4 »Haꞌ mak chito iskoloꞌ isbꞌa yul konhobꞌ tuꞌ chiꞌapni istiꞌ ispultahil konhobꞌ, kat yalni tet ebꞌnaj icham winaj chiꞌijbꞌali tzet yinh yuxin chiꞌapni bꞌey tuꞌ, kat ischahnikto ebꞌnaj yul konhobꞌ, kat yaqꞌni ebꞌnaj bꞌay chiꞌehayoj. 5 Ta xin haꞌ hunu mak ayto yu isbꞌa yebꞌ naj aqꞌlaxkamo chiꞌapni istzujuyo naj, ebꞌnaj ichamta winaj ay ismunil yijbꞌali mach chako ebꞌnaj naj yul isqꞌabꞌ naj, yuto mach nabꞌilo yu naj yet yaqꞌnikamo yet anmahil tuꞌ, machi xin howal xol yet yalanhtokanoj. 6 Chixin kankano naj iskoloꞌ isbꞌa yul konhobꞌ tuꞌ, masanto yet chiꞌok naj sata konhobꞌ Israel yu yil-laxi tzet chiꞌeliko naj, yebꞌ masanto yet chikam naj yahawil sacerdote ayko yinh ismunil yinh huneꞌ tiempohal tuꞌ; lahwi tuꞌ xayu ismeltzo naj yatut yul iskonhobꞌ bꞌay elnakanh tuꞌ,» xhi Komam.^a

7 Hak tuꞌ yu issaynilo ebꞌnaj Israel hunteqꞌan konhobꞌ bꞌay chiskol isbꞌa ebꞌnaj; issaynilo ebꞌnaj konhobꞌ Cedes bꞌey Galilea bꞌey txꞌotxꞌ chewal txꞌotxꞌ yul ismajul ebꞌnaj titna yinh yaꞌ Neftalí, yebꞌ konhobꞌ Siquem ay bꞌey txꞌotxꞌ chewal txꞌotxꞌ yul ismajul ebꞌnaj titna yinh yaꞌ Efraín, yebꞌ konhobꞌ Quiriat-arba, chihal-laxpaxo Hebrón ay bꞌey txꞌotxꞌ chewal txꞌotxꞌ yul ismajul ebꞌnaj titna yinh yaꞌ Judá. 8 Haxa bꞌey isqꞌaxebꞌikꞌto haꞌ Jordán yul akꞌal sat txꞌotxꞌ desierto yinh yetkꞌulal bꞌay chiꞌahilo tzꞌayik yinh txꞌotxꞌ Jericó, issayilo ebꞌnaj konhobꞌ Beser ayko yul ismajul ebꞌnaj titna yinh yaꞌ Rubén. Haxa bꞌey txꞌotxꞌ Galaad issayilo ebꞌnaj konhobꞌ Ramot ayko yul ismajul ebꞌnaj titna yinh yaꞌ Gad. Haxa bꞌey txꞌotxꞌ Basán issayilo ebꞌnaj konhobꞌ Golán ayko yul ismajul ebꞌnaj titna yinh yaꞌ Manasés. 9 Haꞌ hunteqꞌan konhobꞌ tuꞌ issayilo ebꞌnaj yunhe iskolni isbꞌa anma Israel tuꞌ yebꞌ anma mach Israelo ay xol ebꞌnaj. Haꞌ bꞌey tuꞌ chito iskoloꞌ isbꞌa hunu mak mach nabꞌilo yu chismaqꞌnikamo hunu yet anmahil, yunhe matzet chiꞌutelax yu hunu mak ayto yu isbꞌa yebꞌ mak chimaqꞌlaxkamo tuꞌ yalanhto maxhto chiꞌok sata konhobꞌ yu yil-laxi yinh tzet chiꞌelikoj.