3. ISLAHOBꞌAL TZOTIꞌ YAL YAꞌ JOSUÉ YEBꞌ HAL-LAX CHEJBꞌANILE YINH ISKAYELAL
(23:1–24:33)
Yaꞌ Josué yaqꞌ yaꞌ kuybꞌanile tet ebꞌnaj Israel
23
Yet txꞌiꞌalxa habꞌil yaqꞌni Komam Dios xewilal tet ebꞌnaj Israel; matxa howal yaqꞌle ebꞌnaj yebꞌ ebꞌnaj ayko ishowal yinh; wal yaꞌ Josué tuꞌ kaw ichamxa yaꞌ. 2 Ischejni yaꞌ Josué tuꞌ iskutxbꞌanoko isbꞌa sunil ebꞌnaj Israel; ebꞌnaj ichamtaxa xol ebꞌnaj, yebꞌ ebꞌnaj iswiꞌehal konhobꞌ, yebꞌ ebꞌnaj juez, yebꞌ ebꞌnaj yahawil konhobꞌ, yalni yaꞌ tet ebꞌnaj hakaꞌ tiꞌ: «Hanintiꞌan kaw icham inxahan, kaw ayxa intiempohalan; 3 hex tiꞌ xaheyila tzet xaꞌiswatxꞌe Komam Jahawil koDiosal yinh hunteqꞌan konhobꞌ islinhbꞌa isbꞌa yaniko howal teyinh, haꞌ xin Komam aqꞌni howal heseleloj. 4 Xaꞌinpohkanhan sunil txꞌo txꞌotxꞌ tiꞌ hatatikꞌa heyinhbꞌal teyet hunun majan hex Israel tiꞌ, yajaꞌ machnhetaj txꞌotxꞌ xakonhqꞌoji yinh, wal xin inpohpaxkanhan txꞌotxꞌ maxhto chonhqꞌoji yinh; haꞌ ton txꞌotxꞌ chiꞌichiti yinh haꞌ Jordán masanta chiꞌapni yinh haꞌ Niman Mar yinh yetkꞌulal bꞌay chito tzꞌayik. 5 Haꞌ xin Komam Jahawil koDiosal chiꞌinilo hunteqꞌan anma ay sat txꞌotxꞌ tuꞌ tesataj, kat yokkano txꞌotxꞌ heyu hakaꞌ yu yalnikano Komam Jahawil koDiosal.6 »Aweko yinh hekꞌul heyijen yebꞌ hebꞌeybꞌalnhen sunil tzet tzꞌibꞌnhebꞌilkano yul hum yet chejbꞌanile aqꞌbꞌilkano yu yaꞌ Moisés; chu heyijeni, mach chehekꞌilo hebꞌa yinh hewatxꞌqꞌabꞌ yebꞌ yinh hemekqꞌabꞌ. 7 Mach chesomto hebꞌa yebꞌ hunteqꞌan konhobꞌ kankano texol tiꞌ, mach cheyiyo hebꞌa tet hunteqꞌan tzet chal anma tuꞌ isdiosaloj, mach chexok yijemal tet, mach chu heyaqꞌni bꞌinaho isbꞌi istioxh ebꞌnaj, mach chu heqꞌanni yinh isbꞌi istioxh ebꞌnaj. 8 Wal xin yintanhehojabꞌ Komam Jahawil koDiosal tzujan hex hakaꞌtikꞌa heye yet yalanhtokanoj masanto tinanh.
9 »Haꞌ Komam tzumbꞌenilo anma ay yul nimeta konhobꞌ tesataj yebꞌ konhobꞌ kaw aykano yip. Machi hunu mak tiꞌ islinhbꞌa isbꞌa yaniko howal teyinh masanto tinanh. 10 Hunchꞌan hexnhe tiꞌ chetzumbꞌe mil ebꞌnaj winaj, yuto haꞌ Komam Jahawil, koDiosal, chiꞌaqꞌni howal heseleloj, hakaꞌtikꞌa yu yalni teyet. 11 Kaw kam cheyil hebꞌa, ochewe Komam Jahawil, koDiosal, 12 yuto tato chehekꞌilo hebꞌa yinh Komam, kat hesomnito hebꞌa yebꞌ hunteqꞌan anma ay yul konhobꞌ aytoko texol tiꞌ, kat hemohyi yebꞌi, chehunbꞌan hebꞌa yebꞌi; 13 ta hak tuꞌ, ohtanheweloj tato mach chistzumbꞌelo Komam Jahawil koDiosal hunteqꞌan anma tuꞌ tesataj; wal xin hakaꞌ latzꞌabꞌ yehiko ebꞌnaj teyinh yunhe heyaykꞌayi, yebꞌ hakaꞌ noꞌ tzꞌum chiꞌayto istel heyichinh, yebꞌ hakaꞌ teꞌ txꞌix chito yul isbꞌaqꞌ hesat, hak tuꞌ chuko ebꞌnaj teyinh masanto chextanhkanilo sat txꞌo txꞌotxꞌ kaw kꞌul yaqꞌ Komam Jahawil koDiosal teyet bꞌay ay hex tiꞌ.
14 »Hanintiꞌan, lanhanxa yapni istzꞌayikal bꞌay chinkaman, chiwochehan cheyohtanhekanilo yinh sunil heyanma yebꞌ yinh sunil hekꞌul tato xayijkano isbꞌa sunil tzet iskꞌulal yaltekano Komam Jahawil jet, machi hunu tiꞌ chꞌekꞌto yet yijni isbꞌa. 15 Hakaꞌtikꞌa yijni isbꞌa sunil iskꞌulal yalkano Komam teyinh, hak tuꞌ chu yanipaxti Komam Jahawil koDiosal sunil isyaꞌtajil halbꞌilkano yu teyibꞌanh masanto chexistanhtzekanilo sat txꞌo txꞌotxꞌ kaw kꞌul bꞌay ay hex tiꞌ, 16 tato chemanhkꞌo istꞌinhanil yaqꞌ Komam teyet, kat heto yinta istioxh anma tiꞌ kat heyinayo hebꞌa tet, kat heyay jahno sataj, yinh hakaꞌ tuꞌ chitit ishowal Komam teyinh, kat hetanhtzelaxilo yinh haꞌmataj sat txꞌo txꞌotxꞌ kaw kꞌul yaqꞌ Komam teyet tiꞌ,» xhi yaꞌ Josué.