3 Yuxin yal yaꞌ Josué tet ebꞌnaj Israel tuꞌ hakaꞌ tiꞌ: «¿Tzet cheyechma yuxin maxhto chexto ehoyo sat txꞌo txꞌotxꞌ xayaqꞌ Komam Jahawil teyet, Komam isDiosal hemam icham? 4 Saywelo oxwanh ebꞌnaj winaj xol hunun majan hex Israel hex tiꞌ, kat inchejnitojan ebꞌnaj isbꞌeytzeno txꞌotxꞌ, haxa yet chimeltzo ebꞌnaj kat yalni ebꞌnaj wetan tzet yok txꞌotxꞌ, yunhe chu ispohlaxkanh txꞌotxꞌ teyinh. 5 Haꞌ xin ebꞌnaj chito ilno txꞌotxꞌ tuꞌ hujebꞌ majan chu ispohnayo ebꞌnaj txꞌotxꞌ. Chikankano istxꞌotxꞌ ebꞌnaj titna yinh yaꞌ Judá yinh yetkꞌulal sur yinh txꞌotxꞌ chepohayo tuꞌ; haxa istxꞌotxꞌ ebꞌnaj titna yinh yaꞌ José chikankano yinh yetkꞌulal norte yinh txꞌotxꞌ chepohayo tuꞌ. 6 Hayet xahepohkanh txꞌotxꞌ yinh ishuj majan, chetzꞌibꞌnhenkano ismohonal txꞌotxꞌ kat heyiniti wetan, kat wanayojan suerte sata Komam Jahawil, koDiosal. 7 Wal ebꞌnaj levita, mach ismajul ebꞌnaj chischah, yuto haꞌ ismunil ebꞌnaj haꞌ ton yok ebꞌnaj issacerdotehal Komam. Wal ebꞌnaj heyet Israelal titna yinh yaꞌ Gad yebꞌ yinh yaꞌ Rubén yebꞌ yikta majan ebꞌnaj titna yinh yaꞌ Manasés, xaꞌischah ebꞌnaj ismajul isqꞌaxebꞌikꞌto haꞌ Jordán yinh yetkꞌulal bꞌay chiꞌahilo tzꞌayik; txꞌotxꞌ aqꞌbꞌilkano yu yaꞌ Moisés, ischejabꞌ Komam Dios,» xhi Josué.

8 Hayet lanhanxa isto ebꞌnaj ispohnoyo txꞌotxꞌ tuꞌ yebꞌ ebꞌnaj chitzꞌibꞌnhenayo isnajachil bꞌay chꞌekꞌ txꞌotxꞌ, yalni yaꞌ Josué tuꞌ tet ebꞌnaj: «Asiꞌwe yulaj ismajul sunil txꞌo txꞌotxꞌ tuꞌ, kat hepohnayo txꞌotxꞌ, lahwi tuꞌ kat hemeltzo bꞌey konhobꞌ Silo tiꞌ, hak tuꞌ xin chiwayojan suerte sata Komam Jahawil, yinh bꞌaytet txꞌotxꞌ chechah,» xhi yaꞌ Josué tet ebꞌnaj.

9 Isto ebꞌnaj yilno txꞌotxꞌ tuꞌ, isbꞌeytzen ebꞌnaj sunil ismajul txꞌotxꞌ, ispohnayo ebꞌnaj ej txꞌotxꞌ konhobꞌ yinh hujebꞌ majan, istzꞌibꞌnhenkano ebꞌnaj yul hum bꞌay chꞌekꞌ isnajachil; lahwi tuꞌ ismeltzo ebꞌnaj yul campamento bꞌey konhobꞌ Silo. 10 Ispohnikanokanh yaꞌ Josué txꞌotxꞌ yinh suertehal yinh ebꞌnaj Israel tuꞌ hatatikꞌa yinh hanta chischah hunun majan, sata Komam Jahawil bꞌey konhobꞌ Silo.

11 Hayet ispohlaxkanh txꞌotxꞌ yinh suertehal, haꞌ ebꞌnaj titna yinh yaꞌ Benjamín ischah istxꞌotxꞌ yinh bꞌabꞌelal, yaj hakaꞌtikꞌa isbꞌisil ebꞌnaj. Aqꞌlax istxꞌotxꞌ ebꞌnaj tuꞌ xolbꞌal istxꞌotxꞌ ebꞌnaj titna yinh yaꞌ Judá, yebꞌ ebꞌnaj titna yinh yaꞌ José.

12 Haꞌ ismohonal istxꞌotxꞌ ebꞌnaj tuꞌ yinh yetkꞌulal norte, chiꞌichiti yinh haꞌ Jordán, kat yekꞌ yinh yetkꞌulal norte yinh konhobꞌ Jericó, kat istopaxo yinh txꞌotxꞌ chewal txꞌotxꞌ yinh yetkꞌulal bꞌay chito tzꞌayik, kat yelapno yinh txꞌotxꞌ desierto Bet-avén, 13 kat istopaxo bꞌey konhobꞌ Luz chihal-laxpaxo Bet-el yinh yetkꞌulal sur, kat yayapno bꞌey konhobꞌ Atarot-adar bꞌey huneꞌ witz yinh yetkꞌulal sur yinh konhobꞌ Bet-horón bꞌey yalanhaytoj; 14 kat ismeltzo ismohonal txꞌotxꞌ tuꞌ, kat yekꞌ yinh iskꞌul witz yinh yetkꞌulal sur ayko satakꞌti Bet-horón, kat yapni bꞌey Quiriat-baal, chihal-laxpaxo Quiriat-jearim, iskonhobꞌ ebꞌnaj Judá. Haꞌ ton tuꞌ ismohonal txꞌotxꞌ yinh yetkꞌulal bꞌay chito tzꞌayik.

15 Haxa ismohonal txꞌotxꞌ yinh yetkꞌulal sur chitaichiti bꞌey konhobꞌ Quiriat-jearim yinh yetkꞌulal bꞌay chito tzꞌayik, bꞌay ay isnuqꞌ ha haꞌ bꞌey konhobꞌ Neftoa. 16 Kat yayapno yinh witz ayko satakꞌti hokan yet iskꞌahol naj Hinom yinh yetkꞌulal norte yinh hokan Refaim. Lahwi tuꞌ, kat istopaxo sat hokan Hinom, kat yekꞌto yinh iskꞌul witz Jebús yinh yetkꞌulal sur, kat yapnikano bꞌey isnuqꞌ ha haꞌ Rogel, 17 kat ismeltzopaxo ismohonal yinh yetkꞌulal norte, kat yelapno bꞌey konhobꞌ En-semes, kat istopaxo bꞌey konhobꞌ Gelilot ayko satakꞌti iskꞌul witz Adumín, kat yayapno satla chꞌen chꞌen yet naj Bohán, iskꞌahol naj Rubén, 18 kat yekꞌ yinh witz yinh yetkꞌulal norte satakꞌto wonhan Arabá, kat yayapno yul hokan Arabá.^b 19 Kat yayapno yinh yetkꞌulal norte yinh konhobꞌ Bet-hogla, kat yapnikano yinh yetkꞌulal norte yinh isqꞌabꞌ haꞌ mar Kachi, kat yapnikano yinh iskꞌul haꞌ Jordán yinh sur. Haꞌ ton tiꞌ ismohonal txꞌotxꞌ yinh yetkꞌulal sur.

20 Haxa ismohonal txꞌotxꞌ yinh yetkꞌulal bꞌay chiꞌahilo tzꞌayik, haꞌ ton haꞌ Jordán. Haꞌ hunteqꞌan tiꞌ ismohonal txꞌotxꞌ chabꞌil yu ebꞌnaj titna yinh yaꞌ Benjamín.

21 Haꞌ xin konhobꞌ ischah ebꞌnaj titna yinh yaꞌ Benjamín, haꞌ ton hunteqꞌan konhobꞌ tiꞌ: konhobꞌ Jericó, konhobꞌ Bet-hogla, hokan Casis,^c 22 konhobꞌ Bet-arabá, konhobꞌ Zemaraim, konhobꞌ Bet-el, 23 konhobꞌ Avim, konhobꞌ Pará, konhobꞌ Ofra, 24 konhobꞌ Quefar-haamoni, konhobꞌ Ofni yebꞌ konhobꞌ Geba; kabꞌlahonhebꞌ konhobꞌ tuꞌ yebꞌ ej yaldeahil.

25 Ischahnilo ebꞌnaj konhobꞌ Gabaón, konhobꞌ Ramá, konhobꞌ Beerot, 26 konhobꞌ Mizpa, konhobꞌ Cafira, konhobꞌ Mozah, 27 konhobꞌ Requem, konhobꞌ Irpeel, konhobꞌ Tarala, 28 konhobꞌ Zela, konhobꞌ Elef, konhobꞌ Jebús, haꞌ ton Jerusalén, konhobꞌ Gabaa, yebꞌ konhobꞌ Quiriat; 14 (kanhlahonhebꞌ) konhobꞌ tuꞌ yebꞌ ej yaldeahil. Haꞌ ton txꞌotxꞌ tiꞌ ischalo ebꞌnaj titna yinh yaꞌ Benjamín.