2 Yalni yaꞌ Josué tet konhobꞌ Israel:

—Hak tiꞌ yalni Komam Jahawil, koDiosal hanhonh Israelonh hakaꞌ tiꞌ: “Hayet kaw payat, yaꞌ Taré yebꞌ kawanh iskꞌahol, haꞌ ton yaꞌ Abraham yebꞌ naj Nacor, ebꞌyaꞌ heyichmam, haꞌ bꞌey isqꞌaxebꞌikꞌto haꞌ niman Éufrates ay ebꞌyaꞌ. Hayet ay ebꞌyaꞌ bꞌey tuꞌ, haꞌ tet hunteqꞌan tzet chihal-lax tioxhal chiyiyo isbꞌa. 3 Wawtentijan yaꞌ Abraham heyichmam bꞌey tuꞌ, winitijan yaꞌ sat txꞌotxꞌ Canaán tiꞌ, ispitzkꞌa huneꞌ iskꞌahol yaꞌ, haꞌ ton yaꞌ Isaac, ispohchakanh yuninal yaꞌ Isaac tuꞌ. 4 Waqꞌnipaxojan kawanh iskꞌahol yaꞌ Isaac tuꞌ, haꞌ ton yaꞌ Jacob yebꞌ naj Esaú. Waqꞌnihan txꞌotxꞌ chewal txꞌotxꞌ ay yul ismajul Seir tet naj Esaú tuꞌ, yajaꞌ wal yaꞌ Jacob yebꞌ yuninal, to ebꞌnaj bꞌey Egipto. 5 Inchejnitojan yaꞌ Moisés yebꞌ yaꞌ Aarón bꞌey Egipto, wanayojan isyaꞌtajil yibꞌanh anma ah Egipto masanto apni istiempohal winilojan heyichmam tuꞌ. 6 Hayet winiltijan ebꞌnaj heyichmam bꞌey Egipto, tit ebꞌnaj ah Egipto istzujuyo ebꞌnaj yebꞌ iscarruaje yebꞌ ischeh yet howal masanta bꞌey haꞌ Kajinh Mar, 7 yahwi ebꞌnaj heyichmam tuꞌ wetan, hanin Yahawilintiꞌan, wanikojan qꞌejholo xolbꞌal ebꞌnaj yebꞌ ebꞌnaj ah Egipto, wanitijan haꞌ mar tuꞌ yibꞌanh ebꞌnaj, istokano ebꞌnaj xol haꞌ. Hex tiꞌ ilbꞌilxa heyu yinh tzet wutehan ebꞌnaj Egipto.

»”Kaw xin txꞌiꞌal habꞌil ekꞌ ebꞌnaj heyichmam tuꞌ sat txꞌotxꞌ desierto. 8 Lahwi tuꞌ, winitijan ebꞌnaj yebꞌ hex sat istxꞌotxꞌ ebꞌnaj amorreo isqꞌaxebꞌikꞌto haꞌ Jordán yinh yetkꞌulal bꞌay chiꞌahilo tzꞌayik. Yaniko ebꞌnaj amorreo tuꞌ howal teyinh, yajaꞌ xin wakojan ebꞌnaj yul heqꞌabꞌ heqꞌoji yinh ebꞌnaj, yokkano istxꞌotxꞌ ebꞌnaj heyu. 9 Lahwi tuꞌ, istit naj Balac, iskꞌahol naj Zipor, isreyal ebꞌnaj moabita yanoko howal teyinh, hex Israel hex tiꞌ. Yanito naj Balac ischejabꞌ yawtenoti naj Balaam, iskꞌahol naj Beor, yunhe kexistzꞌaktiꞌnhen naj; 10 yajaꞌ mach inchahan kexistzꞌaktiꞌnhe naj, wal xin txꞌiꞌal el isqꞌan naj iskꞌulal teyibꞌanh, hak tuꞌ yu kexinkolnilojan yul isqꞌabꞌ naj. 11 Lahwi tuꞌ heqꞌaxponikꞌto yibꞌanh haꞌ Jordán, heyapni bꞌey konhobꞌ Jericó, haꞌ xin ebꞌnaj ay bꞌey Jericó tuꞌ yebꞌ ebꞌnaj amorreo, yebꞌ ebꞌnaj ferezeo, ebꞌnaj cananeo, ebꞌnaj hitita, ebꞌnaj gergeseo, ebꞌnaj heveo, ebꞌnaj jebuseo yako ebꞌnaj tuꞌ howal teyinh, yajaꞌ wakojan ebꞌnaj yul heqꞌabꞌ. 12 Ebꞌnaj kawanh rey amorreo, machi kexqꞌoji yinh ebꞌnaj yu heyespada yebꞌ yu helitꞌ, wal xin haninan watijan huneꞌ xiwkilal xol ebꞌnaj, yuxin elkanh ebꞌnaj teyet. 13 Haninan waqꞌan hetxꞌotxꞌ, maxhtaj hex xin hetzꞌun tzꞌunubꞌ sat txꞌotxꞌ, waqꞌnipaxojan konhobꞌ bꞌay kexehi, maxhtaj hex xin hewatxꞌekanh. Tinanh kaw kꞌul heyehi, cheloh sat teꞌ uva, yebꞌ teꞌ aceituna, maxhtaj hex xin hetzꞌunu,” xhi Komam.

14 »Yu sunil hunteqꞌan tiꞌ yuxin ayojabꞌ yelapno Komam Jahawil yul hesat, kat heyijen yinh tzet chal Komam yinh sunil hekꞌul yebꞌ yinh kaw isyelal. Iwelo hunteqꞌan tzet chihal-lax tioxhal texol, hunteqꞌan bꞌay yiyo isbꞌa ebꞌnaj jichmam isqꞌaxebꞌikꞌto haꞌ Éufrates yebꞌ bꞌey Egipto. 15 Yajaꞌ ta mach choche hekꞌul cheyije tzet chal Komam Jahawil xin, sikꞌlewej mak tet bꞌay wal heyijeni, ta haꞌ tet hunteqꞌan tioxh bꞌay yiyo isbꞌa heyichmam bꞌey isqꞌaxebꞌikꞌto haꞌ Éufrates, maka tet isdiosal ebꞌnaj amorreo ay bꞌey tiꞌ; wal hanintiꞌan, haꞌ tet Komam Dios Jahawil bꞌay chiwaqꞌ chejaꞌ hinbꞌahan yebꞌ wixalan yebꞌ wuninalan, xhi yaꞌ Josué.

16 Istaqꞌwi sunil konhobꞌ Israel hakaꞌ tiꞌ:

—Machojabꞌ bꞌaqꞌinh chikobꞌejkanojanh Komam Jahawil, kat jokanh koyijenojanh tet hunuxa nan diosal. 17 Yuto haꞌ Komam Jahawil haꞌ konhinilti bꞌey Egipto yebꞌ komam icham bꞌay ayonhiko chejabꞌoj. Isyeni Komam nimeta kꞌaybꞌalkꞌule jet, haꞌ Komam xin konhkꞌubꞌani yebꞌ konhkolni yinh sunil kobꞌeh bꞌayla konhekꞌi, yebꞌ yet jekꞌto yulaj konhobꞌ. 18 Haꞌ Komam Jahawil xin inipaxilo sunil ej konhobꞌ kosataj, yinipaxilo xin Komam ebꞌnaj amorreo ay bꞌey tiꞌ yet juli. Yu sunil tzet iswatxꞌe Komam tuꞌ, yuxin chijiyo kobꞌahanh tet Komam, yuto haꞌ Komam koDiosal, xhi ebꞌnaj Israel tuꞌ.

19 Yajaꞌ xin yal yaꞌ Josué hakaꞌ tiꞌ:

—Mach chu heyok heyijeno tet Komam, yuto Komam Jahawil, machi nino istxꞌojal yinh Komam; kaw chitit ishowal Komam yet cheyinayo hebꞌa tet hunuxa dios, mach chaqꞌ nimankꞌulal Komam yinh hemul. 20 Tato chebꞌejkano Komam Dios, kat heyok heyinoyo hebꞌa tet hunuxa nan diosal, kaw chiꞌok Komam kexiskajaꞌ yinh hakaꞌ tuꞌ, kat yaniti Komam isyaꞌtajil teyibꞌanh, kat kexistanhtzeniloj, waxanhka kaw niman iskꞌulal xaꞌiswatxꞌe Komam teyinh, xhi yaꞌ Josué.

21 Istaqꞌwi sunil ebꞌnaj Israel tet:

—Mach hako tuꞌ chijutehanh, wal xin haꞌ tet Komam Jahawil chikoyijehanh tzet chala, xhi ebꞌnaj.

22 Yalni yaꞌ Josué:

—Hex cheyaqꞌ hebꞌa teyinh tato hanhe tet Komam Jahawil bꞌay cheyiyo hebꞌa, xhi yaꞌ.

Istaqꞌwi ebꞌnaj:

—Hak tuꞌ ye hakaꞌ hawalni tiꞌ, xhi ebꞌnaj.

23 Yalni yaꞌ Josué:

—Ta hak tuꞌ, iwelo sunil hunteqꞌan tioxh texol, kat heyaniko heyanma yinh Komam Jahawil, koDiosal hanhonh Israelonh tiꞌ, xhi yaꞌ.

24 Istaqꞌwi ebꞌnaj Israel:

—Hanhe tet Komam Jahawil chijaqꞌ chejaꞌ kobꞌahanh, kat koyijenanh yinh tzet chala, xhi ebꞌnaj.

25 Haꞌ yinh huneꞌ tzꞌayik tuꞌ, istꞌinhbꞌakano yaꞌ Josué huneꞌ tzotiꞌ tuꞌ yebꞌ konhobꞌ Israel bꞌey konhobꞌ Siquem, yaqꞌnikano yaꞌ chejbꞌanile yebꞌ kuybꞌanile tet ebꞌnaj. 26 Istzꞌibꞌnhenkano yaꞌ Josué yul hum yet chejbꞌanile yet Komam Dios. Lahwi tuꞌ, ischejni yaꞌ bꞌal-laxoti huneꞌ chꞌen niman chꞌen, yanayo yaꞌ chꞌen yich huneꞌ teꞌ hih bꞌey yamaqꞌil Yatut Komam. 27 Yalni yaꞌ Josué tet sunil anma Israel:

—Haꞌ huneꞌ chꞌen chꞌen tiꞌ testigo jinh yinh sunil tzet mayalkano Komam Dios jet. Testigo chꞌen teyinh tato mach cheyije tzet maxetaqꞌwekano tet Komam Dios tiꞌ, xhi yaꞌ Josué.

28 Lahwi tuꞌ, ischejnito yaꞌ Josué hunun majan ebꞌnaj Israel tuꞌ sat istxꞌotxꞌ chabꞌilxa yu.

29 Lahwi tuꞌ xin, iskam yaꞌ Josué, ischejabꞌ Komam Dios, yaꞌ iskꞌahol yaꞌ Nun; 110 ishabꞌilal yaꞌ yet iskam yaꞌ. 30 Mujlax yaꞌ sat istxꞌotxꞌ ischah bꞌey konhobꞌ Timnat-sera bꞌey chewal txꞌotxꞌ, yul ismajul yaꞌ Efraín, yinh isnortehal witz Gaas. 31 Ebꞌnaj Israel isyije ebꞌnaj tzet yal Komam Jahawil yulbꞌal istiempohal ehikꞌo yaꞌ Josué, yebꞌ yet aytokꞌo ebꞌnaj ichamta winaj kantokano yinta yaꞌ Josué, ebꞌnaj ohtanhe sunil tzet iswatxꞌe Komam Dios yinh anma Israel.

32 Ismujlax isbꞌajil isnimanil yaꞌ José yiti ebꞌnaj Israel bꞌey Egipto. Ismujni ebꞌnaj bꞌey konhobꞌ Siquem, bꞌey huneꞌ txꞌotxꞌ loqꞌbꞌil yu yaꞌ Jacob yinh 100 (hokꞌal) plata tet iskꞌahol naj Hamor, ismam naj Siquem. Haꞌ huneꞌ txꞌotxꞌ tuꞌ, okkano ismajulo ebꞌnaj titna yinh yaꞌ José.

33 Iskampaxo yaꞌ Eleazar, iskꞌahol yaꞌ Aarón. Ismujlax yaꞌ bꞌey huneꞌ tzalan sat istxꞌotxꞌ yaꞌ Finees, iskꞌahol yaꞌ Eleazar, txꞌotxꞌ aqꞌlax ismajulo yaꞌ bꞌey chewal txꞌotxꞌ yinh ismajul ebꞌnaj titna yinh yaꞌ Efraín.