Latzꞌbꞌalaxkanh chꞌen chꞌen mexhahil istiꞌ haꞌ Jordán
22
Lahwi tuꞌ, yawten yaꞌ Josué ebꞌnaj soldado Israel titna yinh yaꞌ Rubén yebꞌ ebꞌnaj titna yinh yaꞌ Gad yebꞌ yikta majan ebꞌnaj titna yinh yaꞌ Manasés. 2 Yalni yaꞌ tet ebꞌnaj: «Hex tiꞌ malahwi heyijenkano sunil tzet yalkano yaꞌ Moisés ischejabꞌ Komam Jahawil, heyijenpaxo tzet walan. 3 Maxhtikꞌa hebꞌejkano heyuxhta Israel yulbꞌal hunteqꞌan tiempo tiꞌ, masanto tinanh, wal xin heyije sunil chejbꞌanile yalkano Komam Jahawil, koDiosal. 4 Wal tinanh mayijkano isbꞌa tzet haltebꞌilkano yu Komam Dios, Jahawil, yuto sunil ebꞌnaj heyet Israelal ayxako ebꞌnaj yinh tzalahilal, yuxin meltzanhweto bꞌay aykanh hemantiado sat hetxꞌotxꞌ aqꞌbꞌilkano yu yaꞌ Moisés isqꞌaxebꞌikꞌto haꞌ Jordán. 5 Haꞌ huneꞌ tzet chinqꞌanan teyet ta cheyije sunil chejbꞌanile yebꞌ kuybꞌanile aqꞌbꞌilkano yu yaꞌ Moisés, ischejabꞌ Komam Dios, haꞌ chal yelapno chexahannhe Komam Jahawil koDiosal, kat hebꞌeybꞌalnhen tzet chal Komam, kat heyijen chejbꞌanile, kat heyok tzujno yintaj, kat hewatxꞌen tzet chala yinh sunil hekꞌul yebꞌ yinh sunil heyanma,» xhi yaꞌ Josué.6 Lahwi tuꞌ xin, isqꞌannayo yaꞌ Josué iskꞌulal Komam Dios yibꞌanh ebꞌnaj, istaqꞌlikano yaꞌ tet ebꞌnaj, ispaxto ebꞌnaj bꞌay aykanh ismantiado.
7 Haꞌ yikta majan ebꞌnaj titna yinh yaꞌ Manasés, haꞌ yaꞌ Moisés aqꞌnikano istxꞌotxꞌ ebꞌnaj bꞌey txꞌotxꞌ Basán; haxa yiktaxa majan ebꞌnaj xin haꞌ yaꞌ Josué aqꞌni istxꞌotxꞌ ebꞌnaj xol yet Israelal bꞌey isqꞌaxebꞌikꞌti haꞌ Jordán yinh yetkꞌulal bꞌay chito tzꞌayik. Ischejnitopaxo yaꞌ Josué ebꞌnaj bꞌey isqꞌaxebꞌikꞌto haꞌ Jordán bꞌay aykanh ismantiado ebꞌnaj yet lahwi isqꞌannikanayo yaꞌ iskꞌulal Komam yibꞌanh ebꞌnaj. 8 Yalni yaꞌ Josué hakaꞌ tiꞌ: «Hex tiꞌ chexmeltzo sat hetxꞌotxꞌ yebꞌ nimeta qꞌalomal, yebꞌ kaw nimankano henoqꞌ, yebꞌ chꞌen oro, yebꞌ chꞌen plata yebꞌ chꞌen bronce yebꞌ chꞌen hierro, kaw nimanpaxo xilqꞌape cheyitoj. Sunil tzet heyilo tet ebꞌnaj chichiwa iskꞌul jinh, chepohkanh teyinh yebꞌ sunil mak aykano bꞌey tuꞌ,» xhi yaꞌ Josué.
9 Hak tuꞌ yu ispohni isbꞌa ebꞌnaj titna yinh yaꞌ Rubén yebꞌ ebꞌnaj titna yinh yaꞌ Gad yebꞌ yikta majan ebꞌnaj titna yinh yaꞌ Manasés yinh hunteqꞌanxa ebꞌnaj Israel bꞌey konhobꞌ Silo ay yul ismajul txꞌotxꞌ Canaán, ispaxto ebꞌnaj sat istxꞌotxꞌ bꞌey Galaad, txꞌotxꞌ aqꞌlaxkano ismajuloj ebꞌnaj hakaꞌtikꞌa yu yalnikano Komam tet yaꞌ Moisés.
10 Haxa yet yapni ebꞌnaj Rubén yebꞌ ebꞌnaj Gad yebꞌ ebꞌnaj yikta majan ebꞌnaj Manasés bꞌey istiꞌ haꞌ Jordán, yulto ismajul txꞌotxꞌ Canaán, iswatxꞌenkanh ebꞌnaj huneꞌ niman mexha yinh chꞌen chꞌen yet xahanbꞌalil bꞌey tuꞌ. 11 Hayet yabꞌenilo hunteqꞌanxa ebꞌnaj Israel tato islatzꞌbꞌakanh ebꞌnaj chꞌen chꞌen ok mexhahil yet xahanbꞌal bꞌey ismohonal txꞌotxꞌ Canaán istiꞌ haꞌ Jordán yul ismajul hunteqꞌanxa ebꞌnaj Israel. 12 Hayet yabꞌenilo ebꞌnaj tuꞌ, iskutxbꞌaniko isbꞌa ebꞌnaj bꞌey konhobꞌ Silo, yu yahto ebꞌnaj yanoko howal yinh ebꞌnaj tuꞌ.a
13 Yajaꞌ yet yalanhto maxhto chito ebꞌnaj, ischejnito ebꞌnaj yaꞌ Finees, iskꞌahol yaꞌ sacerdote Eleazar bꞌey Galaad, bꞌay ay ebꞌnaj Rubén yebꞌ ebꞌnaj Gad yebꞌ yiktaj majan ebꞌnaj Manasés. 14 Istopaxo 10 (lahonhwanh) ebꞌnaj iswiꞌehal ebꞌnaj Israel yinta yaꞌ Finees tuꞌ, hunun ebꞌnaj tuꞌ yahaw yeko ebꞌnaj yinh hunun majan ebꞌnaj Israel.
15 Isto ebꞌnaj sunil bꞌey Galaad, bꞌay ay ebꞌnaj Rubén yebꞌ ebꞌnaj Gad yebꞌ yiktaj majan ebꞌnaj Manasés, yalni ebꞌnaj tet ebꞌnaj hakaꞌ tiꞌ:
16 —Sunil ebꞌnaj Israel iskutxbꞌako isbꞌa sata Komam Jahawil, konhischejnitijan ebꞌnaj jalnojanh teyet hakaꞌ tiꞌ:
—¿Tzet yinh maxewatxꞌe huneꞌ kaw txꞌoj yinh Komam Jahawil koDiosal, hanhonh Israelonh tiꞌ? ¿Tzet yinh xin hebꞌejkano Komam Dios, helatzꞌbꞌakanh chꞌen chꞌen ok mexhahil yet xahanbꞌal, heyaniko hebꞌa manhkꞌomal tet Komam? 17 ¿Tom hanikꞌnhe istxꞌojal yu bꞌey konhobꞌ Peor,b aytopaxiko xin jibꞌanh tinanh? Wal xin maxhto chikosajnhe kobꞌa yalanh isyaꞌtajil hunteqꞌan tuꞌ. Kaw xin txꞌiꞌal jet Israelal kam koxol hanhonh konhiskonhobꞌonh Komam tiꞌ yu huneꞌ istxꞌojal tuꞌ. 18 ¿Tom hanikꞌnhe huneꞌ tuꞌ yul hesat, yuxin chebꞌejkano Komam tinanh?
»Tato chexok manhkꞌomal tet Komam, yet hekal chitit ishowal jinh hanhonh Israelonh tiꞌ. 19 Tato chetxumu ta mach chu heyinayo hebꞌa tet Komam sat txꞌo txꞌotxꞌ hechah tiꞌ, tonhwe bꞌey txꞌotxꞌ yet Komam bꞌay aykanh istabernáculo Komam, kat hechahni hetxꞌotxꞌ koxolanh. Yajaꞌ xin mach cheyako hebꞌa manhkꞌomal tet Komam yebꞌ xin jetanh, chewatxꞌen hunxa chꞌen chꞌen mexhahil yet xahanbꞌal, yintajilo chꞌen yet Komam Jahawil, koDiosal. 20 Nawetij yet yaniko ismul naj Acán, iskꞌahol naj Zera, yet yiniti naj hunteqꞌan yalkano Komam ta chitanhtzelaxkaniloj, yu huneꞌ istxꞌojal iswatxꞌe naj tuꞌ yuxin tit ishowal Komam jinh kosunil hanhonh Israelonh tiꞌ. ¡Machnhetaj xin naj Acán kam yu ismul tuꞌ! xhi ebꞌnaj.
21 Istaqꞌwi ebꞌnaj Rubén yebꞌ ebꞌnaj Gad yebꞌ yikta majan ebꞌnaj Manasés tet ebꞌnaj iswiꞌehal ebꞌnaj Israel tuꞌ hakaꞌ tiꞌ:
22 —Komam Jahawil, isDiosal tzet chihal-lax diosal yohta Komam tato maxhtaj yu jokanh manhkꞌomal tet Komam, maka yu kopohnilo kobꞌahanh yinh Komam yuxin kowatxꞌehanh huneꞌ tiꞌ; wal xin yohta Komam, chixin yaqꞌ Komam heyohtanheꞌ. Yajaꞌ ta yu jokanh manhkꞌomal chikowatxꞌenanh istxꞌojal sata Komam, machojabꞌ cheyaqꞌ nimankꞌulal jinhanh. 23 Tato kowatxꞌehanh huneꞌ chꞌen mexha yu kohekꞌnilo kobꞌahanh yinh Komam maka yu konhusnihanh no noqꞌ yinh xahanbꞌalil, maka yu jaqꞌnihanh ixim trigo koyebꞌalqꞌabꞌojanh, maka yu jaltenanh xahanbꞌal yet aqꞌankꞌulal; yinh hakaꞌ tuꞌ yaqꞌabꞌayo Komam ishowal jibꞌanhanh.
24 »Wal xin kowatxꞌekanhanh huneꞌ chꞌen mexha tiꞌ, yuto mach chijochehanh tato chiyal heyuninal yet bꞌaqꞌinh tet juninalanh hakaꞌ tiꞌ: “Hex tiꞌ, machi heyok yinh Komam Jahawil, koDiosalanh hanhonh Israelonh tiꞌanh. 25 Haꞌ Komam Dios aniko haꞌ Jordán mohonal jinhanh yebꞌ hex Israel titna yinh yaꞌ Rubén yebꞌ hex titna yinh yaꞌ Gad, yuxin hex tiꞌ machi heyok yinh Komam Dios,” xhitaxka ebꞌnaj. Hak tuꞌ xin matxa yelapno Komam Dios yul sat juninalanh yu tzet chiyal heyuninal tuꞌ.
26 »Yuxin ok yinh konabꞌalanh kolatzꞌbꞌankanhanh chꞌen chꞌen mexhahil tiꞌ, yaj maxhtaj yu konhusnihanh xahanbꞌal, maka yu jaltenanh hunuxa xahanbꞌal tet Komam. 27 Wal xin kowatxꞌehanh huneꞌ tiꞌ yu yaqꞌni isbꞌa testigohal jinhanh yebꞌ hex, yebꞌ xol juninalanh yebꞌ heyuninal yet bꞌaqꞌinh, tato chu jinipaxayo kobꞌahanh tet Komam Dios, yebꞌ jokanh sata Komam yu konhusnihanh koxahanbꞌalanh, yebꞌ jaqꞌnihanh xahanbꞌal chitohlan komulanh, yebꞌ xahanbꞌal yet aqꞌankꞌulal; hak tuꞌ xin mach chu yalni heyuninal yet bꞌaqꞌinh hakaꞌ tiꞌ: “Hex tiꞌ machi heyok yinh Komam Dios,” xhitaxka.
28 »Yuxin kotxumanh tato ay mak chihalni jetanh hakaꞌ tuꞌ, maka tet juninalanh yet bꞌaqꞌinh, chonhtaqꞌwihanh tet hakaꞌ tiꞌ: “Ilwekꞌanabꞌi, haꞌ ebꞌyaꞌ komam ichamanh latzꞌbꞌankanh chꞌen chꞌen hakaꞌ mexha, yajaꞌ maxhtaj yu konhusnihanh no noqꞌ yinh xahanbꞌalil maka yu jaltenanh koxahanbꞌalanh, wal xin to yu yokniko yaqꞌni isbꞌa jinhanh, koxolanh yebꞌ hex,” konhchihanh tet. 29 Haꞌojabꞌ Komam Dios chikolwa jinhanh, haxinwal mach chonhokanh manhkꞌomal tet Komam, kat kopohnilo kobꞌahanh yinh Komam chikowatxꞌenkanhanh hunuxa mexha bꞌay chikonhusanh no noqꞌ xahanbꞌalil, maka bꞌay chijaltehanh sat ixim trigo koyebꞌalqꞌabꞌehalanh, maka hunuxa xahanbꞌal yibꞌanhilo ismexhahil xahanbꞌal yet Komam ayko sata istiꞌ ispultahil isTabernáculo Komam, xhi ebꞌnaj.
30 Hayet yabꞌen yaꞌ sacerdote Finees yebꞌ ebꞌnaj iswiꞌehal konhobꞌ Israel yinh tzet yal ebꞌnaj Rubén yebꞌ ebꞌnaj Gad yebꞌ yikta majan ebꞌnaj Manasés, huneꞌ tuꞌ kaw ischah iswiꞌ ebꞌnaj yinh tzet yal ebꞌnaj. 31 Yalni xin yaꞌ Finees, iskꞌahol yaꞌ sacerdote Eleazar tet ebꞌnaj Rubén, yebꞌ ebꞌnaj Gad yebꞌ ebꞌnaj Manasés hakaꞌ tiꞌ:
—Tinanh xin, chijohtanhelojanh tato ayko Komam Jahawil koxol, yuto mach ayoko yinh henabꞌal heyok manhkꞌomal tet Komam, hak tuꞌ xin machi isyaꞌtajil chiyayti Komam jibꞌanh hanhonh Israelonh tiꞌ, xhi ebꞌnaj.
32 Lahwi tuꞌ, istaqꞌli yaꞌ Finees, iskꞌahol yaꞌ sacerdote Eleazar, yebꞌ ebꞌnaj iswiꞌehal yeko yinh konhobꞌ Israel tet ebꞌnaj Rubén yebꞌ ebꞌnaj Gad; yel ebꞌnaj bꞌey Galaad tuꞌ, isto ebꞌnaj bꞌey Canaán. Yalni ebꞌnaj ispaj tet ebꞌnaj bꞌey tuꞌ yinh tzet elikoj. 33 Hayet yabꞌen ebꞌnaj yinh tzet yal ebꞌnaj tuꞌ, kaw ischah iswiꞌ ebꞌnaj, yok ebꞌnaj yanoko ismay Komam Jahawil, matxa xin tzet yal ebꞌnaj isto yanoko howal yinh ebꞌnaj yebꞌ yetanto istxꞌotxꞌ ebꞌnaj Rubén yebꞌ ebꞌnaj Gad. 34 Yaniko ebꞌnaj titna yinh yaꞌ Rubén yebꞌ ebꞌnaj titna yinh yaꞌ Gad huneꞌ bꞌihe chalni hakaꞌ tiꞌ: «Haꞌ chꞌen latzꞌbꞌabꞌilkanh mexhahil tiꞌ, haꞌ chꞌen ayko koxol, chaliloj tato haꞌ Komam Jahawil koDiosal kosunil,» xhikoj.