Istxꞌotxꞌ yaꞌ Efraín yebꞌ istxꞌotxꞌ yaꞌ Manasés
16
Haꞌ txꞌotxꞌ ischah ebꞌnaj titna yinh yaꞌ José hatatikꞌa yinhbꞌal, chiꞌichiti txꞌotxꞌ yinh yetkꞌulal bꞌay chiꞌahilo tzꞌayik yinh haꞌ Jordán, kat yekꞌ ismohonal txꞌotxꞌ bꞌay ay isnuqꞌ ha haꞌ bꞌey Jericó, kat yekꞌ ismohonal txꞌotxꞌ bꞌey txꞌotxꞌ desierto, bꞌey hunteqꞌan witz bꞌey Jericó, chiꞌapni bꞌey konhobꞌ Bet-el. 2 Palan yekꞌto ismohonal txꞌotxꞌ bꞌey konhobꞌ Bet-el, chihal-laxpaxo Luz, kat yekꞌ ismohonal txꞌotxꞌ bꞌay ay istxꞌotxꞌ ebꞌnaj arquita, masanta bꞌey konhobꞌ Atarot; 3 kat istopaxo txꞌotxꞌ yinh yetkꞌulal bꞌay chito tzꞌayik bꞌey istxꞌotxꞌ ebꞌnaj jafletita, masanta chꞌekꞌ ismohonal txꞌotxꞌ yinh ismohonal Bet-horón yichayoj masanta bꞌey konhobꞌ Gezer, kat yelapno bꞌey haꞌ Niman Mar. 4 Haꞌ ton txꞌotxꞌ tiꞌ ischahkano ebꞌnaj titna yinh yaꞌ Manasés yebꞌ yinh yaꞌ Efraín, ebꞌyaꞌ iskꞌahol yaꞌ José.5 Haꞌ ismohonal istxꞌotxꞌ ebꞌnaj titna yinh yaꞌ Efraín, chitaichiti txꞌotxꞌ bꞌey Atarot-adar, yinh yetkꞌulal bꞌay chiꞌahilo tzꞌayik, masanto yinhahto Bet-horón; 6 kat yekꞌ ismohonal txꞌotxꞌ istiꞌ haꞌ Niman mar, masanta bꞌey konhobꞌ Micmetat yinh yetkꞌulal norte, kat isbꞌey ishoyoꞌ isbꞌa yinh yetkꞌulal bꞌay chiꞌahilo tzꞌayik masanta chiꞌapni bꞌey konhobꞌ Taanat-silo, lahwi tuꞌ kat yekꞌto bꞌey Janoa, 7 kat yayapno bꞌey konhobꞌ Atarot, yebꞌ bꞌey konhobꞌ Naarat, masanta chiꞌapni bꞌey konhobꞌ Jericó, kat yelapno bꞌey haꞌ Jordán, 8 kat yichipaxti ismohonal txꞌotxꞌ bꞌey konhobꞌ Tapúa, kat isto yinh yetkꞌulal bꞌay chito tzꞌayik masanta bꞌey haꞌ nichꞌan haꞌ bꞌey konhobꞌ Caná, yebꞌ bꞌey haꞌ Niman Mar. Haꞌ ton txꞌotxꞌ tuꞌ ischah ebꞌnaj titna yinh yaꞌ Efraín, ispohlaxkanh txꞌotxꞌ yinh hunun ebꞌnaj mame yinh hunun majan. 9 Aypaxo xin hunteqꞌan konhobꞌ yebꞌ yaldeahil ayko yul ismajul istxꞌotxꞌ ebꞌnaj titna yinh yaꞌ Manasés ischahpaxo ebꞌnaj titna yinh yaꞌ Efraín. 10 Yaj xin mach istzumbꞌelo ebꞌnaj titna yinh yaꞌ Efraín tuꞌ ebꞌnaj cananeo ay bꞌey konhobꞌ Gezer,a yaj isqꞌan ebꞌnaj chꞌen tohlabꞌal tet ebꞌnaj; yexnheto xin ye ebꞌnaj cananeo tuꞌ xol ebꞌnaj tinanh.