7 Ischahpaxo ebꞌnaj konhobꞌ Aín, konhobꞌ Rimón, konhobꞌ Eter yebꞌ konhobꞌ Asán; kanhebꞌ konhobꞌ tuꞌ yebꞌ ej yaldeahil. 8 Ischahpaxo ebꞌnaj sunil ej yaldeahil ayko yinhla ishoyanil konhobꞌ tuꞌ masanta bꞌey konhobꞌ Baalat-beer, haꞌ ton konhobꞌ chal-laxpaxo Ramot ay bꞌey txꞌotxꞌ Neguev. Haꞌ ton xin txꞌotxꞌ aqꞌlax tet ebꞌnaj titna yinh yaꞌ Simeón, hakaꞌtikꞌa isbꞌisil ebꞌnaj, hak tuꞌ txꞌotxꞌ ischah ebꞌnaj. 9 Haꞌ yul ismajul ebꞌnaj titna yinh yaꞌ Judá, aqꞌlax ismajul ebꞌnaj titna yinh yaꞌ Simeón, yuto ebꞌnaj titna yinh yaꞌ Judá tuꞌ, kaw niman istxꞌotxꞌ ebꞌnaj ischah, yuxin yinh ismajul ebꞌnaj Judá el ismajul ebꞌnaj titna yinh yaꞌ Simeón.

10 Haxa txꞌotxꞌ yet isyox majan ok suerte yinh, haꞌ ebꞌnaj Israel titna yinh yaꞌ Zabulón iqꞌni txꞌotxꞌ; hakaꞌtikꞌa isbꞌisil ebꞌnaj, hak tuꞌ istxꞌotxꞌ ebꞌnaj ischah. Haꞌ ismohonal istxꞌotxꞌ ebꞌnaj chitaichiti bꞌey konhobꞌ Sarid, 11 kat isto yinh yetkꞌulal bꞌay chiꞌahilo tzꞌayik masanta bꞌey konhobꞌ Marala, chꞌekꞌpaxo bꞌey konhobꞌ Dabeset, kat yapnikano yinh haꞌ nichꞌan haꞌ ay satakꞌti Jocneam. 12 Chiꞌichipaxti bꞌey konhobꞌ Sarid tuꞌ, kat isto ismohonal txꞌotxꞌ yinh yetkꞌulal bꞌay chiꞌahilo tzꞌayik masanta bꞌey konhobꞌ Quislot-tabor, kat xin yekꞌpaxo bꞌey konhobꞌ Daberat, kat yahapno bꞌey konhobꞌ Jafía, 13 haꞌ bꞌey tuꞌ chitopaxo ismohonal txꞌotxꞌ yinh yetkꞌulal bꞌay chiꞌahilo tzꞌayik, kat yekꞌ bꞌey konhobꞌ Gat-hefer, kat yekꞌpaxo bꞌey konhobꞌ Ita-cazín, kat yapnikano bꞌey konhobꞌ Rimón, ishoyni isbꞌa yinh konhobꞌ Nea. 14 Haxa ismohonal yinh yetkꞌulal norte, chitaekꞌ ishoyoꞌ bꞌey konhobꞌ Hanatón kat yelapno yul akꞌal ay bꞌey konhobꞌ Jefte-el. 15 Xol konhobꞌ tuꞌ ayko konhobꞌ Catat, konhobꞌ Naalal, konhobꞌ Simrón, konhobꞌ Idala yebꞌ konhobꞌ Belén; ay kabꞌlahonhebꞌ konhobꞌ yebꞌ ej yaldeahil. 16 Haꞌ ton txꞌotxꞌ tuꞌ aqꞌlax ismajulo ebꞌnaj titna yinh yaꞌ Zabulón, yebꞌ hunteqꞌan konhobꞌ yebꞌ ej yaldeahil.

17 Haxa txꞌotxꞌ yet iskanh majan ok suerte yinh, haꞌ ebꞌnaj Israel titna yinh yaꞌ Isacar iqꞌni txꞌotxꞌ; hakaꞌtikꞌa isbꞌisil ebꞌnaj tuꞌ, hak tuꞌ istxꞌotxꞌ ebꞌnaj ischah. 18 Haꞌ sat istxꞌotxꞌ ebꞌnaj tuꞌ ayayo hunteqꞌan konhobꞌ tiꞌ; konhobꞌ Jezreel, konhobꞌ Quesulot, konhobꞌ Sunem, 19 konhobꞌ Hafaraim, konhobꞌ Sihón, konhobꞌ Anaharat, 20 konhobꞌ Rabit, konhobꞌ Quisión, konhobꞌ Abez, 21 konhobꞌ Remet, konhobꞌ En-ganim, konhobꞌ En-hada yebꞌ konhobꞌ Bet-pases. 22 Chitaxin apni ismohonal txꞌotxꞌ tuꞌ bꞌey konhobꞌ Tabor yebꞌ bꞌey konhobꞌ Sahazima yebꞌ bꞌey konhobꞌ Bet-semes, kat iskachnakanapno yinh haꞌ Jordán; 16 (wajlanhebꞌ) konhobꞌ tuꞌ yebꞌ ej yaldeahil. 23 Haꞌ txꞌotxꞌ tuꞌ yebꞌ ej konhobꞌ yebꞌ ej yaldeahil aqꞌlaxkano ismajuloj ebꞌnaj titna yinh yaꞌ Isacar.

24 Haxa txꞌotxꞌ yet ishoꞌ majan ok suerte yinh, haꞌ ebꞌnaj Israel titna yinh yaꞌ Aser iqꞌni txꞌotxꞌ; hakaꞌtikꞌa isbꞌisil ebꞌnaj, hak tuꞌ istxꞌotxꞌ ebꞌnaj ischah. 25 Haꞌ xin sat istxꞌotxꞌ ebꞌnaj tuꞌ, ayayo hunteqꞌan konhobꞌ tiꞌ; konhobꞌ Helcat, konhobꞌ Hali, konhobꞌ Betén, konhobꞌ Acsaf, 26 konhobꞌ Alamelec, konhobꞌ Amad, konhobꞌ Miseal, chitaxin apni bꞌey witz Carmelo yinh yetkꞌulal bꞌay chito tzꞌayik yebꞌ bꞌey konhobꞌ Sihor-libnat. 27 Haxa ismohonal txꞌotxꞌ xin chishoy isbꞌa yinh yetkꞌulal bꞌay chito tzꞌayik masanta bꞌey konhobꞌ Bet-dagón, kat isto yinh yetkꞌulal norte kat yapni yinh istxꞌotxꞌ ebꞌnaj Zabulón, kat yekꞌ bꞌey hokan Jefte-el yebꞌ bꞌey konhobꞌ Bet-emec yebꞌ bꞌey konhobꞌ Neiel, kat yekꞌto satakꞌto konhobꞌ Cabul yinh yetkꞌulal norte. 28 Yuxin chiꞌekꞌ ismajatoj konhobꞌ Hebrón, konhobꞌ Rehob, konhobꞌ Hamón, yebꞌ konhobꞌ Caná, masanta chiꞌapni yinh niman konhobꞌ Sidón. 29 Chilahwi tuꞌ, kat yekꞌ ismohonal tuꞌ ishoyno konhobꞌ Ramá masanta chiꞌapni bꞌey huneꞌ konhobꞌ hoyaniko kꞌubꞌ yinh, haꞌ ton Tiro, tohol yapni yinh konhobꞌ Hosa, kat apni yinh haꞌ Niman mar bꞌey txꞌotxꞌ yetto Aczib, 30 yebꞌpaxo bꞌey konhobꞌ Uma, konhobꞌ Afec yebꞌ konhobꞌ Rehob; haꞌ ej konhobꞌ tuꞌ 22 (kabꞌ iskawinaj) yinh sunil, yebꞌpaxo ej yaldeahil. 31 Haꞌ txꞌotxꞌ tuꞌ aqꞌlaxkano tet ebꞌnaj titna yinh yaꞌ Aser yebꞌ hunteqꞌan konhobꞌ yebꞌ ej yaldeahil.

32 Haxa txꞌotxꞌ yet iswaj majan ok suerte yinh, haꞌ ebꞌnaj Israel titna yinh yaꞌ Neftalí iqꞌni txꞌotxꞌ; hakaꞌtikꞌa isbꞌisil ebꞌnaj, hak tuꞌ istxꞌotxꞌ ebꞌnaj ischah. 33 Haꞌ istxꞌotxꞌ ebꞌnaj tuꞌ chitaekꞌ txꞌotxꞌ bꞌey konhobꞌ Helef yebꞌ bꞌey konhobꞌ Alón-saananim yebꞌ bꞌey konhobꞌ Adami-neceb yebꞌ bꞌey konhobꞌ Jabneel, masanta bꞌey konhobꞌ Lacum, chꞌelapno ismohonal txꞌotxꞌ yinh haꞌ Jordán. 34 Haxa ismohonal txꞌotxꞌ yinh yetkꞌulal bꞌay chito tzꞌayik chiꞌichitij bꞌey konhobꞌ Aznot-tabor, kat yapni bꞌey konhobꞌ Hucoc, yuxin haꞌ yinh yetkꞌulal sur, haꞌ yinh istxꞌotxꞌ ebꞌnaj titna yinh yaꞌ Zabulón chiꞌekꞌ ismohonal txꞌotxꞌ haxa yinh yetkꞌulal bꞌay chito tzꞌayik, haꞌ xin yinh istxꞌotxꞌ ebꞌnaj Aser chiꞌekꞌ ismohonal txꞌotxꞌ. Haxa yinh yetkꞌulal bꞌay chiꞌahilo tzꞌayik chiꞌekꞌ ismohonal txꞌotxꞌ bꞌey istxꞌotxꞌ ebꞌnaj Judá, kat apni bꞌey haꞌ Jordán. 35 Haꞌ xin hunteqꞌan konhobꞌ ayko iskꞌubꞌal, haꞌ ton konhobꞌ Sidim, konhobꞌ Zer, konhobꞌ Hamat, konhobꞌ Racat, konhobꞌ Cineret, 36 konhobꞌ Adama, konhobꞌ Ramá, konhobꞌ Hazor, 37 konhobꞌ Cedes, konhobꞌ Edrei, konhobꞌ En-hazor, 38 konhobꞌ Irón, konhobꞌ Migdal-el, konhobꞌ Horem, konhobꞌ Bet-anat yebꞌ konhobꞌ Bet-semes; 19 (bꞌalonhlahonhebꞌ) konhobꞌ tuꞌ yebꞌ ej yaldeahil. 39 Haꞌ ton txꞌotxꞌ yebꞌ hunteqꞌan konhobꞌ tiꞌ yebꞌ ej yaldeahil ischah ebꞌnaj titna yinh yaꞌ Neftalí. Hakaꞌtikꞌa isbꞌisil ebꞌnaj hak tuꞌ istxꞌotxꞌ ebꞌnaj ischah.

40 Haxa txꞌotxꞌ yet ishuj majan ok suerte yinh, haꞌ ebꞌnaj Israel titna yinh yaꞌ Dan iqꞌni txꞌotxꞌ; hakaꞌtikꞌa xin isbꞌisil ebꞌnaj, hak tuꞌ istxꞌotxꞌ ebꞌnaj ischah. 41 Haꞌ xin hunteqꞌan konhobꞌ ayayo sat istxꞌotxꞌ ebꞌnaj ischah tuꞌ, haꞌ ton konhobꞌ Zora, konhobꞌ Estaol, konhobꞌ Ir-semes, 42 konhobꞌ Saalabín, konhobꞌ Ajalón, konhobꞌ Jetla, 43 konhobꞌ Elón, konhobꞌ Timnat, konhobꞌ Ecrón, 44 konhobꞌ Elteque, konhobꞌ Gibetón, konhobꞌ Baalat, 45 konhobꞌ Jehud, konhobꞌ Bene-berac, konhobꞌ Gat-rimón, 46 konhobꞌ Mejarcón, yebꞌ konhobꞌ Racón, yebꞌ txꞌotxꞌ ayko satakꞌti konhobꞌ Jope. 47 Yajaꞌ istxꞌotxꞌ ebꞌnaj titna yinh yaꞌ Dan ischah tuꞌ, machi eliko txꞌotxꞌ yinh ebꞌnaj, yuxin ahto ebꞌnaj yaqꞌaꞌko howal yinh konhobꞌ Lesem; ispotxꞌnikamo ebꞌnaj sunil anma ay bꞌey tuꞌ, yokkano txꞌotxꞌ yu ebꞌnaj, iskankano ebꞌnaj bꞌey tuꞌ. Ishelni ebꞌnaj isbꞌi huneꞌ konhobꞌ, yaniko ebꞌnaj Dan isbꞌiho txꞌotxꞌ, hakaꞌ isbꞌi ismam icham ebꞌnaj. 48 Haꞌ ton txꞌotxꞌ tiꞌ yebꞌ ej konhobꞌ yebꞌ ej yaldeahil ischah ebꞌnaj titna yinh yaꞌ Dan ismajuloj; hakaꞌtikꞌa isbꞌisil ebꞌnaj, hak tuꞌ istxꞌotxꞌ ebꞌnaj ischah.

49 Lahwi ispohlaxkanokanh txꞌotxꞌ yinh hunun majan ebꞌnaj Israel tuꞌ, yaqꞌni hunun majan ebꞌnaj istxꞌotxꞌ yaꞌ Josué, iskꞌahol yaꞌ Nun. 50 Hakaꞌtikꞌa yu yalnikano Komam Jahawil, aqꞌlax konhobꞌ Timnat-sera tet yaꞌ, konhobꞌ ay bꞌey txꞌotxꞌ chewal txꞌotxꞌ yul ismajul ebꞌnaj Efraín, yuto haꞌ konhobꞌ tuꞌ qꞌanbꞌil yu yaꞌ Josué. Iswatxꞌenkanh yaꞌ huneꞌ konhobꞌ tuꞌ, haꞌ bꞌey tuꞌ ehayo yaꞌ.

51 Haꞌ sunil txꞌo txꞌotxꞌ tuꞌ, ispohkanh yaꞌ sacerdote Eleazar yebꞌ yaꞌ Josué yebꞌ ebꞌnaj iswiꞌehal konhobꞌ yinh suerte yinh hunun majan ebꞌnaj Israel, pohlaxkanh bꞌey konhobꞌ Silo sata Komam Jahawil, sata istiꞌ isTabernáculo Komam, bꞌay chiskutxbꞌa isbꞌa ebꞌnaj Israel; hak tuꞌ yu islahwi ispohnikanokanh ebꞌnaj txꞌotxꞌ yinh.