3 Yajaꞌ wal naj Zelofehad machi yuninal naj winaj, wal xin ixnhe howanh iskutzꞌin naj, haꞌ ton ix Maala, ix Noa, ix Hogla, ix Milca, yebꞌ ix Tirsa. Naj Zelofehad tuꞌ, iskꞌahol naj Hefer ye naj, haxa naj Hefer iskꞌahol naj Galaad ye naj, haxa naj Galaad iskꞌahol naj Maquir ye yaꞌ, haxa naj Maquir iskꞌahol yaꞌ Manasés ye naj. 4 Haꞌ ebꞌix tuꞌ, to ebꞌix iskꞌatanh yaꞌ sacerdote Eleazar yebꞌ iskꞌatanh yaꞌ Josué yebꞌ iskꞌatanh ebꞌnaj yahawil konhobꞌ; yalni ebꞌix: «Haꞌ Komam Dios halnikano tet yaꞌ Moisés tato chiꞌaqꞌlax kotxꞌotxꞌanh, hakaꞌ yaqꞌlax yet jet Israelanh,» xhi ebꞌix. Hak tuꞌ yu yaqꞌni yaꞌ Josué istxꞌotxꞌ ebꞌix, hakaꞌ yu yaqꞌlax istxꞌotxꞌ ebꞌnaj yuxhta ismam ebꞌix, hakaꞌtikꞌa yu yalnikano Komam Dios.^a

5 Hak tuꞌ yu ischahnikano ebꞌnaj titna yinh yaꞌ Manasés, 10 (lahonhebꞌ) majan istxꞌotxꞌ, nan xin yepaxo txꞌotxꞌ Galaad yebꞌ txꞌotxꞌ Basán, ay isqꞌaxebꞌikꞌti haꞌ Jordán yinh yetkꞌulal bꞌay chiꞌahilo tzꞌayik. 6 Wal xin aqꞌlax istxꞌotxꞌ ebꞌix hakaꞌ yu yaqꞌlax istxꞌotxꞌ ebꞌnaj winaj. Haꞌ txꞌotxꞌ Galaad tuꞌ, aqꞌlax txꞌotxꞌ tet hunteqꞌanxa ebꞌnaj titna yinh yaꞌ Manasés. 7 Haꞌ istxꞌotxꞌ ebꞌnaj titna yinh yaꞌ Manasés tuꞌ, chiꞌichiti ismohonal txꞌotxꞌ bꞌey konhobꞌ Aser, masanta bꞌey Micmetat, satakꞌti Siquem, kat yekꞌ ismohonal txꞌotxꞌ yinh sur, masanta bꞌay ay isnuqꞌ ha haꞌ bꞌey konhobꞌ Tapúa. 8 Waxanhka yet ebꞌnaj titna yinh yaꞌ Manasés ye ismajul txꞌotxꞌ Tapúa, yajaꞌ wal konhobꞌ Tapúa huneꞌnhe yehayo ismohonal yebꞌ istxꞌotxꞌ yaꞌ Manasés tuꞌ, ayko yul isqꞌabꞌ ebꞌnaj titna yinh yaꞌ Efraín. 9 Haꞌ tuꞌ xin chꞌayilo ismohonal istxꞌotxꞌ ebꞌnaj titna yinh yaꞌ Manasés yinh haꞌ nichꞌan haꞌ bꞌey konhobꞌ Caná yinh yetkꞌulal sur, hak tuꞌ yu iskankano hunteqꞌan iskonhobꞌ ebꞌnaj yikꞌal yaꞌ Efraín yulikto ismohonal ebꞌnaj tuꞌ. Ismohonal istxꞌotxꞌ ebꞌnaj Manasés tuꞌ ayko yetkꞌulal norte bꞌay ay ha haꞌ tuꞌ yebꞌ bꞌay chiꞌelilo isqꞌabꞌ haꞌ mar. 10 Iskankano ebꞌnaj titna yinh yaꞌ Efraín yinh yetkꞌulal sur yinh haꞌ nichꞌan haꞌ tuꞌ, haxa ebꞌnaj titna yinh yaꞌ Manasés kankano ebꞌnaj yinh yetkꞌulal norte yinh haꞌ. Iskankano istxꞌotxꞌ ebꞌnaj titna yinh yaꞌ Aser yinh yetkꞌulal norte yinh istxꞌotxꞌ yaꞌ Manasés, haxa ebꞌnaj titna yinh yaꞌ Isacar kankano ebꞌnaj yinh yetkꞌulal bꞌay chiꞌahilo tzꞌayik yinh ismohonal istxꞌotxꞌ yaꞌ Manasés.

11 Ischahpaxo ebꞌnaj titna yinh yaꞌ Manasés hunteqꞌan konhobꞌ ayko yul ismajul ebꞌnaj titna yinh yaꞌ Isacar yebꞌ yul ismajul ebꞌnaj titna yinh yaꞌ Aser. Ischah ebꞌnaj hunteqꞌan konhobꞌ tuꞌ yebꞌ yaldeahil, haꞌ ton konhobꞌ Bet-seán, konhobꞌ Ibleam, konhobꞌ Dor, konhobꞌ Endor, konhobꞌ Taanac yebꞌ konhobꞌ Meguido, yebꞌ oxebꞌxa konhobꞌ ayko yinh wonhan.^b

12 Yajaꞌ mach ok hunteqꞌan konhobꞌ tuꞌ yu ebꞌnaj titna yinh yaꞌ Manasés, yuto ebꞌnaj cananeo ay bꞌey tuꞌ, islinhbꞌa isbꞌa ebꞌnaj sata ebꞌnaj Israel, yuxin mach yu yinilo ebꞌnaj ebꞌnaj, hak tuꞌ xin yu iskankano ebꞌnaj cananeo bꞌey hunteqꞌan konhobꞌ tuꞌ. 13 Haxa yet yiqꞌnikanh yip ebꞌnaj Israel, isqꞌanni ebꞌnaj tato chitohlawi ebꞌnaj cananeo tuꞌ tet ebꞌnaj, yajaꞌ machi tzumbꞌelaxilo ebꞌnaj yu ebꞌnaj.

14 Yalni ebꞌnaj titna yinh yaꞌ José tet yaꞌ Josué hakaꞌ tiꞌ:

—¿Tzet yinh xin huneꞌ suertehalnhe maxawayo yinh kotxꞌotxꞌanh? Hanhonhtiꞌanh ayayo isyaxil Komam Jahawil jibꞌanhanh, yu huneꞌ tuꞌ yuxin niman kobꞌisilanh yu Komam, xhi ebꞌnaj.

15 Istaqꞌwi yaꞌ Josué tet ebꞌnaj:

—Yu kaw nimankano hebꞌisil, machi xin chꞌeliko txꞌotxꞌ chewal txꞌotxꞌ teyinh yettikꞌa yaꞌ Efraín hechah hemajuloj, ahanhweto xol qꞌebꞌtalaj sat istxꞌotxꞌ ebꞌnaj ferezeo yebꞌ ebꞌnaj refaíta, kat heqꞌajnayo te teꞌ, xhi yaꞌ Josué tet ebꞌnaj.

16 Istaqꞌwi ebꞌnaj tet yaꞌ Josué tuꞌ, yalni ebꞌnaj:

—Yinh kaw yeli, mach chabꞌe txꞌotxꞌ chewal txꞌotxꞌ tiꞌ jinhanh, yajaꞌ wal ebꞌnaj cananeo ayayo sat akꞌal, ay iscarruaje ebꞌnaj chꞌen; hak tuꞌ xin anma ay bꞌey konhobꞌ Bet-seán yebꞌpaxo yaldeahil; haktikꞌapax tuꞌ anma ay yul hokan Jezreel, xhi ebꞌnaj.

17 Istaqꞌwi yaꞌ Josué tet ebꞌnaj titna yinh yaꞌ José, haꞌ ton ebꞌnaj Efraín yebꞌ ebꞌnaj Manasés hakaꞌ tiꞌ:

—Hex tiꞌ kaw niman hebꞌisil yebꞌ xin kaw ay heyip, yuxin mach hunnhe majan hetxꞌotxꞌ chechah. 18 Wal xin chiꞌokpaxkano txꞌotxꞌ qꞌebꞌtala tuꞌ heyu, kat yoknipaxiko teꞌ qꞌebꞌtaj tuꞌ heyu, yajaꞌ wal ebꞌnaj cananeo ay bꞌey tuꞌ, waxanhka kaw ay yip ebꞌnaj yebꞌ ay iscarruaje ebꞌnaj, chetzumbꞌelo ebꞌnaj bꞌey tuꞌ, xhi yaꞌ Josué tet ebꞌnaj.