo istxꞌotxꞌ ix yu ismam; txꞌotxꞌ bꞌay ay isnuqꞌ haꞌ iswiꞌlaj yebꞌ yichlaj.
Hunteqꞌan konhobꞌ yiqꞌ ebꞌnaj titna yinh yaꞌ Judá
20 Ischah ismajul ebꞌnaj titna yinh yaꞌ Judá, hunun mame yebꞌ yuninal. 21 Haꞌ xin konhobꞌ yiqꞌ ebꞌnaj yinh txꞌotxꞌ ayko yinh yetkꞌulal sur yinh ismohonal txꞌotxꞌ Edom, haꞌ ton konhobꞌ Cabseel, konhobꞌ Edar, konhobꞌ Jagur, 22 konhobꞌ Cina, konhobꞌ Dimona, konhobꞌ Adada, 23 konhobꞌ Cedes, konhobꞌ Hazor, konhobꞌ Itnán, 24 konhobꞌ Zif, konhobꞌ Telem, konhobꞌ Bealot, 25 konhobꞌ Hazor-adata, konhobꞌ Queriot, konhobꞌ Hezrón chiyijpaxo Hazor, 26 konhobꞌ Amam, konhobꞌ Sema, konhobꞌ Molada, 27 konhobꞌ Hazar-gada, konhobꞌ Hesmón, konhobꞌ Bet-pelet, 28 konhobꞌ Hazar-sual, konhobꞌ Beerseba, konhobꞌ Bizotia, 29 konhobꞌ Baala, konhobꞌ Iim, konhobꞌ Esem, 30 konhobꞌ Eltolad, konhobꞌ Quesil, konhobꞌ Horma, 31 konhobꞌ Siclag, konhobꞌ Madmana, konhobꞌ Sansana, 32 konhobꞌ Lebaot, konhobꞌ Silhim, konhobꞌ Aín, yebꞌ konhobꞌ Rimón. Haꞌ xin isbꞌisil hunteqꞌan konhobꞌ tuꞌ, 29 (bꞌalonhebꞌ iskawinaj) yinh sunil, yebꞌ ej yaldeahil.
33 Haxa konhobꞌ yiqꞌ ebꞌnaj ayayo sat akꞌal, haꞌ ton konhobꞌ Estaol, konhobꞌ Zora, konhobꞌ Asena, 34 konhobꞌ Zanoa, konhobꞌ En-ganim, konhobꞌ Tapúa, konhobꞌ Enam, 35 konhobꞌ Jarmut, konhobꞌ Adulam, konhobꞌ Soco, konhobꞌ Azeca, 36 konhobꞌ Saaraim, konhobꞌ Aditaim, konhobꞌ Gedera, yebꞌ konhobꞌ Gederotaim. Haꞌ xin isbꞌisil hunteqꞌan konhobꞌ tuꞌ, 14 (kanhlahonhebꞌ) yinh sunil, yebꞌ ej yaldeahil.
37 Yiqꞌnipaxo ebꞌnaj konhobꞌ Zenán, konhobꞌ Hadasa, konhobꞌ Migdal-gad, 38 konhobꞌ Deleán, konhobꞌ Mizpa, konhobꞌ Jocteel, 39 konhobꞌ Laquis, konhobꞌ Boscat, konhobꞌ Eglón, 40 konhobꞌ Cabón, konhobꞌ Lahmam, konhobꞌ Quitlis, 41 konhobꞌ Gederot, konhobꞌ Bet-dagón, konhobꞌ Naama yebꞌ konhobꞌ Maceda. Haꞌ xin isbꞌisil hunteqꞌan konhobꞌ tuꞌ, 16 (wajlahonhebꞌ) konhobꞌ yinh sunil, yebꞌ ej yaldeahil.
42 Yiqꞌpaxo ebꞌnaj konhobꞌ Libna, konhobꞌ Eter, konhobꞌ Asán, 43 konhobꞌ Jifta, konhobꞌ Asena, konhobꞌ Nezib, 44 konhobꞌ Keila, konhobꞌ Aczib, yebꞌ konhobꞌ Maresa. Haꞌ xin isbꞌisil hunteqꞌan konhobꞌ tuꞌ, bꞌalonhebꞌ yinh sunil, yebꞌ ej yaldeahil.
45 Yiqꞌpaxo ebꞌnaj konhobꞌ Ecrón yebꞌ nixhte konhobꞌ yebꞌ yaldeahil. 46 Bꞌey konhobꞌ Ecrón tuꞌ masanta chiꞌapni bꞌey haꞌ mar, yiqꞌ ebꞌnaj sunil txꞌotxꞌ ayayo iskawilal konhobꞌ Asdod yebꞌ ej yaldeahil.
47 Yiqꞌnipaxo ebꞌnaj konhobꞌ Asdod yebꞌ sunil nixhte konhobꞌ yebꞌ yaldeahil, yebꞌ konhobꞌ Gaza yebꞌ nixhte konhobꞌ yebꞌ yaldeahil, masanta chiꞌapni bꞌey haꞌ nichꞌan haꞌ yet Egipto, yebꞌ istiꞌla haꞌ Niman mar.
48 Haxa bꞌey txꞌotxꞌ chewal txꞌotxꞌ, yiqꞌ ebꞌnaj konhobꞌ Samir, konhobꞌ Jatir, konhobꞌ Soco, 49 konhobꞌ Dana, konhobꞌ Quiriat-sana, chihal-laxpaxo Debir, 50 yebꞌ konhobꞌ Anab, konhobꞌ Estemoa, konhobꞌ Anim, 51 konhobꞌ Gosén, konhobꞌ Holón yebꞌ konhobꞌ Gilo. Haꞌ isbꞌisil hunteqꞌan konhobꞌ tuꞌ, 11 (hunlahonhebꞌ) yinh sunil, yebꞌ ej yaldeahil.
52 Yiqꞌnipaxo ebꞌnaj konhobꞌ Arab, konhobꞌ Duma, konhobꞌ Esán, 53 konhobꞌ Janum, konhobꞌ Bet-tapúa, konhobꞌ Afeca, 54 konhobꞌ Humta, konhobꞌ Quiriat-arba, chihal-laxpaxo Hebrón, yebꞌ konhobꞌ Sior. Haꞌ isbꞌisil hunteqꞌan konhobꞌ tuꞌ bꞌalonhebꞌ yinh sunil, yebꞌ ej yaldeahil.
55 Yiqꞌnipaxo ebꞌnaj konhobꞌ Maón, konhobꞌ Carmel, konhobꞌ Zif, konhobꞌ Juta, 56 konhobꞌ Jezreel, konhobꞌ Jocdeam, konhobꞌ Zanoa, 57 konhobꞌ Caín, konhobꞌ Gabaa yebꞌ konhobꞌ Timna. Haꞌ xin isbꞌisil hunteqꞌan konhobꞌ tuꞌ 10 (lahonhebꞌ) yinh sunil, yebꞌ ej yaldeahil.
58 Yiqꞌnipaxo ebꞌnaj konhobꞌ Halhul, konhobꞌ Bet-sur, konhobꞌ Gedor, 59 konhobꞌ Maarat, konhobꞌ Bet-anot, yebꞌ konhobꞌ Eltecón. Haꞌ xin isbꞌisil hunteqꞌan konhobꞌ tuꞌ, wajebꞌ yinh sunil yebꞌ ej yaldeahil.
60 Yiqꞌnipaxo ebꞌnaj konhobꞌ Quiriat-baal, chihal-laxpaxo Quiriat-jearim yebꞌ konhobꞌ Rabá, yiqꞌ ebꞌnaj kabꞌebꞌ konhobꞌ tuꞌ, yebꞌ yaldeahil.
61 Yiqꞌpaxo ebꞌnaj konhobꞌ ayayo sat txꞌotxꞌ bꞌay machi haꞌ, haꞌ ton konhobꞌ Bet-arabá, konhobꞌ Midín, konhobꞌ Secaca, 62 konhobꞌ Nibsán, yebꞌ huneꞌ konhobꞌ yet Atzꞌam, yebꞌ konhobꞌ En-gadi; wajebꞌ isbꞌisil hunteqꞌan konhobꞌ tuꞌ yebꞌ ej yaldeahil.
63 Wal ebꞌnaj jebuseoe ay bꞌey konhobꞌ Jerusalén, mach ilaxilo ebꞌnaj yu ebꞌnaj titna yinh yaꞌ Judá, yuxin kankano ebꞌnaj jebuseo tuꞌ xol ebꞌnaj Judá masanta tinanh.