Pohlaxkanh txꞌotxꞌ Canaán
14
Ischah ebꞌnaj Israel txꞌotxꞌ Canaán ismajuloj, yaqꞌlaxkano txꞌotxꞌ tet ebꞌnaj Israel yu yaꞌ sacerdote Eleazar, yebꞌ yu yaꞌ Josué iskꞌahol yaꞌ Nun, yebꞌ yu ebꞌnaj yahawil yinh hunun majan ebꞌnaj Israel. 2 Pohlaxkanh txꞌotxꞌ yinh suertehal yinh ebꞌnaj bꞌalonhwanh majan Israel, yebꞌ yinh yiktaxa majan ebꞌnaj, hakaꞌ yu yalni Komam tet yaꞌ Moisés. 3 Wal ebꞌnaj Israel titna yinh yaꞌ Rubén, yebꞌ yinh yaꞌ Gad, yebꞌ yikta majan ebꞌnaj titna yinh Manasés, aqꞌlaxkano istxꞌotxꞌ ebꞌnaj yu yaꞌ Moisés bꞌey isqꞌaxebꞌikꞌto haꞌ Jordán, yajaꞌ wal ebꞌnaj Israel titna yinh yaꞌ Leví, mach istxꞌotxꞌ ebꞌnaj aqꞌlaxi. 4 Haꞌ ebꞌnaj Israel titna yinh yaꞌ José, kabꞌ majan ebꞌnaj, haꞌ ton ebꞌnaj titna yinh yaꞌ Manasés yebꞌ yinh yaꞌ Efraín, wal ebꞌnaj Levita xin machi ismajul ebꞌnaj ischah, kachannhe hunteqꞌan konhobꞌ bꞌay chiꞌeh ebꞌnaj aqꞌlax tet, yebꞌ txꞌo txꞌotxꞌ ayko yinhla ishoyanil konhobꞌ tuꞌ bꞌay chilow isnoqꞌ ebꞌnaj. 5 Hakaꞌtikꞌa yu yalni Komam Dios tet yaꞌ Moisés, hak tuꞌ yu ispohnikanh ebꞌnaj Israel txꞌo txꞌotxꞌ tuꞌ yinh.Aqꞌlax txꞌotxꞌ Hebrón ismajulo yaꞌ Caleb
6 Ebꞌnaj Israel titna yinh yaꞌ Judá, to ebꞌnaj bꞌey konhobꞌ Gilgal tzotelo tet yaꞌ Josué, yalni yaꞌ Caleb yaꞌ cenezeo, iskꞌahol naj Jefone tet yaꞌ Josué hakaꞌ tiꞌ: «Natij tzet yalkano Komam Dios tawinh yebꞌ winhan tet yaꞌ Moisés, ischejabꞌ Komam Dios yet ayonh bꞌey Cades-barnea. 7 40 (Kawinaj) habꞌil hinan yet ayonh bꞌey Cades-barnea bꞌay konhischejto yaꞌ Moisés jilaꞌ txꞌo txꞌotxꞌ tiꞌ; haxa yet komeltzo xin, intzotelan yinh kaw isyelal. 8 Wal ebꞌnaj jet Israelal hulikꞌo jinta xin, ok ebꞌnaj yaqꞌaꞌ xiwokanh iskꞌul konhobꞌ, yajaꞌ wal hinan xin, inyijehan wok tzujnojan yinh tzet yal Komam Dios, inDiosalan. 9 Yuxin yaqꞌ bꞌinaho yaꞌ Moisés isbꞌi Komam Dios, yalni yaꞌ wetan hakaꞌ tiꞌ: “Haꞌ txꞌo txꞌotxꞌ kach bꞌey habꞌeytzeꞌ tuꞌ hawet ye txꞌotxꞌ, haꞌ txꞌotxꞌ hamajul yebꞌ hawuninal yinh sunilbꞌal ej tiempo, yuto hayije hawok tzujno yinta tzet yal Komam Dios, koDiosal,” xhikano yaꞌ Moisés. 10 Haꞌ huneꞌ tiꞌ, 45 (howebꞌ yoxkꞌal) habꞌilxa yalnikano yaꞌ Moisés yu Komam Dios yet ayonh bꞌey txꞌotxꞌ desierto; yu tzet halbꞌilkano tuꞌ, yuxin itzitz intohan yu Komam, wal tinanh xin 85 (howebꞌ ishokꞌal) habꞌil inxahan; 11 yajaꞌ xin kaw ayto wipan chiwabꞌehan tinanh hakaꞌ yet konhischejniti yaꞌ Moisés kobꞌeytzeno txꞌo txꞌotxꞌ tiꞌ, kaw xin ayto wipan tinanh wekꞌan yebꞌ waqꞌni howalan hakaꞌ wipan yet yalanhtokanoj. 12 Yuxin chinqꞌanan tawet tato chawaqꞌ txꞌotxꞌ chewal txꞌotxꞌ tuꞌ wetan, hakaꞌ yu yalni Komam wetan yet hunel tuꞌ. Hataxtikꞌa tuꞌ hawabꞌenkanoj tato ebꞌnaj anaceoa ayayo sat txꞌotxꞌ, kaw xin nimej iskonhobꞌ ebꞌnaj tuꞌ, yebꞌ xin ayko chꞌen kꞌubꞌ yinhla ishoyanil; yajaꞌ xin chikawxi inkꞌulan ta chiꞌok Komam Dios wetbꞌihojan, kat iskolwa winhan winilojan ebꞌnaj sat txꞌotxꞌ, hakaꞌ yu yalni Komam,» xhi yaꞌ Caleb.
13 Hak tuꞌ yu isqꞌannikano yaꞌ Josué iskꞌulal Komam yibꞌanh yaꞌ Caleb, iskꞌahol naj Jefone, yaqꞌnikano yaꞌ Josué txꞌotxꞌ Hebrón ismajulo yaꞌ Caleb yebꞌ tet yuninal. 14 Hak tuꞌ yu yokkano txꞌotxꞌ Hebrón yu yaꞌ Caleb, iskꞌahol naj Jefone, naj cenezeo, yuto isyije yaꞌ yok tzujno yinh tzet yal Komam Dios, isDiosal anma Israel, yetto xin yaꞌ txꞌotxꞌ tinanh. 15 Haꞌ konhobꞌ Hebrón tuꞌ, Quiriat-arba tikꞌa isbꞌi yet kaw payat, yuto Arba isbꞌi huneꞌ naj kaw aykano yelapnoj ay bꞌey tuꞌ, titna naj yinh naj Anac, naj kaw nimajalkano istel.
Hato xin yet yiqꞌnikano hunun majan ebꞌnaj Israel istxꞌotxꞌ, yokkano aqꞌankꞌulal sat txꞌotxꞌ yu matxa howal.