4 Yinh bꞌabꞌelal xin haꞌ yibꞌanh ebꞌnaj levita titna yinh naj Coat aykꞌay suerte; haꞌ xin ebꞌnaj Coat, ebꞌnaj titna yinh yaꞌ sacerdote Aarón ischah ebꞌnaj 13 (oxlahonhebꞌ) konhobꞌ, hunteqꞌan konhobꞌ tuꞌ ayko yul ismajul ebꞌnaj Judá, yebꞌ yul ismajul ebꞌnaj Simeón, yebꞌ yul ismajul ebꞌnaj Benjamín.^b 5 Haxa hunteqꞌanxa ebꞌnaj yuninal naj Coat xin aqꞌlax 10 (lahonhebꞌ) konhobꞌ tet ebꞌnaj yinh suertehal. Hunteqꞌan konhobꞌ tuꞌ ayko yul ismajul ebꞌnaj Efraín, yebꞌ yul ismajul ebꞌnaj Dan, yebꞌ yul ismajul ebꞌnaj Manasés.

6 Haꞌ xin hunmajanxa ebꞌnaj levita titna yinh yaꞌ Gersón aqꞌlax 13 (oxlanhebꞌ) konhobꞌ tet ebꞌnaj yinh suertehal. Hunteqꞌan konhobꞌ tuꞌ ayko yul ismajul ebꞌnaj Isacar, yebꞌ yul ismajul ebꞌnaj Aser, yebꞌ yul ismajul ebꞌnaj Neftalí, yebꞌ yul ismajul ebꞌnaj Manasés ay bꞌey Basán. 7 Haxa hunmajanxa ebꞌyaꞌ levita titna yinh naj Merari, aqꞌlax 12 (kabꞌlahonhebꞌ) konhobꞌ tet ebꞌnaj hatatikꞌa isbꞌisil ebꞌnaj. Hunteqꞌan konhobꞌ tuꞌ ayko yul ismajul ebꞌnaj Rubén, yebꞌ yul ismajul ebꞌnaj Gad, yul ismajul ebꞌnaj Zabulón.

8 Hak tuꞌ xin yu yaqꞌni ebꞌnaj Israel hunteqꞌan konhobꞌ tet ebꞌnaj titna yinh yaꞌ Leví yebꞌ bꞌay chilow isnoqꞌ ebꞌnaj, yinh suertehal ebꞌnaj, hakaꞌ yu yalnikano Komam Jahawil tet yaꞌ Moisés.

9 Haꞌ hunteqꞌan konhobꞌ chibꞌina tiꞌ, haꞌ yul ismajul ebꞌnaj Judá yebꞌ yul ismajul ebꞌnaj Simeón aya.^c 10 Haꞌ xin ebꞌnaj levita titna yinh naj Coat, yebꞌ yinh yaꞌ Aarón ischah hunteqꞌan konhobꞌ tuꞌ, yuto haꞌ ebꞌnaj chahni bꞌabꞌel, hatatikꞌa yinh suertehal ebꞌnaj.

11 Haꞌ bꞌey chewal txꞌotxꞌ yul ismajul ebꞌnaj Judá aqꞌlax konhobꞌ Quiriat-arba tet ebꞌnaj, haꞌtikꞌa huneꞌ konhobꞌ tuꞌ chal-lax Hebrón, yaqꞌlaxpaxo bꞌay chilow isnoqꞌ ebꞌnaj yinhla ishoyanil konhobꞌ. Haꞌ konhobꞌ Quiriat-arba tuꞌ kaw bꞌinabꞌilkano yu ebꞌnaj Anac, ebꞌnaj nimej istel. 12 Yajaꞌ wal istxꞌotxꞌ yebꞌ ej yaldeahil huneꞌ konhobꞌ tuꞌ, aqꞌbꞌilxa ismajulo yaꞌ Caleb, iskꞌahol naj Jefone.^d

13 Yaqꞌlax konhobꞌ Hebrón tet ebꞌnaj iskꞌahol yaꞌ Aarón yebꞌ bꞌay chilow isnoqꞌ ebꞌnaj yinhla ishoyanil. Haꞌ bꞌey konhobꞌ tuꞌ chiskol isbꞌa ebꞌnaj mach nabꞌilo yu chismaqꞌnikamo hunu yet anmahil. Yiqꞌnipaxo ebꞌnaj hunteqꞌan konhobꞌ yebꞌ ej bꞌay chilow isnoqꞌ ebꞌnaj; haꞌ ton xin konhobꞌ Libna, 14 konhobꞌ Jatir, konhobꞌ Estemoa, 15 konhobꞌ Holón, konhobꞌ Debir, 16 konhobꞌ Aín, konhobꞌ Juta, konhobꞌ Bet-semes; bꞌalonhebꞌ konhobꞌ tuꞌ yinh kabꞌ majan ebꞌnaj Israel.

17 Haxa yul ismajul ebꞌnaj Benjamín, ischah ebꞌnaj iskꞌahol yaꞌ Aarón hunteqꞌan konhobꞌ tiꞌ yebꞌ bꞌay chilow isnoqꞌ: konhobꞌ Gabaón, konhobꞌ Geba, 18 konhobꞌ Anatot, konhobꞌ Almón, kanhebꞌ konhobꞌ ischah ebꞌnaj. 19 Yuxin haꞌ konhobꞌ aqꞌlax tet ebꞌnaj sacerdote titna yinh yaꞌ Aarón, 13 (oxlahonhebꞌ) yinh sunil, yaqꞌlaxpaxo bꞌay chilow isnoqꞌ ebꞌnaj yinhla ishoyanil konhobꞌ.

20 Haxa hunmajanxa ebꞌnaj levita titna yinh naj Coat, aqꞌlax hunteqꞌan konhobꞌ tet ebꞌnaj yinh suertehal yul ismajul ebꞌnaj Efraín hatatikꞌa yinhbꞌal ebꞌnaj.

21 Haꞌ bꞌey txꞌotxꞌ chewal txꞌotxꞌ yinh ismajul ebꞌnaj Efraín tuꞌ aqꞌlax konhobꞌ Siquem tet ebꞌnaj. Haꞌ yul konhobꞌ Siquem tuꞌ, haꞌ tuꞌ chiskol isbꞌa ebꞌnaj mach nabꞌilo yu chismaqꞌnikamo hunu yet anmahil. Yaqꞌlaxpaxo konhobꞌ Gezer tet ebꞌnaj, 22 yebꞌ konhobꞌ Kibsaim, yebꞌ konhobꞌ Bet-horón. Kanhebꞌ konhobꞌ tuꞌ aqꞌlax tet ebꞌnaj yebꞌ bꞌay chilow isnoqꞌ ebꞌnaj yinhla ishoyanil.

23 Haxa yul ismajul ebꞌnaj Dan ischah ebꞌnaj hunteqꞌan konhobꞌ yebꞌ bꞌay chilow isnoqꞌ ebꞌnaj. Haꞌ ton xin konhobꞌ Elteque, konhobꞌ Gibetón, 24 konhobꞌ Ajalón, konhobꞌ Gat-rimón. Haꞌ tuꞌ ischah ebꞌnaj kanhebꞌ konhobꞌ, yebꞌ bꞌay chilow isnoqꞌ ebꞌnaj yinhla ishoyanil.

25 Haxa yul ismajul yikta majan ebꞌyaꞌ Manasés ischah ebꞌnaj kabꞌebꞌ konhobꞌ tet ebꞌnaj; haꞌ ton konhobꞌ Taanac yebꞌ konhobꞌ Gat-rimón yebꞌ bꞌay chilow isnoqꞌ ebꞌnaj yinhla ishoyanil. 26 Yuxin 10 (lahonhebꞌ) konhobꞌ ischah ebꞌnaj titna yinh naj Coat, yebꞌ bꞌay chilow isnoqꞌ ebꞌnaj yinhla ishoyanil.

27 Haxa ebꞌnaj levita titna yinh yaꞌ Gersón aqꞌlax kabꞌebꞌ konhobꞌ tet ebꞌnaj yul ismajul yikta majan ebꞌnaj Manasés, yaqꞌlaxpaxo bꞌay chilow isnoqꞌ ebꞌnaj. Haꞌ ton konhobꞌ Beestera, yebꞌ konhobꞌ Golán ay bꞌey txꞌotxꞌ Basán. Haꞌ bꞌey tuꞌ xin chiskol isbꞌa mak mach nabꞌilo yu chiyaqꞌnikamo hunu yet anmahil. 28 Haꞌ yul ismajul ebꞌnaj Isacar ischah ebꞌnaj titna yinh yaꞌ Gersón konhobꞌ Cisón, yebꞌ konhobꞌ Daberat, yebꞌ bꞌay chilow isnoqꞌ ebꞌnaj. 29 Ischahpaxo ebꞌnaj konhobꞌ Jarmut yebꞌ konhobꞌ En-ganim; kanhebꞌ konhobꞌ tuꞌ yebꞌ bꞌay chilow isnoqꞌ ebꞌnaj yinhla ishoyanil. 30 Haxa yul ismajul ebꞌnaj Aser ischah ebꞌnaj konhobꞌ Miseal yebꞌ konhobꞌ Abdón, 31 yebꞌ konhobꞌ Helcat yebꞌ konhobꞌ Rehob; haꞌ kanhebꞌ konhobꞌ tiꞌ aqꞌlax tet ebꞌnaj, yebꞌ bꞌay chilow isnoqꞌ ebꞌnaj yinhla ishoyanil. 32 Haxa yinh ismajul ebꞌnaj Neftalí ischah ebꞌnaj konhobꞌ Cedes, ayko yul ismajul Galilea. Haꞌ bꞌey Cades tuꞌ chiskol isbꞌa ebꞌnaj mach nabꞌilo yu chaqꞌnikamo hunu yet anmahil. Ischahpaxo ebꞌnaj konhobꞌ Hamot-dor yebꞌ konhobꞌ Cartán; haꞌ oxebꞌ konhobꞌ tuꞌ aqꞌlax tet ebꞌnaj, yaqꞌlaxpaxo bꞌay chilow isnoqꞌ ebꞌnaj yinhla ishoyanil. 33 Yuxin ebꞌnaj levita titna yinh yaꞌ Gersón, 13 (oxlahonhebꞌ) konhobꞌ ischah ebꞌnaj yinh sunil, hakaꞌtikꞌa isbꞌisil hunun majan ebꞌnaj. Yaqꞌlaxpaxo bꞌay chilow isnoqꞌ ebꞌnaj yinhla ishoyanil hunun konhobꞌ tuꞌ.

34 Haxa hunmajanxa ebꞌnaj levita maxhto chiꞌaqꞌlax yet, ebꞌnaj titna yinh naj Merari, ischah ebꞌnaj kanhebꞌ konhobꞌ yul ismajul ebꞌnaj Zabulón; haꞌ ton konhobꞌ Jocneam, konhobꞌ Carta, 35 konhobꞌ Dimna yebꞌ konhobꞌ Naalal; haꞌ kanhebꞌ konhobꞌ tuꞌ aqꞌlax tet ebꞌnaj yebꞌ bꞌay chilow isnoqꞌ ebꞌnaj yinhla ishoyanil. 36 Kanhebꞌpaxo xin konhobꞌ aqꞌlax tet ebꞌnaj titna yinh naj Merari yul ismajul ebꞌnaj Rubén; haꞌ ton konhobꞌ Beser yebꞌ konhobꞌ Jahaza, 37 konhobꞌ Cademot yebꞌ konhobꞌ Mefaat; haꞌ kanhebꞌ konhobꞌ tuꞌ aqꞌlax tet ebꞌnaj yebꞌ bꞌay chilow isnoqꞌ ebꞌnaj yinhla ishoyanil. 38 Kanhebꞌ konhobꞌ aqꞌlaxpaxo tet ebꞌnaj yul ismajul ebꞌnaj Gad, haꞌ ton konhobꞌ Ramot ay bꞌey Galaad, haꞌ bꞌey tuꞌ xin chiskol isbꞌa mak chimaqꞌnikamo yet anmahil. Yaqꞌlaxpaxo konhobꞌ Mahanaim, 39 konhobꞌ Hesbón yebꞌ konhobꞌ Jazer; haꞌ kanhebꞌ konhobꞌ tuꞌ aqꞌlax tet ebꞌnaj yebꞌ bꞌay chilow isnoqꞌ ebꞌnaj yinhla ishoyanil. 40 Yuxin haꞌ ebꞌnaj levita titna yinh naj Merari, 12 (kabꞌlahonhebꞌ) konhobꞌ aqꞌlax tet ebꞌnaj; hakaꞌtikꞌa xin isbꞌisil hunun majan ebꞌnaj hak tuꞌ konhobꞌ aqꞌlax tet ebꞌnaj.

41 Haꞌ xin isbꞌisil sunil konhobꞌ aqꞌlax tet ebꞌnaj levita tuꞌ, 48 (waxaj yoxkꞌal) konhobꞌ yul ismajul ebꞌnaj Israel. Aqꞌlaxpaxo bꞌay chilow isnoqꞌ ebꞌnaj. 42 Haꞌ hunteqꞌan konhobꞌ tiꞌ nananta yehi. Ay bꞌay chilow isnoqꞌ ebꞌnaj tuꞌ yinhla ishoyanil, hak tuꞌ ye hunun konhobꞌ.

43 Hak tuꞌ yu yaqꞌnikano Komam Jahawil txꞌo txꞌotxꞌ tet ebꞌnaj Israel, haꞌ ton sunil txꞌotxꞌ yaltekano tet yichmam ebꞌnaj yet yaqꞌni bꞌinaho isbꞌi. Hak tuꞌ yu yokkano txꞌotxꞌ yu ebꞌnaj, yehayo ebꞌnaj sat txꞌotxꞌ. 44 Isyije Komam tzet yalte tet ismam ebꞌnaj; yaqꞌni Komam Jahawil aqꞌankꞌulal tet ebꞌnaj Israel sat istxꞌotxꞌ tuꞌ. Machi hunu ebꞌnaj chichiwa iskꞌul chisje yaniko howal yinh ebꞌnaj, yuto haꞌ Komam Jahawil anikaniko ebꞌnaj yul isqꞌabꞌ ebꞌnaj Israel. 45 Machi hunu Istzotiꞌ Komam Jahawil mach chiyij isbꞌa, wal xin sunil yijkano isbꞌa, hakaꞌtikꞌa yu yalnikano Komam.